Vɛɛ Kpɛ Mɛlɛka Nɔ yɛ Diolaŋ?

Muli Baabuiyo yɔŋgu wo

Diolaŋ la pilɛ kpe Mɛlɛka nɔ ni. A chomultaŋ ndaŋ יהוה ndaa poonyiaa diola Mɛlɛkalaŋ o Hibuluiye niŋ ni, nduyɛ ma hivi laŋ o Iŋkilisiiye niŋ aa, “Chɛhowa.”a Sanaa a wana ndoo suaa le Mɛlɛka wo Aisaya, mi Mɛlɛka dimi aa: “Ya cho Mɛlɛka Yaawɛɛ ni. Diola nilaŋ la cho laŋ ni.” (Aisaya 42:8) Diolaŋ ndaŋ la wa le bɛmbɔɔ 7,000 o Baabuila taselaŋ niŋ. Nduyɛ laŋ laa hiou a diola kɛ kɛ cheleŋ o Baabuiyo niŋ.b

Baa Chɛhowa nɔ pa diola cheleŋ?

Mi che bɛɛ mi Baabuiyo dimi maa diola kpeekpeilaŋ la pilɛ kpe Mɛlɛka nɔ ni, kɛ mbo chɔm vɛlɛ diola cheleŋ la Mɛlɛka nɔ laŋ. Diomnda cho laŋ lachi laŋ la chɔm diola cheleŋnda Mɛlɛka nɔ laŋ. Nduyɛ diolaŋ ndaŋ la chɔm wana suu o cho wo, vɛlɛ a suliŋnda ndɔlaŋ.

Diola cheleŋ	Bolle Baabuileŋ	Nyɛ la sim ndo
Hala	(None)	Diomndo hoo “Hala” fula o Aluamaikiiye niŋ. Kɛ o cho diola kpeekpeila Chɛhowalaŋ te la cho le, nduyɛ la sim le diomndo hoo “Mɛlɛka.” Mɛɛ nda wa Baabuiyo hivioo o Aluamaikiiye niŋ a sɔɔŋ maŋgalaŋ cheleŋ, ma soliŋ diomndo hoo “Hala” kpeku, le diomndo hoo “Mɛlɛka.”
Kpuluŋgumaa ɔɔ Mɛlɛka Kpou Kpou Wo	Chɛnɛsee 17:1.	Kpaayaa ndɔɔ nɔ sulaŋ te. Diomndo hoo “El Shad·daiʹ,” fula o Hibuluiye niŋ, nduyɛ o sim le diomndaŋ ndaŋ “Kpuluŋgumaa ɔɔ Mɛlɛka Kpou Kpou Wo.” Diomndo hoo cho bɛmbɔɔ le ŋɔmmɛu o Baabuilaŋ lapum niŋ.
Ya Cho Kandɔŋndo Ni, Ya Cho Mɛɛlulaŋ Ni	Sɔɔŋ Chɔɔmaŋndoŋ 1:8; 21:6; 22:13	Diomndaŋ ndaŋ “O tasoo a o mɛɛlaa,” ɔɔ “kandɔŋndo a mɛɛlulaŋ,” sim maa, Mɛlɛka kpou kpou cheleŋ cho o Chɛhowa kɔɔli le, nduyɛ o cheleŋ ve niŋ bɛɛ le. (Aisaya 43:10) Chomultaŋ ndaŋ “ya cho kandɔŋndo ni, ya cho mɛɛlulaŋ ni,” cho chomulta taselaŋ a la mɛɛlaalaŋ o Kilikiiye niŋ ni.
Wana Cho Kani Masindɛ Wo	Daaniɛɛ 7:9, 13, 22	Diolaŋ ndaŋ la chɔm maa, Chɛhowa nɔ kandɔŋ te. Kani masindɛ Chɛhowa cho. Wana o wana ɔɔ nyɛ o nyɛ ve yoomu ndu tase le. Nduyɛ le fɛɛŋ a fɛɛŋ o cho ni.—Sam 90:2.
Wana Toosiaa	Aisaya 40:28	Ndu toosiaa nyɛ o nyɛ fee ni.
Finyaa	Maatiu 6:9	Ndu ke nyɛ o nyɛ fee yoomoo ni.
Mɛlɛka	Chɛnɛsee 1:1	Wana waŋndo piɛiyo ɔɔ nyɛ waŋndo piɛiyo. Diomndo hoo ʼElo·himʹ fula o Hibuluiye niŋ. Nduyɛ o chɔm maa Chɛhowa cho Mɛlɛka bɛndoo ni, vɛlɛ maa o nɔ mbo sɔla bɛɛleŋ.
Mɛlɛka Hiou Kpou Wo	Ditɔnɔmii 10:17	Mɛlɛka hiou mɛlɛkaa kpou wo Chɛhowa cho ni. Wana tuu ndu a “mɛlɛkaa yɛ yiaa” waŋnda piɛiya le.—Aisaya 2:8.
Wana Pɛɛkaa Bɛndoo	Aisaya 30:20, 21	Ndu pɛɛku naa nyɛ bɛnda le tosaa wo ni, vɛlɛ mbo chɔm naa nɛiyo.—Aisaya 48:17, 18.
Masa Bɛndoo	Sam 149:2	Ndu ke nyɛm o toosiaa wo yoomoo ni.—Sɔɔŋ Chɔɔmaŋndoŋ 4:11.
Mɛlɛka Kɔl Kɛndɔɔ	Timoti Tasoo 1:11, NWT.	Mɛlɛka kɔl kɛndɔɔ Chɛhowa cho ni.—Sam 104:31.
Wana Muli Piɛileŋ Ndo	Sam 65:2	Mbo yaŋ nilaŋ o piɛile buɛiyaa nduaa cho o laalaŋndo choo wa.
Ya Cho Ya Ni	Ɛsɔdɔɔ 3:14	Mbo simnuŋ nyɛ o nyɛ o yeema pɛ le sabu ndɔɔ peeloo. Diomndaŋ ndaŋ “Ya Cho Ya Ni,” sim vɛlɛ le dimioo hoo “O Simnuŋ nyɛ o nyɛ,” ɔɔ “O simnuŋ nyɛ o nyɛ o yeema le simnɔŋndo wo.” Hei tɛɛsiaa nyɛ kpeekpei Chɛhowalaŋ la sim ndo.—Ɛsɔdɔɔ 3:15.
Mɛlɛka Paŋalɛiyo	Ɛsɔdɔɔ 34:14	Chɛhowa chɛl miŋ piɛi nyɛ o nyɛ cheleŋ te. Nduyɛ diomndaŋ ndaŋ, “Mɛlɛka Paŋalɛiyo” chɔm vɛlɛ maa, ndupilɛ kpe naŋ nɔ ni miŋ piɛi o cho nyɛ cheleŋ te.
Masaa le Lɛŋnde Kpou	Sɔɔŋ Chɔɔmaŋndoŋ 15:3	Masale Chɛhowaleŋ le nɔ kandɔŋ te, nduyɛ le nɔ vɛlɛ lamɛɛlu le.
Masanɔɔ	Sam 135:5	Chɛhowa cho o bɛndu mbo hiau mɛlɛka o mɛlɛka cheleŋ. O Hibuluiye niŋ diomndaŋ ndaŋ ʼA·dhohnʹ a ʼAdho·nimʹ fula ni.
Mɛlɛka Puaa Chɔuwa	Aisaya 1:9	Ndu chɔm maalikɛiyaa kpaayaa bɛnduaa nɛiyo ni. Nduyɛ diomndaŋ ndaŋ la sim vɛlɛ le diomndaŋ ndaŋ “Masanɔɔ Mɛlɛka, o nɔ kpaayaa kpou wo.”—Luomaŋnda 9:29.
Mɛlɛka Hiou Wo	Sam 47:2	Chɛhowa cho Mɛlɛka kpaaya bɛndoo le chieeŋndo kpou ni.
Mɛlɛka Diandaa	Hoosiaa 11:12	Mɛlɛka hiou diondɔɔ kpou wo Chɛhowa cho ni. Nduyɛ ndu hiou diondɔɔ a wana o wana ɔɔ nyɛ o nyɛ cheleŋ.
Wana Chuauwaa	Aisaya 64:8	Chɛhowa nɔ wana o wana vɛlɛ a lelɛŋ o lelɛŋ kpaayaa choo, mɛɛ mɛɛ wana chuauwaa nɔ kpaayaa puuloo choo yɛ.—Luomaŋnda 9:20, 21.
Wana Soli Waŋnda o Chɛleŋ Niŋndo	Aisaya 41:14	Chɛhowa cho wana soli waŋnda o chɛleŋ niŋndo ni. Ndu soli naa o chɛle hakioo a piɔmndo bɛŋgu ni sanaa a sala baŋaa Chiisu Kiliti wo.—Chɔŋ 3:16.
Pou Kpoowaa	Sam 18:2, 46	O Chɛhowa lo naŋ viaŋnuŋ ni, nduyɛ ndu manda naa ni.
Wana piŋiaa	Aisaya 45:21	Ndu piŋi naa o kpundɔɔ niŋ ni.
Wanaa Mandaa Lasaa	Sam 23:1	O buulaŋ le wanaa cho ndu piɛiyo wa.
Kpuluŋguma Bɛndoo	Chɛnɛsee 15:2	Ndu nɔ kpaaya kpou kpou wo ni. Diomndo hoo ʼAdho·naiʹ fula o Hibuluiye niŋ.
Mɛlɛka Bɛndoo	Daaniɛɛ 7:18, 27	Ndu cho Mɛlɛka hiou kpou wo ni.

Diola fondaŋndaŋ lapum o Baabuiyo niŋ

Fondaŋndaŋ lapum o Baabuiyo niŋ nɔ diola Mɛlɛkalaŋ. Kɛ laŋ bɛɛ, la cho diola kpeekpeila Chɛhowalaŋ te.

Diola fondaa	Bolle Baabuileŋ	Nyɛ la sim ndo
“Jehovah-jireh”	Chɛnɛsee 22:13, 14	“Mɛlɛka Yaawɛɛ cho yɔŋgu.”
“Jehovah-nissi”	Ɛsɔdɔɔ 17:15	“Mɛlɛka Yaawɛɛ cho beendiɛi nuu ni.” Chɛhowa cho Mɛlɛka manda wanaa nduaa, nduyɛ mbo mala nda wo ni.—Ɛsɔdɔɔ 17:13-16.
“Jehovah-shalom”	Chɔɔchiaa 6:23, 24	Chɛhowa cho Mɛlɛka “kɔl nyuloo ni.”
“Jehovah-shammah”	Isikiaa 48:35	“Mɛlɛka Yaawɛɛ o cho loŋ.”

Sabulaŋ le diola Mɛlɛkalaŋ sinaa, a laŋ soliŋndo kpeku

Chɛhowa sina maa diola ndɔlaŋ la cho la sɔvɛ, le sabu koŋ o tosa ni ma poonyiaalaŋ o waalaŋ niŋ o Baabuiyo niŋ.—Malakai 1:11.
Mi Chiisu, Po Mɛlɛkaa chɔm teleŋnda bɔɔbɔɔ mɛɛ diola Mɛlɛkalaŋ la cho la sɔvɛ yɛ. Le taamaseliiyo, mɛɛ o wa piɛileŋ o Mɛlɛka lo, mbo dimi aa: ‘maa waŋnda ke diola numndaŋ bɛɛleŋ.’—Maatiu 6:9; Chɔŋ 17:6.
Nyɛ tase wanaa sina diola Mɛlɛkalaŋ, nduyɛ ma soliŋ ndaŋ kpeku wa tosa wo cho chaŋyɛi nɔɔ a Chɛhowa ni. (Sam 9:10; Malakai 3:16) Chaŋyɛi hei mala nda ma sɔla tɔnɔɔ o diomnde mɛyaale Mɛlɛkaleŋ niŋ aa: “Wanaa kaala ya wa, chiindiaa ya I chiindiaa nda ni, nduyɛ wanaa sina ya maa, ya cho Mɛlɛka Yaawɛɛ ni wa, mi manda nda.”—Sam 91:14.
Baabuiyo dimi aa: “Nyɛm waa lende ŋ cho choo choo a lɛŋ nanuŋ, nduyɛ mi waŋnda a chua muŋ maa mɛlɛkaa nda, nduyɛ maa lekɛndɛi, mɛlɛkaa kaŋ a cho tau mi masaa kaŋ a wa tau.” (Kɔliŋtiaŋ Tasoo 8:5, 6) Baabuiyo chɔm naa kpendekele maa diola Mɛlɛkalaŋ la cho Chɛhowa ni.—Sam 83:18.

a Wanaa sinaa dɛniaa apum, a dimi Hibuluiye wa hɛnaŋ tau a mɛɛ nda hivi diola Mɛlɛkalaŋ aa, “Yaawɛɛ” yɛ.

b Diomndo hoo “Jah” vɛlɛ a mɛɛ nda soliŋ ndu kpeku yɛ cho le bɛmbɔɔ 50 o Baabuilaŋ lapum niŋ. Nduyɛ o sim le Mɛlɛka saŋgalaa.—Sɔɔŋ Chɔɔmaŋndoŋ 19:1; “American Standard Version; King James Version.”