BUŊGƐI 19

Nɛɛnɛ Cho yɛ Buɛi Cho Sakpo Nduyɛ Mbo Wa Buɛi Kɔl Kalu Wo?

Sei Chɛhowaa cho pɛɛkoo yau pɛɛku naa a Baabuiyo okɔɔ wo — Naa kpou ŋ sɔla tɔnɔɔ o nyɛm mala naa le pɛɛkoo a Mɛlɛka okɔɔ wo

Waŋnda a ŋiɔɔŋ o dialii kuumbaŋ Seiyaa Chɛhowaa choo

Tuupa mi Chiisu wu, mbo chal a buɛiyaa nduaa a hiɔɔlu kpeele ma duau baltaŋ. Diola ndalaŋ aa, Pitɛ, Chemisi, Chɔŋ a Andulu. Chiisu wa nda chɔmndo tamasi wa niŋ yɔŋnɔŋndo wo te boondii hunɔɔ ndɔɔ fuuluu pɛ o palɛi mɛɛlɛi niŋ. Mbo dimul nda aa, “I chɔm ndɔɔ nya buɛi cho sakpo, nduyɛ, mbo wa buɛi kɔl kalu wo, mɛɛ o nɔ le waa yɛ. Buɛi kɔl kaloo ndu cho buɛi masanɔ ndɔɔ handu hoo chaaŋaa nduaa buɛiya lachi wo ni le mbo wa nda nyɛ diaa nda nɔ le sɔlaa wo kioo o teleŋ nda nɔ le nyɛ diaa dioo wo.” (Maatiu 24:3, 45; Maki 13:3, 4) Chiisu wa buɛiyaa nduaa tiindaŋndo kioo maa ndu cho “masanɔ” ndaa ni, nduyɛ maa ndu cho waŋnda hɛli ni le waa buɛiyaa nduaa nyɛm nda pɛɛku a Mɛlɛka okɔɔ woŋ kioo lɔɔlɔɔ o teleŋ lamɛɛloo. Nɛɛ yaa wa yɛ niŋ buɛiyo hoo?

Buɛi kpeekpei Chiisoo, o Mɛlɛka pɔya a nyina ndɔɔ wo o cho ni. “Buɛiyo” hoo cho Dialii Kuumbaŋ Choo Seiyaa Chɛhowaa ni. Ndi cho wallo kalaŋ ni le chaaŋaa ndaa laalaŋnda kioo nyɛm mala naa le pɛɛkoo a Mɛlɛka okɔɔ wo teleŋ nda nɔ le muŋ sɔlaa wo. Ŋ nɔ tiindaŋndo o buɛiyo hoo niŋ le naa lambaŋndo nyɛdiaa kioo a teleŋ naŋ nɔ le ndu dioo wo.—Luku 12:42.

Ndu cho chiɛi Mɛlɛkaa hɔlteŋ choo ni. (Luku 12:44) Kalaŋ lusulɛiyo pila Chiisu handu buɛiyo hoo choo ni. Ndu nɔ le nyɛm ndɔŋ cho o kɔɔna Chɛhowaa lɛŋ naŋndoŋ hɔlteŋ ni. Ndu ko yɔŋgu vɛlɛ nɛi chɔmaa ni le wali dimiaa yooŋgu kɛndɛ Mɛlɛkaa, vɛlɛ a pɛɛku naŋ sɔla o kundala naalaŋ niŋndaŋ. Vɛɛ o looku yɛ naa nyɛdiaa ke a teleŋ naŋ yeema ndu le dioo wo? Yaula naŋ soliŋ kpeku o pilichioo niŋ ndaŋ ni, sɔɔŋ naŋ pɛɛku o bɔŋaŋndaŋ o kundala naalaŋ niŋndaŋ, vɛlɛ a bɔŋaŋnda bɛndaŋ kpou, “buɛi cho sakpo nduyɛ mbo wa buɛi kɔl kalu wo” toosiaa ni.

Buɛiyo hoo cho sakpo. Le yɛɛ naŋ dimi yɛ lende? Kanifuule, o feŋa tonya cho o Baabuiyo niŋndo lechoo le. Nduyɛ, o cho wali dimiaa yooŋgu kɛndɛ Chiisu ke ndu wo tosaa. Ŋ dimi vɛlɛ maa o nɔ kɔl kaloo kanifuule, o nɔ taasioo le mandaa nyɛm kɛŋ Chiisoŋ o lɛŋndeŋ choo. (Walta Wanaa Chiisuaa 10:42) Chɛhowa cho ndu salaa dɔuwɔɔ kpeekpei a hiouwɔɔ lachi cho yɔŋnɔŋndo wo. Nduyɛ, nyɛm mala naa le pɛɛkoo a Mɛlɛka okɔɔ wo bɛɛ cho tuŋ hiowɔɔ lachi a kuiyo.—Aisaya 60:22; 65:13.

Nɛɛnɛ Chiisu ndoo yulu yɛ iso le buɛiyaa nduaa nyɛm nda pɛɛku a Mɛlɛka okɔɔ woŋ waa kioo?
O nɛila kuɛɛ choo buɛiyo hoo cho yɛ sakpo nduyɛ mbo wa buɛi kɔl kalu?