BUŊGƐI PƐƐKƐI 39

Baa Diola Numndaŋ La Cho Pa o “Yau Yoomoo Niŋ”?

“Ndu o hɔl, ma poonyiaa wanaa nda aa nɔ siooŋii Mɛlɛka Yaawɛɛ ve, . . . [wa] diolaŋ o yauwo choo, le loonɔŋndo a nda.”—MAL. 3:16.

CHONDII 61 La Hiou Lachi, Nya Seiya!

SƆƆŊ KULLOŊ O BUŊGƐI HEI NIŊa

Fotueilaŋ: 1. Chɛhowa cho yau simbulaa poonyiaa. 2. Waŋnda fulaa o kɔɔlima yɛ yiaaŋ niŋ cho a kɔl kɛndɛ, ma wa kɔlaŋ diompilɛ. Nduyɛ nda kpou a teleŋnda yɛ yɛlaŋ nda wa o chieeŋndoo choo ni. — Chɔŋ o sindɔɔ niŋ, Chɛhowa bii niŋ diola waŋnda poonyiaa o “yau yoomoo niŋ” (Tofa pɛl 1-2)

1. A mɛɛ Malakai 3:16 dimi yɛ, yau teŋgeŋ kuɛɛ Chɛhowa bii yɛ niŋ poonyiaa, nduyɛ yɛɛ cho yɛ o yau koŋ niŋ?

O CHO niŋ le wɔsilaŋ waalaŋ o walaŋ niŋ chɔŋ a teleŋ Chɛhowa kandu yau teŋgeŋndo opum poonyiaa wo. Yauwo hoo nɔ diola waŋnda tau. Wana laalaŋ tase diola ndɔlaŋ la cho o yauwo hoo niŋndo cho Ebɛl ni.b (Luku 11:50, 51) Chɔŋ niŋ a teleŋ koŋ, Chɛhowa bii niŋ diola wanaa cheleŋnda poonyiaa o yauwo hoo niŋ. Nduyɛ hau, diola waŋnda o miiliɔŋndaŋ niŋ cho o yau koŋ niŋ. O Baabuiyo niŋ, yau koŋ nda veelu ni aa ‘yau loonaŋndo’ a “yau yoomoo.” O buŋgɛi hei niŋ, ŋ cho yauwo hoo veelu aa, “yau yoomoo.”—Nuawɔ Malakai 3:16; Sɔɔŋ. 3:5; 17:8.

2. Diola nɛɛ waa cho yɛ o yau yoomoo niŋ, nduyɛ yɛɛ naŋ nɔ yɛ miŋ tosa le mi diola naalaŋ la wa o yau koŋ niŋ?

² Yau teŋgeŋndo hoo nɔ diola wanaa nɔ siooŋii Chɛhowɛi, ma nɔ bɛɛleŋ le ndu, nduyɛ ma chua diola ndɔlaŋ la sɔvɛ wa. Waŋnda haa cho hunɔɔ yoomu fafɛɛŋndo sɔla. Le mi diola naalaŋ la wa o yau teŋgeŋndo hoo niŋ, ŋ nɔ miŋ nɔ chaŋyɛi kpɛɛluŋnde a Chɛhowa. Nduyɛ, chaŋyɛi hei nɔ mi i tɔlnuŋ o sala baŋaa Po ndɔɔ, Chiisu Kiliti wo choo. (Chɔŋ 3:16, 36) Naa kpou yeema mi diola naalaŋ la wa o yauwo hoo niŋ, o yɔŋ bɛɛ maa ŋ nɔ tiindaŋndo le kɔlaŋ choo choo ɔɔ le waa o chieeŋndo choo.

3-4. (a) Te diola naalaŋ la wa pɛ o yau yoomoo niŋ suŋ suŋ, baa keŋ sim ni maa ŋ cho yoomu fafɛɛŋndo sɔla? Tɛɛsiaawɔ. (b) Yɛɛ naŋ cho yɛ yaasiaa o buŋgɛi hei niŋ, a i cho lachi ve?

³ Baa hei sim ni maa, wana o wana nɔ diolaŋ o yau yoomoo hoo niŋ cho hunɔɔ yoomu fafɛɛŋndo sɔla? Ŋ tiuba miŋ sɔla mulioo le nyunaa hoo o diomnda Chɛhowa dimul Muuselaŋ niŋ. Diomndaŋ ndaŋ la cho o Ɛsɔdɔɔ 32:33 niŋ. Mi Chɛhowa dimi loŋ aa: “Wana tosa yɔŋ wɔɔŋndo wo, diola wana koŋ ya I soli o yau nuu niŋ ni.” Hei sim ni maa, Mɛlɛka tiuba mbo wɔɔsuu diola wanaa cho o yau koŋ niŋnda. I cho ko maa a kpɛkile wana tiuba ma wɔɔsuu leŋ Chɛhowa poonyiaa diola waŋnda ni. (Sɔɔŋ. 3:5) Lelaŋ, naa kpou nɔ miŋ kindiŋ kpoke, le mi diola naalaŋ la hiou lachi a waa o yau yoomoo niŋ, haaa mi Mɛlɛka poonyiaa laŋ a kpɛkile wana tiuba ma wɔɔsuu le wo.

⁴ Naapum, mi hei hiŋ dɔɔ a nyunalaŋ lapum. Le tamaseliiyo, yɛɛ Baabuiyo dimi yɛ a wanaa diola ndalaŋ la cho o yau yoomoo niŋnda, vɛlɛ a wanaa diola ndalaŋ la cho o yau yoomoo niŋ te wa okɔɔ? Teleŋ kuɛɛ wanaa diola ndalaŋ la cho lo o yau yoomoo niŋnda sɔla yɛ niŋ yoomu fafɛɛŋndo? Wanaa sɔla yɛ piɔmndo a sɔla teleŋ le pɛɛkoo a Chɛhowa okɔɔ le wa yɛ? Baa diola ndalaŋ la wa niŋ pa o yau yoomoo hoo niŋ? Ŋ cho muli nyunalaŋ ndaŋ sɔla o buŋgɛi hei niŋ, a i cho lachi ve.

DIOLA NƐƐ WAA LA CHO YƐ O YAU YOOMOO NIŊ?

5-6. (a) A mɛɛ Filipiaŋnda 4:3 dimi yɛ, ɔɔ kunda tase diola ndalaŋ la cho o yau yoomoo niŋndo? (b) Teleŋ kuɛɛ diola ndalaŋ la cho yɛ wa la poonyiaa o yau koŋ niŋ lefafɛɛŋ?

⁵ Diola nɛɛ waa la cho yɛ o yau yoomoo niŋ? Le miŋ sɔla mulioo le nyunaa hoo, ŋ cho isɔɔ a waŋnda kundalaŋ la ŋuɛɛnu okɔɔ. O kundala ŋuɛɛnu laŋ ndaŋ tɛɛŋ, apum diola ndalaŋ la cho o yau yoomoo niŋ, kɛ apum diola ndalaŋ la cho leniŋ te.

⁶ Kunda tasoo cho wanaa Chɛhowa hɛli le ma kɔ wa masaa latulu a Chiisu o choo choo niŋnda ni. Baa diola ndalaŋ la cho pa o yau yoomoo niŋ? Ei. A mɛɛ Pɔɔl dimul ‘chaaŋaa nduaa walla’ o Filipai niŋ yɛ, diola Kilisiɔŋaa pɔyaŋnda cho suŋ suŋ o yau yoomoo niŋ. Nda cho yɛ, wanaa cho lakɔ choo choo le waa masaa latulu a Chiisu wa ni. (Nuawɔ Filipiaŋnda 4:3.) Kɛ le mi diola ndalaŋ la hiou lachi a waa o yau yoomoo niŋ, a nɔ ma lo o laalaŋ ndaa choo. Te a tosa lende pɛ, diola ndalaŋ la cho wa o yau koŋ niŋ, a kpɛkile wana tiuba ma wɔɔsuu le leŋ. Hei cho yɔŋnɔŋ, tuupa ma sɔla piɔmndo ɔɔ tuupa mi nyɛpalaa bɛndoo hiŋ.—Sɔɔŋ. 7:3.

7. Te o hiŋ pɛ a teleŋ diola faŋga bɛndoo la wa niŋ la poonyiaa o yau yoomoo niŋ le fafɛɛŋndo okɔɔ, yɛɛ naŋ bii yɛ bila o Sɔɔŋ Chɔɔmaŋndoŋ 7:16, 17 niŋ?

⁷ Kunda diiŋ ndɔɔ cho faŋga bɛndoo ni. Baa diola ndalaŋ la cho niŋ pa o yau yoomoo niŋ? Ei. Baa diola ndalaŋ la cho hiouwɔɔ lachi a waa o yau koŋ niŋ te a sɔla pɛ chindaa a teleŋ chɔu Amakɛdɔŋndo? Ei. (Sɔɔŋ. 7:14) Mi Chiisu dimi maa waŋnda haa cho hunɔɔ “yoomu fafɛɛŋndo” sɔla. (Maa. 25:46) Kɛ wanaa sɔla niŋ chindaa o chɔu Amakɛdɔŋndo niŋnda sɔla niŋ yoomu fafɛɛŋndo o lepilɛ niŋ kpe le. (Chɔŋ 10:16) A nɔ niŋ diola ndalaŋ la poonyiaa o yau yoomoo niŋ a kpɛkile wana tiuba ma wɔɔsuu leŋ. A teleŋ Chiisu cho wa o Masaleŋ choo le Wɔsilaŋ Waapilɛ Wo, o “cho nda manda, okoŋ mbo yɛɛ nda o sooŋnda mɛŋma yɔŋgu yoomoo waŋ.” A teleŋ koŋ, wanaa cho nɛi chɔmaa ndɔɔ diikɔŋ, nduyɛ ma lo o laalaŋ ndaa choo wa, Chɛhowa cho diola ndalaŋ poonyiaa a kpɛkile wana tiuba ma wɔɔsuu kposoŋ te leŋ.—Nuawɔ Sɔɔŋ Chɔɔmaŋndoŋ 7:16, 17.

8. Nɛɛ waa nɔ yɛ ladio o yau yoomoo niŋ te, nduyɛ yɛɛ cho yɛ yɔŋnɔŋ a nda?

⁸ Kunda yaa ndɔɔ cho chuiŋnda ni. Nda cho hunɔɔ tambei sɔla a teleŋ chɔu Amakɛdɔŋndo ni. Diola waŋnda haa la cho o yau yoomoo niŋ te. Mi Chiisu dimi aa: “Waŋnda haa cho tambii fafɛɛŋnde sɔla.” (Maa. 25:46) Sanaa a nyina diandaa Mɛlɛkaa, mi kiilanɔɔ Pɔɔl dimul naa aa: “Masanɔ naa cho waŋnda haa yamɛi kilul. Nduyɛ nyɛpalaa nda sɔla niŋndo cho tambii fɛɛŋ fɛɛŋnde ni.” (2 Tɛsa. 1:9; 2 Pitɛ 2:9) Wanaa cho bɛɛ hakioo tosaa kpɛsɛkɛɛ le nyina Mɛlɛkaa simullo wa cho tambii fɛɛŋ fɛɛŋnde sɔla. Hei chɔm kpendekele maa, a miiŋgu lɛ niŋ yoomu le. (Maa. 12:32; Maki 3:28, 29; Hibu. 6:4-6) Ŋ tofaŋndɔ niko kundala tiɔɔŋnda cho miiŋgu yoomu o chieeŋndo choo laŋ.

WANAA CHO MIIŊGU YOOMU WA

9. A mɛɛ Walta Kiilaa 24:15 dimi yɛ, kundala tiɔɔŋnda kuɛɛ cho yɛ miiŋgu yoomu, nduyɛ teŋgeŋ kuɛɛ cho yɛ kundala tiɔɔŋndaŋ ndaŋ tɛɛŋ?

⁹ Baabuiyo soo a waŋnda kundalaŋ latiɔɔŋ okɔɔ, a cho miiŋgu yoomu le ma wa o chieeŋndo choo lefafɛɛŋ nda. Waŋnda haa cho wanaa “sandu wa” a “wanaa sendu le wa” ni. (Nuawɔ Walta Kiilaa 24:15.) “Wanaa sandu wa” cho wanaa piɛi Chɛhowa o laalaŋndo choo haaa ma sɔla piɔmndo wa ni. Nduyɛ “wanaa sendu le wa” cho wanaa piɛi Chɛhowa o laalaŋndo choo le wa ni. Nduyɛ pɛŋ, a bii yoomula ndalaŋ o nɛi chɛlaŋ a sawala Chɛhowalaŋ ndo choo le. I cho tonya maa, kundala tiɔɔŋndaŋ ndaŋ la cho miiŋgu yoomu. Kɛ baa keŋ sim ni maa, diola ndalaŋ la cho o yau yoomoo niŋ? Le mulioo sɔlaa le nyunaa hoo, ŋ yaasiaŋndɔ a kunda kɛ kɛ okɔɔ.

10. Le yɛɛ wanaa sandu wa cho yɛ miiŋgu yoomu, nduyɛ dikeŋnaŋ kuɛɛ apum sɔla yɛ niŋ? (Tofa vɛlɛ Nyunala Wanaa Nua o Yaula Naalaŋ Niŋnda a wanaa miiŋgu niŋ yoomu o chieeŋndo choo wa okɔɔ o Bandu Mɛŋgɛlaa hoo niŋ.)

¹⁰ “Wanaa sandu wa” cho kunda hiɔɔloo ni. Waŋnda haa cho miiŋgu yoomu kanifuule, tuupa ma sɔla piɔmndo, diola ndalaŋ la wa o yau yoomoo niŋ. Baa mi Chɛhowa wɔɔsuu pa diola ndalaŋ o yau koŋ niŋ mɛɛ nda sɔla piɔmndo? Sako. Kanifuule le Chɛhowa, a cho wɔ “yoomu” ndu o hɔl, nduyɛ o cho wɔ loonɔŋndo a nda okɔɔ. Baabuiyo dimi a ndu okɔɔ aa: “O cho Mɛlɛka ŋwaŋ vilɛi le, kɛ Mɛlɛka wanaa cho yoomu wa, kanifuule nda kpou cho yoomu ndu o hɔl.” (Luku 20:38) Hei sim ni maa, te wanaa sandu wa huŋ miiŋgu pɛ yoomu o chieeŋndo choo, diola ndalaŋ la cho wa o yau yoomoo niŋ mi che bɛɛ a kpɛkile wana tiuba ma wɔɔsuu leŋ la cho wa la poonyiaa ni. (Luku 14:14) Wanaa cho kaŋ miiŋgu yoomu wa, apum cho dikeŋnaŋndo sɔla, le ma wa “waŋ bɛnduaa waŋnda choo ba o ba fee o chieeŋndo choo.”—Sam 45:16.

11. Yɛɛ “wanaa sendu le wa” nɔ yɛ niŋ ma tosa le mi diola ndalaŋ la wa o yau yoomoo niŋ?

¹¹ Ŋ tofaŋndɔ kunda mɛɛlaa. “Wanaa sendu le wa.” Waŋnda haa piɛi Chɛhowa o laalaŋndo choo le kanifuule, naapum ndaa sina a sawala ndɔlaŋ okɔɔ le. Le hei, diola ndalaŋ la cho o yau yoomoo niŋ te. Kɛ Mɛlɛka cho nda miŋgi yoomu, nduyɛ mbo ke nda fondaa le ma tosa a sabu mi diola ndalaŋ la wa o yau koŋ niŋ. Waŋnda haa yeema niŋ malaa tau. Tuupa ma sɔla piɔmndo, mi apum tosa sɔɔŋ wɔɔŋndoŋ tau. Lelaŋ, a nɔ ma sɔla pɛɛkoo, le yoomula ndalaŋ biyɔɔ o nɛi chɛlaŋ a sawala Chɛhowalaŋ ndo choo. Le mi hei yɔŋnuŋ, Masale Mɛlɛkaleŋ le cho tosa a sabu, le ma sɔla pɛɛkoo chieeŋndo balɔɔ silɔ. Wali wa niŋ le waŋnda pɛɛkoo wo, cho hiouwɔɔ wali kɛ kɛ tosaŋ niŋ paandu le waŋnda pɛɛkoo o chieeŋndo choo.

Diola Nɛɛ Waa la Cho yɛ “o Yau Yoomoo Niŋ”?

Wanaa diola ndalaŋ la cho o yauwo niŋnda

Kilisiɔŋaa pɔyaŋnda. Wanaa Mɛlɛka hɛli le ma kɔ wa masaa latulu a Chiisu o choo choo niŋnda.

“Wanaa sandu wa.” Buɛiyaa Chɛhowaa vi o laalaŋ ndaa choo wa. A cho hunɔɔ miiŋgu yoomu.

Faŋga bɛndoo. Wanaa cho suŋ suŋ Chɛhowa piɛiyo ma nɔ tiindaŋndo le waa o chieeŋndo choo wa.

Wanaa diola ndalaŋ la cho o yauwo niŋ te wa

Chuiŋnda. Wanaa kɛɛ Chɛhowa diikɔŋndo, ma wa dɛnɛwɔɔŋndo tosaa, nduyɛ ma wa hakioo tosaa a nyina diandaa Mɛlɛkaa a siɛlɛi fuu wa. A cho hunɔɔ tambei sɔla a teleŋ chɔu Amakɛdɔŋndo.

“Wanaa sendu le wa.” Wanaa ndaa sɔla teleŋ tau le pɛɛkoo a Chɛhowa okɔɔ le wa. Chɛhowa cho nda hunɔɔ miŋgi yoomu, nduyɛ ma sɔla dikeŋnaŋndo le ma tosa mi diola ndalaŋ la wa o yau yoomoo niŋ.

12. (a) Nɛɛ waa cho yɛ wanaa sendu le wa pɛɛku? (b) Yɛɛ cho yɛ yɔŋnɔŋ a wanaa cho kɛɛ nyɛ nda cho pɛɛku wo dɔwɔɔ o wali niŋnda?

¹² Nɛɛ waa cho yɛ wanaa sendu le wa pɛɛku? Faŋga bɛndoo a wanaa sandaa cho miiŋgu yoomu wa. Le mi diola wanaa sendu le wa la wa o yau yoomoo niŋ, a nɔ niŋ ma taŋgul chaŋyɛi kpɛɛluŋnde a Chɛhowa, nduyɛ ma yɔŋguŋ o ndu lo. Chiisu Kiliti, nda wanaa nda cho wa o masaleŋ choo wa, cho wa tofaa mɛɛ wanaa sendu le wa duau niŋ nyɛ nda cho wa pɛɛkoo wo o wali niŋ yɛ. (Sɔɔŋ. 20:4) A teleŋ koŋ, wana o wana kɛɛ pɛ nyɛ o cho pɛɛku wo dɔwɔɔ o wali niŋ, o cho tambei sɔla o yɔŋ bɛɛ mi wana koŋ wa niŋ wɔsilaŋ 100. (Aisaya 65:20) Mi Chɛhowa nda Chiisu che nyɛ cho waŋnda o kɔltaŋ niŋndo. Lelaŋ, a chɛl niŋ mi wana o wana tosa nyɛ bɛnda le wo o chieeŋ sɛnɛiyo niŋ te.—Aisaya 11:9; 60:18; 65:25; Chɔŋ 2:25.

WAŊNDA APUM CHO FULA O SƐILA LOONAŊNDAŊ NIŊ MA SƆLA YOOMOO,NDUYƐ APUM LE MA KƆƆSA A NDA

13-14. (a) O paandoo niŋ, vɛɛ naŋ bii yɛ diomnda Chiisu dimi mi la wa o Chɔŋ 5:28, 29 niŋndaŋ bila? (b) Yɛɛ naŋ nɔ yɛ miŋ kɛsiŋ o kɔl?

¹³ Mi Chiisu suaa vɛlɛ a wanaa choo miiŋgu yoomu le ma wa o chieeŋndo choo wa okɔɔ. Le tamaseliiyo, mbo dimi aa: ‘Teleŋ cho fuuluu mi wanaa cho o sɛila loonaŋndaŋ niŋnda kpou tuei diom ndɔɔ, okoŋ ma fula. Wanaa tosa sɔɔŋ kɛndɔŋ nda cho fula ma sɔla yoomoo. Kɛ wanaa tosa sɔɔŋ wɔɔŋndoŋ nda cho fula ma kɔɔsa a nda.’ (Chɔŋ 5:28, 29) Yɛɛ Chiisu ndoo yiyaŋ yɛ?

¹⁴ O paandoo niŋ, naŋ bii diomnda Chiisu dimilaŋ ndaŋ bila maa, a nyɛ wanaa cho miiŋgu yoomu wa cho tosa okoŋ kɔɔli wo okɔɔ, Chiisu wa suɛi ni. Koŋ cho ni maa, wanaa cho miiŋgu yoomu wa apum cho sɔɔŋ kɛndɔŋ tosa, mi apum tosa ŋ wɔɔŋndoŋ. Kɛ kɛsiŋ hei o kɔl. Chiisu dimi nuaa maa, wanaa cho fula o sɛila loonaŋndaŋ niŋnda cho tosa sɔɔŋ kɛndɔŋ ɔɔ sɔɔŋ wɔɔŋndoŋ te. Kɛ naa o dimi ni maa, wanaa “tosa sɔɔŋ kɛndɔŋ nda,” a wanaa “tosa sɔɔŋ wɔɔŋndoŋ nda.” O kpeekpei niŋ, a nyɛ yɔŋnuŋ o paandoo niŋndo okɔɔ o wa suɛi ni, o cho a nyɛ cho yɔŋnɔŋ o chilaŋ niŋndo okɔɔ le o wa suɛi le. Hei chɔm kpendekele maa, nyɛ nda tosa tuupa ma sɔla piɔmndo wo. Taasioo cho o hei niŋ kanifuule, wana o wana tosa lɛ niŋ sɔɔŋ wɔɔŋndoŋ o chieeŋ sɛnɛiyo niŋ te. Mi wanaa sendu le wa tosa sɔɔŋ wɔɔŋndoŋ tuupa ma wu. Mɛɛ vɛɛ naŋ bii yɛ niŋ diomnda Chiisulaŋ bila a wanaa cho fula ma sɔla yoomoo wa vɛlɛ a wanaa cho fula ma kɔɔsa a nda wa okɔɔ?

15. Nɛɛ waa cho yɛ ‘fula ma sɔla yoomoo,’ nduyɛ le yɛɛ?

¹⁵ Wanaa sandu wa cho wanaa tosa sɔɔŋ kɛndɔŋ tuupa ma sɔla piɔmndo wa ni. Nduyɛ a cho fula ma sɔla yoomoo kanifuule, diola ndalaŋ la cho o yau yoomoo niŋ. Hei sim ni maa, wanaa tosa sɔɔŋ kɛndɔŋ mi Chɔŋ 5:29 suaa a nda okɔɔ wa, cho wanaa piliaa Walta Kiilaa 24:15 veelu aa, “wanaa sandu wa ni.” Sinapɛŋgu sɛnɛiyo hoo cho o chɛlaŋ a nyɛ dimiŋ o Luomaŋnda 6:7 niŋndo. Le dimi aa: “Wana vi wo, haki o haki cho lɛ ndu kuee le.” Le hei, mɛɛ waŋnda haa sɔla piɔmndo, mi Chɛhowa mal nda haki le sɔɔŋ wɔɔŋ nda tosa woŋ. Kɛ o cho loonɔŋ a sɔɔŋ kɛndɛŋ nda tosa teleŋ nda wa yoomu wo. (Hibu. 6:10) I cho tonya maa, waŋnda haa nɔ niŋ ma lo o laalaŋ ndaa choo le halikpeŋ mi diola ndalaŋ la lo o yau yoomoo niŋ.

16. Vɛɛ Chiisu kɔɔsa yɛ niŋ a “wanaa sendu le wa”?

¹⁶ Kɛ wanaa tosa sɔɔŋ wɔɔŋndoŋ tuupa ma sɔla piɔmndo wa yɛ? Mi che bɛɛ Chɛhowa mal nda haki le sɔɔŋ wɔɔŋ nda tosa o paandoo niŋndoŋ, kɛ a piɛi ndu o laalaŋndo choo teleŋ nda wa yoomu wo le. Le sabu koŋ, diola ndalaŋ la cho o yau yoomoo niŋ te. Mɛɛ, wanaa Chɔŋ 5:29 soo a nda okɔɔ maa ma “tosa sɔɔŋ wɔɔŋndoŋ nda” cho wanaa piliaa Walta Kiilaa 24:15 veelu aa, “wanaa sendu le wa” ni. Nda cho “fula le ma kɔɔsa a nda” ni.c Chiisu cho kɔɔsa a wanaa sendu le wa, sanaa a nda handɔɔ o tofaa bɛŋgu. (Luku 22:30) Te teleŋ tiŋ hiou pɛ, Chiisu cho sina te kaala ndalaŋ la cho pɛ la kɛndɛ, le mi diola ndalaŋ la wa o yau yoomoo niŋ. Mɛɛ mi waŋnda haa mal kaala ndala paandulaŋ, ma yɔŋguŋ o Chɛhowa lo, malaŋ diola ndalaŋ la wa o yau yoomoo niŋ.

17-18. Yɛɛ wanaa cho miiŋgu yoomu le waa o chieeŋndo choo wa nɔ yɛ niŋ ma tosa, nduyɛ a “kuɛɛla” kuɛɛ Sɔɔŋ Chɔɔmaŋndoŋ 20:12, 13 soo yɛ okɔɔ?

¹⁷ Te wanaa sandu wa a wanaa sendu le wa huŋ miiŋgu pɛ yoomu, nda kpou nɔ niŋ ma diikuŋ sawala cho wa o yaula simbulaala sɛnɛila cho wa la kumbiaa a teleŋ wɔsila waapilɛ laŋ ndo. Mi kiilanɔɔ Chɔŋ tɛɛsiaa nyɛ o che o yilaŋnde niŋndo. Mbo dimi aa: “Mi cha wanaa vi wa, wana bɛndu ni, wana pɔmbɔ ni. A wa isisi o kpeŋgbei lemasaa hɔlndɔ. Mi Mɛlɛka kumbi yaula simbulaa laŋ. Okoŋ kɔɔli, mbo kumbi yau simbulaa cheleŋ, yau yoomoo wa koŋ ni. Ma kɔɔsa wanaa vi wa a sɔɔŋ wa ŋ poonyiaa o yau koŋ niŋndoŋ, a mɛɛ kuɛɛla ndalaŋ la wa yɛ.”—Sɔɔŋ. 20:12, 13.

¹⁸ “Kuɛɛla” kuɛɛ Chiisu tofa yɛ niŋ le wanaa cho miiŋgu yoomu wa kɔɔsaa? Baa kuɛɛla ndalaŋ tuupa ma sɔla piɔmndo? Sako. Loonuŋ maa Chɛhowa mal nda haki le sɔɔŋ nda tosa tuupa ma sɔla piɔmndo woŋ. Keŋ sim ni maa, o cho nyɛ nda tosa tuupa ma sɔla piɔmndo wo le Chiisu tofa niŋ le nda kɔɔsaa le, kɛ naapum nyɛ nda cho tosa o chieeŋ sɛnɛiyo niŋndo ɔɔ mɛɛ kaala ndalaŋ la wa niŋ yɛ. Hali buɛiyaa Chɛhowaa chɔm lo lechoo wo o paandoo niŋnda bɛɛ, nɔ niŋ ma pɛɛku a Chiisu Kiliti okɔɔ, nduyɛ ma dɔu laalaŋndo o sala soliaŋ ndɔɔ niŋ. Mɛɛ Nuuwa, Saamiɛɛ, Deeve a Daaniɛɛ cho nuaa yɛ. Te waŋnda haa nɔ niŋ pɛ ma sɔla pɛɛkoo, mɛɛ yiyaŋndɔ mɛɛ kpɛ wanaa sendu le wa nɔ niŋ ma sɔla pɛɛkoo yɛ.

19. Yɛɛ cho yɛ yɔŋnɔŋ a wanaa kɛɛ niŋ Chɛhowa diikɔŋndo a teleŋ koŋ nda?

¹⁹ Yɛɛ cho yɛ yɔŋnɔŋ a wanaa kɛɛ niŋ Chɛhowa diikɔŋndo a teleŋ koŋ nda? Sɔɔŋ Chɔɔmaŋndoŋ 20:15 dimul naa nyɛ cho nda yɔŋnɔŋndo. Le dimi aa: “Wanaa diola ndalaŋ la ve la poonyiaa o yau yoomoo niŋ te wa kinɛi, ma wuu nda o fondaŋ yiŋnde wule wule bɛndoo niŋ.” A tonya, waŋnda haa cho hunɔɔ tambii fafɛɛŋnde sɔla. Lelaŋ, i cho bɔɔ suɛi sɔvɛ le miŋ tosa a sabu mi diola naalaŋ la wa o yau yoomoo niŋ, nduyɛ mi la lo loŋ.

Puaapilɛnɔɔ cho wanaa miiŋgu yoomu o Kpele Hɛnɛkiɔɔ niŋnda pɛɛkoo. O cho nyɛ chɔm lɛŋnde wo a fotueilaŋ soliŋndo kpeku le piɔm bɛndu Nɛbukanɛɛsa sɔl luaŋ mbo wa o Daaniɛɛ 2 niŋndo tɛɛsiaa. — Puaapilɛnɔɔ cho waŋnda pɛɛkoo a teleŋ Chiisu cho wa o Masaleŋ choo le Wɔsilaŋ Waa Pilɛ Wo, nduyɛ wallo hoo cho wa tosaŋndo tau a teleŋ koŋ ni (Tofa pɛl 20)

20. Wali sɔvɛ kuɛɛ tosaŋ yɛ niŋ a teleŋ Chiisu cho wa o Masaleŋ choo le Wɔsilaŋ Waa Pilɛ wo? (Tofa fotueiyo o kɔɔ.)

²⁰ Nuawɔ se teleŋ kɛndɛ bɛndu wa niŋ o Wɔsila Waa Pilɛlaŋ bɛŋgu wo! A teleŋ koŋ, wali wa niŋ le waŋnda pɛɛkoo wo cho hiouwɔɔ teleŋ kɛ kɛ o chieeŋndo choo. Kɛ a teleŋ pilɛ koŋ, Chiisu cho wa vɛlɛ kaala wanaa sandu wa a wanaa sendu le wa mɛɛndaŋndo, le chɔɔ te a cho pɛ sawala Chɛhowalaŋ diikɔŋndo. (Aisaya 26:9; Walta. 17:31) Vɛɛ wali wa niŋ le waŋnda pɛɛkoo wo tosaŋ yɛ niŋ? Buŋgɛi cho lachi ve cho naa mala le hei biyɔɔ bila. Nduyɛ ŋ cho chɔ mɛɛ naŋ chɔm balika melaa le wali sɔvɛ sɔvɛ koŋ yɛ.

CHONDII 147 Ŋ Cho Wa Yoomu Lefafɛɛŋ

a Buŋgɛi hei cho naa chɔm sinapɛŋgu sɛnɛi naŋ nɔ a diomnda Chiisu dimi mi la wa o Chɔŋ 5:28, 29 niŋndaŋ, te o hiŋ pɛ a wanaa cho fula ma sɔla yoomoo wa, vɛlɛ a wanaa cho fula ma kɔɔsa a nda wa okɔɔ. Ŋ cho pɛɛku a kundala tiɔɔŋndaŋ ndaŋ okɔɔ, vɛlɛ a wanaa cho o laŋ niŋnda.

b Chɔŋ “a kandɔŋ chieeŋndo” Mɛlɛka kandu poonyiaa diola wanaa cho tɔnɔɔ sɔla o sala baŋaa Chiisoo niŋnda o yauwo hoo niŋ ni. (Maa. 25:34; Sɔɔŋ. 17:8) Lelaŋ wana che pɛ maa, Ebɛl cho wana laalaŋ tasoo ni, le mi diola ndɔlaŋ la wa o yau yoomoo niŋ.

c O paandoo niŋ, naŋ yiyaŋ maa diomndo hoo ‘kɔɔsaa,’ sim le waŋndo yamɛi kilullo o nɛi wɔɔŋndo choo ɔɔ le ndu pɛɛsaa. Nduyɛ o kpeekpei niŋ naapum mi i wa lende. Kɛ mɛɛ Chiisu wa suɛi a waŋnda ‘kɔɔsaa’ okɔɔ, a nyɛ cheleŋ okɔɔ ndoo yiyaŋ ni. Nyɛ ndoo yiyaŋndo cho ni maa, waŋndo handɔɔ o tofaa bɛŋgu, ma che mɛɛ kaala ndɔlaŋ la cho yɛ. Ɔɔ a mɛɛ yau maKilikii pilɛ tɛɛsiaa Baabuiyo wo dimi yɛ, “waŋndo mɛɛndaŋndo nyɛkɛndɛi.”