SUƐI LEBOLII 45
Yɛɛ O Sim yɛ le Waa Yuŋyeŋ?
Mi Chiisu pɛɛku buɛiyaa nduaa maa a nɔ ma “wa . . . le chieeŋndo le.” (Chɔŋ 15:19) Hei sim ni maa a nɔ ma wa yuŋyeŋ. Koŋ cho ni, te waŋnda wa pɛ kilta lemasalaŋ ɔɔ mi chɔuwo del, a toolu wana o wana le. O kpeekpei niŋ, i cho suɛi bɛɛŋ le waa yuŋyeŋ te. Naapum ma mam naa pɛŋ le hei. Vɛɛ naŋ wa yɛ yuŋyeŋ nduyɛ miŋ chɔm lo lechoo wo o Chɛhowa Mɛlɛka lo?
1. Vɛɛ Kilisiɔŋaa tonyaa che yɛ masɛi waŋnda chieeya?
Kilisiɔŋaa tonyaa nɔ bɛɛleŋ tau le masaleŋ. A mɛɛ Chiisu dimi yɛ, miŋ “ke Siisa nyɛ cho le Siisa wo.” Koŋ cho ni, miŋ diikuŋ sawalaŋ o lɛŋndeŋ niŋ mɛɛ paawaa malɔɔ cho naa yɛ. (Maki 12:17) Baabuiyo pɛɛku naa maa Chɛhowa chɛl ni mi masɛi waŋnda chieeya wa pɔɔ o masaleŋ choo. (Luomaŋnda 13:1) Le hei, ŋ sina maa kpaaya Mɛlɛkaa hiou poloŋ a kpaaya masaa waŋnda chieeya nɔ wo. Mɛlɛka naa a Masale ndɔleŋ o choo choo niŋ naŋ tiindaŋ ni, le bahawɛila waŋnda chieeya faŋaa.
2. Vɛɛ naŋ chɔm yɛ maa ŋ cho yuŋyeŋ?
Maa Chiisu, ŋ wou laba o masale chieeŋ ndeŋ niŋ te. Teleŋ pilɛ mɛɛ waŋnda che kaamaa Chiisu tosa wo, ma yeema le ndu siiŋguuwo masaa. Kɛ, mbo kɛɛ. (Chɔŋ 6:15) Le yɛɛ? Kanifuule, mbo dimi o koŋ kɔɔli aa: “Masale nileŋ le cho masale waa chieeŋ naŋ te.” (Chɔŋ 18:36) Buɛiyaa Chiisuaa naŋ cho ni. Lelaŋ, ŋ wou ba o sɔɔŋ bɔɔbɔɔ niŋ te. Le tamaseliiyo, ŋ kue o chɔuwo le. (Nuawɔ Makal 4:3.) Ŋ nɔ bɛɛleŋ le nyɛm sim le lɛŋndeŋ ndoŋ, mɛɛ kola lelɛŋndo cho nuaa yɛ. Kɛ, ŋ biilu muŋ te. (1 Chɔŋ 5:21) Nduyɛ te waŋnda sim pɛ le masaleŋ, ŋ sim wana o wana kɔɔli le. O nɛilaŋ ndaŋ choo a la cheleŋ naŋ chɔm ni maa, Masale Mɛlɛkaleŋ kinɛi naŋ cho kɔɔli ni.
CHƆƆLU YAASIAA
Tofawɔ sɔɔŋ pum ŋ tosa ndi ikala le waa yuŋyeŋ ndo. Nduyɛ, ma che nyɛ mala num ma tosa kɛɛsiaala nɛŋi Chɛhowa kɔllo laŋ.
3. Kilisiɔŋaa tonyaa choŋnuŋ yuŋyeŋ
Chiisu nda buɛiyaa nduaa kɛsul naa tamaseliiyo le waa yuŋyeŋ. Nuawɔ Luomaŋnda 13:1, 5-7 a 1 Pitɛ 2:13, 14. Okoŋ, ma handu VIDUEIYO mi la suukaŋ o nyunalaŋ ndaŋ choo:
Le yɛɛ naŋ nɔ yɛ miŋ nɔ bɛɛleŋ le masaa waa?
O nɛila kuɛɛ choo naŋ chɔm yɛ maa ŋ nɔ bɛɛleŋ le nda?
Te chɔuwo del pɛ, mi lɛŋnde ipum dimi maa a cho laba leniŋ te. Kɛ ma toolu wanaa cho chɔulabaa wa vellaa velle. Yɛɛ kpeekpei o sim yɛ le waa yuŋyeŋ? Nuawɔ Chɔŋ 17:16. Okoŋ, ma handu VIDUEIYO mi la suukaŋ o nyunaa hoo choo:
Yɛɛ o sim yɛ le waa yuŋyeŋ?
Kɛ te o wa yɛ mi masaa waa dimul naa le tosaa nyɛ chɛlaŋ a sawa Mɛlɛkaa le wo? Nuawɔ Walta Kiilaa 5:28, 29. Okoŋ, ma handu VIDUEIYO mi la suukaŋ o nyunalaŋ ndaŋ choo:
Te sawa waŋnda chieeya chɛlaŋ a sawa Mɛlɛkaa le, sawa nɛɛnɛ naŋ nɔ yɛ miŋ diikuŋ?
O sɔɔŋ kuɛɛ choo ŋ yiyaŋ yɛ maa Kilisiɔŋnda nɔ ma kɛɛ nyɛ masaa waa dimi wo diikɔŋndo?
4. Wa yuŋyeŋ o yiyaŋ numndo niŋ a nyɛ ŋ tosa wo
Nuawɔ 1 Chɔŋ 5:21. Okoŋ, ma handu VIDUEIYO mi la suukaŋ o nyunalaŋ ndaŋ choo:
O vidueiyo hoo niŋ, le yɛɛ Ayeŋke kɛɛsiaa yɛ le kiɔɔ kunda lemasaa tooloo, a nyɛm sim le lɛŋndeŋ ndoŋ biiloo mɛɛ kola lelɛŋndo choo naa yɛ?
A yiyaŋ pa maa kɛɛsiaa kɛndɔɔ ndoo tosa ni?
Sɔɔŋ cheleŋ kuɛɛ tosa yɛ ndi ikala le miŋ lo yuŋyeŋ? Handu VIDUEIYO, okoŋ, mi la suukaŋ o nyunalaŋ ndaŋ choo:
Vɛɛ naŋ wa yɛ yuŋyeŋ te lɛŋnde bɔɔŋiaŋ pɛ le pisulta kilulaŋ ndaŋ tosaa?
Vɛɛ naŋ lo yɛ yuŋyeŋ o yɔŋ bɛɛ mi kɛɛsiaala masaa waa la chuu naa tɔnɔɔ ɔɔ mi la paaliaŋ naa?
Vɛɛ yooŋgula naŋ tuɛi o hueiye choo laŋ a chaaŋaa naa tosa yɛ ŋ ve yuŋyeŋ te?
O sɔɔŋ kuɛɛ niŋ Kilisiɔŋnɔɔ nɔ yɛ mbo wa yuŋyeŋ o yiyaŋ ndɔɔ niŋ a nyɛ o tosa wo?
TE WAŊNDO NYUNA PƐ AA: “Le yɛɛ la heelul kola lelɛŋndo baa nduyɛ mi la soli chondii lelɛŋnde le?”
Vɛɛ ŋ cho yɛ muli?
SƆƆŊ KULLOŊ
Mi Kilisiɔŋnda kindiŋ kpoke le waa yuŋyeŋ o yiyaŋnda ndalaŋ niŋ, nyɛ nda dimi wo, a o nyɛ nda tosa wo niŋ.
Nyunala miiŋgaa choo laŋ
Yɛɛ naŋ nɔ yɛ miŋ ke masaa waa?
Le yɛɛ naŋ nɔ yɛ miŋ wa yuŋyeŋ a sɔɔŋ lemasaŋ okɔɔ?
Sɔɔŋ kuɛɛ tosa yɛ ndi ikala le miŋ wa yuŋyeŋ?
CHƆƆLU SƆƆŊ PUM TOFA
Sɔɔŋ kuɛɛ naŋ nɔ yɛ miŋ chɛl le miŋ hɛluŋ naa le halikpeŋ miŋ lo yuŋyeŋ?
Vɛɛ yuŋgulaŋ la bɛɛndiaŋ yɛ le loo yuŋyeŋ tuupa mi simullo komal nda?
Luei Balaŋ o Sɔɔŋ leMasa Chieeŋndo Niŋ o Dunyaŋ Choo Le (4:25)
Chɔulabaa le lɛŋnde numndeŋ cho suɛi chuu wana tɔnɔ le. Le yɛɛ?
Te a wa pɛ kɛɛsiaalaŋ tosaa a wali ŋ nɔ ma tosa wo okɔɔ, tofawɔ ma che nyɛ mala num a ve le chieeŋndo le wo.
“Wana o Wana Cho Kalaŋndo o Ndɔɔ Siilɔŋ” (Bandu Mɛŋgɛlaa, Fuoo 15, 2006)