SUƐI LEBOLII 55
Mala Kunda Numndo
Chieeŋndo balɔɔ silɔ, wanaa cho Chɛhowa piɛiyo a nyaale wa cho o miiliɔŋndaŋ niŋ. Nduyɛ, kundala nda cho niŋndaŋ la cho o waalaŋ niŋ. A cho a nyaale tau le pɛɛku nda cho sɔlaa wo vɛlɛ a manda nda cho lebɛŋgu wo. Nduyɛ, ma yɔŋguŋ a kɔllo kpou le malaa yɔŋgoo o kundaa niŋ o nɛila bɔɔbɔɔ niŋ. Baa num bɛɛ naŋ pa kɔl a kunda ŋ cho niŋndo?
1. Ɔɔ nɛila ŋ nɔla ma yɔŋguŋ le kunda numndo malaa laŋ lapum?
Naa kpou nɔla miŋ yɔŋguŋ le malaa wanaa cho o kundaa niŋnda. Le tamaseliiyo, baa la nɔ pa bɛnduaa yuuwa a wanaa nɔla nyɛ tosa a ba nda le wa o kunda nyaa niŋ? A nɔla pa ma mala nda le kɔlaŋ o bɔŋaŋndaŋ? Ɔɔ a nɔla pa ma yɔŋguŋ le nda kpekula pɔm pɔmbɔlaŋ malaa, mɛɛ piinduulaŋ ɔɔ chiɛiyo dindioo cho nuaa yɛ? Ŋ nɔla vɛlɛ miŋ yɔŋguŋ le Toŋgo leMasaa dindioo a ndu bɛɛndiaa. (Nuawɔ Chemisi 1:27.) Wana o wana beŋ naa le sɔɔŋ muŋ tosaa le. Kɛ kaala naŋ nɔ le Mɛlɛka a puaapiliaa naa wo nyindu naa ni miŋ ‘yɔŋguŋ le muŋ tosaa a kɔllo kpou.’—Sam 110:3, NWT.
Puaapiliaa a ndepiliaa yiŋ nda nɔla vɛlɛ ma toolu kundaa o nɛila cheleŋ niŋ. Puaapiliaa komal suliŋnda Mɛlɛkalaŋ nda nɔla ma simnuŋ buɛiyaa malalaŋnda. Nduyɛ te teleŋ tiŋ hiou pɛ, ma yulu nda isu le ma wa bɛnduaa kundaa. Puaapiliaa a ndepiliaa nɔla ma chua kɔɔfaleŋ le kundaa tooloo o wali dimiaa yooŋgu kɛndɔɔ niŋ. Mi Seiyaa Chɛhowaa apum yɔŋguŋ vɛlɛ le fondaŋ nda naŋ piɛi Mɛlɛkalaŋ taŋgullo, ɔɔ le kɔlaŋ o kundala cheleŋ yeema malaa tau laŋ niŋ.
2. Vɛɛ naŋ soliŋ yɛ nyɛm naŋ sɔlaŋ kpeku le kundaa tooloo?
Ŋ nɔla miŋ ke Chɛhowa “bɛɛleŋ sanaa a nyɛm [naŋ] sulaŋ yɔŋgoo o ndu lo maa ke.” (Pulɔwaa 3:9) Miŋ naŋ kɔl tau te ŋ yɔŋgu pɛ kanii nɛi a nyɛm cheleŋ le kunda naŋ cho niŋndo tooloo, a wali dimiaa yooŋgu kɛndɛ cho tosaŋndo chieeŋndo balɔɔ silɔ wo. (Nuawɔ 2 Kɔliŋtiaŋ 9:7.) Ma soliŋ vɛlɛ toolula naalaŋ kpeku le malaa wanaa kpundɔɔ komalla. Mi waŋnda apum kɛɛsiaa le ma “kɛsi nyɛ pɔmbɔ ikɛi” le halikpeŋ ma wa tooloo yɔŋgoo. (Nuawɔ 1 Kɔliŋtiaŋ 16:2.) Ŋ nɔla miŋ dɔu toolula naalaŋ o kɔfoo niŋ naa naŋ bii bɔŋaŋndaŋ nda, ɔɔ miŋ yɔŋ ndaŋ o Intanɛtiiyo choo o donate.jw.org. Chɛhowa ke naa dioo le miŋ chɔm ndu kaalaa a nyɛm naŋ sɔlaŋ.
CHƆƆLU YAASIAA
Tofawɔ nɛilaŋ lapum la ŋ nɔla ma mala kunda numndo laŋ.
3. Ŋ soliŋ vɛlɛ nyɛm naŋ kiɔɔŋ kpeku
Chɛhowa kaala bɔɔ wanaa yɔŋgu a kɔllo kpou wa. Nduyɛ, lende koni Chiisu bɛɛ kaala nda ni. Le tamaseliiyo, mi Chiisu chandu wɛɛŋ vii pɔnɔɔ wo le toolu o yɔŋgu wo mi che bɛɛ toolu ndɔɔ ve nyɛ sanaa le. Nuawɔ Luku 21:1-4, okoŋ mi la suukaŋ o nyunalaŋ ndaŋ choo:
Baa mɛɛ miŋ toolu a nyɛsɔlaa tau malaŋ Chɛhowa naŋ kɔl?
Vɛɛ kɔllo wa yɛ Chɛhowa nda Chiisu te ŋ yɔŋgu pɛ tooloo a kɔllo kpou?
Le sinaa mɛɛ nda soliŋ toolula naalaŋ kpeku yɛ, handu VIDUEIYO. Okoŋ, mi la suukaŋ o nyunaa hoo choo:
Vɛɛ nda cho yɛ toolula naalaŋ soliŋndo kpeku le kundalaŋ malaa chieeŋndo balɔɔ silɔ?
4. Ŋ nɔla miŋ yɔŋguŋ le malaa
O sindɔɔ niŋ, mi buɛiyaa Chɛhowaa ndaa yɔŋguŋ tau le fondaŋnda lepiɛilaŋ biyɔɔ nyɛkɛndɛi. Kɛ o cho ko nyɛsɔlaa le ndoo yeemaŋ le hei tosaa le. Nuawɔ Koloniko Diiŋ Ndɔɔ 34:9-11, okoŋ mi la suukaŋ o nyunaa hoo choo:
Vɛɛ Isɔluɛinɔ kɛ kɛ ndoo mala yɛ le chiɛi Chɛhowaa biyɔɔ nyɛkɛndɛi?
Le chɔɔ mɛɛ Seiyaa Chɛhowaa hau cho tamasi wanaa masindiaa haa tolɔɔ kɔɔli yɛ, handu VIDUEIYO. Okoŋ, mi la suukaŋ o nyunalaŋ ndaŋ choo:
Le yɛɛ i cho yɛ suɛi sɔvɛ le Toŋgo naa leMasaa biyɔɔ nyɛkɛndɛi?
O nɛila kuɛɛ niŋ ŋ yɔŋguŋ yɛ le malaa?
5. Puaapiliaa nɔla ma yɔŋguŋ le chɔɔloo kalaŋndaŋ chuaa
Baabuiyo dɛɛniaa puaapiliaa maa a nɔ ma kindiŋ le suliŋndo le ma mala kundaa. Le tamaseliiyo chɔɔ a hei okɔɔ, handu VIDUEIYO. Okoŋ, mi la suukaŋ o nyunaa hoo choo:
O vidueiyo hoo niŋ, yɛɛ Luayan tosa yɛ le mbo suliŋ le chɔɔloo malaa yɔŋgoo o kunda ndɔɔ niŋ?
Baabuiyo chɔm naa suliŋnda puaapiliaa nɔ ma komal le ma simnuŋ buɛiyaa malalaŋnda a bɛnduaa kundaa wo. Nuawɔ 1 Timoti 3:1-13, okoŋ mi la suukaŋ o nyunalaŋ ndaŋ choo:
TE WAŊNDO NYUNA PƐ AA: “Kuɛɛnɛ Seiyaa Chɛhowaa sɔla yɛ kanioŋ le wali ndaa tosaa?”
Vɛɛ ŋ cho yɛ muli?
SƆƆŊ KULLOŊ
Mi Chɛhowa naŋ kɔl tau te ŋ soliŋ pɛ teleŋ naa, yoomuma naŋ, a nyɛm naŋ sɔlaŋ kpeku le kundaa tooloo.
Nyunala miiŋgaa choo laŋ
Vɛɛ naŋ soliŋ yɛ teleŋ naa, yoomuma naŋ, a nyɛm naŋ sɔlaŋ kpeku le kundaa tooloo?
Vɛɛ naŋ soliŋ yɛ nyɛm naŋ sɔlaŋ kpeku le kundaa tooloo?
O nɛila kuɛɛ niŋ num yeema yɛ ma toolu kundaa?
CHƆƆLU SƆƆŊ PUM TOFA
Yaasiaa wɔ ma sina le sabu Mɛlɛka yeema lɛ mi wanaa nduaa yɔŋgu talamaa le wo.
“Yɛɛ Baabuiyo Dimi Yɛ a Talamaa Biyɔɔ Okɔɔ?” (Kɔ o tɛɛŋgei choo)
Pɛɛku ma sina nyɛ o sim le “suliŋndo” le kalaŋndaŋ chuaa o kundaa niŋndo.
“Chɛhowa Ke Bɛnduaa Kundaa Dioo le Ma Chua Chilaŋ o Kundaa Niŋ” (Bandu Mɛŋgɛlaa, Doŋdoŋndo 2021)
Tofawɔ ma che mɛɛ Seiyaa Chɛhowaa apum chɔm kɔl simulaa, nduyɛ ma soliŋ sala le chaaŋaa ndaa laalaŋnda yaulaŋ youwo yɛ.
Yaasiaa wɔ ma sina teŋgeŋ cho naa tɛɛŋ a kaŋii cheleŋnde wo, te o hiŋ pɛ a mɛɛ naŋ sɔla kanioŋ le wali naa tooloo yɛ.
“Kuɛɛnɛ Seiyaa Chɛhowaa Sɔla yɛ Kanioŋ le Wali Ndaa Tosaa?” (Kɔ o tɛɛŋgei choo)