SUƐI LEBOLII 22
Vɛɛ Ŋ Nɔla yɛ Ma Dimul Waŋnda Yooŋgu Kɛndɔɔ?
Te a wa pɛ tonya cho o Baabuiyo niŋndo pɛɛkoo, ma dimi dɔɔ aa, ‘Wana o wana nɔ mbo tuei sɔɔŋ ya cho muŋ pɛɛkoo woŋ.’ Lekɛndɛi, wana o wana nɔ mbo tuei a muŋ okɔɔ! Kɛ, naapum siooŋnde cho num wa le waŋnda dimullo a nyɛ ŋ pɛɛku wo okɔɔ. Ŋ yaasiaa wɔ nyɛ ŋ nɔ ma tosa le siooŋnde hei soliŋndo o kɔl lo. Okoŋ, ma kandu waŋnda yooŋgu kɛndɛ cho o Baabuiyo niŋndo dimullo.
1. Vɛɛ ŋ nɔla yɛ ma dimul wanaa ŋ sina wa nyɛ ŋ cho pɛɛkoo wo?
Mi buɛiyaa Chiisuaa dimi aa: “Ŋ nɔla miŋ pɛŋgi suɛi a sɔɔŋ naŋ che, nduyɛ miŋ tuɛiyoŋ okɔɔ le.” (Walta Kiilaa 4:20) Ndaa kaala bɔɔ tonya nda pɛɛku wo. Le hei, ndaa yeema ma dimul wana o wana a ndu okɔɔ. Baa lende num bɛɛ yiyaŋ ni? Te lende i cho ni, nuuviaa nɛilaŋ le ma dimul yuŋgu numndo a chaaŋaa numnda nyɛ ŋ cho pɛɛkoo wo a lebɛɛ.—Nuawɔ Koloosiaŋnda 4:6.
Nɛila mala num ma kandu yooŋgu kɛndɔɔ dimioo laŋ
Te a wa pɛ suukaŋndo a wanayɛi numnde, chɔm ndu nyɛ ŋ pɛɛku o Baabuiyo niŋndo. A dimul ndu aa: “I pɛɛku suɛi ipum o lɔɔ hoo niŋ.”
Te chaaŋ num wa a naa pɛ ɔɔ mbo wa buulaŋndo, chɔm ndu bolle Baabuile dɛɛniaa ndu kɔllo leŋ.
Te wanaa nya tosa wallo wa nyuna num pɛ le sinaa mɛɛ sɔɔŋ cho a num yɛ, dimul nda nyɛ ŋ pɛɛku o Baabuiyo niŋ ɔɔ o bɔŋaŋndo wo.
Chɔm chaaŋaa numnda tɛɛŋgii nɛi jw.org
A dimul chaaŋaa numnda le ma sɔɔŋguu o pɛɛku numndo, ɔɔ a chɔm nda mɛɛ wana nyuna le pɛɛku Baabuiyo o jw.org yɛ.
2. Le yɛɛ o bɛnda yɛ ma kɛsi kpeleŋndo le yooŋgu kɛndɔɔ dimioo a kundaa latulu?
O cho ko wanaa buɛiyaa Chiisuaa ndaa sina wa le ndaa dimul yooŋgu kɛndɔɔ le. Mi Chiisu ‘viam nda a ŋiɔɔŋ ŋiɔɔŋnda le mi ndaa kuɛ pɔɔ ndu lachi o chiooŋ’ le yooŋgu kɛndɔɔ dimioo. (Luku 10:1) Mi wali dimiaa yooŋgu kɛndɛ Chiisu kɔɔna koŋ ndo tosa, mi wanaa bɔɔbɔɔ sɔla fondaa le yooŋgu kɛndɔɔ tueiyɔɔ. Nduyɛ, mi buɛiyaa nduaa sɔla nyaaloo tau le yooŋgu kɛndɔɔ dimioo diompilɛ. (Luku 10:17) Baa num bɛɛ cho pa kpeleŋndo kɛsi le yooŋgu kɛndɔɔ dimioo a kundaa latulu?
CHƆƆLU YAASIAA
Pɛɛku ma sina nyɛ mala num ma soliŋ siooŋnde o kɔl lo. Okoŋ, ma che nyaale wana sɔla le yooŋgu kɛndɔɔ dimioo wo.
3. Chɛhowa cho wa a num latulu
Mi waŋnda apum yeema le yooŋgu kɛndɔɔ dimioo kɛ mi siooŋnde wa nda. Kanifuule, a wa yiyaŋndo maa a chiee niŋ te ɔɔ waŋnda cho wa nda mamɔɔ.
Baa siooŋnde cho num pa le waŋnda dimullo a nyɛ ŋ pɛɛku wo okɔɔ? Le yɛɛ ŋ dimi yɛ lende?
Handu VIDUEIYO, okoŋ mi la suukaŋ o nyunaa hoo choo:
Yɛɛ mala yɛ feleŋguaa cho o vidueiyo hoo niŋnda ma soliŋ siooŋnde o kɔl?
Nuawɔ Aisaya 41:10, okoŋ mi la suukaŋ o nyunaa hoo choo:
Te siooŋnde wa num pɛ le yooŋgu kɛndɔɔ dimioo, le yɛɛ o bɛnda yɛ ma piɛi?
A sina pa?
Seiyaa Chɛhowaa a bɔɔbɔɔ ndaa yiyaŋ maa a nɔla ma dimi yooŋgu kɛndɔɔ le. Le tamaseliiyo, Siki ndoo yiyaŋ maa o ve wana sɔvɛ le. Nduyɛ siɔmbulaŋ pila ndoo nɔ ni le suɛi o waŋnda lo. Kɛ mɛɛ o kandu Baabuiyo pɛɛkoo, mbo dimi aa: “Mi che bɛɛ siɔmbulaŋ la wa ya, kɛ mi kandu waŋnda dimullo a nyɛ ya wa pɛɛkoo wo okɔɔ. Mi kɔndɔfillo bii ya kanifuule, mi nyɛ ya wa waŋnda dimullo a Baabuiyo okɔɔ wo tosa mi siŋga yiyaŋ wɔɔŋ yaa nɔ a yapila okɔɔ wo. Nduyɛ mi hei chɔɔlu laalaŋ nuu kindi o sɔɔŋ ya wa pɛɛkoo woŋ niŋ.”
4. Nɔ bɛɛleŋ le waŋnda
Te a wa pɛ yooŋgu kɛndɔɔ dimioo, o cho ko nyɛ ŋ cho dimioo wo le ŋ nɔ ma kɛsi kɔllo choo le, kɛ mɛɛ ŋ cho ndu dimi yɛ. Nuawɔ 2 Timoti 2:24 a 1 Pitɛ 3:15, okoŋ mi la suukaŋ o nyunalaŋ ndaŋ choo:
Vɛɛ ŋ duau yɛ bolii Baabuiye hei o wali niŋ, te a wa pɛ suɛi o waŋnda lo a Baabuiyo okɔɔ?
Te yuŋgu numndo ɔɔ chaaŋaa numnda kɛɛ pɛ le laalaŋndo nyɛ ŋ cho nda dimullo wo, yɛɛ ŋ nɔ yɛ ma tosa? Yɛɛ ŋ nɔ yɛ ma tosa le?
Le yɛɛ o bɛnda yɛ ma soliŋ nyunala taasilaŋ kpeku, nduyɛ a beŋ waŋnda le ma laalaŋ nyɛ ŋ cho nda dimullo wo le?
5. Yooŋgu kɛndɔɔ dimioo tosa ma wa a nyaale
Mi Chɛhowa ke Chiisu wallo le yooŋgu kɛndɔɔ dimioo. Vɛɛ Chiisu ndoo che yɛ wallo hoo? Nuawɔ Chɔŋ 4:34, okoŋ mi la suukaŋ o nyunalaŋ ndaŋ choo:
Nyɛdiaa kɛndɔɔ dioo tosa miŋ wa yoomu, nduyɛ miŋ wa a kɔl kɛndɛ. Le yɛɛ Chiisu tuu yɛ hɛnaŋ Mɛlɛkaa tosaa, mɛɛ yooŋgu kɛndɔɔ dimioo cho naa yɛ a nyɛdiaa?
Nyaale kuɛɛ ŋ yiyaŋ yɛ maa miŋ sɔla o yooŋgu kɛndɔɔ dimioo niŋ?
Nyɛ mala numndo
Te a kuɛ pɛ o bɔŋaŋ naŋ bii o lɔɔ tɛɛŋ ndo, yaŋ nilaŋ le ma sina mɛɛ ŋ kandu yooŋgu kɛndɔɔ dimioo yɛ.
Kindiŋ ma simnuŋ sukuunɔɔ o bɔŋaŋ naŋ bii o lɔɔ tɛɛŋ ndo. Sɔɔŋ nda cho num wa kioo le yɔŋgoo woŋ nɔla miŋ bɛɛndiaa num, le wanaa cheleŋ dimullo nyɛ ŋ laalaŋ ndo.
Suɛi lebolii kɛ kɛ o yauwo hoo niŋ nɔ fondaa hoo, “Te Waŋndo Dimi pɛ Aa” ɔɔ “Te Waŋndo Nyuna pɛ Aa.” Bɛɛndiaa mulilaŋ le nyunala cho loŋ ndaŋ ɔɔ sɔɔŋ waŋnda dimi lepum ndoŋ.
TE WAŊNDO DIMI PƐ AA: “A lo dɛ. A cho kɛndɛ?”
Vɛɛ ŋ soliŋ yɛ teleŋndo hoo kpeku le wana koŋ dimullo nyɛ ŋ pɛɛku o Baabuiyo niŋndo?
SƆƆŊ KULLOŊ
Mi yooŋgu kɛndɔɔ dimioo chuu naa nyaaloo tau. Nduyɛ pɛŋ, siooŋii nɔ mii wa num le kandɔɔ le kanifuule, sɔɔŋ cho wa tɛtɛlɛ.
Nyunala miiŋgaa choo laŋ
Le yɛɛ ŋ nɔ yɛ ma dimul waŋnda yooŋgu kɛndɔɔ?
Vɛɛ ŋ tosa yɛ keŋ o nɛi lebɛɛ niŋ?
Vɛɛ ŋ nɔla yɛ ma soliŋ siooŋnde o kɔl le yooŋgu kɛndɔɔ dimioo?
CHƆƆLU SƆƆŊ PUM TOFA
Tofawɔ nɛilaŋ la hiɔɔlu la ŋ nɔla ma dimi yooŋgu kɛndɔɔ a yau ŋ kua jw.org wo.
Pɛɛku a suliŋndaŋ la hiɔɔlu okɔɔ, la mala num le yooŋgu kɛndɔɔ dimioo wo.
“A Cho Pa o Bɛɛndiaŋ le Ma Simnuŋ Wana Yɔɔyaa Ŋwaŋnda Chiee?” (Bandu Mɛŋgɛlaa, Tapioo 2020)
Tofawɔ mɛɛ tamaseliiyo o Baabuiyo niŋ ke naa kɔl simulaa le yooŋgu kɛndɔɔ dimioo yɛ, o yɔŋ bɛɛ aa chuaambuaa naŋ cho ni.
Veelu wɔ diomndaŋ ma che mɛɛ ŋ dimul wanaa num aa sina Chɛhowa le wa yooŋgu kɛndɔɔ yɛ.
“Wanayaŋ Naŋ Sina Chɛhowa le Woŋ Yooŋgu Kɛndɔɔ Dimullo” (Bandu Mɛŋgɛlaa, Fuoo 15, 2014)