SUƐI LEBOLII 23
Yiŋɔɔ Nɔla Mbo Chuu Wana Tɔnɔɔ Tau!
Mi Chiisu dimi maa Kilisiɔŋnda nɔ ma sɔla yiŋɔɔ. (Nuawɔ Maatiu 28:19, 20.) Kɛ yɛɛ cho yɛ yiŋɔɔ? Nduyɛ, yɛɛ waŋndo nɔ yɛ mbo tosa le mbo suliŋ le yiŋɔɔ?
1. Yɛɛ cho yɛ yiŋɔɔ?
Diomndo hoo “yiŋɔɔ,” o fula o diom maKilikiiyo niŋ, nduyɛ o sim le mɔɔwaa nyɔɔ o mɛŋndaŋ bɛŋgu. Mɛɛ Chiisu kuɛ le yiŋɔɔ, ma mɔɔwa ndu o Pioo Chɔɔdaŋ niŋ. Okoŋ, mbo “fula o mɛŋndaŋ bɛŋgu.” (Maki 1:9, 10) O nɛi pilɛ koŋ choo Kilisiɔŋaa tonyaa bɛɛ sɔla yiŋɔɔ ni. A wa nda pɛ yiŋɔɔ, ma mɔɔwa nda o mɛŋndaŋ bɛŋgu.
2. Te waŋndo sɔla pɛ yiŋɔɔ, yɛɛnɛ o chɔm yɛ koŋ?
Te waŋndo sɔla pɛ yiŋɔɔ, o chɔm maa o yɔŋgu yoomu ndɔɔ o Chɛhowa Mɛlɛka lo. Vɛɛ waŋndo yɔŋguŋ yɛ o Mɛlɛka lo? Tuupa mi waŋndo yiŋ, mbo dimul Chɛhowa o piɛileŋ niŋ maa o yeema mbo piɛi ndu lefafɛɛŋ. Mbo chua buŋgɛi o ndu lo maa ndupilɛ kpe o cho piɛi ni, nduyɛ maa hɛnaŋ ndɔɔ tosaa cho wa nyɛ tasoo o yoomu ndɔɔ niŋ ni. Mbo kɛɛsiaa le “mbo kɛɛ ndupila, nduyɛ . . . mbo tol” pɛɛkula Chiisulaŋ kɔɔli a tamasi ndɔɔ. (Maatiu 16:24) Te o yɔŋguŋ pɛ mbo sɔla yiŋɔɔ, mi chaŋyɛi kpɛɛluŋnde luɛi nda tɛɛŋ nda Chɛhowa, vɛlɛ a chaaŋaa nduaa laalaŋnda.
3. Yɛɛ waŋndo nɔ yɛ mbo tosa tuupa mbo sɔla yiŋɔɔ?
Tuupa ma sɔla yiŋɔɔ, a nɔ fɛŋ ma pɛɛku a Chɛhowa okɔɔ, nduyɛ ma dɔu tiindaŋndo o ndu niŋ. (Nuawɔ Hibuluiya 11:6.) Mɛɛ kɔl kalu numndo vɛlɛ a tiindaŋ numndo kiandu fau, lende koni ŋ chɔɔlu Chɛhowa kaala ni. Kaalaa hoo nɔla mbo nyindu num ma kandu waŋnda dimullo nyɛ ŋ pɛɛku a ndu okɔɔ wo, nduyɛ ma bii sawala ndɔlaŋ. (2 Timoti 4:2; 1 Chɔŋ 5:3) Te waŋndo wa pɛ “sɔɔŋ nɛŋi [Chɛhowa] kɔllo woŋ” tosaa, o nɔla mbo yɔŋguŋ o Mɛlɛka lo, nduyɛ mbo sɔla yiŋɔɔ.—Koloosiaŋnda 1:9, 10.a
CHƆƆLU YAASIAA
Tofawɔ ma che nyɛ naŋ pɛɛku o yiŋɔɔ Chiisu wo niŋndo, vɛlɛ a nyɛ waŋndo nɔ mbo tosa tuupa mbo sɔla yiŋɔɔ wo.
4. Nyɛ naŋ pɛɛku o yiŋɔɔ Chiisu wo niŋndo
Nuawɔ Maatiu 3:13-17, le chɔɔloo sinaa a yiŋɔɔ Chiisu wo okɔɔ. Okoŋ, mi la suukaŋ o nyunalaŋ ndaŋ choo:
Baa chɛlɛkpɔɔ Chiisu wa ni ma yiŋ ndu?
Vɛɛ nda yiŋ yɛ ndu? Baa mɛŋndaŋ nda fasaŋiaa ndu ni?
A teleŋ Chiisu yiŋndo o kandu wali teŋgeŋ Mɛlɛka ke ndu le tosaa o chieeŋndo choo wo ni. Nuawɔ Luku 3:21-23 a Chɔŋ 6:38, okoŋ mi la suukaŋ o nyunaa hoo choo:
Mɛɛ Chiisu sɔla yiŋɔɔ, wali yɛɛ ndoo kɛsi yɛ nyɛ tase o yoomu ndɔɔ niŋ?
5. A nɔla ma suliŋ le yiŋɔɔ sɔlaa
Te ŋ tuei pɛ a yɔŋgɔŋndo vɛlɛ a yiŋɔɔ okɔɔ, o tasela ndɔ, miŋ che ndi suɛi kala le tosaa. Kɛ te a kindiŋ pɛ ma tosa hiouwɔɔ lachioo, teleŋ cho fuuluu ma nɔ kɔllo le kɛɛsiaa sɔvɛ koŋ tosaa. Le sinaa nyɛ mala waŋnda apum ma tosa kɛɛsiaa hoo wo, handu VIDUEIYO.
Nuawɔ Chɔŋ 17:3 a Chemisi 1:5, okoŋ mi la suukaŋ o nyunaa hoo choo:
Yɛɛ mala yɛ waŋndo mbo suliŋ le yiŋɔɔ?
Yɔŋgɔŋndo cho ni, Chɛhowa dimullo o piɛileŋ niŋ maa ŋ yeema miŋ piɛi ndu lefafɛɛŋ
O paale naŋ yiŋ ndeŋ choo naŋ chɔm waŋnda o hɔl ni kpendekele maa, ŋ yɔŋguŋ o Chɛhowa lo
6. Te ŋ yiŋ pɛ, ŋ luɛi o yuŋgu Chɛhowaa niŋ
Chɛhowa nɔ yuŋgu cho ndu piɛiyo o diompilɔɔ niŋ chieeŋndo balɔɔ silɔ wo. Lelaŋ te ŋ yiŋ pɛ, naa bɛɛ luɛi o yuŋgoo hoo niŋ. Mi che bɛɛ ŋ fula o fondaŋnda yɛ yɛ laŋ nduyɛ ŋ nɔ kɔɔlima pilɛ le, kɛ laalaŋnda pilɛ laŋ kpe naŋ nɔ ni. Nduyɛ ba o ba naŋ wa, o sawala pilɛ laŋ bɛŋgu kpe naŋ cho ni. Nuawɔ Sam 25:14 a 1 Pitɛ 2:17, okoŋ mi la suukaŋ o nyunaa hoo choo:
Te waŋndo sɔla pɛ yiŋɔɔ, vɛɛ chaŋyɛi nduɛi wa yɛ a Chɛhowa vɛlɛ a wanaa cho ndu piɛiyo wa?
TE WAŊNDO DIMI PƐ AA: “Ya I suliŋ ndɔ le yiŋɔɔ le.”
Te lende num bɛɛ yiyaŋ ni, a laalaŋ pa maa a nɔla wɔ ma komal kpeleŋndo le yiŋɔɔ sɔlaa?
SƆƆŊ KULLOŊ
Mi Chiisu pɛɛku maa Kilisiɔŋnda nɔ ma sɔla yiŋɔɔ. Tuupa mi waŋndo yiŋ, o nɔ fɛŋ mbo nɔ tiindaŋ kala kalaa o Chɛhowa niŋ, mbo bii sawala ndɔlaŋ, nduyɛ mbo yɔŋguŋ o ndu lo.
Nyunala miiŋgaa choo laŋ
Yɛɛ cho yɛ yiŋɔɔ, nduyɛ le yɛɛ o cho yɛ nyɛ sɔvɛ?
Vɛɛ yɔŋgɔŋndo a yiŋɔɔ chiɛɛliaŋ yɛ?
Sɔɔŋ kuɛɛ waŋndo nɔ yɛ mbo tosa tuupa mbo yɔŋguŋ o Chɛhowa lo nduyɛ mbo sɔla yiŋɔɔ?
CHƆƆLU SƆƆŊ PUM TOFA
Pɛɛku ma sina nyɛ yiŋɔɔ sim ndo a nyɛ o sim te wo.
Yaasiaa wɔ ma che sɔɔŋ waŋndo nɔ mbo tosa tuupa mbo yiŋ ndo.
“Vɛɛ Kaalaa a Balikaa Nɔɔ le Chɛhowa Mala yɛ Num Ma Yiŋ?” (Bandu Mɛŋgɛlaa, Fuoo 2020)
Veelu wɔ diomndaŋ ma che nyɛ mala po pilɛ mbo tosa kɛɛsiaa a ba ndɔ le yiŋɔɔ sɔlaa wo.
“Ndaa Yeema Ya Mi Che Tonyaa a Ba Ni” (Bandu Mɛŋgɛlaa, Doŋdoŋndo 1, 2013)
Tofawɔ ma che mɛɛ yiŋɔɔ cho nyɛ sɔvɛ yɛ vɛlɛ a mɛɛ ŋ bɛɛndiaŋ le ndu yɛ.
a Te waŋndo ndoo yiŋ niŋ pɛ paandu o kaŋnde cheleŋ, o nɔ vɛlɛ mbo sɔla yiŋɔɔ. Le yɛɛ? Kanifuule, kaaŋnde leŋ le pɛɛku ndu tonya cho o Baabuiyo niŋndo le.—Nuawɔ Walta Kiilaa 19:1-5 a Suɛi Lebolii 13.