Wa Chaaŋ O Mɛlɛka Lefafɛɛŋ!

Sɛmbɔɔ yeemaŋ ni le chaŋyɛi biyɔɔ, sɛmbɔɔ yeemaŋ vɛlɛ ni le ndi mandaa. A cho salaa sɔla tau le sɛmbɛ ŋ dɔu le simnɔŋndo a loo chaaŋ o Mɛlɛka wo. Mi Chiisu dimul wanaa ndaa laalaŋ o ndu niŋ nda aa, “Tonya cho koŋ a Mɛlɛka okɔɔ wo . . . o baŋa nya.” (Chɔŋ 8:​32) Yɛɛ koŋ sim yɛ?

A tuɛi hɛnɛkɛyɛi yeela suŋ suŋ. A sɔla niŋ baŋaa o pɛɛkula lachoowalaŋ vɛlɛ a choola Setana cho hau pɛŋgɛlaa laŋ. Waŋnda hau o miiliɔŋndaŋ niŋ a sina Chɛhowa le wa nɔ tiindaŋ te, kɛ num a sɔla niŋ baŋaa. (Luomaŋnda 8:​22) Chaaŋaa Mɛlɛkaa a cho a baŋaa o “siooŋii piɔmnde” niŋ.—Hibuluiya 2:​14, 15.

A cho tueiyɔɔ hɛnɛkɛyɛi yeela o chieeŋ sɛnɛi Mɛlɛkaa niŋ. Nuawɔ se hɛnɛkɛyɛi bɛndu ŋ tuɛi niŋ yeela o chilaŋ niŋnde! O Kpele Hɛnɛkiɔɔ niŋ o leŋndeŋ choo, chɔu ve lɛ niŋ te, naa ve lɛ niŋ te, vɛlɛ sawa tɛɛmbaa ve lɛ niŋ te. Hɛnɛkɛyɛi wa niŋ kanifondole, pɛŋndeŋ a yiaŋ ma cho lɛ wa le. Yuuwɛi a piɔmndo bɛɛ chuu niŋ. Siooŋndoŋ, nyɛ kindilaa, vɛlɛ a kɔɔsɔ lakafaa. Baabuiyo dimi a Mɛlɛka okɔɔ aa, “Mbo ke nya nyɛ diaa. Mbo tosa mi la sɔla kɔl kɛndɔɔ.”—Walta Wanaa Chiisuaa 14:​17.

Chaaŋaa Mɛlɛkaa cho wa achal lefafɛɛŋ. Wana o wana cho chaŋyɛi Mɛlɛkɛi nuuviaa, cho hunɔɔ yoomu fafɛɛŋndo sɔla. (Luomaŋnda 6:​23) Yiyaŋndɔ nyɛ yoomu nɔ lamɛɛlu le wo sim le numndo!

A cho nɔ teleŋndo le tosaa sɔɔŋ siaama. Naapum ma yeema pɛɛkoo mɛɛ wana pisul a nyɛm chaaŋ yɛ. Kɛlɛŋgaa naapum ma yeema pɛɛkoo le fotueilaŋ toosiaa, naapum ma yeema waa kaapidɛinɔɔ. A yeema le pɛɛkoo a visiaa okɔɔ ɔɔ naapum a tɔlɔɔlaŋ. O kpeekpei niŋ a yeema kelaa le ma che waŋchieeya a lɛŋii yɛ yɛi. Yoomu fafɛɛŋndo sɔlaa tosa mi sɔɔŋ muŋ kpou yɔŋnuŋ!

A cho nɔ teleŋndo le chaŋyaŋ sɔlaa tau. Waa achal lefafɛɛŋ tosa niŋ kpeekpei ni ma sina acheleŋnda tau a simnuŋ niŋ chaaŋaa Mɛlɛkaa wa. A sina niŋ nyɛm nda chaa tosaa woŋ vɛlɛ a suliŋnda ndala kɛndɛlaŋ, nduyɛ nda bɛɛ simnuŋ niŋ chaaŋaa numnda. Num cho nda kaala mi nda bɛɛ kaala num. (Kɔliŋtiaŋ Tasoo 13:​8) Sɔlaa yoomu nɔ lamɛɛlu wo o ke num teleŋndo le ma wa chaaŋ o wana o wana fee o lɛŋndeŋ choo! O kɛndɔɔ kpou cho ni, chaŋyɛi numnde nya Chɛhowa cho hiouwɔɔ lachi a hindɔɔ ikala kala lefafɛɛŋ. Maa wa chaaŋ o Mɛlɛka lefafɛɛŋ fɔ!