SUƐI LEBOLII 54
Wali Yɛɛ “Buɛi Cho Sakpo, Nduyɛ Mbo Wa Buɛi Taasi Wo” Nɔ Yɛ?
Chiisu cho kunda leKilisiɔŋndo bolleŋ ni. (Ɛfisiaŋnda 5:23) Hau, Chiisu cho o choo choo niŋ mbo wa “buɛi cho sakpo, nduyɛ mbo wa buɛi taasi wo” soliŋndo kpeku, le tol kɔɔliaa nduaa cho o lɛŋndeŋ choo wa nɛiyo chɔmndo. (Nuawɔ Maatiu 24:45.) Chiisu yulu ‘buɛiyo’ hoo isu ni, mbo ke ndu kpaayaa o tiŋ. Kɛ a koŋ kpou, o nɔ mbo diikuŋ Chiisu, nduyɛ mbo tosa wallo le pɔmbuaa Kiliti wa. Nɛɛnɛ cho yɛ buɛiyo hoo? Vɛɛ o cho yɛ naa mandaa?
1. Nɛɛnɛ cho yɛ “buɛi cho sakpo, nduyɛ mbo wa buɛi taasi wo”?
Chɔŋ o sindɔɔ niŋ mbo huŋ bii a hau, lepum mi Chɛhowa soliŋ waŋndo opilɛ kpeku le wanaa nduaa nɛi chɔmaa kioo. Lepum yɛ, mbo hɛli puaa kunda le hei tosaa. (Malakai 2:7; Hibuluiya 1:1) Mɛɛ Chiisu vi, kiilaa a bɛnduaa wa Chulusalɛm nda wa niŋ chilaŋ chuaa ni. (Walta Kiilaa 15:2) Hau bɛɛ, lende koni i cho ni. Bɛnduaa kundaa apum cho chilaŋ chuaa wanaa Mɛlɛkaa tɛɛŋ ni. Nda naŋ veelu ni aa Dialii Kuumbaŋ Choo Seiyaa Chɛhowaa. Nda toosiaa nyɛm naŋ pɛɛku a Mɛlɛka okɔɔ woŋ ni. Nduyɛ, nda yɔŋgu nɛi chɔmaa le wali dimiaa yooŋgu kɛndɔɔ ni. Nda cho “buɛi cho sakpo, nduyɛ mbo wa buɛi taasi [Chiisu] handu buɛiyaa nduaa lachi” wo ni. (Maatiu 24:45a) Wanaa cho o Dialii Kuumbaŋ Choo Ve choo wa kpou, Kilisiɔŋaa sɔla pɔyaŋndo a nyina Mɛlɛkaa wa nda cho ni. Te a vi pɛ, a nɔ tiindaŋndo le kɔlaŋ waa o choo choo niŋ nda Chiisu waa latulu.
2. Nyɛdiaa suu kuɛɛ buɛi cho sakpo wo toosiaa yɛ?
Mi Chiisu dimi maa buɛi cho sakpo wo cho wa ‘chaaŋaa nduaa [Kilisiɔŋnda] . . . nyɛdiaa kioo a teleŋndo kinɛi.’ (Maatiu 24:45b) Mi nyɛdiaa naŋ dia wo luei naa yoomuaŋ, nduyɛ mbo tosa miŋ wa kɛndiaa. O nɛi pilɛ koŋ choo, Diom Mɛlɛkaa bɛɛ nyɛdiaa o cho ni. Kanifuule, sila cho leniŋndo luei naa yoomuaŋ ni le hiouwɔɔ lachi a Chɛhowa piɛiyo, a wali Chiisu ke naa wo tosaa. (1 Timoti 4:6) Mi buɛi cho sakpo wo ke naa nyɛdiaa hoo o bɔŋaŋnda naŋ bii o lɔɔ bɛŋgu laŋ, bɔŋaŋnda ibuŋgalaŋ, a o bɔŋaŋnda bɛndaŋ. Ma toosiaa vɛlɛ yaula tɔlnuŋ o Baabuiyo choo laŋ a vidueilaŋ, le naa malaa miŋ sina hɛnaŋ Mɛlɛkaa, nduyɛ miŋ nɔ chaŋyɛi kpɛɛluŋnde a ndu.
CHƆƆLU YAASIAA
Tofawɔ ma che le sabu naŋ yeema “buɛi cho sakpo, nduyɛ mbo wa buɛi taasi wo,” ɔɔ Dialii Kuumbaŋ Choo Ve.
Dialii Kuumbaŋ Choo Ve ke Seiyaa Chɛhowaa chieeŋndo balɔɔ silɔ nyɛm nda pɛɛku a Mɛlɛka okɔɔ woŋ, nɛi chɔmaa, a mala nda yeema wo ni
3. Wanaa Chɛhowaa nɔ ma wa a kɔɔnaa
O nɛi chɔmaa Chiisu wo bɛŋgu, mi Dialii Kuumbaŋ Choo Ve kɔɔna wali Seiyaa Chɛhowaa. Kɛɛsiaa suu waa nuaa wa Kilisiɔŋaa tasiaa tɛɛŋ o wɔsiŋ kɛmɛ tasoŋ niŋ. Handu VIDUEIYO.
Nuawɔ 1 Kɔliŋtiaŋ 14:33, 40, okoŋ mi la suukaŋ o nyunaa hoo choo:
Vɛɛ bolle Baabuileŋ ndeŋ le chɔm yɛ maa Chɛhowa yeema mi Seiyaa nduaa wa a kɔɔnaa?
4. Buɛi cho sakpo wo kɔɔna wali naa dimiaa yooŋgu kɛndɔɔ ni
Yooŋgu kɛndɔɔ dimioo wa wali Kilisiɔŋaa tasiaa ndaa kɛsi kɔllo choo wo ni. Nuawɔ Walta Kiilaa 8:14, 25, okoŋ mi la suukaŋ o nyunalaŋ ndaŋ choo:
O Kilisiɔŋaa tasiaa tɛɛŋ, nɛɛ yaa ndaa yɔŋgu yɛ nɛi chɔmaa le wali dimiaa yooŋgu kɛndɔɔ?
Yɛɛ Pitɛ nda Chɔŋ tosa yɛ mɛɛ kiilaa a piliaa vem nda?
Wali dimiaa yooŋgu kɛndɔɔ cho wali sɔvɛ Dialii Kuumbaŋ Choo Ve kɔɔna wo ni. Handu VIDUEIYO.
Mi Chiisu chɔm mɛɛ wali dimiaa yooŋgu kɛndɔɔ cho nyɛ sɔvɛ yɛ. Nuawɔ Maki 13:10, okoŋ mi la suukaŋ o nyunalaŋ ndaŋ choo:
Le yɛɛ wali dimiaa yooŋgu kɛndɔɔ cho yɛ nyɛ sɔvɛ le Dialii Kuumbaŋ Choo Ve?
Le yɛɛ “buɛi cho sakpo, nduyɛ mbo wa buɛi taasi wo” yeemaŋ yɛ le wallo hoo tosaa chieeŋndo balɔɔ silɔ?
5. Buɛi cho sakpo wo ke naa nɛi chɔmaa ni
Chieeŋndo balɔɔ silɔ, Dialii Kuumbaŋ Choo Ve ke Kilisiɔŋnda nɛi chɔmaa ni. Yɛɛ mala yɛ nda le sinaa nɛi chɔmaa nda nɔ ma yɔŋgu wo? Tofawɔ ma che mɛɛ dialii kuumbaŋ choo ve o wɔsiŋ kɛmɛ tasoŋ niŋ ndaa tosa hei yɛ. Nuawɔ Walta Kiilaa 15:1, 2, okoŋ mi la suukaŋ o nyunalaŋ ndaŋ choo:
Suɛi kuɛɛ ndii hiŋ yɛ a sɛɛŋgiaŋndo Kilisiɔŋaa tasiaa tɛɛŋ?
O nɛɛ yaa lo Pɔɔl, Banabaa, a wanaa cheleŋ kuɛ yɛ le ndi toosiaa?
Nuawɔ Walta Kiilaa 15:12-18, 23-29, okoŋ mi la suukaŋ o nyunaa hoo choo:
Tuupa mi dialii kuumbaŋ choo ve o wɔsiŋ kɛmɛ tasoŋ niŋ ndii tosa kɛɛsiaa, yɛɛnɛ fɛŋ ndaa yaasiaa yɛ le sinaa yiyaŋ Mɛlɛkaa?—Tofa sɔɔŋ 12, 15, a 28.
Nuawɔ Walta Kiilaa 15:30, 31 a 16:4, 5, okoŋ mi la suukaŋ o nyunalaŋ ndaŋ choo:
Yɛɛ Kilisiɔŋnda o wɔsiŋ kɛmɛ tasoŋ niŋ ndaa tosa yɛ, te dialii kuumbaŋ choo ve ndii yɔŋgu nɛi chɔmaa pɛ?
Vɛɛ Chɛhowa dɔu yɛ nda sala le diikɔŋ ndaa?
Nuawɔ 2 Timoti 3:16 a Chemisi 1:5, okoŋ mi la suukaŋ o nyunaa hoo choo:
Hau, te Dialii Kuumbaŋ Choo Ve wa pɛ kɛɛsiaa tosaa, kuɛɛ nda nua yɛ le nɛi chɔmaa?
TE WAŊNDO DIMI PƐ AA: “Dialii Kuumbaŋ Choo Ve bɛɛ waŋnda chieeya nda cho ni. Lelaŋ Mɛlɛka naŋ nɔ ni miŋ yaŋ nilaŋ, kɛ o cho nda le.”
Yɛɛ ke yɛ num laalaŋndo maa Chiisu cho Dialii Kuumbaŋ Choo Ve nɛi chɔmaa kioo ni?
SƆƆŊ KULLOŊ
Dialii Kuumbaŋ Choo Ve cho “buɛi cho sakpo, nduyɛ mbo wa buɛi taasi” Chiisu yulu isu wo ni. Chieeŋndo balɔɔ silɔ, nda ke Kilisiɔŋnda nɛi chɔmaa ni a nyɛm mala nda le pɛɛkoo a Mɛlɛka okɔɔ woŋ.
Nyunala miiŋgaa choo laŋ
Nɛɛnɛ yulu yɛ “buɛi cho sakpo, nduyɛ mbo wa buɛi taasi wo” isu?
Vɛɛ Dialii Kuumbaŋ Choo Ve cho yɛ naa mandaa?
A laalaŋ pa maa Dialii Kuumbaŋ Choo Ve cho “buɛi cho sakpo, nduyɛ mbo wa buɛi taasi wo” ni?
CHƆƆLU SƆƆŊ PUM TOFA
Tofawɔ ma che mɛɛ Dialii Kuumbaŋ Choo Ve cho i kɔɔnaa le wali ndɔɔ tosaa yɛ.
“Yɛɛ Cho yɛ Dialii Kuumbaŋ Choo Seiyaa Chɛhowaa?” (Kɔ o tɛɛŋgei choo)
Pɛɛku ma sina mɛɛ Dialii Kuumbaŋ Choo Ve cho kindiŋndo o nɛi o nɛi niŋ, le miŋ sɔla pɛɛkula tonyalaŋ yɛ.
Vɛɛ Dialii Kuumbaŋ Choo Ve che yɛ wali Chiisu ke nda le tosaa wo?
Vɛɛ bɔŋaŋnda naŋ bii o lɔɔ bɛŋgu laŋ, a bɔŋaŋnda bɛŋndaŋ la chɔm yɛ maa, Chɛhowa cho Dialii Kuumbaŋ Choo Ve nɛi chɔmaa kioo ni?