Nyunala Wanaa Nua o Yaula Naalaŋ Niŋnda

Yɛɛ Pɔɔl ndoo yiyaŋ yɛ mɛɛ o dimi aa: “I cho niŋ machuaa maa wana vilɛi. Nduyɛ, sawalaŋ la tosa keŋ ni”?—Kalee. 2:​19.

Mi Pɔɔl poonyiaa aa: “I cho niŋ machuaa maa wana vilɛi. Nduyɛ, sawalaŋ la tosa keŋ ni . . . , le hali kpeŋ mi I kuɛ o nɛi Mɛlɛka hɛnaŋ ya mi kuɛ wo choo.”—Kalee. 2:​19.

Nyɛ Pɔɔl poonyiaa hoo wo chɛlaŋ a suɛi kulii kpeekpei o kindilal kundalaŋ o tanda Kaleesiaa wo niŋndo. Kilisiɔŋnda apum o tanda koŋ niŋ wa wanaa pɛɛkaa lachoowaa nilaŋ yaŋɔɔ. Wanaa pɛɛkaa haa wa waŋnda pɛɛkoo maa le mi waŋndo sɔla pioŋɔɔ, mɛɛ mi ndoo diikuŋ sawala Mɛlɛka ndoo ke Muuse laŋ, taama taama sawa wa a hivi chiɛi kɔɔlioo okɔɔ wo. Kɛ Pɔɔl ndoo sina maa Kilisiɔŋnda ve lɛ o sawala laŋ bɛŋgu le. Le hei, mbo chɔm sabula bɔɔbɔɔ le nyɛ pɛɛku koŋ ve tonya le wo. Nduyɛ, mbo luei puaapiliaa nduaa yoomuaŋ le halikpeŋ ma kindi tiindaŋ ndaa o sala baŋaa Chiisu Kilitioo niŋ.—Kalee. 2:​4; 5:​2.

Baabuiyo chɔm kpendekele maa te waŋndo vi pɛ, o sina lɛ nyɛ o nyɛ le. (Ikili. 9:​5) Lelaŋ mɛɛ Pɔɔl dimi aa: ‘I cho niŋ machuaa maa wana vilɛi, nduyɛ maa sawalaŋ la tosa keŋ ni,’ nyɛ ndoo yiyaŋndo wa ni maa, sawala Mɛlɛka ndoo ke Muuselaŋ laa nɔ lɛ ndu kpaaya choo le. Le hei, ndoo nɔ tiindaŋndo maa sanaa a sala baŋaa Kilitioo, ndoo tiuba mbo ‘kuɛ o nɛi Mɛlɛka hɛnaŋndo choo.’

Mɛɛ Pɔɔl sina sawalaŋ ndaŋ, mbo siŋga yiyaŋ ndɔɔ. Vɛɛ hei yɔŋnuŋ yɛ? Mbo tɛɛsiaa aa: “O cho le sawala naalaŋ chuaa le Mɛlɛka siiŋguu waŋndo wana sakpo ndu o hɔl te. Maa le tiindaŋndo dɔwɔɔ o Chiisu Kiliti niŋ Mɛlɛka siiŋguu waŋndo wana sakpo ndu o hɔl ni.” (Kalee. 2:​16) I cho tonya maa, sawalaŋ la wa la sɔvɛ kanifuule, mi Pɔɔl tɛɛsial Kaleesiaŋnda aa: “Le sabu Mɛlɛka yɔŋgu sawalaŋ ndo cho ni maa le mi waŋnda chieeya sina pɛŋgu nyɛ cho yɔŋ wɔɔŋndo Mɛlɛka o hɔl lo. Mɛlɛka dɔu sawalaŋ, kɛ le mbo lo o koŋ mi wana nɔ le fulaa o pulale Ebilahamndeŋ choo wo o hiŋ.” (Kalee. 3:​19) Mi sawalaŋ la chɔm kpendekele maa, waŋnda chieeya ndaa tiuba ma bii laŋ o nɛi walaŋndo choo le. Nduyɛ maa wana walaŋndo ndoo nɔ ni mbo huŋ soliŋ yoomu ndɔɔ sala. Mi la chɔm vɛlɛ maa, “o pulale Ebilahamndeŋ choo” Kiliti fula niŋ ni. Nduyɛ maa te ŋ dɔu pɛ tiindaŋ naa o sala baŋaa Chiisu Kilitioo niŋ, ŋ cho simnɔŋ wanaa sakpo Mɛlɛka o hɔl. (Kalee. 3:​24) Le sabu Pɔɔl ndoo dimi heiyo cho ni maa, sawalaŋ la mala ndu ni mbo duau tiindaŋndo o Chiisu niŋ. Le hei, mi che bɛɛ mi ‘sawalaŋ la tosa mbo wa maa wana vilɛi,’ kɛ ndoo tiuba mbo ‘kuɛ o nɛi Mɛlɛka hɛnaŋndo choo.’ Sawalaŋ laa nɔ lɛ Pɔɔl kpaaya choo le. Kɛ Mɛlɛka ndoo nɔ niŋ ndu kpaayaa choo ni.

Mi Pɔɔl dimi nyɛ pilɔɔ hoo kpe o yau o poonyial Luomaŋnda wo niŋ. Mbo dimi aa: “A sawala naa ŋ wa laŋ o ba o biyɔɔ niŋ ndaŋ okɔɔ, naa naa ŋ cho niŋ machuaa maa wanaa vi niŋ.” (Luomaŋ. 7:​6) O bolle Baabuileŋ ndeŋ niŋ a o Kaleesiaŋnda 2:​19 niŋ, Pɔɔl ve dimi naa maa piɔm o sɔla wo cho ko mɛɛ waŋndo tɛɛmbuu naa sawa Mɛlɛkaa yɛ le. Kɛ dimioo o wa ni maa, ndu a chaaŋaa nduaa Kilisiɔŋnda ve lɛ o sawala laŋ bɛŋgu le. Nduyɛ maa tiindaŋ nda dɔu o sala baŋaa Kilitioo niŋndo tosa hei ni.