“Mɛlɛka Naa, Ndu Pilɛ Kpe Cho Mɛlɛka Yaawɛɛ Ni”

1, 2. (a) Le yɛɛ waŋnda sina yɛ tau nyɛ Ditɔnɔmii 6:4 dimi wo? (b) Le yɛɛ Muuse ndoo soo yɛ diomndaŋ ndaŋ?

O CHO niŋ le wɔsilaŋ kɛmɛ, Chuuwa soliŋ niŋ diomndaŋ o Ditɔnɔmii 6:​4 kpeku maa piɛile teŋgeŋ. A veelu piɛile leŋ aa “Shema,” leŋ le cho yɛ diom tasoo o bolle Baabuile leŋ niŋ o Hibuluiye niŋ ni. Chuuwaa siaama soliŋ piɛileŋ kpeku idii a ichɔl le chɔmndo kaala yiŋgoloŋ nda nɔ le Mɛlɛka wo.

² Diomndaŋ la cho o suɛi mɛɛlɛi Muuse yɔŋgu o kaaleŋ Isɔluɛi lo wo niŋ. O wɔsi 1473 tuupa mi Chiisu vialuŋ, kaaleŋ Isɔluɛi le wa o lɛŋnde Mowabileŋ niŋ. A wa niŋ a bɛɛndiaŋ le taŋɔɔ Pioo Chɔɔdaŋ le Lɛŋnde Mɛyaaleŋ biyɔɔ. (Ditɔnɔmii 6:​1) Mi Muuse kua a waŋnda haa le wɔsilaŋ 40, nduyɛ ndoo yeema nda ma wa a dialuŋ kala le halikpeŋ ma nɔla simulta wa nda komallo laŋ. Ndaa nɔ vɛlɛ ma dɔu tiindaŋndo o Chɛhowa Mɛlɛka niŋ. Nduyɛ ma chɔm sandei o ndu lo. Le hei, diomnda mɛɛla la Muuselaŋ la dɛɛniaa nda ni maa a tosa lende kinɛi. Mɛɛ o soo a Sawala Tɔlaŋ a sawala cheleŋnda fula o Chɛhowa lo laŋ okɔɔ, mi Muuse loonuŋ waŋnda o kala kala a nyɛ naŋ nua o Ditɔnɔmii 6:​4, 5 niŋndo. (Nuawɔ.)

3. Nyunala kuɛɛ naŋ nɔ yɛ le yaasiaa o buŋgɛi hei niŋ?

³ Mi Isɔluɛiya sina maa Chɛhowa Mɛlɛka ndaa “ndu pilɛ kpe” cho ni. Mɛlɛkaa opilɛ kpe Isɔluɛiyaa laalaŋnda ndaa piɛi ni, Mɛlɛka finyaa ndaa mamaa. Mɛɛ le yɛɛ Muuse loonuŋ yɛ niko nda maa Chɛhowa Mɛlɛka ndaa “ndu pilɛ kpe cho ni.” Vɛɛ tonya koŋ velaŋ yɛ a Mɛlɛka kaalaa a kɔl numndo, yoomu numndo, a kpaaya numndo kpou? Nduyɛ vɛɛ nyɛ dimiŋ o Ditɔnɔmii 6:​4, 5 niŋndo piiliaŋ yɛ naa hau?

CHƐHOWA MƐLƐKA NAA “NDU PILƐ KPE” CHO NI

4, 5. (a) Ɔɔ tɛɛsiaa opilɛ le dimioo hoo Chɛhowa “ndu pilɛ kpe” cho ni? (b) Vɛɛ Chɛhowa cho yɛ teŋgeŋ a mɛlɛkaa cheleŋ waŋnda piɛiya?

⁴ O Nɔ Velaŋ Te. Dimioo hoo “ndu pilɛ kpe” sim ni maa Chɛhowa nɔ velaŋ te, nduyɛ wana o wana cho mbo siimaŋ a ndu le. Le yɛɛ Muuse soliŋ yɛ diomnda laŋ kpeku? O cho naa maa kindiŋ te o wa le pɛɛkoo maa waŋnda a yaa le cho o Mɛlɛka pilɔɔ niŋ te. Chɛhowa toosiaa choo choo a lɛŋndeŋ ni. Nduyɛ ndu cho Masaa le chieeŋndo kpou ni. Ndupilɛ kpe cho Mɛlɛka tonyaa ni, nduyɛ mɛlɛka o mɛlɛka cheleŋ cho maa ndu le. (Saamiɛɛ Diiŋ Ndɔɔ 7:​22) Lelaŋ, mi diomnda Muuse laŋ la loonuŋ Isɔluɛiya maa Chɛhowa ndupilɛ kpe nda nɔ ni ma piɛi. A nɔ ma tol taamasi wanaa wa nda a balaa wa kɔɔli le, a ndaa piɛi mɛlɛkaa lachoowaa bɔɔbɔɔ a mɛlɛkaa laanduaa wa. Wanaa kaŋ ndaa laalaŋ maa mɛlɛkaa ndaa kaŋ ndaa nɔ nyɔɔŋ pum o chieeŋndo niŋ kpaayaa choo.

⁵ Le tamaseliiyo, mi Ichipiaŋnda ndaa piɛi mɛlɛka lepaa wo diolaŋ Ra, mɛlɛkaa halaa Nut, mɛlɛka chieeŋndo Geb, mɛlɛka pioo Nail Hapi. Mi ndaa piɛi vɛlɛ visiaa bɔɔbɔɔ. Mi Chɛhowa chɔm maa o hiou mɛlɛkaa lachoowaa haa teleŋ o tuisi Ichipi Kpundɛla Tɔlaŋ choo wo. Mɛlɛka bɛndu Kenanaitiiya ndaa piɛiyo wa Baal ni. Mɛlɛka lachoowaa hoo Kenanaitiiya ndaa laalaŋ ni maa ndu toosiaa yoomoo ni. Ndaa laalaŋ vɛlɛ maa ndu wa Mɛlɛka halaa ni, piɔɔ, a hueiyii bɛndu bɛnduei. O fondaŋ nda bɔɔbɔɔ, Baal waŋnda tiindaŋ ni le nda mandaa. (Nɔmbaa 25:​3) Isɔluɛiya ndaa nɔ ma kɛsiŋ o kɔl maa “Mɛlɛka tonyaa” nda nɔ ni. O nɔ velaŋ te. “Ndu pilɛ kpe” cho Chɛhowa ni.​—Ditɔnɔmii 4:35, 39.

6, 7. Yɛɛ dimioo hoo “ndu pilɛ kpe” sim yɛ vɛlɛ? Nduyɛ vɛɛ Chɛhowa chɔm yɛ maa “ndu pilɛ kpe” cho ni?

⁶ O Siŋgaŋ te Nduyɛ Mbo lo Naa Kɔɔli. Dimioo hoo o “pilɛ” sim vɛlɛ ni maa sabula Chɛhowalaŋ a nyɛ o tosa wo siŋgaŋ te. Chɛhowa mulu muluŋ te. Le tamaseliiyo, mbo dimul Ebilaham maa chuauwaa nduaa mamaa cho wa o Lɛŋnde Mɛyaaleŋ niŋ. Nduyɛ mi Chɛhowa tosa kaamaalaŋ tau le loo o diomnde ndɔleŋ choo. Mi wɔsilaŋ kɛmɔɔ le hiɔɔlu a beleyaa hiau o diomnde Chɛhowa mɛi leŋ ndeŋ kɔɔli. Kɛ sabu ndɔɔ siŋgaŋ te.​—Chɛnɛsee 12:1, 2, 7; Ɛsɔdɔɔ 12:40, 41.

⁷ Mɛɛ wɔsilaŋ la hiou o kɛmɛlaŋ niŋ o koŋ kɔɔli, mi Chɛhowa veelu Isɔluɛiya maa nda cho seiyaa nduaa ni. Mbo dimul nda aa, “Ya pilɛ kpe cho Mɛlɛka ni. O fula o ya kɔɔli, mɛlɛka o mɛlɛka kpeekpei cheleŋ cho le, o paandoo niŋ ni, a siɔdiiyo niŋ bɛɛ.” Mi Chɛhowa dimul nda vɛlɛ kpendekele maa fɛɛŋ bɛɛ sabu ndɔɔ siŋgaŋ te. Mbo dimi aa, “Le teleŋ o teleŋ I cho wa Mɛlɛka.” (Aisaya 43:10, 13; 44:6; 4812) Nuawɔ dikeŋnaŋ bɛndu Isɔluɛiya ndaa sɔla wo se le Mɛlɛka chɔm lo lechoo wo nduyɛ o siŋgaŋ te wo piɛiyo! Dikeŋnaŋ pilɛ koŋ kpe naa bɛɛ nɔ hau ni.​—Malakai 3:​6; Chemisi 1:17.

8, 9. (a) Yɛɛ Chɛhowa yeema yɛ mi wanaa cho ndu piɛiyo wa tosa? (b) Vɛɛ Chiisu kindila yɛ nyɛ Muuse dimi wo maa o cho o sɔvɛ?

⁸ A tonya kɛsɛ, mi Muuse yiyalaŋ Isɔluɛiya maa fɛɛŋ fɛɛŋ bɛɛ kaala Chɛhowa nɔ le nda nduyɛ mbo buulaŋ le nda wo siŋgaŋ te. Chɛhowa bɛɛ ndoo yeema ma piɛi ndu ndupilɛ kpe, nduyɛ ma kaala ndu a kɔl ndaa kpou, a yoomu ndaa kpou, vɛlɛ a kpaaya ndaa kpou. Kalaŋ chuauwa ndaa nɔ ma pɛɛku chuauwaa ndaa a Chɛhowa okɔɔ teleŋ o teleŋ le halikpeŋ mi nda bɛɛ piɛi Chɛhowa ndupilɛ kpe.​—Ditɔnɔmii 6:6-9.

⁹ Fɛɛŋ fɛɛŋ bɛɛ Chɛhowa siŋga sabu ndɔɔ le. Lelaŋ, fɛɛŋ bɛɛ o siŋga sawala ndɔlaŋ le wanaa nduaa cho ndu piɛiyo o tonyaa choo wa le. Te ŋ yeema pɛ mi Chɛhowa hini kɔl a piɛile naaleŋ, ndupilɛ kpe naŋ nɔ ni miŋ piɛi nduyɛ miŋ kaala ndu a kɔl naa kpou, a yiyaŋ naa kpou, vɛlɛ a kpaaya naa kpou. Chiisu dimi maa sawa hiou sawalaŋ kpou wo cho hoo ni. (Nuawɔ Maki 12:​28-31.) Ŋ pɛɛkuŋndɔ mɛɛ naŋ chɔm o nyɛ naŋ tosa wo niŋ yɛ maa ŋ laalaŋ maa Chɛhowa Mɛlɛka naa “ndu pilɛ kpe” cho ni.

CHƐHOWA NDUPILƐ KPE Ŋ NƆ NI MA PIƐI

10, 11. (a) O nɛi kuɛɛ choo naŋ piɛi yɛ Chɛhowa ndupilɛ kpe? (b) Vɛɛ chuaa piaanduaa o Babilɔŋ niŋ chɔm yɛ maa Chɛhowa ndupilɛ kpe nda wa piɛiyo ni?

¹⁰ Chɛhowa ndupilɛ kpe cho Mɛlɛka naa ni. Lelaŋ ndupilɛ kpe naŋ nɔ ni miŋ piɛi. Ŋ piɛi mɛlɛka o mɛlɛka cheleŋ te, nduyɛ ŋ nɔ miŋ mɔsɔŋa yiyaŋnda lachoowa kɛ kɛ o Chɛhowa piɛiyo niŋ te. O cho ko mɛlɛka o hiou mɛlɛkaa cheleŋnda ɔɔ mbo hiau nda kpaaya wo le o cho le. Ndu cho Mɛlɛka tonyaa ni. Chɛhowa ndu pilɛ kpe naŋ nɔ ni miŋ piɛi.​—Nuawɔ Sɔɔŋ Chɔɔmaŋndoŋ 4:11.

¹¹ O yau Daaniɛɛ wo niŋ, miŋ pɛɛku a chuaa piaanduaa Hibuluiya okɔɔ. Nda cho ni, Daaniɛɛ, Hananiya, Misiɛl, a Asiilua. Ma chɔm maa Chɛhowa ndupilɛ kpe nda cho piɛiyo ni mɛɛ nda kɛɛ kpoŋ le nyɛdiaa nɔɔlɛi wanaa Chɛhowaa nɔ ma de le wo dioo. Nduyɛ mi Daaniɛɛ chaaŋaa nduaa yaa wa kɛɛ kpoŋ le piɔm ŋkoolii Nɛbiukanɛɛsa simi wo wulaŋ beŋndo ma sooluu ndu. Le nda, Chɛhowa wa nyɛ tasoo o yoomu ndaa niŋ ni. A wa a yɔŋgaŋ o ndulo a kɔl ndaa kpede.​—Daaniɛɛ 1:1–3:30.

12. Le miŋ piɛi Chɛhowa ndupilɛ kpɛ, a yɛɛ okɔɔ naŋ nɔ yɛ miŋ wa yekeŋ?

¹² Chɛhowa nɔ ni mbo wa nyɛ tasoo o yoomu naa niŋ. Te ŋ yeema pɛ miŋ piɛi ndu ndupilɛ kpe, mɛɛ ŋ nɔ miŋ wa yekeŋ yɔŋi nyɛm cheleŋndoŋ kpeeŋa ndu ikɛi miŋ sim o foofo ndɔɔ. Yɛɛnɛ cho yɛ nyɛm muŋ? O Sawala Tɔlaŋ niŋ, mi Chɛhowa dimi maa wanaa nduaa nɔ ma sooluu mɛlɛkaa cheleŋ te. A nɔ ma sooluu piɔmaa kɛ kɛ le. (Ditɔnɔmii 5:6-10) Hau, piɔmnda sooluuwo cho suulaŋ tau, nduyɛ la pum kendu sina. Chɛhowa siŋga sawala ndɔlaŋ te. “Ndu pilɛ kpe” cho wɔ Chɛhowa ni. Ŋ tofaŋndɔ mɛɛ naŋ kpakpala hau piɔmnda sooluuwo yɛ.

13. Yɛɛ naŋ kandu yɛ kaalaa mbo hiou Chɛhowa?

¹³ O Kolosiaŋnda 3:5 (nuawɔ), ŋ che nyɔɔŋ pum ŋ tosa ŋ piɛi Chɛhowa a kɔl naa kpou le wo. Ŋ che maa hɔlteŋ luɛiyɔɔ o nyɔɔŋ bɛɛ sooluulaŋ la tiŋ la cho laŋ ni. Vɛɛ keŋ yɔŋnuŋ yɛ? Te ŋ nɔ pɛ yeemɛi ikala kala le nyɔɔŋ opum, mɛɛ le kaniei sɔlaa i hɔbɛi ɔɔ nyɛm kɛndɔŋ cho naa yɛ, ŋ tosa miŋ wa muŋ o ba bɛŋgu maa mɛlɛka kpaaya. Sɔɔŋ wɔɔŋ cho o Kolosiaŋnda 3:​5 niŋndoŋ kpou, ŋ chiɛɛliaŋ a hɔlteŋ luɛiyɔɔ, nduyɛ sooluulaŋ la tiŋ la cho laŋ ni. Lelaŋ te ŋ nɔ pɛ yeemɛi ikala kpoke le nyɔɔŋ muŋ, ŋ cho kandɔɔ muŋ kaalaa mbo hiou kaala naŋ nɔ le Mɛlɛka wo. Mɛɛ Chɛhowa ve lɛ “ndu pilɛ kpe” le naa le. Ŋ yeema mi keŋ yɔŋnuŋ kposoŋ te.

14. Sila yɛɛ kiilanɔɔ Chɔŋ yɔŋgu yɛ naa a kaala naŋ nɔ le Mɛlɛka wo okɔɔ?

¹⁴ Mi kiilanɔɔ Chɔŋ bɛɛ kindila nyɛpilɔɔ kpe. Mbo sila maa te wana o wana kaala pɛ nyɔɔŋ o chieeŋndo niŋ, “mɛɛ o nɔ kaala Mɛlɛkaa o kɔl te.” Nyɛm muŋ cho ni, “yeemaŋ cho o wana chieeyɛi wɔɔŋnde hei niŋ ndoŋ, a nyɛm waŋnda cha ma luɛi lehɔl o muŋ ndoŋ, a nyɛ o nyɛ waŋnda kialu yoŋgaa a muŋ.” (Chɔŋ Tasoo 2:15, 16) Lelaŋ, ŋ nɔ miŋ wa naapila yaasiaa lɔɔlɔɔ le sina te ŋ kaala pɛ chieeŋndo. Miŋ saaluŋ maa ŋ kandu hɔlla mulioo o yelelaŋndo, waŋnda suuwo opum hɛnaŋndo, a chuɛinɔŋndo suuwo opum. Te koŋ te, miŋ yeema “dɛnɛ kɛndɔɔ” sɔlaa o dɛnɛ sinaa bɛndoo nuuviaa niŋ. (Chɛluimaya 45:​4, 5) Chieeŋ sɛnɛiyo cho niŋ bɔɔ kpɛɛluŋ. Lelaŋ, ŋ nɔ miŋ kɛsiŋ diomnda sɔvɛ Muuse dimi laŋ o kɔl! Te ŋ bii pɛ bila nduyɛ miŋ laalaŋ kɛsɛ maa Chɛhowa Mɛlɛka naa “ndu pilɛ kpe” cho ni, mɛɛ ŋ cho ndu piɛi ndupilɛ kpe o nɛi o yeema wo choo.​—Hibuluiya 12:28, 29.

HIOU LACHI A DIOMPILƐ LEKILISIƆŊNDO CHƆMNDO

15. Le yɛɛ Pɔɔl yiyalaŋ yɛ Kilisiɔŋnda maa Chɛhowa Mɛlɛka “ndu pilɛ kpe” cho ni?

¹⁵ Dimioo hoo Chɛhowa “ndu pilɛ kpe” mala naa le sinaa maa Chɛhowa yeema mi wanaa nduaa wa o diompilɔɔ niŋ nduyɛ ma nɔ kpeleŋ pilɔɔ kpe. O kunda leKilisiɔŋ tasoo niŋ, Chuuwa wa loŋ, Kilikiiya, Luomaŋnda, vɛlɛ a wanaa fula o kayii cheleŋnde niŋnda. Ndaa fula o kɔɔlima yɛ yiaŋ niŋ, naamulaŋ, nduyɛ wana o wana ndoo nɔ nyɛ o hɛnaŋ ndo. Le keŋ, i wa ikala kpoke le mi apum ndaa chɛl nɛi sɛnɛi nda nɔ ma piɛiyo, ɔɔ le ma mal sɔɔŋ ndaa tosa paandu woŋ. Lelaŋ, Pɔɔl ndoo nɔ mbo dimul nda maa Mɛlɛkaa opilɛ kpe Kilisiɔŋnda nɔ ni ma nɔ, Chɛhowa.​—Nuawɔ Kɔliŋtiaŋ Tasoo 8:5, 6.

16, 17. (a) Suɛi yɛɛ Baabuiyo dimi yɛ paandu mii wa hau peelɔŋndo, nduyɛ a fulamakɔɔli kuɛɛ? (b) Yɛɛ tɛɛmbuu yɛ diompilɛ naa?

¹⁶ Kɛ kunda leKilisiɔŋndo hau yɛ? Mi wana ndoo suaa le Mɛlɛka wo Aisaya dimi maa “te palɛi mɛɛlɛi le chieeŋndo hoo i fuuluu pɛ,” waŋnda o kaalaŋ niŋ kpou cho chuuŋgiaŋ diompilɛ le Chɛhowa piɛiyo. A cho dimi aa, “O cho lakɔ naa pɛɛku nyɛ o yeema naa mi ŋ tosa wo, mi ŋ wa o nɛi ndɔɔ choo.” (Aisaya 2:2, 3) Ŋ cho a kɔl kɛndɛ le chɔɔ nyɛ dimiŋ hoo wo o peelɔŋndo hau! Puaapiliaa a ndepiliaa naa a bɔɔbɔɔ fula o fondaŋnda yɛ yɛlaŋ, ma dimi sɔɔŋ maŋgalaŋ yɛ yɔŋ, nduyɛ a nɔ naamulaŋ yɛ yɛ. Kɛ ŋ cho a mɔɔsaa diompilɛ o Chɛhowa piɛiyo niŋ. Kɛ le mɛɛ naŋ fula o fondaŋnda yɛ yɛlaŋ yɛ, lepum, mi bahawɛilaŋ la luɛi naa tɛɛŋ.

¹⁷ Le tamaseliiyo, vɛɛ ŋ yiyaŋ yɛ a puaapiliaa a ndepiliaa nɔ naamula yɛ yɛlaŋ nda? Suɛi ndɛi maŋgalɛi, chuɛiyɔŋ ndaa, kaa ndaa, vɛlɛ a nyɛdiaa nda dia wo mbo wa teŋgeŋ a o numndo. A cho nda pa kpakpala okoŋ ma nɔ teleŋndo tau a wanaa nya tosa nyɛpilɔɔ kpe nya ndaa wa? Vɛɛ ŋ yiyaŋ yɛ a bɛnduaa kundaa ŋ chuu o kɔɔ wa, ɔɔ a nya nɔ naamula pilɛ nya ndaa le wa? Te ŋ ve yekeŋ te, ŋ cho tosa mi teŋgeŋndaŋ ndaŋ la paaliaŋ naa nduyɛ mi la tɛɛmbuu diompilɛ naa.

18, 19. (a) Sila kuɛɛ cho yɛ o Ɛfisiaŋnda 4:1-3 niŋ? (b) Yɛɛ naŋ nɔ yɛ miŋ tosa le mi kundaa lo o diompilɔɔ niŋ?

¹⁸ Vɛɛ naŋ kpakpala yɛ simulta waa naa? Mi kiilanɔɔ Pɔɔl sila Kilisiɔŋaa wa Ɛfisɔɔ wa. Chiee sulaa pila o wa ni nduyɛ wanaa fula o kɔɔlima yɛyiaŋ niŋnda wa loŋ. (Nuawɔ Ɛfisiaŋnda 4:1-3.) Mi Pɔɔl dimi maa ŋ nɔ miŋ wa wanaa yoŋga le, miŋ mal kaala kala kala laŋ, miŋ nɔ biuwɔŋndo, a kaalaa. Suiliŋndaŋ ndaŋ la cho machuaa suŋgbuma kala saa chiɛiyo waŋ. Kɛ le mi chiɛiyo wa o kɛndɛ, wali kalaa yeemaŋ ni. Pɔɔl ndoo yeema Kilisiɔŋnda o Ɛfisɔɔ niŋ le ma tosa wallo kalaŋ le ma “hiou lachi a diom pilɔɔ hoo nɔɔ.”

¹⁹ Naa kpou nɔ miŋ kindi o nɛi o nɛi niŋ le mi kundaa wa o diompilɔɔ niŋ. Vɛɛ naŋ tosa yɛ keŋ? O tasoo, ŋ nɔ miŋ nɔ suiliŋnda Pɔɔl dimi laŋ ndaŋ nduyɛ miŋ chɔm ndaŋ. Laŋ la cho ni, yoŋgaa a kaala kala kalalaŋ malɔɔ, biuwɔŋndo, a kaalaa. O diiŋ ndɔɔ, ŋ nɔ miŋ tosa wallo kalaŋ le miŋ “hiou lachi a diom pilɔɔ hoo nɔɔ.” Kɛɛ sinapɛŋgoo cho ko maa tɛɛndiaalaŋ o chiɛiyo o diompilɛ naa niŋ. Lelaŋ, ŋ nɔ miŋ tosa wallo kalaŋ le kɛɛ sinapɛŋgoo toosiaŋndo tɛɛŋ le halikpeŋ mi kɔl nyuloo a diompilɔɔ lo naa tɛɛŋ.

20. Vɛɛ naŋ chɔm yɛ maa ŋ bii bila maa Chɛhowa Mɛlɛka naa “ndu pilɛ kpe” cho ni?

²⁰ Chɛhowa Mɛlɛka naa “ndu pilɛ kpe” cho ni. Suɛi kɛndɛ bɛnduei pila cho keŋ ni! Mi suɛi nda yiyalaŋ keŋ Isɔluɛiya ve ke nda yoomuaŋ le biunɔŋndo simultaŋ mɛɛ nda luɛi o Lɛŋnde Mɛyaaleŋ niŋ. Naa bɛɛ diomnda laŋ la ke naa yoomuaŋ miŋ biunuŋ tei mi nyɛpalaa bɛndoo keeku naa choo nduyɛ miŋ luɛi o Kpele Hɛnɛkɛ cho hunɔɔ wo niŋ. Ŋ hiounuŋ lachi a Chɛhowa piɛiyo ndupilɛ kpe. Ŋ nɔ miŋ kaala ndu a kɔl naa, yiyaŋnda naalaŋ, vɛlɛ a yoomuma naŋ kpou. Nduyɛ ŋ nɔ miŋ tosa wallo kalaŋ le mi kɔl nyuloo a diompilɔɔ wa puaapiliaa tɛɛŋ. Te ŋ hiou pɛ lachi a sɔɔŋ muŋ tosaa, Chiisu cho naa chua maa lasaa nduyɛ miŋ che nyɛ o dimi wo o peelɔŋndo. Ndu cho ni, “La huŋ. Nya Finya nuu dɔu sala ni. La huŋ mi la huŋ wa o masale ndɔleŋ bɛŋgu, masale o bɛɛndiaa le nya boondii o tosa chieeŋndo ve.”​—Maatiu 25:34.