Chɛl Mi Nyɛ o Nyɛ Kuuna Num Fandaa Sɔlaa Le

1, 2. (a) Fanda kuɛɛ buɛiyaa Mɛlɛkaa cho yɛ lehɔl o nɛi le sɔlaa? (b) Yɛɛ mala yɛ naa le kɔlta naalaŋ kɛsioo o fandaa choo? (Tofa fotueiyo o peeleŋ ndeŋ choo.)

KILISIƆŊAA pɔyaŋnda nɔ tiindaŋ sɔvɛ sɔviɔɔ. A cho lehɔl o nɛi le waa achal o choo choo niŋ. Mi Pɔɔl, wana Chiisu vem hɔlte ndɔ wo suaa a tiindaŋndo hoo okɔɔ maa ‘Mɛlɛka veelu ndu . . . le yoomu kpeekpeiyo choo choo sɔlaa.’ (Filipiaŋnda 3:​14) O choo choo niŋ, a cho wa o Masaleŋ choo nda Chiisu Kiliti waa nduyɛ ma tosa wallo a ndu latulu le waŋchieeya malaa ma simnuŋ walaŋ. (Sɔɔŋ Chɔɔmaŋndoŋ 20:​6) Nuawɔ tiindaŋ kɛndɛ bɛndu se! Saa cheleŋnda cho lehɔl o nɛi le fanda teŋgeŋndo sɔlaa. A nɔ tiindaŋndo le waa achal lefafɛɛŋ o Kpele Hɛnɛkiɔɔ niŋ o lɛŋndeŋ choo. Nduyɛ tiindaŋndo hoo ke nda nyaale kpeekpeiyo ni!—Pitɛ Diiŋ Ndɔɔ 3:​13.

² Pɔɔl ndoo yeema le mi chaaŋaa nduaa Kilisiɔŋaa pɔyaŋnda lo o tiindaŋ ndaa choo le fandaa sɔlaa. Mbo dimul nda aa, “Nyɔɔŋ o fondaŋ Mɛlɛkaa a muŋ nya nɔ ni mi la wa yiyaŋndo.” (Kolosiaŋnda 3:​2) Ndaa nɔ ma handu kɔllo o tiindaŋ nda sɔvɛ sɔviɔɔ choo le kɔlaŋ o choo choo niŋ. (Kolosiaŋnda 1:​4, 5) Yiyaŋndo a salala Chɛhowalaŋ okɔɔ mala buɛiyaa Mɛlɛkaa kpou ma kɛsi kɔlta ndalaŋ o fandaa choo. Hei cho tonya o yɔŋ bɛɛ ma nɔ tiindaŋndo le kɔlaŋ o choo choo niŋ ɔɔ le waa o lɛŋndeŋ choo.—Kɔliŋtiaŋ Tasoo 9:​24.

3. A yɛɛ okɔɔ Pɔɔl ndoo sila yɛ Kilisiɔŋnda?

³ Mi Pɔɔl sila vɛlɛ Kilisiɔŋnda a kpundɛ ndoo kuuna nda fandaa sɔlaa wo okɔɔ. Le taamaseliiyo, mbo poonyial waŋnda Koloose a Kilisiɔŋaa lachoowaa okɔɔ a wa kindiŋndo le Mɛlɛka kɔllo nɛŋioo wa. Waŋnda haa wa Sawala Mɛlɛka ke Muuselaŋ tolɔɔ kɔɔli kɛ a ve tiindaŋ dɔwɔɔ o Chiisu niŋ te. (Kolosiaŋnda 2:​16-18) Mi Pɔɔl suaa vɛlɛ a kpundɛla cho wɔ hau laŋ okɔɔ, la nɔla mi la kuuna naa fandaa sɔlaa wo. Mbo tɛɛsiaa mɛɛ naŋ chɔulaba yeemaŋ nɔɔlɛiyoŋ yɛ, a nyɛ naŋ nɔ miŋ tosa wo, te o yɔŋ pɛ miŋ nɔ bahawɛiyo o yuŋgu naa niŋ ɔɔ a puaapiliaa naa o kundaa niŋ. Sila sɔvɛ Pɔɔl yɔŋgu wo nɔla mbo mala naa hau. Ŋ yaasiaŋndɔ sɔɔŋ ŋpum o silala sɔvɛ o yɔŋgu o yau ndoo poonyial waŋnda Koloose wo niŋ.

SOLI BALAŊ PO O YEEMAŊ NƆƆLƐIYOŊ NIŊ

4. Le yɛɛ yeemaŋ nɔɔlɛiyoŋ kuuna yɛ naa fandaa sɔlaa?

⁴ Mɛɛ Pɔɔl chii puaapiliaa nduaa yiyalaŋ a tiindaŋ sɔvɛ nda nɔ wo okɔɔ, mbo poonyiaa aa, “Lelaŋ, la soli niko balaŋ po o yeemaŋ wanaa cho le chieeŋndo hoo wa a nɔ woŋ niŋ. Muŋ cho ni, suundaa nya wana nya cho o nɔ niŋ te wo, niilu nɔɔlɛiyo, yeemɛi suundɛi bɛnduei nɔɔ, yeemɛi le dɛnɛ wɔɔŋndo tosaa, a hɔlteŋ luɛiyɔɔ o nyɔɔŋ.” (Kolosiaŋnda 3:​5) Mi yeemaŋ nɔɔlɛiyoŋ simnuŋ ŋ kala kala nduyɛ ŋ tosa mi chaŋyɛi nɛi tambu a Chɛhowa vɛlɛ a tiindaŋ naŋ nɔ le chilaŋndo. Mi puaapilɛnɔ pilɛ o luei balaŋ o kaala nɔɔlɛilaŋ niŋ, kɛ mbo mɛɛlu miiŋgu o kundaa niŋndo dimi maa mbo yiŋnuŋ pɔŋgeŋ o kaala nɔɔlɛilaŋ niŋ nduyɛ o “yala miiŋgu o kundaa niŋ te.”

5. Vɛɛ naŋ kpakpala yɛ sɔɔŋ luei naa o kpundɔɔ niŋndoŋ?

⁵ Ŋ nɔ miŋ wa yekeŋ a sɔɔŋ kuuna naa le sawala walaŋnda Chɛhowalaŋ kiɔɔ diikɔŋndo wo. Le taamaseliiyo, o cho suɛi taasi le mi wanaa cho nuaŋnaŋndo le challe o nɔɔ niŋndo kɛsi kpeleŋndaŋ, yɔŋi nda kandu sɔɔŋ pum tosaa mɛɛ piiliaŋndo, sondolaŋ wɛiyaŋndo, a waa nya ŋiɔɔŋ kpeele cho naa yɛ. (Pulɔwaa 22:​3) Kpundɛ cheleŋ cho vɛlɛ ni, kɔlaŋ yulaleŋ tosaa o lɔɔlaŋ niŋ ɔɔ wallo naapilɛ a wana nya cho o nɔ niŋ te wo. (Pulɔwaa 2:​10-12, 16) Yɛɛ ŋ nɔ yɛ ma tosa le numpila mandaa? Chɔɔmuŋ numpila maa Sei Chɛhowaa ŋ cho ni. Chɔm kaa kɛndɔɔ lɔɔlɔɔ, nduyɛ puɛɛnuŋ te maa i tɛfɛlɛkɛlɛɛ ve luei num o kpundɔɔ niŋ. Ŋ nɔ vɛlɛ miŋ wa yekeŋ te ŋ tambu pɛ kɔl ɔɔ miŋ wa yololɛ. Ŋ yeema mi waŋndo chɔm naa kaalaa. Naapum a teleŋ koŋ, miŋ chɛl wana o wana chɔm yeemɛi o naa niŋ pɛ. Hei cho suɛi kpundɛ. Te a yiyaŋ pɛ lende, tosa nyɛ o nyɛ kuuna num fandaa sɔlaa wo le. Muliŋ naa Chɛhowa cha, puaapiliaa a ndepiliaa numnda le malaa.—Nuawɔ Sam 34:​18; Pulɔwaa 13:​20.

6. Yɛɛ naŋ nɔ yɛ miŋ loonuŋ te ŋ wa pɛ yelelaŋndo hɛlioo?

⁶ Le balaŋ solioo o yeemaŋ nɔɔlɛiyoŋ niŋ, mɛɛ miŋ kɛɛ yelelaŋnda nɔɔlɛilaŋ. Hau, yelelaŋnda bɔɔbɔɔ cho naa yiyalaŋndo a mɛɛ waŋnda ndaa tosa sɔɔŋ Sodɔm a Komoolua yɛ. (Chudi 7) Wanaa cho yelelaŋndaŋ ndaŋ toosiaa wa tosa mi kaa ihini nɔɔlɛiyo simnuŋ nyɛ kɛndɛ nduyɛ maa o nɔ kpundɛ le. Lelaŋ, ŋ nɔ miŋ wa lɔɔlɔɔ yekeŋ. Ŋ nɔ miŋ chɛl yelelaŋndaŋ chieeŋndo hoo nɔlaŋ kpou le. Kɛ ŋ nɔ miŋ hɛli yelelaŋnda bɛnda laŋ, la tosa miŋ sɔla fanda yoomoo wo.—Pulɔwaa 4:​23.

“LA NƆ” KAALAA A KƐNDƐI

7. Bahawɛila kuɛɛ huŋ yɛ lepum o kunda leKilisiɔŋndo niŋ?

⁷ Ŋ cho bɔɔ a nyaale le waa o kunda leKilisiɔŋndo niŋ. Miŋ pɛɛku Diom Mɛlɛkaa o bɔŋaŋndaŋ, nduyɛ miŋ maaliaŋ vellaa velle. Hei mala naa miŋ kɛsi kɔl naa o fandaa choo. Kɛ teleŋndaŋ lapum mi kɛɛ sinapɛŋgoo hiŋ a bahawɛilaŋ puaapiliaa a ndepiliaa naa tɛɛŋ. Te o yɔŋ pɛ miŋ soli bahawɛilaŋ ndaŋ te, la tosa mi sɛɛŋgiaŋndo hiŋ naa tɛɛŋ.—Nuawɔ Pitɛ Tasoo 3:​8, 9.

8, 9. (a) Suliŋnda kuɛɛ mala yɛ naa le fandaa sɔlaa? (b) Yɛɛ mala yɛ naa le kɔl nyuloo nɔɔ te Kilisiɔŋnɔɔ pilaŋ naa pɛ tana?

⁸ Ŋ nɔ miŋ kɛsiŋ suɛi nɛiyaŋ waŋndo o kɔl mii kuunaa naa fandaa sɔlaa le. Mi Pɔɔl tɛɛsiaa nyɛ Kilisiɔŋnda nɔ ma tosa wo aa, “Nya cho wanaa Mɛlɛka hɛli le waa wanaa ndɔ wa ni. Wanaa cho le Mɛlɛka wa nya cho ni, nduyɛ, o kaala nya tau. Lelaŋ, sɔɔŋ nya nɔ mi la tosa niŋ ndoŋ muŋ cho muŋ ni, nyiɛɛye nɔɔ, a kɛndɛi, a waa wana tusiaŋ, a waa wana chaa ŋwaŋ biyɔɔ, a waa wana biuwaŋ. La biuwaŋ vellaa velle. Nduyɛ, te o wa pɛ mi chaaŋ num yɔŋ num isɔɔ, mɛɛ mal ndu le suɛi wɔɔŋ o tosal num keŋ nde. La nɔ mi la malnaŋ vellaa velle mɛɛ Masanɔɔ Mɛlɛka mal nya le yɔŋnda nyala wɔɔŋndaŋ yɛ. O koŋ kɔɔli, suɛi le bolii nya nɔ mi la tosa ve cho ni, la nɔ kaalaa nya o lakɔl. Kaala kɛndɛlaŋ ndaŋ kinɛi kaalaa ndu mɔɔsa laŋ ni mi nyɛ o nyɛ bɛnda nyɛ kɛndɛi.”—Kolosiaŋnda 3:​12-14.

⁹ Kaalaa a kɛndɛi mala naa le acheleŋnda malɔɔ haki. Te ŋ tuulu pɛ kɔl le nyɛ waŋndo dimul naa ɔɔ tosal naa wo, ŋ nɔ miŋ yiyaŋ a teleŋnda naŋ dimul ɔɔ tosal acheleŋnda suɛi wɔɔŋnde nduyɛ ma mal naa haki wo. Ŋ wa bɔɔ a nyaale le kaala nda chɔm naa vɛlɛ a kɛndɛi nda tosal naa ve! (Nuawɔ Ikilisiaatii 7:​21, 22.) Ŋ nɔ bɔɔ balika melaa le mɛɛ Kiliti hiŋ a diompilɔɔ wanaa cho Mɛlɛka piɛiyo o tonyaa choo wa tɛɛŋ yɛ. (Kolosiaŋnda 3:​15) Naa kpou kaala Mɛlɛka pilɔɔ, miŋ wa yooŋgu pilɔɔ dimioo, nduyɛ bahawɛila pilɛ laŋ kpe naŋ nɔ ni. Te ŋ wa pɛ wanaa ikɛndɛ nduyɛ miŋ nɔ kaalaa, vɛlɛ miŋ malnaŋ lahaki vellaa velle, kundaa cho chɔɔlu diompilɔɔ nɔ, nduyɛ hei tosa miŋ kɛsi kɔllo o fandaa choo.

10, 11. (a) Le yɛɛ paŋalaa cho yɛ nyɛ kpundɛ? (b) Te ŋ yeema mi paŋalaa kuuna naa fandaa sɔlaa le, yɛɛ naŋ nɔ yɛ miŋ tosa?

¹⁰ Paŋalaa nɔla mbo kuuna naa fandaa sɔlaa. Taamaseliila Baabuiyo chɔm mɛɛ paŋalaa cho nyɛ kpundɛ yɛ. Le taamaseliiyo, mi Keŋ paŋala Ebɛɛl nduyɛ mbo dii ndu. Mi Kolua, Detaŋ, a Abiluam paŋala Muuse nduyɛ ma tosal ndu nila kalulaŋ. Mi Masaa Sɔɔ paŋala Deeve nduyɛ mbo kindiŋ le ndu diyɔɔ. Nyɛ Diom Mɛlɛkaa dimi wo cho tonya. Ndu cho ni, “Ba o ba paŋaliaŋndo wa pɛ, a kiɔɔ hɛnaŋndo a dɛnɛ kɛndɛ chaaŋnda, sɛɛŋgiaŋndaŋ a sɔɔŋ wɔɔŋndoŋ suu o suu, muŋ wa loŋ ni.”—Chemisi 3:​16.

¹¹ Te ŋ tosa pɛ wallo kekelee le kaala kpeekpeiyo a kɛndɛi nɔɔ, o kiandu le paŋalaa nɔɔ. Diom Mɛlɛkaa dimi aa, “Te o wa pɛ ma kaala waŋndo, biuwɔŋndo ŋ biunuŋ ndu ni. Te o wa pɛ ma kaala waŋndo, kɛndɛi ŋ tosal ndu ni. Wana kaala chaaŋ ndɔ wana chioo pɛ, o luei lehɔl o nyɛ chaaŋ ndɔ nɔ wo le.” (Kɔliŋtiaŋ Tasoo 13:​4) Le paŋalaa kiɔɔ simnɔŋndo kaa naa, ŋ nɔ miŋ che sɔɔŋ mɛɛ Chɛhowa che muŋ yɛ. Ŋ nɔ miŋ che puaapiliaa a ndepiliaa naa maa dialle ipilɛ naŋ cho ni, ndi cho yɛ kunda leKilisiɔŋndo ni. Baabuiyo dimi aa, “Te o pilɛ sɔla bɛɛleŋ pɛ, muŋ kpou ŋ naŋ kɔl vellaa velle.” (Kɔliŋtiaŋ Tasoo 12:​16-18, 26) Te puaapiliaa naa opilɛ sɔla dɛnɛ kɛndɔɔ pɛ, ŋ nɔ miŋ dɔɔŋ nyaale le ndu, kɛ o cho ndu paŋalaa le. Yiyaŋndɔ a taamasi kɛndɛ po Sɔɔ wo okɔɔ, Chonataŋ. Teleŋ Mɛlɛka hɛli Deeve le waa masa wo, Chonataŋ ndoo paŋala Deeve le mɛɛ nda kɛɛ ndu hɛlioo yɛ le. Mbo dɛɛniaa pɛɛŋ Deeve kɔllo nduyɛ mbo toolu ndu. (Saamiɛɛ Tasoo 23:​16-18) Baa ŋ nɔ pa miŋ wa wanaa ikɛndɛ nduyɛ miŋ nɔ kaalaa maa Chonataŋ?

LA SƆLA FANDAA MAA LEYUŊGU

12. Sila Baabui kuɛɛ mala yɛ yuŋgu naa le fandaa sɔlaa?

¹² Te wana o wana o yuŋgu naa niŋ tol pɛ sawala mandaala Baabuiyo kɔɔli, yuŋgu naa cho wa a kɔl nyulu vɛlɛ a nyaale, nduyɛ o cho fandaa sɔla. Mi Pɔɔl yɔŋgu sila taasioo hoo le yuŋgulaŋ, “Nya laanduaa, la tuei piaandaa nyaa diom. Kani fondole, nyɛ bɛnda num wana laalaŋndo ma tosa wo ndu cho hoo ni. Nya piaanduaa yɛ, la kaala laandaa nyaa. Nduyɛ, la wa ŋuasu ŋuasu a nda le. Nya chuauwa, la tuei wanaa velu nya wa diom o isɔɔ o isɔɔ niŋ, kani fondole, hei nɛŋi Masanɔɔ Mɛlɛka kɔl. Nya finyaa yɛ, la bii chuauwaa nyaa biyɔɔ wɔɔŋ te, kani fondole, koŋ tosa ma tambu kɔl.” (Kolosiaŋnda 3:​18-21) A cho pa chɔɔ mɛɛ silaa hoo nɔla mbo mala yuŋgu numndo yɛ?

13. Vɛɛ ndepilɛnɔ Kilisiɔŋnɔɔ mala yɛ pɔnɔ ndɔ cho wana laalaŋ te wo le mbo nɔ yeemɛi le Chɛhowa piɛiyo?

¹³ Kɛlɛŋgaa ndepilɛnɔɔ ŋ cho ni, nduyɛ pɔnɔ num cho Chɛhowa piɛi le. Yɛɛ ŋ cho yɛ tosa te pɔnɔ num ve num biyɔɔ mɛɛ o nɔ mbo bii num yɛ le? Naapum ma tuulu kɔl nduyɛ ma sɛɛŋgiaŋ a ndu. Kɛ keŋ tosa pa miŋ sɔɔŋ bɛnda? Nduyɛ o yɔŋ bɛɛ maa a nɔ di o sɛɛŋgiaŋ koŋ niŋ, a cho pa tosa le mbo yeema Chɛhowa piɛiyo? Kɛlɛŋgaa sako bɛɛ. Kɛ te a diikuŋ ndu pɛ maa ndu cho yuŋgoo bolleŋ ni, a cho yuŋgu numndo mala le kɔl nyuloo chɔɔloo nɔɔ, nduyɛ ma chuu Chɛhowa tɔɔ kɛndɔɔ. Kɛlɛŋgaa taamasi num kɛndɔɔ cho tosa mi pɔnɔ num nɔ yeemɛi le Chɛhowa piɛiyo, nduyɛ mi nya ŋiɔɔŋ kpou sɔla fandaa.—Nuawɔ Pitɛ Tasoo 3:​1, 2.

14. Yɛɛ pɔnɔ Kilisiɔŋnɔɔ nɔ yɛ mbo tosa te laa ndɔ cho wana laalaŋ te wo ve ndu lebɛɛ ke le?

¹⁴ Kɛlɛŋgaa puaapilɛnɔɔ ŋ cho ni, nduyɛ laa num cho Chɛhowa piɛi le. Yɛɛ ŋ nɔ yɛ ma tosa te a yiyaŋ pɛ maa o cho num lebɛɛ ke le? Te a kindiŋ pɛ le ndu chɔmndo maa num cho wana lebollo ni nduyɛ ma wa ndu deŋullo, o cho pa num bɛɛleŋ ke? Sako bɛɛ! Mɛlɛka yeema num ma tol taamasi Chiisoo kɔɔli, le waa pɔnɔ chɔm kaalaa wo. (Ɛfisiaŋnda 5:​23) Chiisu, wana cho kundaa bolleŋndo, cho lɔɔlɔɔ kaalaa chɔmndo a biuwɔŋndo. (Luku 9:​46-48) Te a tol pɛ taamasi Chiisoo kɔɔli, kɛlɛŋgaa teleŋ cho fuuluu mi laa num bɛɛ yeema Chɛhowa piɛiyo.

15. Vɛɛ pɔnɔ Kilisiɔŋnɔɔ chɔm yɛ laa ndɔ maa o kaala ndu?

¹⁵ Chɛhowa sila piaanduaa aa, “La kaala laandaa nyaa. Nduyɛ, la wa ŋuasu ŋuasu a nda le.” (Kolosiaŋnda 3:​19) Mi pɔnɔ nɔ kaalaa wo ke laa ndɔ bɛɛleŋ. Vɛɛ o tosa yɛ keŋ? Mbo yaŋ laa ndɔ nilaŋ nduyɛ mbo tosa mi laa ndɔ sina maa nyɛ o cho dimioo wo cho o sɔvɛ. (Pitɛ Tasoo 3:​7) Nduyɛ o yɔŋ bɛɛ mbo tosa lɔɔlɔɔ nyɛ o dimul ndu wo le, nilaŋ laa ndɔ yaŋɔɔ nɔla mbo mala ndu le kɛɛsiaala sɔvɛlaŋ tosaa. (Pulɔwaa 15:​22) Pɔnɔ chɔm kaalaa wo beŋ laa ndɔ le ndu bɛɛleŋ kioo le. Kɛ mbo kindiŋ le sɔɔŋ tosaa le mi laa ndɔ ke ndu bɛɛleŋ. Te pɔnɔɔ kaala pɛ laa ndɔ a chuauwaa nduaa, a cho wa a kɔl kɛndɛ o Chɛhowa piɛiyo niŋ nduyɛ ma sɔla fanda yoomoo.

FELEŊGUAA, LA CHƐL NYƐ O NYƐ LE MBO KUUNA NYA FANDAA SƆLAA LE!

16, 17. Maa feleŋgɔnɔ, vɛɛ ŋ kpakpala yɛ kɔl tuu ŋama ŋamaa a wanaa velu numnda?

¹⁶ Kɛlɛŋgaa a cho niŋ kpasu, nduyɛ ma nɔ yiyaŋndo maa wanaa velu numnda cho num bila biyɔɔ le ɔɔ a nɔ lamamɔɔ le. Mi hei tosa lepum ma tuulu kɔl tau nduyɛ ma kandu kiisaŋndo te a nɔla niŋ pɛ ma piɛi Chɛhowa. Kɛ te a mal Chɛhowa piɛiyo pɛ, a cho chɔ maa wana o wana kaala num o chieeŋndo niŋ maa finya num a kala num cho Kilisiɔŋnda wa vɛlɛ a chaaŋaa numnda o kundaa niŋ te.

¹⁷ Yiyaŋndɔ a hei. Te wanaa velu numnda ndaa sila num te, vɛɛ ŋ wa yɛ sina te a buulaŋ kpeekpei a num? (Hibuluiya 12:​8) A tonya, a cho wanaa walaŋ te. Lelaŋ, ma pilaŋ num tana a mɛɛ nda sila num yɛ. Kɛsi kɔllo o keŋ choo le. Kɛ, kindiŋ ma sina sabula nda cho keŋ tosaa wo a nyɛ nda cho num dimullo wo. Tuulu kɔl ma kindiŋ le pasaa le. Diom Mɛlɛka dimi aa, “Wana kɔl kaloo mandaŋndo pila o mandaŋ ni, te o wa suɛi pɛ, o suu ko faŋ faŋ te. Wana kɛsi hoo kɔl ndɔɔ wo, wana nɔ sina pɛŋgoo wo o cho ni.” (Pulɔwaa 17:​27) I wa kpeleŋ num le simnɔŋndo kaasoŋnɔɔ o Mɛlɛka piɛiyo niŋ. Hei cho tosa ma chɛl silaa nduyɛ ma pɛɛku nyɛ o ndu niŋ mɛɛ mɛɛ nda ke num ndu. (Pulɔwaa 1:​8) Puɛɛnuŋ te maa wanaa velu num nduyɛ ma nɔ kaalaa le Chɛhowa wa, ke sɔviɔɔ pila nda cho ni. A yeema ma mala num le ma wa achal lefafɛɛŋ.

18. Le yɛɛ ŋ nɔ yɛ kɔl sikpaa le kɔllo kɛsioo o fandaa choo?

¹⁸ O yɔŋ bɛɛ miŋ nɔ tiindaŋndo le kɔlaŋ o choo choo niŋ ɔɔ le waa o kpele hɛnɛkiɔɔ niŋ o lɛŋndeŋ choo, naa kpou cho lehɔl o nɛi le chila sɔvɛ sɔvɛlaŋ sɔlaa. Ŋ nɔ tiindaŋ kpeekpeiyo. Nduyɛ o tɔlnuŋ o diomnde mɛyaale Wana Toosiaa chieeŋndo wo choo. Mbo dimi aa, “Sina pɛŋgu waŋnda nɔ niŋ a Mɛlɛka Yaawɛɛ okɔɔ wo o wa niŋ tau tau o chieeŋndo niŋ.” (Aisaya 11:​9) Waŋnda kpou o chieeŋndo choo cho suŋ wa pɛɛkoo sɔlaa Mɛlɛka o ba. O bɛnda miŋ tosa wallo le fanda sɔvɛ koŋ sɔlaa. Lelaŋ, wa loonɔŋndo lɔɔlɔɔ a diomnde Chɛhowa mɛi le numndeŋ. Nduyɛ chɛl mi nyɛ o nyɛ kuuna num fandaa sɔlaa le!