Yɛɛ Baabuiyo Dimi yɛ a Chiɛɛniŋndo Okɔɔ?

Mi siɔmbulaŋ la wa wanaa bɔɔbɔɔ le suɛi a chiɛɛniŋndo okɔɔ. Kɛ te Baabuiyo wa pɛ suɛi a chiɛɛniŋndo okɔɔ, mbo tɛɛsiaa ndi o nɛi lebɛɛ niŋ, kɛ o viŋ naa tonyaa le. Miŋ sɔla tɔnɔɔ tau o nyɛ o dimi wo niŋ. Hei bii naa kɔndɔfili le kanifuule, Chɛhowa toosiaa naa ni. Nduyɛ o sina nyɛ bɛnda le naa wo. O chɔm naa nyɛ naŋ tosa miŋ nɛŋi ndu kɔllo, a nyɛ mala naa miŋ tuei yoomoo yeela lefafɛɛŋ ndo.

1. Vɛɛ Chɛhowa yiyaŋ yɛ a chiɛɛniŋndo okɔɔ?

Ke fula Chɛhowa o ba wo chiɛɛniŋndo cho ni. Kɛ pɔnɔɔ a lanɔɔ kinɛi o yeema ni ma tuei ndu yeela. Kioo hoo tosa ma velu chuauwa, nduyɛ ma peelu yeemaŋ ndaŋ o nɛi teŋgeŋndo niŋ. Lelaŋ pɛŋ Diom Mɛlɛkaa dimi ni aa: “Naŋ kɔl a laa num nya chal boondii ŋ wa wɔ chua piaandu ve.” (Pulɔwaa 5:​18, 19) Chɛhowa yeema mi Kilisiɔŋnda lo o lediom a wana nda chal o nɔɔ niŋndo. Koŋ cho ni maa, fɛɛŋ bɛɛ a nɔ ma suunda le.​—Nuawɔ Hibuluiya 13:4.

2. Yɛɛ cho yɛ kaa ihini nɔɔlɛiyo?

Baabuiyo dimul naa maa, “wanaa kaa ihini nɔɔlɛiya . . . luei niŋ o Masale Mɛlɛkaleŋ niŋ te.” (1 Kɔliŋtiaŋ 6:​9, 10) O Baabuiyo niŋ, diom wanaa poonyiaa yaula maKilikiilaŋ nda soliŋ kpeku le tɛɛsiaa kaa ihini nɔɔlɛiyo wo cho pɔniaa ni. Nyɛ diomndo hoo sim ndo cho ni, (1) tiɔmɔɔ ɔɔ hinilaŋa nya wana nya cho o nɔ niŋ te wo, (2) wana pɔnɔɔ nda wana pɔnɔɔ ɔɔ wana lanɔɔ nda wana lanɔɔ hiniei tosaa, a (3) hinilaŋ a chɔloo. Te ŋ “wou laba o kaa ihini nɔɔlɛiyo niŋ te,” miŋ nɛŋi Chɛhowa kɔl nduyɛ mbo wa tɔnɔɔ le naa.​—1 Tɛsaloniaŋ 4:3.

CHƆƆLU YAASIAA

3. Nyaanuŋ kaa ihini nɔɔlɛiyo

Mi Choosɛ nyaanuŋ chua ndoo yeema le ma wa nda ndu wo. Nuawɔ Chɛnɛsee 39:​1-12, okoŋ mi la suukaŋ o nyunalaŋ ndaŋ choo:

• Yɛɛ tosa yɛ mi Choosɛ nyaanuŋ?—Tofa sɔɔŋ 9.

• A yiyaŋ pa maa kɛɛsiaa kɛndɔɔ Choosɛ tosa ni? Le yɛɛ ŋ dimi yɛ lende?

VIDUEIYO: Wou Ba o Suundaa Niŋ Te (5:06)

Chɛhowa yeema naa kpou miŋ nyaanuŋ kaa ihini nɔɔlɛiyo. Nuawɔ 1 Kɔliŋtiaŋ 6:​18, okoŋ mi la suukaŋ o nyunalaŋ ndaŋ choo:

• Sɔɔŋ kuɛɛ tosa yɛ mi waŋndo luei balaŋ o kaa ihini nɔɔlɛiyo niŋ?

• Vɛɛ ŋ nyaanuŋ yɛ kaa ihini nɔɔlɛiyo?

4. A nɔla ma fafaŋ tɔɔndaŋndo

VIDUEIYO: Wa Diomndaŋ Veeloo o Baabuiyo Niŋ le Tɔɔndaŋndo Simullo (3:02)

• Mɛɛ puaapilɛnɔɔ o vidueiyo hoo niŋ sina maa, yiyaŋnda ndɔlaŋ a kaala ndɔlaŋ la nɔla mi la tosa mbo mɛi laa ndɔ mbo suunda, yɛɛ o tosa yɛ?

Kilisiɔŋaa cho Mɛlɛka piɛiyo o laalaŋndo choo wa bɛɛ, lepum ma che ndi ikala le yiyaŋnda ndalaŋ kɛsioo la diandaa. Yɛɛ mala yɛ num ma fafaŋ yiyaŋndo o sɔɔŋ nɔɔlɛiyoŋ choo? Nuawɔ Filipiaŋnda 4:​8, okoŋ mi la suukaŋ o nyunalaŋ ndaŋ choo:

• O sɔɔŋ kuɛɛ choo naŋ nɔ yɛ miŋ wa yiyaŋndo?

• Vɛɛ diomndaŋ veeloo o Baabuiyo niŋ a walta Chɛhowalaŋ tosaa, la mala yɛ naa miŋ fafaŋ sɔɔŋ luei naa o hakioo niŋndoŋ?

5. Mi sawala Chɛhowalaŋ la chuu naa tɔnɔɔ

VIDUEIYO: Ndoo Nɔ Kɔl Kalu Le (9:31)

• Vɛɛ po feleŋgɔnɔɔ hoo luei yɛ ndupila o tɔɔndaŋndo niŋ?—Tofa Pulɔwaa 7:​8, 9.

• A mɛɛ Pulɔwaa 7:​23, 26 dimi yɛ, mi kaa ihini nɔɔlɛiyo luei naa o bahawɛilaŋ niŋ tau. Te ŋ kindiŋ pɛ le waa a diandaa, bahawɛila kuɛɛ naŋ fafaŋ yɛ?

• Vɛɛ kaa diandaa mala yɛ naa miŋ tuei yoomoo yeela lefafɛɛŋ?

Baabuiyo dimi maa wana pɔnɔɔ nɔ mbo hini a chaaŋ ndɔ wana pɔnɔɔ le. Kɛ waŋnda apum yiyaŋ maa, nyɛ Baabuiyo dimi hoo wo bɛnda le. Mɛlɛka nɔ kaalaa wo Chɛhowa cho ni. Nduyɛ o yeema mi wana o wana tuei yoomoo yeela lefafɛɛŋ. Le mi hei yɔŋnuŋ, mɛɛ miŋ bii sawala ndɔlaŋ. Nuawɔ 1 Kɔliŋtiaŋ 6:​9-11, okoŋ mi la suukaŋ o nyunaa hoo choo:

• O yiyaŋ Mɛlɛkaa niŋ, baa waŋ piaanduaa hini a waŋ piaanduaa wa koni cho o kaa ihini nɔɔlɛiyo choo ni?

Le miŋ nɛŋi Mɛlɛka kɔl, naa kpou nɔ miŋ tosa siŋgaŋndaŋ. Baa tɔnɔɔ cho pa o hei niŋ? Nuawɔ Sam 19:​8, 11, okoŋ mi la suukaŋ o nyunalaŋ ndaŋ choo:

• A yiyaŋ pa maa sawala Chɛhowalaŋ la naŋ? Le yɛɛ ŋ dimi yɛ lende?

SƆƆŊ KULLOŊ

Ke fula Chɛhowa o ba le pɔnɔɔ a lanɔɔ wo chiɛɛniŋndo cho ni.

Nyunala miiŋgaa choo laŋ

• Sɔɔŋ kuɛɛ cho yɛ o kaa ihini nɔɔlɛiyo niŋ?

• Yɛɛ cho yɛ naa mala le miŋ fafaŋ kaa ihini nɔɔlɛiyo?

• Te ŋ tol pɛ sawala Chɛhowalaŋ kɔɔli, tɔnɔ yɛɛ naŋ sɔla yɛ?

CHƆƆLU SƆƆŊ PUM TOFA

Yaasiaa wɔ ma sina te i cho pɛ ikɛndɛ Mɛlɛka o hɔl, le mi wana pɔnɔɔ a wana lanɔɔ chal ma soli bɛɛ yau nɔ le.

“Baa Baabuiyo Chɛl Pa le Mi Wana Pɔnɔɔ a Wana Lanɔɔ Wa Diompilɛ Ma Soli Bɛɛ Yau Nɔ Le?” (Kɔ o tɛɛŋgei choo)

Baabuiyo dimi maa o bɛnda mi wana pɔnɔɔ tosa hiniei a chaaŋ ndɔ wana pɔnɔɔ le. Kɛ baa koŋ chɔm ni maa ŋ nɔ miŋ tul wanaa waa lende leyɛ? Pɛɛku wɔ ma sina.

“Baa Wana Pɔnɔɔ Nɔ Pa Mbo Wa a Chaaŋ Ndɔ Wana Pɔnɔɔ?” (Kɔ o tɛɛŋgei choo)

Pɛɛku wɔ ma sina mɛɛ sawala Mɛlɛka dɔu a chiɛɛniŋndo okɔɔ laŋ la manda naa yɛ.

“Yeemɛi Ihiniei Kpeeŋiaa a Sondo, Hiniei Kpeekpei I Cho Ni?” (Kɔ o tɛɛŋgei choo)

Tofawɔ suɛi yɔŋnaŋnde hei, “Ma Ke Ya Bɛɛleŋ.” Okoŋ, ma che nyɛ tosa mi po ndoo hini a chaaŋ ndɔ wana pɔnɔɔ wo siŋga yiyaŋ ndɔɔ le mbo nɛŋi Mɛlɛka kɔllo wo.

“Baabuiyo Siŋga Yoomulaŋ” (Bandu Mɛŋgɛlaa, Nyaakuɛiyo 1, 2011)