Kindiŋ Ma Tiu Kɔl Numndo Ba

1, 2. (a) Yɛɛ wa yɛ fulamakɔɔlioo te ŋ tiu kɔl naa ba le? (b) Le yɛɛ o bɛnda yɛ miŋ soo a kɔllo baa tiuwo?

KƆL NUMNDO BAA TIUWO cho suliŋ Chɛhowa mala naa le miŋ sɔla wo ni. (Kaleesiaŋnda 5:​22, 23) Chɛhowa nɔ biondɔŋ o kɔl ndɔɔ baa tiuwo niŋ te. Kɛ naa miŋ benduŋ kanifuule wanaa lahakiaa naŋ cho ni. O dimi niŋ, wanaa tiu kɔl ndaa ba le wa tosa hau ma luɛi o kpundɛla bɔɔbɔɔ niŋ. O tosa waŋndo mbo dɔɔŋ tamala a sɔɔŋ sɔvɛ o nɔ le tosaa woŋ. Mbo tosa vɛlɛ o dii dɛnɛ o sukuu ɔɔ o wallo niŋ te. Te waŋndo tiu kɔl ndɔɔ ba le, o tosa ndu vɛlɛ mbo dimi diomnda wɔɔŋndaŋ, kolɔɔ bɛɛtambɛiyo, sɔŋgɔlaŋ, kɛyaŋndo o nɔɔ niŋ, kueela fondolaŋ biyɔɔ, kaa luɛi waŋndo o koowaŋ niŋndo, dɔuwɔɔ num o chiɛi manyumndo niŋ, saŋgaa o kɔllo niŋ, naala waŋnda sɔla o kaa ihini nɔɔlɛiyo niŋndo, vɛlɛ a foli ŋ ve kɔl te wo.—Sam 34:​11-14.

² Wanaa tiu kɔl ndaa ba le wa mɛli kpundɛlaŋ le ndapila vɛlɛ a wanaa cheleŋnda. Nduyɛ mɛɛ teleŋndo hiau fau, mi i simnuŋ niko kpendekele maa wanaa tiu kɔl ndaa ba kposoŋ te wa nda cho niŋ ni. Hei nɔ mii bii naa kɔndɔfili le kanifuule, Diom Mɛlɛkaa dimi maa kɔl ba tiuwaa lepɛŋndo cho wa taamasioo opilɛ le chɔmndo maa ŋ cho o “palɛi mɛɛlɛi” niŋ.—Timoti Diiŋ Ndɔɔ 3:​1-3.

3. Le yɛɛ naŋ nɔ yɛ miŋ tiu kɔl naa ba?

³ Le yɛɛ naŋ nɔ yɛ miŋ tiu kɔl naa ba? Le sabula sɔvɛlaŋ la tiɔɔŋ. O tasoo, wanaa tiu yiyaŋnda ndalaŋ ba wa vɛlɛ a mɛɛ nda tuunuŋ sɔɔŋ o kɔllɛ luei o bahawɛila bɔɔ niŋ te. O wa vɛlɛ tɛtɛlɛ le nda ma tosa chaŋyɛi kɛndɛi nduyɛ ma kpakpala kɔl tuu bɛndoo, buulaŋndo ɔɔ kɔl tambɛiyo. O diiŋ ndɔɔ, le loo maa chaaŋaa Mɛlɛkaa, ŋ nɔ miŋ simul tɔɔndaŋndaŋ nduyɛ miŋ mal yiyaŋnda wɔɔŋndaŋ. Keŋ Adam nda Ifi kɛɛ le tosaa ni. (Chɛnɛsee 3:​6) Maa Adam nda Ifi, wanaa bɔɔbɔɔ hau nɔ bahawɛi bɛndu bɛndoo o hei niŋ kanifuule, a nɔla ma tiu kɔl ndaa ba le.

4. Kɔl dɛɛniaa yɛɛ cho yɛ le wanaa che ndi ikala le yeemaŋ ndaŋ wɔɔŋndoŋ ba tiuwo wa?

⁴ Chɛhowa sina maa wanaa lahakiaa naŋ cho ni nduyɛ o cho suɛi kpɛdɛ le miŋ tiu kɔl naa ba le. Kɛ o yeema mbo mala naa miŋ soliŋ yiyaŋnda wɔɔŋnda laŋ o kɔl. (Masaa Bɛnduaa Tasiaa 8:​46-50) Maa Chaaŋ naa kaalaa, o cho wanaa i cho ikala kpoke le yiyaŋnda ndalaŋ baa tiuwo wa kɔllo dɛɛniaa o nɛi kaalaa niŋ. O buŋgɛi hei niŋ, ŋ cho taamasi Chɛhowaa pɛɛku le kɔllo baa tiuwo. Ŋ cho vɛlɛ yaasiaa taamaseliila kɛndɛlaŋ a la wɔɔŋndaŋ o Baabuiyo niŋ, nduyɛ miŋ miŋgi hɔlteŋ keeku o kɛɛsiaala kɛndɛla mala naa laŋ choo.

CHƐHOWA KƐSUL NAA TAAMASELIIYO

5, 6. Taamaselii yɛɛ Chɛhowa kɛsullɛ naa le kɔllo baa tiuwo?

⁵ Kɔl ba tiuwaa Chɛhowaa nɔ biondɔŋ te, kanifuule o cho wana haki le. (Ditɔnɔmii 32:​4) Naa yɛ wanaa lahakiaa naŋ cho ni. Kɛ ŋ nɔ miŋ yaasiaa mɛɛ Chɛhowa tiu kɔl ndɔɔ ba yɛ le halikpeŋ miŋ tol taamaselii ndɔɔ kɔɔli nyɛkɛndɛi. Hei cho naa mala le sinaa nyɛ naŋ nɔ miŋ tosa wo te sɔɔŋ tɛɛmbuu naa kɔllo woŋ yɔŋnuŋ pɛ. Ɔɔ taamaseliilaŋ la tiŋ a mɛɛ Chɛhowa tiu kɔl ndɔɔ ba yɛ?

⁶ Yiyaŋndɔ a nyɛ Chɛhowa ndoo tosa teleŋ Setana simul ndu o kpeloo niŋ Idɛŋ ndo. Wana che pɛ maa mi suɛi nyina wɔɔŋndo tosa keŋnde tosa mi kɔndɔfillo bii buɛiyaa Mɛlɛkaa o choo choo niŋ. Ma duaŋ tumbe nduyɛ ma tambu kɔl. Naapum mi num bɛɛ yiyaŋ lende te ŋ tofa pɛ saŋga Setana tusi naa choo wo. Kɛ Chɛhowa tosa isɔɔ o foofo loŋ te. Mbo yɔŋgu muli sɔviɔɔ. Chɛhowa keleŋa tumbe dɔunɔŋ nduyɛ mbo bii simul Setana wo o nɛi ndii bɛnda le wo choo le. (Ɛsɔdɔɔ 34:​6; Choobu 2:​2-6) Le yɛɛ? Chɛhowa chɛl mi teleŋndo hiau kanifuule, o yeema mi wana o wana sɔla tambei le. Kɛ “o hɛnaŋ mi wana o wana o mal yɔŋnda ndɔla wɔɔŋndaŋ.”—Pitɛ Diiŋ Ndɔɔ 3:​9.

7. Yɛɛ taamaselii Chɛhowaa pɛɛku yɛ naa?

⁷ Taamaselii Chɛhowa wo cho naa pɛɛkoo maa ŋ nɔ miŋ yiyaŋ fɛŋ nyɛkɛndɛi tuupa miŋ soo nduyɛ ŋ nɔ miŋ tuulu kɔl chɔ chɔ le. Lelaŋ, te a nɔ pɛ le kɛɛsiaa sɔviɔɔ tosaa, chua fɛŋ teleŋndo ma yiyaŋ nyɛkɛndɛi. Piɛi le taasioo le ma soo ɔɔ ma tosa suɛi kɛndɛi. (Sam 141:​3) Te ŋ dɔɔŋ tumbe pɛ ɔɔ mi waŋndo pilaŋ naa tana, i wa tɛtɛlɛ le miŋ tosa suɛi wɔɔŋnde. Nduyɛ mi wanaa bɔɔbɔɔ tambu kɔl o mɛɛlulaŋ le nyɛ nda tosa a yiyaŋ fɛŋ te wo.—Pulɔwaa 14:​29; 15:​28; 19:​2.

TAAMASILA KƐNDƐLAŊ A LA WƆƆŊNDAŊ BUƐIYAA MƐLƐKAA TƐƐŊ

8. (a) Kuɛɛ naŋ saaluŋ yɛ taamaseliila kɛndɛlaŋ le kɔllo baa tiuwo? (b) Yɛɛ mala yɛ Choosɛ mbo kpakpala tɔɔndaŋndo mɛɛ lanɔɔ Pɔtifa wa kindiŋndo le ma wa nda ndu? (Tofa fotueiyo o peele naŋ kandu leŋ choo.)

⁸ Taamaseliila kuɛɛ o Baabuiyo niŋ chɔm yɛ maa i cho suɛi sɔvɛ le kɔllo baa tiuwo? O tase wana yiyaŋndo cho po Chekɔpu wo ni, Choosɛ. Mbo kpakpala tɔɔndaŋndo boondii o wa wallo o chiɛi wana ndɔ bɛndoo niŋndo, Pɔtifa. Pɔtifa wa masaa le buɛiyaa Felo wa ni. Mi lanɔɔ Pɔtifa nɔ yeemɛi tau le Choosɛ kanifuule, “oo naŋ, wana aa che ndu dɔɔ pɛ, nyɔɔ hɛnaŋ num.” Nduyɛ teleŋnda bɔɔbɔɔ o wa kindiŋndo le ma wa nda ndu. Yɛɛ mala yɛ Choosɛ mbo kpakpala tɔɔndaŋ koŋ? Naapum o chua fɛŋ teleŋndo mbo yiyaŋ nyɛkɛndɛi nyɛ wa niŋ fulamakɔɔlioo wo te o yɔŋ pɛ mbo chɛl chuaa hoo diom. Okoŋ, mɛɛ o saa ndu domaa lekɔɔ, mbo nyaanuŋ ndu. Mbo dimi aa, “Vɛ mi tosa suɛi kɔl vesɛi bɛnduii waa lende? Vɛ mi tosa yɔŋ wɔɔŋ waa lende Mɛlɛka o hɔl?”—Chɛnɛsee 39:​6, 9; nuawɔ Pulɔwaa 1:​10.

9. Vɛɛ ŋ bɛɛndiaŋ yɛ le tɔɔndaŋndaŋ kpakpalaa?

⁹ Yɛɛ naŋ pɛɛku yɛ o taamaselii Choosiɔɔ niŋ? Te tɔɔndaŋndo komal naa pɛ le sawa Chɛhowaa tɛɛmboo, mɛɛ miŋ kpakpala ndu. Tuupa miŋ simnuŋ Seiyaa Chɛhowaa, a bɔɔbɔɔ mi ndaa de nyɛdiaa hiouwɔɔ ba, kolɔɔ bɛɛtambɛiyo, kumnde sɔsaa, kooma wana chua a ve o numpila niŋ te waŋ, kaa ihini nɔɔlɛiyo, ɔɔ bahawɛila cheleŋndaŋ. Mi che bɛɛ waŋnda apum yiŋ niŋ, kɛ naapum ma kuɛ le delɔɔ o tɔɔndaŋndo niŋ le sɔɔŋ muŋ tosaa. Te keŋ yɔŋnuŋ num pɛ, sim ndɔ kpɛ ma yiyaŋ maa chaŋyɛi numnde nya Chɛhowa tɛɛŋ cho tambu te a del pɛ o tɔɔndaŋ koŋ niŋ. Kindiŋ ma mɛɛndaŋ sɔɔŋ keleŋa num wou o tɔɔndaŋndo niŋndoŋ, nduyɛ ma tosa kɛɛsiaa mɛɛ ŋ kpakpala muŋ yɛ. (Sam 26:​4, 5; Pulɔwaa 22:​3) Te tɔɔndaŋ waa lende komal num pɛ, nyuna Chɛhowa le mbo ke num taasioo nduyɛ ma tiu kɔl numndo ba le tɔɔndaŋ koŋ kpakpalaa.

10, 11. (a) Yɛɛ yɔŋnuŋ yɛ feleŋguaa bɔɔbɔɔ o sukuu? (b) Yɛɛ mala yɛ Kilisiɔŋaa feleŋguaa ma kpakpala tɔɔndaŋndo le sawala Mɛlɛkalaŋ tɛɛmboo?

¹⁰ Nyɛ yɔŋnuŋ Choosɛ wo yɔŋnuŋ Kilisiɔŋaa feleŋguaa bɔɔbɔɔ hau. Taamaseliiyo opilɛ cho Kim ni. Teleŋnda bɔɔbɔɔ mi chaaŋaa nduaa nda wa o sukuu wa ndaa pɛɛluŋ a mɛɛ nda tosa hiniei o lɔɔ mɛɛlulaŋ yɛ. Kim ndoo nɔ sɔɔŋ waa lende le dimi le. Mbo dimi maa mi waa teŋgeŋ tosa mbo yiyaŋ maa “o cho ndupilɛ nduyɛ maa o nɔ wana le.” Teleŋndaŋ lapum mi chaaŋaa nduaa kaŋ ndaa che ndu maa diɔmndo o cho ni kanifuule, ndoo nɔ sama le. Kɛ taasioo pila Kim ndoo nɔ ni. Mbo sina maa mi yeemɛi kala kalɛi wa naa o kɔl le hiniei tosaa boondii wana wa feleŋgɔnɔ ve. (Timoti Diiŋ Ndɔɔ 2:​22) Mi sukuuwaa cheleŋ ndaa nyuna te chuaambɔ yufuaanɔɔ kpeekpei o cho wɔ ni. Mi ndoo soliŋ teleŋ koŋ kpeku le tɛɛsiaa sabu o kɛɛ hiniei tosaa wo. Ŋ cho bɔɔ a kɔl kɛndɛ le Kilisiɔŋaa feleŋguaa nɔ kɔl sikpaa le kiɔɔ kaa ihini nɔɔlɛiyo tosaa wa. Nduyɛ Chɛhowa bɛɛ naŋ kɔl a nda!

¹¹ Baabuiyo ke naa vɛlɛ taamaseliilaŋ a wanaa kɛɛ tɔɔndaŋ kaa ihini nɔɔlɛiyo kpakpala wa. Nduyɛ mbo chɔm fulamakɔɔli wɔɔŋ yɔŋnuŋndo te ŋ nɔla kɔl naa baa tiu le. Te a wa pɛ o bahawɛi pilɔɔ niŋ maa Kim, yiyaŋ a poombɔ diɔm Pulɔwaa bolle 7 soo a ndu okɔɔ wo. Yiyaŋndɔ vɛlɛ a Aminɔŋ okɔɔ nduyɛ a kpundɛ bɛndu yɔŋnuŋndo le kaa o tosa wo. (Saamiɛɛ Diiŋ Ndɔɔ 13:​1, 2, 10-15, 28-32) Kalaŋ chuauwa mala chuauwaa ndaa le ma tiu kɔl ndaa ba, nduyɛ ma nɔ taasioo te a wa pɛ taamaseliilaŋ ndaŋ yaasiaa a teleŋ pɛɛku leyuŋgoo.

12. (a) Vɛɛ Choosɛ ndoo tiu yɛ kɔl ndɔɔ ba teleŋ o wa nda bɛndaa nduaa wo? (b) A teleŋnda kuɛɛ naŋ nɔ yɛ miŋ tiu kɔl naa ba?

¹² A teleŋ cheleŋ vɛlɛ, mi Choosɛ kɛsi taamaselii kɛndɔɔ le kɔllo baa tiuwo. Hei yɔŋnuŋ a boondii bɛndaa nduaa hiŋ nyɛdiaa piondɔɔ Ichipi wo. Le mbo sina nyɛ cho yiyaŋ ndaa kpeekpeiyo, Choosɛ dimul nda maa pɔmbɔ nda le o cho le. Nduyɛ mɛɛ o che ndi maa o tiu lɛ kɔl ndɔɔ ba kposoŋ te, mbo mɛi bɛndaa nduaa loŋ, mbo kua naa yololiaa mbo chaŋ chaŋndo pila. (Chɛnɛsee 43:​30, 31; 45:​1) Te puaapilɛnɔɔ ɔɔ ndepilɛnɔɔ pilaŋ num tana pɛ, tol taamaselii Choosɛ wo kɔɔli le kɔllo baa tiuwo. O cho num mala a dimi isɔɔ ɔɔ ma tosa suɛi wɔɔŋ ŋ tambu kɔl o mɛɛlulaŋ ndo le. (Pulɔwaa 16:​32; 17:​27) Ɔɔ naapum a nɔ wanayaŋ sɔla solioo woŋ. Te o wa pɛ lende, mɛɛ a nɔ ma tiu kɔl numndo ba le ma fafaŋ holiaŋnda fondolaŋ tosaa a nda. Hei wa suɛi kala le tosaa. Kɛ i wa tɛtɛlɛ te a loonuŋ pɛ maa taamasi Chɛhowaa ŋ cho tolɔɔ kɔɔli ni, nduyɛ ma wa sawala ndɔlaŋ biyɔɔ.

13. Sɔɔŋ kuɛɛ naŋ pɛɛku yɛ a nyɛ yɔŋnuŋ Masaa Deeve o yoomu ndɔɔ niŋndo?

¹³ Ŋ sɔla vɛlɛ tɔnɔɔ o taamaselii Masaa Deeve wo niŋ. Mɛɛ Sɔɔ nda Siɛmɛi wa ndu mamɔɔ, Deeve dounuŋ tumbe ɔɔ mbo soliŋ kpaaya ndɔɔ kpeku nda choo le. (Saamiɛɛ Tasoo 26:​9-11; Saamiɛɛ Diiŋ Ndɔɔ 16:​5-10) Kɛ, o cho lɔɔlɔɔ fee le Deeve ndoo nɔla kɔl ndɔɔ baa tiu le. Ŋ sina hei te ŋ veelu pɛ diomndaŋ a haki o tosa a Baasiɛba wo, vɛlɛ a nyɛ o tosa teleŋ Nabal tuŋ ndu nyɛdiaa wo. (Saamiɛɛ Tasoo 25:​10-13; Saamiɛɛ Diiŋ Ndɔɔ 11:​2-4) Ŋ nɔla miŋ pɛɛku sɔɔŋ sɔviɔŋ o taamaselii Deeve wo niŋ. O tasoo, wanaa chua chilaŋ wanaa Mɛlɛkaa tɛɛŋnda nɔ kɛsɛ ma tiu kɔl ndaa ba yɔŋi nda soliŋ kpaaya ndaa kpeku o nɛi bɛnda le wo choo. O diiŋ ndɔɔ, wana o wana nɔ mbo hiu tiindaŋndo dɔuwɔɔ o ndupila niŋ, mbo yiyaŋ maa o luei o tɔɔndaŋ niŋ te le.—Kɔliŋtiaŋ Tasoo 10:​12.

SƆƆŊ SƆVƐ Ŋ NƆ MA TOSA WOŊ

14. Suɛi yɛɛ yɔŋnuŋ yɛ puaapilɛnɔ pilɛ, nduyɛ yɛɛ sɔvɛ naŋ nɔ yɛ miŋ tosa te suɛi waa lende komal naa pɛ?

¹⁴ Yɛɛ ŋ tosa yɛ le ma hiou lachi a kɔl numndo baa tiuwo? Ŋ yaasiaŋndɔ nyɛ yɔŋnuŋ Luiki wo. Mɔmbil cheleŋ huŋ kundu mɔmbil ndɔɔ amakɔɔ. Mi che bɛɛ wana kundu ndu wo ndoo nɔ di le, kɛ mbo kandu deŋioo. Mbo kindiŋ pɛɛŋ le sɔŋgaa kandɔɔ a Luiki. Mi Luiki piɛi o Chɛhowa lo le mbo pɔlul kɔllo, nduyɛ mbo kindiŋ vɛlɛ le mbo pɔlul po kundu mɔmbil ndɔɔ wo kɔllo. Kɛ mi poo hiau lachi a deŋioo. Okoŋ, mi Luiki poonyiaa nɔmbɛi mɔmbil po koŋ, mbo mɛi ndu deŋioo loŋ, mbo kuaŋnuŋ. Mɛɛ lɔɔ hiou opilɛ, mi Luiki kua miiŋgu makɔɔ tosaa o chua pumndo. Chuaa hoo yɛ, pɔnɔ ndɔ ndoo kundu mɔmbil Luiki wo ni! Mi siɔmbulaŋ la bii poo hoo, okoŋ, mbo nyɔɔlu Luiki le kaa wɔɔŋ o tosal ndu wo. Mbo suukaŋ a wanaa Luiki toosiaa yaulaŋ a nda wa le mɔmbil ndɔɔ bɛɛndiaa te o yɔŋ pɛ mbo tambu. Okoŋ, mbo kɛɛsiaa le mɔmbil ndɔɔ bɛɛndiaa o teleŋ biŋgi bɛŋgu. Mi poo hoo sɔɔŋguu le pɛɛku Baabuiyo nduyɛ mbo tuɛi ndu yeela tau. Le hei, mi Luiki sina maa o wa suɛi sɔvɛ le kɔllo pɔlullo teleŋ suɛi keŋ yɔŋnuŋndo. Nduyɛ te ndoo dɔunuŋ tumbe pɛ, fulamakɔɔlioo ve wa o kɛndɛ le.—Nuawɔ Kɔliŋtiaŋ Diiŋ Ndɔɔ 6:​3, 4.

15, 16. Vɛɛ Baabuiyo pɛɛkoo mala yɛ num a yuŋgu numndo le kɔl numndo baa tiuwo?

¹⁵ Baabuiyo pɛɛkoo teleŋ o teleŋ a kɔl naa kpou mala Kilisiɔŋnda ma hiou lachi a kɔlta ndalaŋ baa tiuwo. Loonuŋ nyɛ Mɛlɛka dimul Chɔɔsuaa wo aa, “Nduyɛ le teleŋ o teleŋ nya diiŋ kundaa le ya sooluuwo pɛ, wana pilɛ tofa o yau lasawaa niŋ, mbo tombolal waŋnda sawalaŋ. Wa laŋ pɛɛkoo le idii a ichɔl. Nyɛ o nyɛ cho o yau koŋ niŋ, wa ndu tosaa. Koŋ tosa ni mi dɛnɛ kɛndɔɔ wa num choo.” (Chɔɔsuaa 1:​8) Kɛ vɛɛ Baabuiyo pɛɛkoo mala yɛ num ma nɔla ɔɔ ma kindiŋ le kɔl numndo baa tiuwo?

¹⁶ Ŋ pɛɛku o Baabuiyo niŋ a taamaseliila chɔm tɔnɔ naŋ sɔla wo te ŋ nɔla pɛ kɔl naa baa tiuwo, nduyɛ a kpundɛ naŋ sɔla wo te ŋ tiu kɔl naa ba le. Chɛhowa chɛl mi taamaseliilaŋ ndaŋ la poonyiaŋ le sabu. (Luomaŋnda 15:​4) O wa suɛi taasi le miŋ veelu diomndaŋ, miŋ pɛɛku, nduyɛ miŋ yiyaŋ nyɛkɛndɛi a laŋ okɔɔ. Kindiŋ ma bii bila mɛɛ la piiliaŋ num a yuŋgu numndo yɛ. Nyuna Chɛhowa le mbo mala num ma dɔu sila fula o Diom ndɔɔ niŋndo o wali niŋ. Te a sina pɛ maa a tiu kɔl numndo ba o sɔɔŋ pum choo le, chɛl ndi. Okoŋ, piɛi a ndi okɔɔ, nduyɛ ma tosa wallo kalaŋ le ma tosa hiouwɔɔ lachioo. (Chemisi 1:​5) Tosa yaasiaa o yaula naalaŋ niŋ le ma saaluŋ silala kɛndɛla mala numndaŋ.

17. O nɛila kuɛɛ niŋ kalaŋ chuauwa mala yɛ chuauwaa ndaa le kɔlta ndalaŋ baa tiuwo?

¹⁷ Vɛɛ ŋ mala yɛ Chuauwaa numnda le kɔllo baa tiuwo? Kalaŋ chuauwa sina maa chuauwaa ndaa viluŋ a suliŋndo hoo le. Lelaŋ, a nɔ ma pɛɛku chuauwaa ndaa suliŋnda kɛndɛlaŋ a taamaselii ndapilaa. (Ɛfisiaŋnda 6:​4) Te a che pɛ maa chuauwaa numnda nɔla kɔlta ndalaŋ ba tiu le, nyunaŋndɔ te a cho pɛ taamaselii kɛndɔɔ kɛsioo. Te a tiu pɛ kɔl numndo ba le kɔlaŋ o wali pollo niŋ lɔɔlɔɔ, o bɔŋaŋndaŋ, a pɛɛku leyuŋgoo tosaa, mɛɛ a cho taamasi kɛndɔɔ kɛsioo le chuauwaa numnda. Nduyɛ nɔ isiooŋ le chuauwaa numnda kuunaa suɛi wɔɔŋnde tosaa le. Mi Chɛhowa kɛsul Adam nda Ifi kpeleŋndaŋ. Kpeleŋnda laŋ la wa nda mala le bɛɛleŋ chɔmndo le kpaaya Chɛhowaa. O nɛi pilɛ koŋ niŋ kpe, te kalaŋ chuauwa ke pɛ chuauwaa ndaa silaa nduyɛ ma kɛsi taamaselii kɛndɔɔ, o mala chuaambuaa ma tiu kɔlta ndalaŋ ba. Kaalaa le kpaaya Mɛlɛkaa a bɛɛleŋ le sawala ndɔlaŋ la cho nyɛm sɔviɔŋ ŋtiŋ, ŋ mala chuauwaa numnda le ma sɔla woŋ ni.—Nuawɔ Pulɔwaa 1:​5, 7, 8.

18. Le yɛɛ naŋ nɔ yɛ miŋ hɛli chaŋyaŋ naŋ a taasi?

¹⁸ O yɔŋ bɛɛ aa kalaŋ chuauwa naŋ cho ni ɔɔ ŋ nɔ ŋchuau le, naa kpou nɔ miŋ hɛli chaŋyaŋ naŋ a taasi. Te chaaŋaa numnda kaalaa pɛ Chɛhowa, a cho num dɛɛniaa le ma kɛsi kpeleŋnda kɛndɛlaŋ nduyɛ ma kpakpala kpundɔɔ. (Pulɔwaa 13:​20) Taamaseliila ndala kɛndɛlaŋ la cho num nyindɔɔ le ma tol kaa ndaa kɔɔli le kɔllo baa tiuwo. Nduyɛ o Kpeekpei niŋ, kaa num kɛndɔɔ tiuba mbo ke nda kɔl dɛɛniaa. Te ŋ tiu pɛ kɔl naa ba, Mɛlɛka cho hɛnaŋ a naa, ŋ cho yoomu naa tueiyɔɔ yeela, nduyɛ miŋ piɔu nyɛm kɛndɛŋ naŋ nɔ woŋ a wanaa naŋ kaala wa.