Chɔ Teŋgeŋndo o Waŋnda Niŋ

1, 2. Le yɛɛ yoomoo cho yɛ o kala le wanaa Mɛlɛkaa hau? (Tofa fotueiyo o peeleŋ ndeŋ choo.)

WANAA chiɔuwaa bɔɔbɔɔ cho wanaa nɔ naala taŋ waŋnda laŋ chiɔuwo. Wanaa chiɔuwaa buulaŋ a waŋnda haa kanifuule a yeema ma mala nda. Kɛ a nɔ vɛlɛ ma manda ndapila le halikpeŋ naala nda cho kindiŋndo le chiɔuwo laŋ la taŋ nda le. Naa Seiyaa Chɛhowaa nɔ simul pilɔɔ kpe. Naa bɔɔbɔɔ cho latulu a wanaa kaala ndalaŋ la cho teŋgeŋ a kaala Mɛlɛkalaŋ nda, nduyɛ miŋ tosa wallo latulu a nda. Mi hei wa ikala le naa.

² O palɛi mɛɛlɛi hei niŋ, wanaa kaala Mɛlɛka le wa cho sawala ndɔlaŋ le iwɔɔŋnde a ikɛndɛi kiɔɔ. Mi Pɔɔl, wana Chiisu vem hɔlte ndɔ wo tɛɛsiaa kaala ndala wɔɔŋndaŋ teleŋ o poonyial Timoti wo. Mi Pɔɔl dimi maa kaala wɔɔŋndaŋ ndaŋ la cho simnɔŋ tɛtɛlɛ mɛɛ naŋ sɔɔŋguu fau o mɛɛlula chieeŋndo hoo. (Nuawɔ Timoti Diiŋ Ndɔɔ 3:​1-5, 13.) Mi che bɛɛ i cho suɛi wɔɔŋ le kaala wɔɔŋndaŋ ndaŋ chɔɔ, kɛ mɛɛ waŋnda yiyaŋ yɛ, mɛɛ nda suaa yɛ, a sɔɔŋ nda tosa woŋ piiliaŋ naa. (Pulɔwaa 13:​20) O buŋgɛi hei niŋ, ŋ cho chɔ mɛɛ kaalaŋ ndaŋ la cho teŋgeŋ a kaala wanaa Mɛlɛkaa yɛ. Ŋ cho vɛlɛ chɔ nyɛ naŋ nɔ miŋ tosa le kaala wɔɔŋndaŋ ndaŋ kpakpalaa wo, te ŋ wa pɛ kindiŋndo le waŋnda malaa le Chɛhowa sinaa.

3. Wanaa suu kuɛɛ nda tɛɛsiaa yɛ o Timoti Diiŋ Ndɔɔ 3:​2-5?

³ Mi Pɔɔl poonyiaa maa “nyɛ palaa o wa niŋ bɔɔ” o palɛi mɛɛlɛi niŋ. O koŋ kɔɔli, mbo chɔm kaala wɔɔŋndaŋ 19, la cho wa tɛtɛlɛ le chɔɔ o teleŋ naa niŋndo. Kaalaŋ ndaŋ la velaŋ a la Pɔɔl poonyiaa o Luomaŋnda 1:​29-31 wo. Kɛ ŋ seeluŋ sɔɔŋ o poonyial Timoti woŋ ba o ba cheleŋ o Yaula maKilikiilaŋ o Baabuiyo niŋ te. Mbo kandu a diomndaŋ ndaŋ aa “waŋnda chieeya a nɔ niŋ.” ‘Waŋchieeyaa’ Pɔɔl wa suɛi a nda okɔɔ wa cho waŋpiaanduaa a waŋlaanduaa ni. Kanifuule, nda kpou nɔ kaala wɔɔŋndaŋ. Kɛ o cho waŋnda kpou le nɔ kaala wɔɔŋnda Pɔɔl tɛɛsiaa laŋ te. Kilisiɔŋnda nɔ kaa teŋgeŋ.—Nuawɔ Malakai 3:​18.

MƐƐ NAŊ CHE NAAPILA YƐ

4. Yɛɛ hɔlaa heelaa sim yɛ?

⁴ Mɛɛ Pɔɔl dimi maa waŋnda nɔ niŋ kaalaa le ndapila a kaalaa le kanioŋ, mbo dimi vɛlɛ maa wanaa heelaŋnda, wanaa yoŋgaa, a wanaa hɔlaa heelaa nda wa niŋ ni. Mi wanaa nɔ kaalaŋ ndaŋ nda yiyaŋ maa mɛɛ nda cho yɛ, nyɛ nda tosa wo, nyɛm nda nɔ woŋ, a foofo nda nɔ wo bɛnda mbo hiau acheleŋnda. Waŋnda haa yeema mi acheleŋnda hɛnaŋ nyɛ o nyɛ nda wa pɛ tosaa. Mi wana sinaa dɛnɛ pilɛ poonyiaa a wana suu waa ndoo okɔɔ aa, “O kɔl ndɔɔ niŋ, o nɔ maaŋ o baŋ wulaŋ le sooloo wo.” Apum dimi maa hɔlaa heelaa wɔu bɔɔ, nduyɛ wanaa nɔ hɔlaa heelaa wa yeema ma che acheleŋnda heelɔŋndo le.

5. Vɛɛ buɛiyaa ndaa dɔu tiindaŋndo o Mɛlɛka niŋnda bɛɛ chɔm yɛ kaa hɔlaa heelaa?

⁵ Chɛhowa tul kaa hɔlaa heelaa leyɛ o Baabuiyo tɛɛsiaa maa “tofa yoŋgaa” wo. (Pulɔwaa 6:​16, 17) Wana hɔlaa heelaa sɔɔŋguu pɛŋ Mɛlɛka ikɛi le. (Sam 10:​4) Kaa Masa Nyinaa Wɔɔŋnda hɔlaa heelaa cho ni. (Timoti Tasoo 3:​6) I cho suɛi kɔl tambɛi le dimioo maa, mi kaa hɔlaa heelaa piiliaŋ buɛiyaa Chɛhowaa wa lo lechoo wo chɔmndo wa. Le taamaseliiyo, Masaa Yusaya o Chuda niŋ wa tiindaŋndo dɔwɔɔ o Mɛlɛka niŋ le wɔsila bɔɔbɔɔ. Kɛ mi Baabuiyo dimi aa, “Mɛɛ Masaa Yusaya o simnuŋ masa kpaaya bɛndu, mbo luɛi yoŋgaa. Nduyɛ mi yo-ŋga ndɔ koŋ o tɛɛmbuu ndu. Kani mbo soli Mɛlɛka Yaawɛɛ, Mɛlɛka ndɔɔ diom.” Mi Yusaya luɛi o chiɛi Mɛlɛkaa niŋ le nyɛm chuŋ kɛndɔŋ lomɔɔ, nduyɛ ndoo nɔ dikeŋnaŋndo le hei tosaa le. Okoŋ kɔɔli, mi Masaa Hɛsɛkiya ndoo dɔu tiindaŋndo o Mɛlɛka niŋndo bɛɛ nɔ kaa hɔlaa heelaa, kɛ le teleŋ biŋgi.—Koloniko Diiŋ Ndɔɔ 26:​16; 32:​25, 26.

6. Yɛɛ ŋ yiyaŋ yɛ maa ndoo nyindu Deeve le hɔlaa heelaa nɔɔ? Kɛ le yɛɛ o wa yɛ wana tusiaŋ?

⁶ Mi waŋnda apum nɔ kaa hɔlaa heelaa le mɛɛ nda naŋ yɛ, le mɛɛ nda nɔ tɔɔ yɛ, le mɛɛ nda nɔ kioo le nyɛchaa lɔɔ yɛ, le mɛɛ nda nɔ kpaayaa yɛ, ɔɔ le mɛɛ acheleŋnda hɛnaŋ a sɔɔŋ nda tosa woŋ yɛ. Deeve ndoo nɔ kelaŋ ndaŋ kpou, kɛ mbo chɔm kaa tusiaŋndo haaa a yoomu ndɔɔ mɛɛlulaŋ. Le taamaseliiyo, mɛɛ Deeve dii Koolaya, mi Masaa Sɔɔ dimi maa Deeve nɔla mbo chua chua ndɔɔ o nɔɔ niŋ. Kɛ mi Deeve dimi aa, “Ya cho hoo wo, ya wa lefoo masa bɛndoo ni?” (Saamiɛɛ Tasoo 18:​18) Yɛɛ ndoo mala yɛ Deeve le waa wana tusiaŋ? Ndoo sina maa suliŋnda ndoo nɔlaŋ, ke kɛ kɛ ndoo nɔ, a dilakeŋnaŋnda ndoo nɔlaŋ, le mɛɛ Mɛlɛka wa wana tusiaŋ nduyɛ mbo muli hɔlla o ndu lo yɛ o sɔla laŋ ni. (Sam 113:​5-8) Mi Deeve sina maa nyɛ o nyɛ kɛndɛ ndoo nɔ, Chɛhowa ke ndu ni.—Tuuwɔ Kɔliŋtiaŋ Tasoo 4:​7.

7. Yɛɛ mala yɛ naa le kaa tusiaŋndo chɔmndo?

⁷ Maa Deeve, wanaa Chɛhowaa cho hau kindiŋndo le kaa tusiaŋndo chɔmndo. Mii pilaŋ naa kɔllo le sinaa maa wana tusiaŋndo, Chɛhowa, Mɛlɛka Kpou Kpou Wo cho ni. (Sam 18:​35, NW) Ŋ yeema miŋ dɔu diomndaŋ ndaŋ o wali niŋ, “Sɔɔŋ nya nɔ mi la tosa niŋ ndoŋ muŋ cho muŋ ni, nyiɛɛye nɔɔ, a kɛndɛi, a waa wana tusiaŋ, a waa wana chaa ŋwaŋ biyɔɔ, a waa wana biuwaŋ.” (Kolosiaŋnda 3:​12) Ŋ sina vɛlɛ maa wana kaala wo “ve wana yoŋga le, o ve wana daŋga le.” (Kɔliŋtiaŋ Tasoo 13:​4) Te acheleŋnda che pɛ maa ŋ tusiŋ, kɛlɛŋgaa mi nda bɛɛ yeema le Chɛhowa sinaa. Mɛɛ kaa kɛndɛ lanɔ Kilisiɔŋnɔɔ naŋ pɔnɔ ndɔ cho wana laalaŋ te wo Chɛhowa o ibuŋ yɛ, lende koni kaa tusiaŋ buɛiyaa Mɛlɛkaa naŋ waŋnda Chɛhowa o ibuŋ ni.—Pitɛ Tasoo 3:​1.

MƐƐ NAŊ BII ACHELEŊNDA YƐ

8. (a) Vɛɛ waŋnda apum che yɛ hau nilakalulaŋ wanaa velu nda wa tosallo? (b) Yɛɛ Baabuiyo dimullɛ chuauwa le tosaa?

⁸ Mi Pɔɔl tɛɛsiaa mɛɛ wanaa Mɛlɛkaa cho wa biyaŋndo vellaa velle o palɛi mɛɛlɛi niŋ yɛ. Mbo poonyiaa maa chuauwa tuii niŋ wanaa velu nda wa diom te. Hau, yaula bɔɔbɔɔ, vidueilaŋ, a sɔɔŋ nda chɔm o tɛlivisiɔŋndo choo woŋ tosa hei tɛtɛlɛ, nduyɛ maa o bɛnda mi chuauwa tosal wanaa velu nda wa nilakalulaŋ. Kɛ tonyaa cho ni maa mi nilakalulaŋ la tosa yuŋgoo pɔŋ pɔŋ, ŋgemila waŋchieeya. Waŋchieeya sina tonyaa hoo le teleŋ vilɛi. Le taamaseliiyo, o Kilisi niŋ sindɛ, te waŋndo ndoo hol wanaa velu ndu wa baa pɛ, mi dila ndoo nɔ o chalta ndɔlaŋ ndaŋ laa hɛluŋ ndu. O sawa Luomaŋnda bɛŋgu, te waŋndo ndoo hol finya ndɔ baa pɛ, yamɛi pilɛi kpe ndaa kilul ndu nda wana diiyo ni. Yaula maHibuluilaŋ a Yaula maKilikiilaŋ o Baabuiyo niŋ ke chuauwa sawaa le ma ke wanaa velu nda wa bɛɛleŋ.—Ɛsɔdɔɔ 20:​12; Ɛfisiaŋnda 6:​1-3.

9. Yɛɛ mala yɛ chuauwa le wanaa velu nda wa diikɔŋndo?

⁹ Yɛɛ mala yɛ chuauwa le ma diikuŋ wanaa velu nda wa o yɔŋ bɛɛ mi chuaambuaa balu nda wa ve keŋ tosa le? Te chuauwa wa pɛ yiyaŋndo a sɔɔŋ kɛndɛŋ wanaa velu nda wa tosal nda woŋ kpou, a nɔ ma chɔm balika melaa, nduyɛ ma nɔ yeemɛi le nda diikɔŋndo. Feleŋguaa nɔ vɛlɛ ma sinapɛŋgu maa Mɛlɛka, o cho Finyaa naa kpou wo, yeema nda ma diikuŋ wanaa velu nda wa. Te feleŋguaa wa pɛ sɔɔŋ kɛndɔŋ dimioo a wanaa velu nda wa okɔɔ, a cho chaaŋaa ndaa mala le mi nda bɛɛ diikuŋ wanaa velu nda wa. I cho tonya maa te kalaŋ chuauwa nɔ yiyaŋ le chuauwaa ndaa le, i wa ikala lepum le mi chuauwaa ndaa diikuŋ nda. Kɛ te fele-ŋgɔnɔɔ che pɛ maa wanaa velu ndu wa nɔ kaala kpeekpeiyo le ndu, mi hei mala ndu le nda diikɔŋndo o yɔŋ bɛɛ mii wa ikala. Mi puaapilɛnɔ feleŋgɔnɔɔ diolaŋ Ɔsitiŋ dimi aa, “Mi che bɛɛ mi yaa nɔ yeemɛi le suɛi wɔɔŋnde tosaa, kɛ mi wanaa velu ya wa kɛsi kpeleŋnda kɛndɛlaŋ, ma tɛɛsiaa le sabu nda kɛsi sawalaŋ ndo, nduyɛ a kilu suukaŋndo a ya le. Hei mala ya ni le nda diikɔŋndo. Mi cha maa ndaa buulaŋ le ya, nduyɛ keŋ tosa ni mi yeema le nda kɔllo nɛŋioo.”

10, 11. (a) Kaala wɔɔŋnda kuɛɛ chɔm yɛ maa waŋnda kaaliaŋ te? (b) Vɛɛ kpɛ Kilisiɔŋaa tonyaa kaala yɛ wanaa cheleŋnda?

¹⁰ Mi Pɔɔl tɛɛsiaa vɛlɛ kaala cheleŋ chɔm maa waŋnda nɔ kaala ndapila tɛɛŋ te wo. Mɛɛ o dimi maa chuauwa tuii niŋ “wanaa velu nda wa diom te,” mbo dimi vɛlɛ maa a ve niŋ wanaa sinaa ikɛndɛ le. Hei cho suɛi taasi, kanifuule, wanaa sina ikɛndɛ le wa chi sɔɔŋ kɛndɛŋ acheleŋnda tosal nda woŋ nyɛ sɔvɛ le. Mi Pɔɔl dimi vɛlɛ maa waŋnda ke niŋ Mɛlɛka lebɛɛ le. A mel niŋ wana le yɔŋ wɔɔŋ te, kanifuule, a yeema ma tosa kɔl nyuloo a wanaa cheleŋnda le. A cho wa wanaa kaŋgalaa a wanaa leyalaa. Koŋ cho ni, a cho wa sɔɔŋ dɛnɛ wɔɔŋndoŋ a sɔɔŋ kpundɔŋ dimioo a waŋnda okɔɔ, nduyɛ a Mɛlɛka bɛɛ. Vɛlɛ, a cho wa wanaa balu a chaaŋnda o sondo wa, koŋ cho ni, choola wɔɔŋ wɔɔŋndaŋ dimioo le waŋndo tɔɔ tɛɛmboo.a—Tofa tɛɛsiaa amatou.

¹¹ Buɛiyaa Chɛhowaa cho bɔɔ teŋgeŋ a wanaa bɔɔbɔɔ o chieeŋndo choo kanifuule, ma chɔm kaala kpeekpeiyo le acheleŋnda. Hei cho tonya kani masindɛ. Mi Chiisu dimi pɛŋ maa sawa pilɛ kpe wa o sɔvɛ o Sawala Muuselaŋ tɛɛŋ, mbo hiau sawaa le wanaa cheleŋnda kaalaa wo, wa sawaa le Mɛlɛka kaala ni. (Maatiu 22:​38, 39, NW) Mi Chiisu dimi vɛlɛ maa, waŋnda cho Kilisiɔŋaa tonyaa sina a kaala nda nɔ ndapila tɛɛŋndo. (Nuawɔ Chɔŋ 13:​34, 35.) Kilisiɔŋaa tonyaa nɔ pɛŋ ma kaala yaamɔɔwaa ndaa.—Maatiu 5:​43, 44.

12. Vɛɛ Chiisu ndoo chɔm yɛ acheleŋnda kaalaa?

¹² Mi Chiisu chɔm maa ndoo nɔ kaala kpeekpeiyo le waŋnda. Mbo chɔm hei teleŋ o wa kelaa o chiooŋ le waŋnda yooŋgu kɛndɔɔ dimullo a Masale Mɛlɛkaleŋ okɔɔ wo. Mbo siŋgi wanaa sumɛiya, wanaa bɛvɛiya, wanaa ŋlɛliaa, a wanaa nila baŋɔlɛiya. Mbo miŋgi vɛlɛ wanaa vi wa yoomu. (Luku 7:​22) Mi Chiisu yɔŋgu pɛŋ yoomu ndɔɔ le waŋchieeya piŋioo, mi che bɛɛ ma tul ndu leyɛ. Mi Chiisu tual taamasi Finya ndɔɔ kɔɔli le kaalaa chɔmndo. Chieeŋndo balɔɔ silɔ, Seiyaa Chɛhowaa cho taamasi Chiisoo tolɔɔ kɔɔli nduyɛ a cho acheleŋnda kaalaa chɔmndo.

13. Vɛɛ kaala naŋ chɔm acheleŋnda wo mala yɛ nda le yeemɛi nɔɔ le Chɛhowa sinaa?

¹³ Te ŋ chɔm pɛ waŋnda maa ŋ kaala nda, o cho nda nyindɔɔ ma nɔ yeemɛi le Finyaa naa o choo choo niŋ sinaa. Le taamaseliiyo, mɛɛ poo o lɛŋnde Tailaŋ ndeŋ niŋ kuɛ o bɔŋaŋ bɛndoo, mi nyɔɔ hɛnaŋ ndu a mɛɛ puaapiliaa a ndepiliaa wa kaalaa chɔmndo ndapila tɛɛŋ yɛ. Mɛɛ o miiŋgu o ndu lo chiee, mbo nyuna Seiyaa Chɛhowaa le pɛɛku Baabuiyo tosaa a ndu le diiŋ o lɔɔ bɛŋgu. Okoŋ, mbo dimul wanayaŋ ndɔŋ kpou yooŋgu kɛndɔɔ. Paŋgoŋ ŋɔmpum kinɛi hiou ni, mi poo hoo yɔŋgu suɛi nduɛi tasei le diomndaŋ veeloo o Baabuiyo niŋ o Toŋgo leMasaa. Ŋ cho pa acheleŋnda kaalaa chɔmndo? Nyunaŋndɔ aa, ‘I cho pa kindiŋndo o nɛi o nɛi niŋ le waŋnda malaa o yuŋgu nuu niŋ, o kunda nuu niŋ, a o wali pollo niŋ? I cho pa acheleŋnda chɔɔ mɛɛ Chɛhowa che nda yɛ?’

VISIAA BIYAA NDA SAA

14, 15. Kaala wɔɔŋnda kuɛɛ wanaa bɔɔbɔɔ cho yɛ chɔmndo? Vɛɛ waŋnda apum siŋga yɛ kaala ndalaŋ?

¹⁴ O palɛi mɛɛlɛi niŋ, waŋnda cho vɛlɛ kaala wɔɔŋndaŋ chɔm la naŋ nɔ miŋ kpakpala laŋ. Le taamaseliiyo, wanaa bɔɔbɔɔ cho nyɛ o nyɛ cho nyɛ kɛndɛ tul leyɛ. A cho ikɛndɛi tul leyɛ nduyɛ ma simul ndi. Wanaa kɔl vesɛiya nda cho ni. Waŋnda haa cho sɔɔŋ tosaa a yiyaŋ te, nduyɛ a buulaŋ pɛŋ mɛɛ kaala ndalaŋ la cho acheleŋnda paaliaŋndo yɛ le.

¹⁵ Wanaa bɔɔbɔɔ ndaa nɔ kaalaŋ maa visiaa biyaa wa siŋgaŋ. Mi Baabuiyo dimi maa siŋgaŋ waa naa nɔ le yɔŋnɔŋndo. (Nuawɔ Aisaya 11:​6, 7.) Bolle Baabuileŋ le soo a visiaa biyaa mɛɛ kpɔkuŋnda cho naa yɛ, maa a cho wa o kɔl nyuloo niŋ nda saa a nauwaa fɔŋnduaa. Le yɛɛ nda cho yɛ kɔl nyuloo nɔ? Baabuiyo hiou lachi a dimioo aa, “Mɛɛ mɛŋndaŋ ma cho nuaa tau tau o pee mɛŋma ihɛllo yɛ, lende sina pɛŋgu waŋnda nɔ niŋ a Mɛlɛka Yaawɛɛ okɔɔ wo o wa niŋ tau tau o chieeŋndo niŋ ni.” (Aisaya 11:​9) Visiaa nɔla ma pɛɛku a Chɛhowa okɔɔ le. Lelaŋ, bolle Baabuileŋ ndeŋ le cho suɛi a si-ŋgaŋnda waŋnda tosa niŋ o kaala ndalaŋ niŋndo.

16. Vɛɛ Baabuiyo mala yɛ waŋnda le kaala ndalaŋ siŋgaa?

¹⁶ Puaapiliaa a ndepiliaa bɔɔbɔɔ ndaa nɔ kɔl vesɛiyo maa visiaa biyaa wa cho niŋ hau wanaa kɔl nyulu. A veelu diomndaŋ a sɔɔŋ yɔŋnaŋ ndaŋ okɔɔ o suɛi lebolle hei, “Baabuiyo Siŋga Yoomulaŋ” o jw.org. Wanaa sina Chɛhowa nduyɛ ma wa ndu piɛiyo wa cho maa waŋnda haa le, a chɔm nda pila maa wanaa piɛiyaa Mɛlɛka, kɛ, mi kaala nda tosa laŋ la chɔm maa nyɛ fondoo fuu piɛile ndaleŋ le cho ni. Mi wanaa waa ndoo chɔm maa a cho Mɛlɛka piɛiyo, kɛ ma tosa sɔɔŋ chɔm maa a cho Mɛlɛka piɛi le woŋ. Kɛ o wanaa Chɛhowaa tɛɛŋ, a bɔɔbɔɔ ndaa nɔ kɔl vesɛiyo, kɛ ma ‘wounuŋ wana chieeyɛi sɛnɛi Mɛlɛka toosiaa hei le waa maa ndu pila ve. O koŋ, ma wa o nɛi tonyaa choo, koŋ cho ni, ma simnuŋ wanaa cho sakpo, nduyɛ, ma wa a yɔŋgaŋ o Mɛlɛka lo.’ (Ɛfisiaŋnda 4:​23, 24) Te waŋnda pɛɛku pɛ a Mɛlɛka okɔɔ, ma sina maa a nɔ ma tol sawala ndɔlaŋ kɔɔli. Hei mala nda ma tosa siŋgaŋndaŋ o laalaŋnda ndalaŋ niŋ, mɛɛ nda yiyaŋ yɛ, a sɔɔŋ nda tosa woŋ. O ve suɛi bɛɛŋ le siŋgaŋndaŋ tosaa le, kɛ mi nyina Mɛlɛkaa mala wanaa nɔ yeemɛi le ndu kɔllo nɛŋioo wa.

“LA HOLNUŊ WANAA WAA LENDE LE”

17. Vɛɛ naŋ kpakpala yɛ wanaa nɔ kaala wɔɔŋndaŋ nda?

¹⁷ I cho yɔŋnɔŋndo tɛtɛlɛ le teŋgeŋndo chɔɔ wanaa cho Mɛlɛka piɛiyo wa tɛɛŋ a wanaa cho ndu piɛi le wa. Ŋ nɔ miŋ wa yekeŋ yɔŋi kaala wɔɔŋnda wanaa cho Mɛlɛka piɛi le wa piiliaŋ naa. Ŋ yeema miŋ tol nɛi chɔmaa Chɛhowaa kɔɔli maa naŋ holnuŋ wanaa waa lende le, a Timoti Diiŋ Ndɔɔ 3:​2-5 tɛɛsiaa wa. I cho tonya maa ŋ nɔla miŋ kpakpala lepum wanaa nɔ kaala wɔɔŋndaŋ nda le. Lepum, ŋ nɔ le wallo tosaa latulu a nda, miŋ kuɛ latulu o sukuu a nda, ɔɔ miŋ wa a nda latulu. Kɛ ŋ nɔ miŋ yiyaŋ ɔɔ miŋ tosa sɔɔŋ maa nda le. Yɛɛ mala yɛ naa? Ŋ nɔ miŋ veelu diomndaŋ o Baabuiyo niŋ le chaŋyɛi nɛi kindioo a Chɛhowa, nduyɛ miŋ hɛli chaŋyaŋ kaala ndu woŋ.

18. Vɛɛ nyɛ naŋ dimi wo a o naŋ tosa wo mala yɛ acheleŋnda le yeemɛi nɔɔ le Chɛhowa sinaa?

¹⁸ Ŋ yeema vɛlɛ miŋ mala acheleŋnda le ma huŋ sina Chɛhowa. Nuuviaa nɛilaŋ le yooŋgu kɛndɔɔ dimioo, nduyɛ nyuna Chɛhowa le mbo mala num ma dimi suɛi bɛnda ve nduyɛ a teleŋ bɛnda wo. Ŋ nɔ miŋ dimul acheleŋnda maa Seiyaa Chɛhowaa naŋ cho ni. Nduyɛ kaa naa kɛndɔɔ cho Chɛhowa saŋgalaa chuu kɛ o cho naapila le. Chɛhowa pɛɛku naa “le mi ŋ mal kaalaŋ la simul suɛi Mɛlɛkɛi laŋ, nduyɛ, mi ŋ mal kɔl landaŋndo o nyɔɔŋ chieeŋ naŋ. Nduyɛ, i cho naa pɛɛkoo le mi ŋ wa wanaa kɛsiŋ lebɛɛ, mi ŋ wa sakpo nduyɛ, mi ŋ nɔ kaala Mɛlɛka hɛnaŋ maa ŋ tosa o chieeŋndo hoo choo laŋ.” (Taitɔɔ 2:​11, 12, 14) Te ŋ tol pɛ taamasi Chɛhowaa kɔɔli nduyɛ miŋ tosa nyɛ o yeema wo, acheleŋnda cho chɔ. Mi apum dimi pɛŋ aa, “Ŋ kɔŋnuŋ latulu naa nyaa naa ŋ cho kɔlaŋ nda, fondole, ŋ tuei maa Mɛlɛka cho nya Chuuwa kɔɔli.”—Sɛkalaya 8:​23.