Vɛɛ Bɔŋaŋnda Seiyaa Chɛhowaa La Mala yɛ Num?

Kani bɛɛ waŋndo veelu num niŋ le kɔlaŋ o bɔŋaŋnda Seiyaa Chɛhowaa? Te a kue wɔ le, naapum siooŋnde cho num wa le paale tasele ŋ cho lakɔ leŋ. Ma nyunaŋ dɔɔ aa: ‘Yɛɛ yɔŋnuŋ yɛ o bɔŋaŋndaŋ ndaŋ? Le yɛɛ la bɛnda yɛ? Le yɛɛ ya nɔ yɛ mi kuɛ?’ O suɛi lebolle hei bɛŋgu, a cho sina mɛɛ chuuŋgiaŋndo a wanaa cheleŋ mala num ma sɔɔŋguu Mɛlɛka ikɛi kpɛɛluŋ yɛ, a tɔnɔla cheleŋ ŋ sɔla o hei kɔɔli wo.

1. Le sabu yɛɛ kpeekpei naŋ kua yɛ o bɔŋaŋndaŋ?

Mi wana poonyiaa Baabui pilɛ chɔm sabu kpeekpei naŋ bii bɔŋaŋndaŋ a wanaa cheleŋ nda wo. Mbo dimi a Mɛlɛka okɔɔ aa: “I cho lasisi wanaa nduaa tɛɛŋ mi saŋgala ndu.” (Sam 26:12) Seiyaa Chɛhowaa bɛɛ kaala bɔɔ hau bɔŋaŋndaŋ biyɔɔ diompilɛ. Chieeŋndo balɔɔ silɔ, ma chuuŋgiaŋ o lɔɔ o lɔɔ bɛŋgu le pɛɛkoo a Mɛlɛka okɔɔ, le chondoŋ a piɛleŋ. A teleŋndaŋ lapum o wɔsioo niŋ, ma chuuŋgiaŋ o bɔŋaŋnda bɛndaŋ le Mɛlɛka piɛiyo.

2. Te a kuɛ pɛ o bɔŋaŋnda naalaŋ, yɛɛ ŋ cho yɛ pɛɛku?

Diom Mɛlɛkaa naŋ pɛɛku o bɔŋaŋnda naalaŋ ni. ‘Ma tɛɛsial waŋnda ndu le ma sina ndu pɛŋgu walaŋ.’ (Nuawɔ Nɛhimaya 8:8.) Te a kuɛ pɛ o bɔŋaŋnda naalaŋ, a cho pɛɛku a Chɛhowa okɔɔ, vɛlɛ a suliŋnda ndɔla kɛndɛlaŋ. Te a hiou pɛ lachi a sinaa mɛɛ kpɛ o kaala num yɛ, a cho ndu sɔɔŋguu ikɛi kpɛɛluŋ. A cho vɛlɛ sina mɛɛ pɛɛkula ndɔlaŋ la mala num ma wa a kɔl nyulu yɛ.​​—Aisaya 48:​17, 18.

3. Vɛɛ wanaa ŋ cho komal o bɔŋaŋnda naalaŋ nda mala yɛ num?

Chɛhowa dimul naa le miŋ wa “yiyaŋndo a chaaŋaa naa vellaa velle, okoŋ, miŋ kpeeŋiaŋ le kaalaa a walta kɛndɛlaŋ tosaa.” Le hei, o cho naa dɛɛniaa maa naŋ “malnuŋ kɔlaŋ o bɔŋaŋndaŋ te.” (Hibuluiya 10:​24, 25) Te a kuɛ pɛ, a cho komal wanaa buulaŋ le opilɛ a o cheleŋndo wa. Nda bɛɛ nɔ yeemɛi le pɛɛkoo a Mɛlɛka okɔɔ maa num. A cho wa nda tueiyɔɔ sɔɔŋ kɔl dɛɛniaŋ cho o Baabuiyo niŋndoŋ dimioo. (Nuawɔ Luomaŋnda 1:​11, 12.) A cho vɛlɛ baltaŋ dɔwɔɔ a yembuaa, a wanaa cho o nɔlaŋ nda. Waŋnda haa cho a nyaale mi che bɛɛ a nɔ bahawɛilaŋ. Sabula Chɛhowa yeema naa miŋ wa chuuŋgiaŋndo lɔɔlɔɔ laŋ lapum koni la cho laŋ ni!

CHƆƆLU YAASIAA

4. Bɔŋaŋnda Seiyaa Chɛhowaa

O wɔsiŋ kɛmɛ tasoŋ niŋ, mi Kilisiɔŋnda ndaa chuuŋgiaŋ teleŋ o teleŋ le Chɛhowa piɛiyo. (Luomaŋnda 16:​3-5) Nuawɔ Koloosiaŋnda 3:16, okoŋ mi la suukaŋ o nyunaa hoo choo:

• Vɛɛ Kilisiɔŋnda o wɔsiŋ kɛmɛ tasoŋ niŋ ndaa bii yɛ bɔŋaŋndaŋ?

VIDUEIYO: Yɛɛ Naŋ Tosa yɛ o Toŋgo Naa leMasaa Niŋ? (2:​12)

• Vɛɛ nyɛ yɔŋnuŋ o Toŋgo leMasaa wo velaŋ yɛ a nyɛ Koloosiaŋnda 3:16 dimi wo?

• Baa a che pa nyɛ cheleŋ o vidueiyo ɔɔ o fotueiyo niŋ o hɛnaŋ num a bɔŋaŋnda naalaŋ ndo?

Nuawɔ 2 Kɔliŋtiaŋ 9:​7, okoŋ mi la suukaŋ o nyunaa hoo choo:

• Le yɛɛ Seiyaa Chɛhowaa bii wana ikani o ba o bɔŋaŋnda ndalaŋ te?

La tofa sɔɔŋ cho le pɛɛkoo o bɔŋaŋ cho hunɔɔ wo nya wana num pɛɛkaa.

• Pɛl kuɛɛ ŋ hɛnaŋ yɛ tau?

A sina pa?

O jw.org, a nɔla ma saaluŋ naa naŋ bii bɔŋaŋnda naalaŋ chieeŋndo balɔɔ silɔ wa a teleŋ naŋ bii laŋ ndo.

1. O bɔŋaŋnda naalaŋ, ma yɔŋgu sɔɔŋ, ma tosa tuulalaŋ, nduyɛ ma chɔm vidueilaŋ. Miŋ kandu laŋ a chondei a piɛileŋ miŋ chii vɛlɛ a chondei a piɛileŋ

2. O pɛltaŋ lapum o bɔŋaŋnda naalaŋ, ma nyuna wanaa challa le ma yɔŋgu mulilaŋ

3. Wana o wana cho o veelaa, yuŋgulaŋ, yembuaa, bɛnduaa yuuwɛiya, a chuaambuaa

4. Seiyaa Chɛhowaa nyuna wana le ke Mɛlɛkaa yɔŋgoo o bɔŋaŋnda ndalaŋ te

5. Sɛmbɔɔ yeemaŋ ni le kɔlaŋ o bɔŋaŋndaŋ

Yiyaŋndɔ a yuŋgu Chiisu wo okɔɔ. Chɔŋ Naasaluɛi kɔ Chulusalɛm, mi ndaa buli tiŋndo le suɛi kɔla palɛi iyaa le bɔŋaŋ iwɔsioo biyɔɔ. Nduyɛ nɛi ndaa keiyo ndoo nɔ pemboŋ tau. Nuawɔ Luku 2:​39-​42, okoŋ, mi la suukaŋ o nyunalaŋ ndaŋ choo:

• A yiyaŋ pa maa o wa suɛi bɛɛŋ le kɔlaŋ o bɔŋaŋndo hoo Chulusalɛm?

• Le yɛɛ ŋ nɔ yɛ ma kindiŋ kpoke le kɔlaŋ o bɔŋaŋndaŋ?

• A yiyaŋ pa maa a sɔla tɔnɔɔ te a kuɛ pɛ o bɔŋaŋndaŋ? Le yɛɛ?

• Le sabu yɛɛ naŋ nɔ yɛ miŋ wa kɔlaŋ o bɔŋaŋndaŋ lɔɔlɔɔ?

SƆƆŊ KULLOŊ

Kɔlaŋ o bɔŋaŋnda naalaŋ la cho num mala ma chɔɔlu pɛɛku a Chɛhowa okɔɔ, mi chaŋyɛi kpɛɛluŋnde chɔɔlu nya luɛiyɔɔ tɛɛŋ nduyɛ ma piɛi ndu a wanaa cheleŋ latulu.

Nyunala miiŋgaa choo laŋ

• Le yɛɛ Chɛhowa dɛɛniaa yɛ naa le miŋ chuuŋgiaŋ le ndu piɛiyo?

• Te a kuɛ pɛ o bɔŋaŋnda Seiyaa Chɛhowaa, yɛɛ ŋ cho yɛ pɛɛku?

• A yiyaŋ pa maa bɔŋaŋndaŋ la mala num o nɛi cheleŋ niŋ?

CHƆƆLU SƆƆŊ PUM TOFA

Baa a nɔ pa siooŋnde le kɔlaŋ o bɔŋaŋndaŋ? Tofawɔ mɛɛ laŋunɔ ndoo nɔ siooŋii waa naa wo kaala niŋ kɔlaŋ o bɔŋaŋndaŋ yɛ.

Fɛɛŋ Bɛɛ Ŋ Puɛɛnuŋ Mɛɛ Nda Yil Naa Yɛ Le (4:16)

Tofawɔ mɛɛ po feleŋgɔnɔ pilɛ tuei bɔŋaŋndaŋ yeela yɛ, nduyɛ a nyɛ mala ndu le hiouwɔɔ lachi a kɔlaŋ o bɔŋaŋndaŋ ndo

Yaa Hɛnaŋ Bɔɔ a Bɔŋaŋndaŋ! (4:33)

Pɛɛku ma sina mɛɛ waŋnda che kɔlaŋ o bɔŋaŋndaŋ nyɛ sɔvɛ yɛ.

“Le Yɛɛ Ŋ Nɔ Yɛ Ma Bii Bɔŋaŋndaŋ o Toŋgo leMasaa?” (Kɔ o tɛɛŋgei choo)

Tofawɔ suɛi yɔŋnaŋnde hei ma che mɛɛ bɔŋaŋ Seiyaa Chɛhowaa siŋga laŋunɔ dɛnɛ wɔɔŋ pilɛ yɛ.

“Yaa Kue Ba o Ba Mi Mɛi Yekpandi Nuu Kɔɔli Le” (Bandu Mɛŋgɛlaa, Suɛɛsɔɔ 1, 2014)

5. Chieeŋndo siŋgaŋ chɔŋ a wɔsi 1914

Handu VIDUEIYO.

VIDUEIYO: Chieeŋndo Siŋgaŋ Chɔŋ a Wɔsi 1914 (1:10)

Mi Chiisu dimi maa sɔɔŋ pum nɔ le yɔŋnɔŋndo o chieeŋndo niŋ te o simnuŋ pɛ Masa. Nuawɔ Luku 21:​9-11, okoŋ mi la suukaŋ o nyunaa hoo choo:

• O sɔɔŋ muŋ tɛɛŋ, i kuɛɛ num che yɛ niŋ ɔɔ ma tuɛi a ndi okɔɔ?

Mi kiilanɔɔ Pɔɔl tɛɛsiaa mɛɛ waŋnda cho wa o palɛi mɛɛlɛi niŋ yɛ. Nuawɔ 2 Timoti 3:​1-5, okoŋ mi la suukaŋ o nyunaa hoo choo:

• A che niŋ pa waŋnda kaalaŋ ndaŋ tosaa?

6. Mɛɛ Masale Mɛlɛkaleŋ le kanduŋ niŋ yɛ, ŋ nɔ miŋ tosa nyɛ

Nuawɔ Maatiu 24:​3, 14, okoŋ mi la suukaŋ o nyunalaŋ ndaŋ choo:

• Wali sɔvɛ kuɛɛ cho yɛ hau tosaŋndo le chɔmndo maa Masale Mɛlɛkaleŋ le kanduŋ niŋ?

• Vɛɛ num bɛɛ nɔla yɛ ma sɔɔŋguu le wallo hoo tosaa?

Masale Mɛlɛkaleŋ le kanduŋ niŋ. Nduyɛ paale le cho hunɔɔ masɛi waŋnda chieeya faŋa leŋ le cho niŋ kpɛɛluŋ. Nuawɔ Hibuluiya 10:​24, 25, okoŋ mi la suukaŋ o nyunaa hoo choo:

• Yɛɛ naa pilɛŋ pilɛŋnda nɔ yɛ miŋ tosa, mɛɛ naŋ cho chɔɔ maa “paale Masanɔɔ le cho niŋ kpɛɛluŋ” yɛ?