Yɛɛ Nyɛ Yau Sɔɔŋ Chɔɔmaŋndoŋ Dimi Wo Sim yɛ le Yaamɔɔwaa Mɛlɛkaa?

1. Yɛɛ yau Sɔɔŋ Chɔɔmaŋndoŋ chɔm yɛ a wanaa Mɛlɛkaa okɔɔ?

YAU Sɔɔŋ Chɔɔmaŋndoŋ chɔm maa, Masale Mɛlɛkaleŋ le kilaŋ niŋ o choo choo niŋ, nduyɛ maa a soli niŋ Setana loŋ. (Sɔɔŋ. 12:​1-9) O chɔm vɛlɛ maa, mɛɛ nda soli Setana o choo choo niŋ, mi wanaa cho loŋ nda duaunuŋ nyaale. Kɛ mi kpundɔɔ huŋ naa choo. Le yɛɛ? Kanifuule, Setana cho a kɔl tuuwo, mbo wa wanaa cho Chɛhowa piɛiyo o laalaŋndo choo o chieeŋndo choo wa chiŋalaŋndo.—Sɔɔŋ. 12:​12, 15, 17.

2. Yɛɛ mala yɛ naa miŋ lo o laalaŋ naa choo, mi che bɛɛ Setana cho naa nyɛpalaa tusioo choo?

² Yɛɛ mala yɛ naa miŋ lo o laalaŋ naa choo mi che bɛɛ Setana cho naa nyɛpalaa tusioo choo? (Sɔɔŋ. 13:​10) Nyɔɔ opilɛ o mala naa wo cho sinaa nyɛ cho yɔŋnɔŋ o chilaŋ niŋndo ni. Le tamaseliiyo, o yau Sɔɔŋ Chɔɔmaŋndoŋ niŋ, mi kiilanɔɔ Chɔŋ tɛɛsiaa salalaŋ lapum la naŋ cho hunɔɔ tueiyɔɔ yeela laŋ. O laŋ tɛɛŋ, opilɛ cho ni maa, Mɛlɛka cho hunɔɔ yaamɔɔwaa nduaa faŋa. Ŋ yaasiaŋndɔ niko miŋ che mɛɛ yau Sɔɔŋ Chɔɔmaŋndoŋ tɛɛsiaa yaamɔɔwa haa yɛ, vɛlɛ a nyɛ cho nda yɔŋnɔŋndo.

NYƐM SIM LEWUNDU LE YAAMƆƆWAA MƐLƐKAA WOŊ

3. Ɔɔ sɔɔŋ ŋpum ŋ yau Sɔɔŋ Chɔɔmaŋndoŋ soo a muŋ okɔɔ wo?

³ Suɛi tasei o yau Sɔɔŋ Chɔɔmaŋndoŋ niŋ chɔm maa, sɔɔŋ ŋpum o yauwo hoo niŋ sim lewundu le nyɛ. (Sɔɔŋ. 1:​1) Nduyɛ, visiaa bɔɔbɔɔ o yauwo hoo niŋ sim le yaamɔɔwaa Mɛlɛkaa. Le tamaseliiyo, mi yauwo hoo suaa a ‘visi biyaa fula o pee mɛŋma ihɛllo niŋndo’ okɔɔ. Nduyɛ maa visioo hoo “nɔ leelaŋ tɔ, a bolle i ŋɔmmɛu.” (Sɔɔŋ. 13:​1) Okoŋ kɔɔli, mi Chɔŋ cha “vɛlɛ visi biyaa cheleŋ fulaa lɛŋ.” Nduyɛ mbo dimi maa, wana tuei visioo hoo suɛi pɛ naŋ chaa tambalakaa ni. Mi visioo hoo tosa mi “yiŋndeŋ le fula choo choo, mi le tual o lɛŋndeŋ choo.” (Sɔɔŋ. 13:​11-13) Okoŋ kɔɔli, mi Chɔŋ cha vɛlɛ visi biyaa siaŋa sɔɔtɔtɔɔ, nduyɛ wana lanɔ suundɛiyo wa ichali o visioo hoo choo. Visiaa biyaa yaa wa haa sim le yaamɔɔwaa Mɛlɛkaa a Masale ndɔleŋ. Nduyɛ a bii niŋ chɔulabaa a Mɛlɛka le teleŋ vilɛi. Lelaŋ, i cho bɔɔ suɛi sɔvɛ le miŋ sina yaamɔɔwaa Mɛlɛkaa haa.—Sɔɔŋ. 17:​1, 3.

4-5. Yɛɛ nyɛ dimiŋ o Daaniɛɛ 7:​15-17 niŋndo mala yɛ naa le sinaa nyɛ sɔɔŋ ŋpum o yau Sɔɔŋ Chɔɔmaŋndoŋ niŋ sim lewundu wo?

⁴ Tuupa miŋ pɛɛku a yaamɔɔwaa Mɛlɛkaa okɔɔ, ŋ nɔ fɛŋ miŋ bii bila nyɛ visiaa biyaa haa a chua suundɛiyo sim lewundu wo. Nyɛ kinɛi mala naa le miŋ bii hei bila wo cho Baabuiyo ni. Yaula cheleŋ o Baabuiyo niŋ tɛɛsiaa sɔɔŋ bɔɔbɔɔ cho o yau Sɔɔŋ Chɔɔmaŋndoŋ niŋndo. Le tamaseliiyo, mɛɛ Daaniɛɛ wana ndoo suaa le Mɛlɛka wo sɔl luaŋ, mbo cha mi “visiaa bɛnduaa pum a fula o Pee Mɛŋma Ihɛllo niŋ nda hiɔɔlu.” (Daan. 7:​1-3) Nduyɛ mi Daaniɛɛ chɔm naa nyɛ visiaa bɛnduaa haa sim lewundu wo. Mbo poonyiaa maa, visiaa haa sim le masaa ɔɔ “masɛi bɛnduei” i hiɔɔlu. (Nuawɔ Daaniɛɛ 7:​15-17.) Hei mala naa le biyɔɔ bila maa, visiaa yau Sɔɔŋ Chɔɔmaŋndoŋ soo a nda okɔɔ wa bɛɛ sim le kpaayala lemasalaŋ.

⁵ Ŋ yaasiaŋndɔ niko nyɛ sɔɔŋ ŋpum o yau Sɔɔŋ Chɔɔmaŋndoŋ niŋ sim lewundu wo. Te ŋ wa pɛ sɔɔŋ muŋ yaasiaa, ŋ cho chɔ mɛɛ Baabuiyo mala naa le biyɔɔ bila nyɛ sɔɔŋ muŋ sim ndo yɛ. Ŋ cho kandɔɔ yaasiaa a visiaa biyaa yɛ yiaa okɔɔ. Nduyɛ ŋ cho sina nyɛ visiaa haa sim lewundu wo vɛlɛ a nyɛ cho yɔŋnɔŋ a nda wo. Okoŋ kɔɔli, ŋ cho yaasiaa nyɛ sɔɔŋ muŋ sim le naa wo.

YƐƐ SIM YƐ LEWUNDU LE YAAMƆƆWAA MƐLƐKAA?

6. Yɛɛ visi biyaa nɔ bolle i ŋɔmmɛu mi Sɔɔŋ Chɔɔmaŋndoŋ 13:​1-4 suaa a ndu okɔɔ wo sim yɛ lewundu?

⁶ Yɛɛ visi biyaa nɔ bolle i ŋɔmmɛu wo sim yɛ lewundu? (Nuawɔ Sɔɔŋ Chɔɔmaŋndoŋ 13:​1-4.) Wana che pɛ visioo hoo naŋ chaa tambillo ni. Kɛ peluŋ ndɔŋ, naŋ chaa peluŋ sulukoo ni. Nduyɛ sondo ndɔɔ maa sondo kpɔkuŋ. Visioo hoo nɔ leelaŋ tɔ. Nduyɛ o velaŋ a visiaa biyaa hiɔɔluaa Daaniɛɛ bolle 7 soo a nda okɔɔ wa. Ndupilɛ kpe, o nɔ nyɛ o nyɛ visiaa Daaniɛɛ bolle 7 soo a nda okɔɔ wa nɔ wo. Nduyɛ, o sim ko lewundu le masaleŋ lepilɛ le. Baabuiyo dimi maa ndu cho masaa ‘kaalaŋ, lɛŋnde, waŋnda, a sɔɔŋ maŋgalaŋ kpou choo ni.’ Mɛɛ ŋ dimi maa, visioo hoo nɔ kpaayaa mbo hiau kpaaya masa kɛ kɛ o chieeŋndo choo. (Sɔɔŋ. 13:​7) Le saboo hoo, wana che pɛ maa, visioo hoo sim lewundu le masɛi kpou o chieeŋndo choo, i cho hau waŋnda chieeya nyɛpalaa tusioo choo ve.b—Ikili. 8:​9.

7. Yɛɛ bolii ŋɔmmɛu ve hei le kɛ kɛ sim yɛ?

⁷ Yɛɛ bolii ŋɔmmɛu ve hei le kɛ kɛ sim yɛ? Ŋ tiuba miŋ sɔla mulioo o Sɔɔŋ Chɔɔmaŋndoŋ bolle 17 niŋ. Kanifuule, bolle Baabuileŋ ndeŋ le tɛɛsiaa visi biyaa nɔ bolle i ŋɔmmɛu mi Sɔɔŋ Chɔɔmaŋndoŋ bolle 13 suaa a ndu okɔɔ wo. Le tamaseliiyo, Sɔɔŋ Chɔɔmaŋndoŋ 17:​10 dimi aa: “Bolle hei sim vɛlɛ le masaa a ŋɔmmɛu: Masaa a ŋuɛɛnu del niŋ. Opilɛ cho wɔ o masaleŋ choo. Kɛ opilɔɔ ndu hiŋ ndɔ le. Nduyɛ te o hiŋ pɛ, le teleŋ biŋgi koni o wa niŋ masa ni.” Setana soliŋ niŋ hau kpaayala lemasala bɔɔbɔɔ kpeku, kɛ o laŋ tɛɛŋ kinɛi, la ŋɔmmɛu sim le bolle hei ni. Nduyɛ, kpaayala lemasalaŋ ndaŋ la cho wanaa Mɛlɛkaa a bɔɔbɔɔ nyɛpalaa tusioo choo. O palɛi kiilanɔɔ Chɔŋnde niŋ, kpaayala lemasalaŋ ndaŋ la ŋuɛɛnu ve lɛ le. Nduyɛ, lɛŋii ndii nɔ kpaayala lemasalaŋ ndaŋ o ba ve wa hei ni: Ichipi, Asiiliaa, Babilɔŋ, Mɛdo Paasiaa, a Kilisi. A teleŋ kpaaya lemasa ŋɔmpumndo wa wo kinɛi Chɔŋ che yilaŋnde hei ni. Luom ndoo nɔ kpaaya lemasaa hoo o ba ni. Mɛɛ, lɛŋnde kuɛɛ nɔ yɛ kpaaya lemasa ŋɔmmɛu wo o ba ɔɔ bolle ŋɔmmɛu leŋ?

8. Lɛŋii kuɛɛ sim yɛ lewundu le bolle ŋɔmmɛu le visi biyaa?

⁸ A mɛɛ naŋ cho chɔ yɛ, huuluŋ cho o yau Daaniɛɛ wo niŋndoŋ cho naa mala le sinaa nyɛ bolle ŋɔmmɛuleŋ le sim lewundu wo. Lɛŋnde kuɛɛ ɔɔ lɛŋii kuɛɛ nɔ yɛ kpaaya lemasa chieeŋndo o ba o palɛi mɛɛlɛi hei ɔɔ o “paale Masanɔɔ niŋ”? (Sɔɔŋ. 1:​10) Ndi cho Amɛlika a Bilitiŋ ni. Le hei, ŋ tiuba miŋ dimi maa kpaaya lemasaa hoo cho o mɛɛlaa ɔɔ bolle ŋɔmmɛu le Sɔɔŋ Chɔɔmaŋndoŋ 13:​1-4 soo a leŋ okɔɔ wo ni.

9. Yɛɛ visi biyaa ‘nɔ leelaŋ latiɔɔŋ maa saa fɔŋndɔ wo’ sim yɛ lewundu?

⁹ Sɔɔŋ Chɔɔmaŋndoŋ bolle 13 chɔm naa mɛɛ bolle ŋɔmmɛu leŋ le cho wa sɔɔŋ tosaa yɛ. Leŋ le cho yɛ Amɛlika a Bilitiŋ ni. Bolle Baabuileŋ ndeŋ le dimi maa, bolle ŋɔmmɛu leŋ le cho wa sɔɔŋ tosaa mɛɛ visi biyaa nɔ ‘leelaŋ latiɔɔŋ maa saa fɔŋndɔ kɛ mbo kandu suɛi maa tambalaka wo’ tosa sɔɔŋ yɛ. “Mi visioo hoo tosa kaamaala bɛndulaŋ. Mbo tosa pɛŋ mi yiŋndeŋ le fula choo choo, mi le tual o lɛŋndeŋ choo waŋnda kpede o hɔl.” (Sɔɔŋ. 13:​11-15) Sɔɔŋ Chɔɔmaŋndoŋ bolle 16 a 19 tɛɛsiaa visioo hoo maa, ndu cho “wana lachoowa dimi maa le Mɛlɛka o suaa ni wo” ni. (Sɔɔŋ. 16:​13; 19:​20) Mi Daaniɛɛ bɛɛ suaa a nyɛ velaŋ a heiyo okɔɔ. Mbo dimi maa, Amɛlika nda Bilitiŋ “cho tosa mi dɛnɛ tambu tau tau bɛndu.” (Daan. 8:​19, 23, 24) Hei kpeekpei yɔŋnuŋ o Chɔu Chieeŋ Diiŋ Ndɔɔ niŋ ni. Wanaa sinaa dɛniaa bɛnduaa o Bilitiŋ a Amɛlika niŋ toosiaa bɔm nda bɛndula tiɔɔŋ nda del Chepaŋ, mi chɔu koŋ chuu laŋ ni. Mɛɛ ŋ dimi maa, mi Amɛlika nda Bilitiŋ tosa mi “yiŋndeŋ le fula choo choo, mi le tual o lɛŋndeŋ choo.”

10. Yɛɛ “visi biyaa siaŋa sɔɔtɔtɔɔ” sim yɛ lewundu? (Sɔɔŋ Chɔɔmaŋndoŋ 13:​14, 15; 17:​3, 8, 11)

¹⁰ Okoŋ kɔɔli, mi Chɔŋ cha visi biyaa cheleŋ. Visioo hoo velaŋ a visi nɔ bolle i ŋɔmmɛu wo. Kɛ ndu ndu, o siaŋa sɔɔtɔtɔ o cho ni. Ma veelu ndu vɛlɛ aa: “visi biyaa.” Yau Sɔɔŋ Chɔɔmaŋndoŋ tɛɛsiaa maa ndu “cho masa ŋɔmaa wo ni.”c (Nuawɔ Sɔɔŋ Chɔɔmaŋndoŋ 13:​14, 15; 17:​3, 8, 11.) Mi Chɔŋ cha maa masaa hoo cho wa o masaleŋ choo le teleŋ tiŋ, nduyɛ ma faŋa ndu o masaleŋ choo. Okoŋ kɔɔli, mbo miiŋgu vɛlɛ o lemasa. A kɔɔna nda veelu aa UN ndo okɔɔ bolle Baabuileŋ ndeŋ le cho suɛi ni. Nduyɛ, ndu kpeekpei cho masɛi o chieeŋndo choo tooloo ni. Mɛɛ o fula o tasela ndɔ, ndu wa “League of Nations” ni. Kɛ mbo faŋaŋ a teleŋ Chɔu Chieeŋ Diiŋ Ndɔɔ. Okoŋ kɔɔli, mbo miiŋgu kpaayaa sɔla o palɛi nɛi hei niŋ.

11. Yɛɛ visi biyaa ɔɔ masaa chieeŋnda cho yɛ hunɔɔ tosa, nduyɛ le yɛɛ ŋ nɔ miŋ wa a isiooŋ le nda le?

¹¹ Visi biyaa hoo ɔɔ masɛi chieeŋnde hei, cho hau choolaŋ pɛŋgɛlaa le mi waŋnda simul Chɛhowa a wanaa nduaa. O dimi niŋ, ‘masaa haa kpou’ cho chuuŋgiaŋ o fondaŋ nda veelu o Hibuluiye niŋ aa Amakɛdɔŋ ndo le chɔuwo. Chɔuwo hoo nɔ le yɔŋnɔŋndo “o paale Mɛlɛka Kpaaya Kpou Kpou Wo choo.” (Sɔɔŋ. 16:​13, 14, 16) Kɛ siooŋii nɔ mi i bii naa le. Mɛlɛka naa Chɛhowa cho nyɛ tosa chɔ chɔ le mbo piŋi wana o wana cho masale ndɔleŋ tooloo.—Isi. 38:​21-23.

12. Yɛɛ cho yɛ yɔŋnɔŋ a visiaa biyaa haa kpou?

¹² Yɛɛ cho yɛ yɔŋnɔŋ a visiaa biyaa haa kpou? Sɔɔŋ Chɔɔmaŋndoŋ 19:​20 nɔ mulioo le nyunaa hoo. Le dimi aa: “Ma bii visi biyaa, a wana lachoowa dimi maa le Mɛlɛka o suaa ni wo. Ndu wa walta kɔndɔfiltaŋ tosaa visi biyaa o hɔl ni, mbo hui wanaa nda handu pondale visi biyaa, a wanaa sooluu velaŋ visioo hoo wa. A lo yoomu lende, ma wuu nda o fondaŋ yiŋnde wule wule bɛndoo niŋ.” Masaa haa kpou ɔɔ yaamɔɔwaa Mɛlɛkaa cho wa wɔ o lemasa, mi Mɛlɛka huŋ tɛɛmbuu nda lefafɛɛŋ.

13. Yɛɛ masaa chieeŋnda yeema yɛ niŋ naa miŋ tosa?

¹³ Yɛɛ hei sim yɛ le naa? Le mɛɛ naŋ cho Kilisiɔŋnda yɛ, ŋ nɔ miŋ chɔm lo lechoo wo o Mɛlɛka lo a Masale ndɔleŋ. (Chɔŋ 18:​36) Le hei tosaa, ŋ nɔ miŋ wa yuŋyeŋ. Ŋ nɔ miŋ wou laba o sɔɔŋ lemasa chieeŋndo niŋ ɔɔ miŋ toolu muŋ te. Hei ve bɛɛŋ bɛɛŋ le tosaa le kanifuule, masaa haa yeema niŋ miŋ toolu nda a kɔllo kpou sanaa a nyɛ naŋ dimi wo vɛlɛ a nyɛ naŋ tosa wo. Wanaa cho chɛlɔɔ le nda tooloo wa cho pondale visi biyaa hoo sɔla. (Sɔɔŋ. 13:​16, 17) Wana o wana chɛl pɛ ma handu ndu pondale leŋ, Chɛhowa niŋ kɔl a ndu le, nduyɛ o cho yoomu fafɛɛŋndo sɔla le. (Sɔɔŋ. 14:​9, 10; 20:​4) Lelaŋ, i cho bɔɔ suɛi sɔvɛ le miŋ lo yuŋyeŋ o yɔŋ bɛɛ mi masaa waa tusi naa nyɛpalaa choo.

SIƆMBULAŊ LA CHO HUNƆƆ WANA LANƆ SUUNDƐIYO BIYƆƆ

14. A mɛɛ Sɔɔŋ Chɔɔmaŋndoŋ 17:​3-5 dimi yɛ, suɛi kɔndɔfilii kuɛɛ kiilanɔɔ Chɔŋ ndoo che yɛ?

¹⁴ Nuawɔ Sɔɔŋ Chɔɔmaŋndoŋ 17:​3-5. Mi kiilanɔɔ Chɔŋ dimi maa, mi kɔndɔfillo bii ndu mɛɛ o che nyɛ cheleŋ. Yɛɛ wa nyɛ koŋ? Mbo cha chuaa ichali o visi biyaa opilɛ choo. Ndu cho ‘wana lanɔ suundɛi bɛndu’ Baabuiyo veelu aa, “Babilɔŋ Bɛndoo” wo ni. A chuaa hoo “masaa o chieeŋndo choo tosa kaa ihini nɔɔlɛiyo ni.”—Sɔɔŋ. 17:​1, 2, 6

15-16. Nɛɛ cho yɛ “Babilɔŋ Bɛndoo,” nduyɛ vɛɛ naŋ looku yɛ ndu sina?

¹⁵ Nɛɛ cho yɛ “Babilɔŋ Bɛndoo”? Chua hoo sim lewundu le kɔɔnala lemasalaŋ te. Kanifuule, o cho kaa ihini nɔɔlɛiyo tosaa a masaa waa o chieeŋndo choo. (Sɔɔŋ. 18:​9) Nduyɛ pɛŋ, i cho kpendekele maa, ndu nɔ nda kpaayaa choo ni. Kanifuule, ndu cho ichali o visi koŋ choo ni. Le handɔɔ lechoo, o cho ndu le sim lewundu le kɔɔnala leyula laŋ o chieeŋ Setanaa niŋ te. Baabuiyo soo a kɔɔnalaŋ ndaŋ okɔɔ maa, wanaa cho o laŋ niŋnda cho “yulaa bɛnduaa o chieeŋndo choo” ni.—Sɔɔŋ. 18:​11, 15, 16.

¹⁶ O Baabuiyo niŋ, kaa suundɛiyo sim le wanaa chɔm maa a cho Mɛlɛka piɛiyo, kɛ ma wa vɛlɛ nyɛm cheleŋndoŋ sooluuwo wa. Ɔɔ naapum, mi waŋnda haa tosa chaŋyɛi a chieeŋndo o sɔɔŋ cheleŋ choo. (1 Kolo. 5:​25; Chemi. 4:​4) O baa pilɔɔ choo, Baabuiyo dimi maa wanaa cho Mɛlɛka piɛiyo o laalaŋndo choo wa cho ‘a diandaa’ ɔɔ a cho ko maa “yufuaanɔ.” (2 Kɔliŋ. 11:​2; Sɔɔŋ. 14:​4) O Babilɔŋ niŋ sindɛ piɛile lachoowaleŋ lee tɔlnuŋ ni. Hei chɔm maa Babilɔŋ sim le piɛiyii lachoowɛi kpou ni. Nduyɛ pɛŋ, ndu cho kɔɔna piɛiyii lachoowɛi ni.—Sɔɔŋ. 17:​5, 18; tofa buŋgɛi hei o jw.org, “Yɛɛ Cho yɛ Babilɔŋ Bɛndoo?” O puuluei niŋ.

17. Yɛɛ cho yɛ yɔŋnɔŋ a Babilɔŋ Bɛndoo?

¹⁷ Yɛɛ cho yɛ yɔŋnɔŋ a Babilɔŋ Bɛndoo? Sɔɔŋ Chɔɔmaŋndoŋ 17:​16, 17 muli nyunaa hoo. Le dimi aa: “Leela tɔla ŋ che laŋ, a visi biyaa, a cho wana lanɔ suundɛiyo hoo yɛleŋ tul, ma poondiaa nyɛm ndɔŋ kpou, ma mɛi ndu tum fondo. A cho dialuŋ ndɔŋ dio, nduyɛ ma lom ndu chilikɔ. Mɛlɛka pila dɔu nda o lakɔl ni le ma tosa nyɛ o yeema wo.” A tonya, Mɛlɛka cho masaa waa dɔwɔɔ o lakɔl, le ma soliŋ visi biyaa sɔɔtɔtɔɔ kpeku, le Babilɔŋ Bɛndoo ɔɔ piɛiyii lachoowɛi chiŋalaŋndo, okoŋ ma tɛɛmbuu ndu. Visi biyaa koŋ cho UN ni.—Sɔɔŋ. 18:​21-24.

18. Vɛɛ naŋ chɔm yɛ maa ŋ cho Babilɔŋ Bɛndoo tooloo o nɛi o nɛi niŋ te?

¹⁸ Yɛɛ hei sim yɛ le naa? Ŋ nɔ miŋ hiou lachi a “piɛile Mɛlɛka Finya naa che maa le cho le diandaa, nduyɛ maa le nɔ sɔŋ o sɔŋ te leŋ” hivioo lachi. (Chemi. 1:​27) Fɛɛŋ bɛɛ ŋ nɔ miŋ wou balaŋ o pɛɛkula lachoowalaŋ, dunyaŋ lachoowaŋ biiloo a o kaala nɔɔlɛilaŋ niŋ te. Nduyɛ ŋ nɔ miŋ wou vɛlɛ balaŋ o walta nyinaa wɔɔŋnda niŋ te. Laŋ kpou, la tɔlnuŋ o Babilɔŋ Bɛndoo niŋ. Ŋ nɔ miŋ hiou lachi a waŋnda malaa le ma fula o Babilɔŋ Bɛndoo niŋ, yɔŋii nda wou balaŋ o kaala ndɔla nɔɔlɛilaŋ niŋ.—Sɔɔŋ. 18:​4.

MƐLƐKA CHO YAAMƆƆNƆ NDƆ BƐNDOO YAMƐI KILUL

19. Nɛɛ cho yɛ ‘tambalaka siaŋa yɔɔ cho maa le yiŋndo’?

¹⁹ Mi yau Sɔɔŋ Chɔɔmaŋndoŋ suaa vɛlɛ a tambalaka siaŋa yɔɔ cho maa le yiŋndo okɔɔ. (Sɔɔŋ. 12:​3) Mi tambalakaa hoo chɔulaba a Chiisu nda maalikɛiyaa nduaa. (Sɔɔŋ. 12:​7-9) Mbo chiŋalaŋ vɛlɛ wanaa Mɛlɛkaa, nduyɛ mbo ke masaa chieeŋnda kpaayaa. (Sɔɔŋ. 12:​17; 13:​4) Nɛɛ cho yɛ tambalakaa hoo? Ndu cho “kɛu paandu paandoo” ni. Ma veelu ndu vɛlɛ aa, “Setana a wana tɛɛmbuu chaanda tɔɔ wo.” (Sɔɔŋ. 12:​9; 20:​2) Ndu cho yaamɔɔwaa Chɛhowaa tooloo ni.

20. Yɛɛ cho yɛ yɔŋnɔŋ a Setana ɔɔ tambalakaa?

²⁰ Yɛɛ cho yɛ yɔŋnɔŋ a tambalakaa? Sɔɔŋ Chɔɔmaŋndoŋ 20:​1-3 tɛɛsiaa maa, maalikɛinɔɔ cho Setana ɔɔ tambalakaa biyɔɔ mbo wou ndu o sooŋ yiŋgilɛi nɔ lamɛɛlu le wo niŋ. Koŋ sim ni maa, Setana cho wa o biyɔɔ niŋ. Teleŋ o cho wa o biyɔɔ niŋndo, o hui lɛ niŋ ŋwaŋnda chiee le haaa mi wɔsila waa pilɛ laŋ la chuu. O mɛɛlulaŋ kpɔŋ, a cho Setana a nyinaa nduaa wɔɔŋnda wou o “fondaŋ yiŋnde wule wule bɛndoo niŋ.” Koŋ sim ni maa, a cho tambii fafɛɛŋnde sɔla. (Sɔɔŋ. 20:​10) Yiyaŋndɔ mɛɛ chieeŋndo wa niŋ yɛ, te Setana nda nyinaa nduaa wɔɔŋnda faŋaŋ pɛ o chieeŋndo choo. Teleŋ kɔl kɛndɔɔ pila wa niŋ koŋ ni!

21. Le yɛɛ naŋ nɔ yɛ miŋ wa a kɔl kɛndɛ le sɔɔŋ naŋ pɛɛku muŋ o yau Sɔɔŋ Chɔɔmaŋndoŋ niŋndo?

²¹ I cho bɔɔ suɛi kɔl dɛɛniaa le sɔɔŋ cho o yau Sɔɔŋ Chɔɔmaŋndoŋ niŋndo biyɔɔ bila! O buŋgɛi hei niŋ, ŋ sina yaamɔɔwaa Chɛhowaa a nyɛ cho nda hunɔɔ yɔŋnɔŋndo. A tonya, “wana o wana veelu pɛ diomndaŋ o yauwo hoo niŋ, kɔl kɛndɔɔ cho le ndu. Nduyɛ wana o wana yaŋ pɛ nilaŋ mbo tosa nyɛ o tueiyo, kɔl kɛndɔɔ cho le ndu”! (Sɔɔŋ. 1:​3) Te yaamɔɔwaa Mɛlɛkaa huŋ sɔla pɛ tambei, salala kuɛɛ wanaa cho loo o laalaŋndo choo wa tuɛi yɛ niŋ yeela? Ŋ cho mulioo sɔla le nyunaa hoo o buŋgɛi cho lachi ve niŋ.