Ŋ Tiuba Miŋ Wa Yoomu Lefafɛɛŋ

1. Vɛɛ yiyaŋndo o diomnde mɛyaale Chɛhowaleŋ choo le naa yoomu fafɛɛŋndo kioo piiliaŋ yɛ naa?

CHƐHOWA mɛi lediom maa wanaa cho ndu diikɔŋ nda cho hunɔɔ “yoomu fafɛɛŋndo” sɔla. (Luomaŋ. 6:​23) Te ŋ yiyaŋ pɛ a diomnde Chɛhowa mel naa leŋ ndeŋ, mi keŋ tosa mi kaala naŋ nɔ le ndu wo chɔɔlu kalu poŋ. Yiyaŋndɔ a hei okɔɔ: Finya naa o choo choo niŋ kaala naa tau. Lelaŋ fɛɛŋ bɛɛ o yeema naa miŋ faŋaŋ ndu o ibuŋ te.

2. Vɛɛ diomnde Mɛlɛka mɛi le naa yoomu fafɛɛŋndo kioo leŋ le mala yɛ naa?

² Diomnde mɛyaale Mɛlɛkaleŋ le naa yoomu fafɛɛŋndo kioo mala naa miŋ biunuŋ tɔɔndaŋnda komal naa suŋ suŋndaŋ. Nduyɛ o yɔŋ bɛɛ mi yaamɔɔwa kɔŋgɔlaŋ naa le naa diyɔɔ, ŋ mel Chɛhowa piɛiyo le. Le yɛɛ? Kanifuule ŋ sina maa te ŋ lo pɛ o laalaŋ naa choo haaa miŋ vi, o cho naa miŋgi yoomu, nduyɛ miŋ nɔ tiindaŋndo maa fɛɛŋ bɛɛ ŋ vi lɛ niŋ te. (Chɔŋ 5:​28, 29; 1 Kɔliŋ. 15:​55-58; Hibu. 2:​15) Le yɛɛ naŋ nɔ yɛ miŋ nɔ tiindaŋndo maa, ŋ tiuba miŋ wa yoomu lefafɛɛŋ? Ŋ tofaŋndɔ sabulaŋ latiŋ.

CHƐHOWA CHO YOOMU LEFAFƐƐŊ

3. Le yɛɛ naŋ nɔ yɛ miŋ nɔ tiindaŋndo maa Chɛhowa tiuba mbo tosa miŋ wa yoomu lefafɛɛŋ? (Sam 102:12, 24, 27)

³ Ŋ sina maa Chɛhowa tiuba mbo tosa miŋ wa yoomu lefafɛɛŋ kanifuule, ndu cho puundule yoomoo ni, nduyɛ o cho yoomu lefafɛɛŋ. (Sam 36:9) Tofawɔ bolii Baabuiye ipum, i chɔm maa Chɛhowa cho, nduyɛ maa o cho wa lefafɛɛŋ ndo. Sam 90:​2 dimi maa, Chɛhowa cho “le fɛɛŋ a fɛɛŋ.” Nyɛ pilɔɔ hoo kpe, Sam 102 dimi ni. (Nuawɔ Sam 102:​12, 24, 27.) Mi Habakuku, wana ndoo suaa le Mɛlɛka wo poonyiaa a Finya naa o choo choo niŋ okɔɔ aa: “Mɛlɛka Yaawɛɛ, kani bɛɛ num koni cho Mɛlɛka ni. Num cho Mɛlɛka nuu ni. Num Mɛlɛka ni [diandaa]. A cho Mɛlɛka vi le.”​—Haba. 1:12.

4. Baa ŋ nɔ pa miŋ buulaŋ te ŋ che ndi pɛ ikala le laalaŋndo maa Chɛhowa cho lefafɛɛŋ? Tɛɛsiaawɔ.

⁴ Baa ma che ndi pa ikala le biyɔɔ bila maa Chɛhowa cho yoomu “le fɛɛŋ a fɛɛŋ”? (Aisaya 40:​28) Te lende ŋ yiyaŋ ni, mɛɛ kɛsiŋ o kɔl maa o cho ko num te nɔ yiyaŋ waa lende le. Mi Ɛlihu dimi a Mɛlɛka okɔɔ maa: “Wana sina mɛɛ kpɛ o cho paanduyɛi yɛ” le. (Choobu 36:​26) Kɛ ŋ nɔ miŋ loonuŋ maa, te o yɔŋ pɛ miŋ bii nyɔɔ bila le, keŋ chɔm nuaa maa nyɛ koŋ cho le le. Le tamaseliiyo, mi che bɛɛ ŋ bii bila mɛɛ nyɛ teŋgaa looku hunɔɔ yɛ le, kɛ baa keŋ sim ni maa nyɛ teŋgaa cho le? Sako. O nɛi pilɛ koŋ choo, naapum ŋ bii bila maa Chɛ­howa cho chɔŋ o sindɔɔ niŋ, nduyɛ maa o cho wa lefafɛɛŋ te. Kɛ hei sim nuaa maa, Mɛlɛka cho le fɛɛŋ a fɛɛŋ te le. O yɔŋ bɛɛ miŋ bii bila ɔɔ ŋ bii bila le, keŋ kuuna Wana Toosiaa naa wo sɔɔŋ tosaa le. (Luomaŋ. 11:​33-36) Tuupa mi halaa a nyɛm cho leniŋndoŋ wa, mɛɛ paaleŋ le cho nuaa yɛ, Chɛhowa wa fɛŋ. Ŋ sina maa “ndu toosiaa chieeŋndo . . . a kpaaya ndɔ bɛndoo ni.” A tonya, Chɛhowa wa fɛŋ malaŋ o “pɛŋgɛla halaa choo choo.” (Chɛlui. 51:15; Walta. 17:​24) Ɔɔ sabu cheleŋ naŋ nɔ le laalaŋndo maa, ŋ tiuba miŋ wa yoomu lefafɛɛŋ ndo?

CHƐHOWA TOOSIAA NAA LE MIŊ WA YOOMU LEFAFƐƐŊ

5. Tiindaŋ yɛɛ Adam nda Ifi ndaa nɔ yɛ?

⁵ O fula o waŋnda chieeya kɔɔli, nyɛm yoomaŋ kpou o chieeŋndo choo, le teleŋ biŋgi koni Chɛhowa toosiaa muŋ ni. Pesiŋ bɛɛ Chɛhowa toosiaa wana chioo le mbo vi le. Kɛ mbo sila Adam aa: “Yɔm komɔɔ ndɔɔ tosa mi wana sina suɛi wɔɔŋnde a ikɛndɛi yo, dia ndu le pa. O paaleŋ niŋ bɛɛ te a de ndu pɛ a vi.” (Chɛ. 2:17) Te Adam nda Ifi ndaa diikuŋ pɛ Chɛhowa, a ve wu le. Mɛɛ hei chɔm maa, te teleŋ tiŋ ndoo hiou pɛ, Chɛhowa wa nda chɛlɔɔ le ma de komɔɔ “yɔm yɔŋgu yoomu fɛɛŋ fɛɛŋndo wo.” Hei sim ni maa, ndaa nɔ tiindaŋndo le ma wa ‘yoomu lefafɛɛŋ.’b​—Chɛ. 3:22.

6-7. (a) Yɛɛ cheleŋ chɔm yɛ maa, Chɛhowa toosiaa waŋnda chieeya le ma vi le? (b) Yɛɛ ŋ nɔ yɛ o kɔl le tosaa o chieeŋ sɛnɛiyo niŋ? (Tofa fotueilaŋ.)

⁶ Wanaa sinaa dɛniaa bɛnduaa apum dimi maa, hulma naŋ nyɛɛmbɔ koni naŋ soliŋ kpeku ni, le yooŋgula bɔɔbɔɔ loonɔŋndo. Kanifuule, ma tiuba mi ma kɛsi yooŋgulaŋ tau. Hei cho bɔɔ suɛi kɔndɔfili! A wɔsi 2010, mi buŋgɛi o yau pilɛ niŋ dimi maa, hulma naŋ ma tiuba mi ma manda yooŋgulaŋ hiouwɔɔ miiliɔŋndaŋ latiɔɔŋ a tɛndaa tɛɛŋ. Koŋ sim ni maa, ma tiuba mi ma kɛsi yooŋgulaŋ, mbo hiou yooŋgula wa o tɛlivisiɔŋ waŋnda tofa le hawɛilaŋ miiliɔŋndaŋ la yaa wo. Nduyɛ o kpeekpei niŋ, wana che pɛ maa, hulma naŋ ma tiuba mi ma manda yooŋgulaŋ, mbo hiou pɛŋ lende. Hei chɔm maa, Chɛhowa toosiaa hulma naŋ le mi ma manda yooŋgulaŋ tau, mbo hiou bɛɛ la naŋ manda o wɔsilaŋ 70 ɔɔ 80 bɛŋgu laŋ.​—Sam 90:10.

⁷ Mi Chɛhowa toosiaa naa vɛlɛ a yeemɛi le waa achal lefafɛɛŋ. Mi Baabuiyo suaa a waŋnda chieeya okɔɔ maa, Mɛlɛka dɔu nda yeemɛi o kɔl le “waa achal lefafɛɛŋ.” (Ikili. 3:​11, NWT) Saboo opilɛ koni cho hoo ni, le piɔmndo chɔɔ maa yaamɔɔnɔ naa o cho ni. (1 Kɔliŋ. 15:​26) Te ŋ del pɛ a naa kala kalaa, miŋ kindiŋ o nɛi o nɛi niŋ le miŋ chiɔunuŋ, lende le? Lepum miŋ kuɛ o wanaa chiɔuwaa lo, nduyɛ miŋ chua kooma nda ke naa waŋ, le halikpeŋ miŋ chɔulaba naa koŋ. Nduyɛ pɛŋ, miŋ kindiŋ o nɛi o nɛi niŋ yɔŋii naŋ sɔla piɔmndo. Te wana naŋ kaala wo vi pɛ, miŋ tambu kɔl vɛlɛ mi mɔnɛi wa naa o kɔl le teleŋ vilɛi o yɔŋ bɛɛ aa o wa o yuwɛi ɔɔ feleŋgɔnɔɔ. (Chɔŋ 11:​32, 33) A tonya, te Wana Naa Toosiaa ndoo nɔ iyeema le miŋ wa achal lefafɛɛŋ te, pesiŋ bɛɛ o ve naa yeemɛi keŋ dɔwɔɔ o kɔl te. Kɛ sabula cheleŋ la cho, la naŋ nɔ le laalaŋndo kɛsɛ maa, ŋ tiuba miŋ wa yoomu lefafɛɛŋ ndo. Ŋ yaasiaŋndɔ sɔɔŋ Chɛhowa tosa o paandoo niŋ, vɛlɛ a ŋ o cho tosaa suŋ suŋ, le naa chɔmndo maa tuu ndɔɔ le waŋnda chieeya siŋgaŋndɔ le wo.

TUU CHƐHOWA NƆ LE NAA WO SIŊGAŊNDƆ LE

8. Tiindaŋ yɛɛ Aisaya 55:11 ke yɛ naa, te o hiŋ pɛ a tuu Chɛhowa nɔ le naa wo okɔɔ?

⁸ Le haki Adam nda Ifi tosa wo, waŋnda chieeya kpou cho hau piɔmndaŋ ni. Kɛ tuu Chɛhowaa le waŋnda chieeya siŋgaŋndɔ le. (Nuawɔ Aisaya 55:​11.) Tuu ndɔɔ cho ni le wanaa cho sakpo wa yoomu fafɛɛŋndo kioo. Hei cho kpendekele te ŋ tofa pɛ sɔɔŋ o dimi niŋ, nduyɛ mbo tosa le nyɛ o tuu wo peeloo wo.

9. Diomnde mɛyaale kuɛɛ Chɛhowa ke yɛ naa? (Daaniɛɛ 12:2, 13)

⁹ Chɛhowa mɛi lediom maa o cho wanaa vi wa miŋgi yoomu, mbo ke nda dikeŋnaŋndo le ma wa yoomu lefafɛɛŋ. (Walta. 24:​15; Tai. 1:​1, 2) Choobu ndoo nɔ laalaŋndo kɛsɛ maa, Chɛhowa nɔ yeemɛi le wanaa vi wa miŋgioo yoomu. (Choobu 14:​14, 15) Daaniɛɛ wana ndoo suaa le Mɛlɛka wo bɛɛ, ndoo sina maa waŋnda chieeya cho hunɔɔ miiŋgu yoomu, ma nɔ dikeŋnaŋndo le waa achal lefafɛɛŋ. (Sam 37:​29; nuawɔ Daaniɛɛ 12:​2, 13.) Chuuwa o palɛi Chiisu ve niŋ bɛɛ ndaa sina maa, Chɛhowa tiuba mbo ke buɛiyaa nduaa lo o laalaŋ ndaa choo wa “yoomu fafɛɛŋndo.” (Luku 10:​25; 18:​18) Mi Chiisu ndoo soo a diomnde mɛyaaleŋ ndeŋ okɔɔ teleŋ o teleŋ. Nduyɛ ndu bɛɛ, mi Finya ndɔ miŋgi ndu yoomu.​—Maa. 19:​29; 22:​31, 32; Luku 18:​30; Chɔŋ 11:25.

10. O paandoo niŋ, mi Chɛhowa ke waŋnda kpaayaa le wanaa vi wa miŋgioo yoomu. Yɛɛ keŋ chɔm yɛ? (Tofa fotueiyo.)

¹⁰ Chɛhowa ke nyaa yoomaa kpou yoomoo ni, nduyɛ o nɔ kpaayaa le wanaa vi wa miŋgioo yoomu. Mbo ke Ilaacha, wana ndoo suaa le ndu wo kpaayaa le poombɔ chua pilɛ ndoo vii pɔnɔɔ o chioo Saluɛfati wo miŋgioo yoomu. (1 Masaa. 17:​21-23) Okoŋ kɔɔli, mi Mɛlɛka mala Ilaasia, wana ndoo suaa le ndu wo, le poombɔ chua pilɛ o chioo Siunim, miŋgioo yoomu. (2 Masaa. 4:​18-20, 34-37) Tamaseliilaŋ ndaŋ a la cheleŋ cho a waŋnda miŋgioo yoomu okɔɔ laŋ, la chɔm maa Chɛhowa nɔ kpaayaa le waŋnda miŋgioo yoomu. Teleŋ Chiisu wa o chieeŋndo choo wo, mbo chɔm maa Finya ndɔ ke ndu kpaayaa le keŋ tosaa. (Chɔŋ 11:​23-25, 43, 44) Suŋ suŋ, Chiisu cho niŋ o choo choo niŋ, nduyɛ Mɛlɛka ke ndu “kpaayaa nyɛ o nyɛ choo o choo choo niŋ a o lɛŋndeŋ choo.” Lelaŋ, o tiuba mbo peelu diomnde o mɛi leŋ ndeŋ maa, “wanaa cho o sɛila loonaŋndaŋ niŋnda kpou” cho miiŋgu yoomu, ma nɔ tiindaŋndo le waa ­yoomu lefafɛɛŋ.​—Maa. 28:​18; Chɔŋ 5:25-29.

11. Vɛɛ sala baŋaa tosa yɛ miŋ nɔ tiindaŋndo le waa yoomu lefafɛɛŋ?

¹¹ Le yɛɛ Chɛhowa chɛllɛ mi Po ndɔ kaalaa sɔla piɔm imɔnɔɔ? Mi Chiisu chɔm sabu koŋ mɛɛ o dimi aa: “Le mɛɛ Mɛlɛka kaala chieeŋndo tau yɛ, mbo yɔŋgu Po ndɔ pilɔɔ kpe. Nduyɛ wana o wana dɔu laalaŋndo o ndu niŋ pɛ, o cho tambii sɔla le, kɛ o cho yoomu fafɛɛŋndo sɔla.” (Chɔŋ 3:​16) Mi Mɛlɛka chɛl le mi Po ndɔɔ yɔŋgu yoomu ndɔɔ le hakila naalaŋ. Nduyɛ mi keŋ ke naa tiindaŋndo maa, ŋ tiuba miŋ wa yoomu lefafɛɛŋ. (Maa. 20:28) Mi kiilanɔɔ Pɔɔl chɔɔlu tɛɛsiaa a tuu Mɛlɛkaa hoo okɔɔ. Mbo poonyiaa aa: “Wana pilɛ tosa ni mi piɔmndo huŋ. Nduyɛ wana pilɛ cho vɛlɛ tosa ni mi wanaa vi wa miiŋgu yoomu. Mɛɛ Adam tosa mi waŋnda kpou wa wuoo yɛ, lende koni Kiliti bɛɛ cho tosa ni mi waŋnda kpou miiŋgu yoomu.”​—1 Kɔliŋ. 15:21, 22.

12. Yɛɛ Chɛhowa tosa yɛ le mi tuu o nɔ le naa wo peeluŋ?

¹² Mi Chiisu pɛɛku buɛiyaa nduaa le ma piɛi le mi Masaleŋ Mɛlɛkaleŋ le hiŋ, nduyɛ mi hɛnaŋ Mɛlɛkaa yɔŋnuŋ o lɛŋndeŋ choo. (Maa. 6:​9, 10) Tuula Mɛlɛkalaŋ opilɛ cho le mi waŋnda chieeya wa o chieeŋndo choo lefafɛɛŋ ni. Kɛ le mbo tosa hei, mbo yulu Po ndɔɔ isu, le mbo wa Masaa le Masale ndɔleŋ. Nduyɛ mbo hɛli ŋwaŋ 144,000 o lɛŋndeŋ choo, le ma kɔ wa o masaleŋ choo a Chiisu latulu o choo choo niŋ, le tuu ndɔɔ peeloo.​—Sɔɔŋ. 5:9, 10.

13. Yɛɛ Chɛhowa cho yɛ tosaa suŋ suŋ, nduyɛ yɛɛ naŋ nɔ yɛ miŋ tosa?

¹³ Suŋ suŋ, Chɛhowa cho “faŋga bɛndu bɛndoo” chuuŋgiaa, nduyɛ mbo wa nda pɛɛkoo le ma wa o Masale ndɔleŋ bɛŋgu. (Sɔɔŋ. 7:9, 10; Chemi. 2:8) Mi che bɛɛ chieeŋndo cho hau o piaa cha a sɔɔŋ ŋsiooŋndoŋ vɛlɛ a chɔulaŋ, kɛ waŋnda haa cho kindiŋndo le waŋnda kaalaa o lelɛŋ o lelɛŋ niŋ a lekaa o lekaa, ma wa yɛle tulaaleŋ soliŋndo o kɔl. O dimi niŋ, waŋnda haa cho mɔɔŋ ndaŋ chɔuwoŋ toosiaa, ma siiŋguu muŋ dɛndɛla waalaŋ. (Makal 4:3) Waŋnda haa kue o chɔu le, nduyɛ a cho acheleŋnda malaa le ma saaluŋ yoomu kpeekpeiyo sanaa a nda pɛɛkoo a Mɛlɛka tonyaa, vɛlɛ a tuu o nɔ le naa wo okɔɔ. (1 Timo. 6:​19) Lepum, mi wanayaŋ ndaŋ simul nda. Naapum yɛ, a nɔ nyɛsɔlaa bɔɔ le kanifuule, a cho Masale Mɛlɛkaleŋ tooloo. Kɛ mi Chɛhowa tosa a sabu le ma sɔla nyɛm nda hauba woŋ. (Maa. 6:​25, 30-33; Luku 18:​29, 30) Sɔɔŋ muŋ kpou chɔm maa Masale Mɛlɛkaleŋ le cho kpeekpei. Nduyɛ, le cho hiouwɔɔ lachi a tuu Mɛlɛkaa peeloo.

CHILA SƆVƐ SƆVƐLAŊ LA CHO O NƐI

14-15. Vɛɛ diomnde mɛyaale Mɛlɛkaleŋ le piɔmndo tɛɛmbuuwo lefafɛɛŋ cho yɛ peelɔŋ?

¹⁴ Suŋ suŋ, Chiisu nɔ niŋ foofo bɛndoo o choo choo niŋ, nduyɛ o cho hunɔɔ mɛɛla Mɛlɛkalaŋ kpou peelu. (2 Kɔliŋ. 1:20) Chɔŋ a wɔsi 1914, Chiisu bii niŋ yaamɔɔwaa nduaa yomɔɔ. (Sam 110:1, 2) O teleŋ biŋgi bɛŋgu, ndu nda wanaa nda cho wa o masaleŋ choo wa cho yaamɔɔwaa nduaa kpou tɛɛmbuu.​—Sɔɔŋ. 6:2.

¹⁵ O Wɔsila Waa Pilɛla Chiisu cho wa o Masaleŋ choo laŋ bɛŋgu, wanaa vi wa cho miiŋgu yoomu, mi wanaa cho hiouwɔɔ lachi a diikɔŋndo wa simnuŋ walaŋ. Te tofa mɛɛlaa chuu pɛ, wanaa cho tofa koŋ hiouwɔɔ wa “cho wa o lɛŋnde Mɛlɛka chua buŋgɛi leŋ niŋ le fɛɛŋ a fɛɛŋ.” (Sam 37:10, 11, 29) Nduyɛ i cho suɛi kɔl kɛndɛ le sinaa maa, “yaamɔɔnɔ Mɛlɛka mɛɛlu niŋ tɛɛmbuu kpɔŋ ndo cho piɔmndo ni.”​—1 Kɔliŋ. 15:26.

16. Ɔɔ sabu kpeekpei naŋ nɔ le Chɛhowa piɛiyo wo?

¹⁶ A mɛɛ naŋ che niŋ yɛ, tiindaŋ naŋ nɔ le waa yoomu lefafɛɛŋ ndo tɔlnuŋ o Diom Mɛlɛkaa choo. Tiindaŋndo hoo mala naa miŋ hiou lachi a lo lechoo wo chɔmndo, o yɔŋ bɛɛ mi sɔɔŋ kala kalaŋ komal naa o palɛi mɛɛlɛi hei niŋ. Kɛ le miŋ nɛŋi Chɛhowa kɔl, o cho ko yeemɛi naŋ nɔ le waa yoomu lefafɛɛŋ ndo le nɔ mi i nyindu naa le lo lechoo wo chɔmndo le. Sabu kpeekpei naŋ chɔm lo lechoo wo o Chɛhowa lo vɛlɛ a o Chiisu lo wo cho le mɛɛ naŋ kaala nda tau yɛ ni. (2 Kɔliŋ. 5:​14, 15) Mi hei nyindu naa miŋ tol tamasi ndaa kɔɔli, nduyɛ miŋ dimul acheleŋnda a tiindaŋ naa okɔɔ. (Luomaŋ. 10:13-15) Te ŋ mal pɛ kaayei, miŋ nɔ kɛndɛi, keŋ mala naa miŋ simnuŋ wanaa Chɛhowa yeema ma wa chaaŋaa nduaa lefafɛɛŋ nda.​—Hibu. 13:16.

17. Kalaŋ kuɛɛ naa kpou nɔ yɛ? (Maatiu 7:​13, 14)

¹⁷ Baa ŋ cho pa wa wanaa cho yoomu fafɛɛŋndo sɔla wa tɛɛŋ? Chɛhowa ke naa dikeŋnaŋndo le miŋ huŋ sɔla yoomu fafɛɛŋndo. Kɛ o lo a naapila, te ŋ lo niŋ pɛ o nɛi yaa wana o yoomoo wo choo. (Nuawɔ Maatiu 7:13, 14.) Vɛɛ sɔɔŋ wa yɛ niŋ te ŋ huŋ wa pɛ yoomu lefafɛɛŋ? Ŋ cho nyunaa hoo muli o buŋgɛi cho lachi ve niŋ.