Mɛɛ Adam nda Ifi fula o kpeloo niŋ Idɛŋ, ma vialu chuauwa tau. Po nda tasoo wa Keŋ ni. Nduyɛ wali ichiɔɔ ndoo tosa ni. Po nda diiŋ ndɔɔ wa Ebɛl ni, nduyɛ chɔluaa ndoo manda ni.

Paale pilɛ, mi Keŋ nda Ebɛl kua salalaŋ solioo o Chɛhowa lo. A sina nyɛ cho salaa wo? Ke teŋgeŋndo o cho ni. Mi Chɛhowa hini kɔl a sala Ebɛl lo, kɛ o hini kɔl a sala Keŋ ndo le. Mi hei tosa mi Keŋ tuulu kɔl tau. Mi Chɛhowa sila Keŋ maa kɔl ndɔ tuuwo cho ndu nyindɔɔ mbo tosa suɛi wɔɔŋnde. Kɛ Keŋ yeŋ ndu lani le.

Mi Keŋ dimul Ebɛl aa: ‘Huŋ kɔ o kpeloo niŋ.’ Mɛɛ nda wa nda ŋiɔɔŋ kpeele o kpeloo niŋ, mi Keŋ del pɔmbɔ ndɔ choo mbo dii ndu. Yɛɛ Chɛhowa ndoo nɔ yɛ mbo tosa o hei niŋ? Mi Chɛhowa tusi Keŋ nyɛpalaa choo, okoŋ mbo faŋa ndu yuŋgu ndɔɔ ikɛi, mbo yɔŋ ndu landaŋ. Fɛɛŋ bɛɛ o chɛllɛ mi Keŋ  miiŋgu o yuŋgu ndɔɔ lo le.

Yɛɛ naŋ pɛɛku yɛ o hei niŋ? Naapum, te sɔɔŋ ve lakɔ mɛɛ naŋ yeema yɛ le, mi hei tosa miŋ tuulu kɔl. Te ŋ che pɛ maa ŋ cho kɔllo tuuloo, ɔɔ mi wanaa cheleŋnda che maa ŋ cho kɔllo tuuloo nduyɛ ma sila naa, ŋ nɔ miŋ yaŋ nda nilaŋ. Ŋ nɔ miŋ mal kɔl tuu koŋ, miŋ dɔu naapila o mandaa bɛŋgu yɔŋii o luei naa o kpundɔɔ niŋ.

Le mɛɛ Ebɛl ndoo kaala Chɛhowa, nduyɛ mbo tosa nyɛ cho o kɛndɔɔ wo yɛ, Chɛhowa cho loonɔŋ a ndu okɔɔ le fɛɛŋ a fɛɛŋ. Mɛlɛka cho Ebɛl miŋgi yoomu te o huŋ siiŋguu pɛ chieeŋndo hoo kpele hɛnɛkiɔɔ.

Mɛɛ teleŋ tiŋ hiou, mi waŋnda chieeya kui tau o chieeŋndo choo. Kɛ a bɔɔbɔɔ wanaa dɛnɛ wɔɔŋnda nda wa ni. Mi maalikɛiya apum o choo choo niŋ bɛɛ simnuŋ wanaa dɛnɛ wɔɔŋnda. Ma mal fondaŋ ndaa o choo choo niŋ, ma tual o lɛŋndeŋ choo. A sina pa le sabu nda tosa keŋ ndo? Le ma chua dialuŋ waŋnda chieeya, le halikpeŋ ma chua waŋ laanduaa o nɔlaŋ niŋ.

Mi maalikɛiya haa a waŋ laanduaa nda chua o nɔlaŋ niŋnda vialu chuauwa. Mi chuauwaa ndaa kaŋ simnuŋ wanaa kpaaya bɛndu, nduyɛ ma kandu waŋnda nyɛpalaa tusioo choo. Sɔɔŋ wɔɔŋndoŋ pila ndaa tosal waŋnda ni. Kɛ Chɛhowa chɛl ma hiou lachi a sɔɔŋ muŋ tosaa le. Le hei, mbo kɛɛsiaa le mbo tɛɛmbuu wanaa dɛnɛ wɔɔŋnda haa a mɛŋma koŋgi bɛnduaŋ.

Kɛ wana pilɛ wa nda tɛɛŋ ndu waŋnuŋ teŋgeŋ. Ndoo kaala Chɛhowa. Diola ndɔlaŋ la wa ni aa Nuuwa. Ndoo nɔ lanɔɔ a puaa a yaa. Siɛm, Haam, a Chafɛti. Nduyɛ puaa nduaa haa o kɛ kɛ ndoo nɔ lanɔɔ. Mi Chɛhowa dimul Nuuwa le mbo taŋgul dɛndɛ bɛndoo, le mi ndu a yuŋgu ndɔɔ kpou sɔla chindaa te Mɛŋma Koŋgi Bɛnduaŋ ma hiŋ pɛ. Dɛndɔɔ cho ko maa kɔfu bɛndu bɛndu wa o mɛŋndaŋ choo o tul lebɛŋgu le wo ni. Mi Chɛhowa dimul vɛlɛ Nuuwa le mbo luei visiaa tau o dɛndɔɔ niŋ, le mi nda bɛɛ sɔla chindaa.

O lepilɛ niŋ kpe, mi Nuuwa kandu dɛndɔɔ taŋgullo. Le wɔsilaŋ 50, Nuuwa a yuŋgu ndɔɔ wa dɛndɔɔ hoo taŋgullo. Ma taŋgul dɛndɔɔ hoo mɛɛ o mɛɛ Chɛhowa ndoo dimul nda yɛ. A teleŋ koŋ, Nuuwa wa vɛlɛ waŋnda dimullo a Mɛŋma Koŋgi Bɛnduaŋ okɔɔ. Kɛ wana o wana yeŋ ndu lani le.

O mɛɛlulaŋ kpɔŋ, mi teleŋndo fuuluu le luɛiyɔɔ o dɛndɔɔ niŋ. Ŋ yaasiaŋndɔ miŋ che nyɛ yɔŋnuŋ okoŋ kɔɔli wo.