A Cho Pa o Bɛɛndiaŋ le Waa o Lɛŋndeŋ Choo?

BƐƐNDIAŊ LE CHIEEŊNDO KPOU SIIŊGUUWO KPELE HƐNƐKIƆƆ

Mɛɛ Chɛhowa dimul Adam nda Ifi le ma ‘pei chieeŋndo nduyɛ mbo wa nda o ba bɛŋgu,’ mbo dimul nda vɛlɛ maa a nɔ ma kindiŋ le chieeŋndo kpou siiŋguuwo kpele hɛnɛkiɔɔ. (Chɛ. 1:​28) Nyɛ o dimi koŋ ndo wanaa cho hunɔɔ wa o chieeŋndo choo wa tosa niŋ ni. Te Mɛlɛka huŋ tɛɛmbuu pɛ chieeŋndo, o kandɔŋndo, chieeŋndo cho wa kpele hɛnɛkɛ le. Kanifuule, kpeloo Idɛŋ cho lɛ le. Wallo cho wa tau le fondaŋnda cho la nɔɔlɛi nduyɛ mi la wa la tambɛilaŋ dindioo a le laŋ miŋgioo toosiaa. Wali kala kalaa wa niŋ koŋ ni!

Hei loonuŋ naa a wali kala kala Isɔluɛiya tosa wo, mɛɛ nda fula o chɛleŋ niŋ Babilɔŋ. Le wɔsilaŋ 70 wana o wana ve o lɛŋnde ndaleŋ niŋ te. Kɛ mi Aisaya poonyiaa maa, Chɛhowa cho nda salaa dɔwɔɔ le ma miŋgi lɛŋnde ndaleŋ taŋgul. Mi Chɛhowa dimi sanaa a Aisaya aa: “I cho tosa mbo simnuŋ maa kpeloo Idɛŋ, mbo simnuŋ mɛɛ kpele ya Mɛlɛka Yaawɛɛ wo o wa nuaa yɛ.” (Aisaya 51:3) Mi Isɔluɛiya sɔla batiuwaa le wallo hoo tosaa. O nɛi pilɛ koŋ choo, a mala Chɛhowaa, wanaa cho wa o chieeŋndo choo wa cho batiuwaa sɔla le chieeŋndo siiŋguuwo kpele hɛnɛkiɔɔ. A nɔla ma chɔm suŋ suŋ maa, a tiuba le wallo hoo tosaa.

Nɛiyo opilɛ o ŋ tosa heiyo cho fondaŋ numndo dindioo a ndu biyɔɔ nyɛkɛndɛi ni. A tiuba ma tosa hei o yɔŋ bɛɛ mi wanaa nya chiɛɛliaŋnda ve ndi tosa le. A nɔla vɛlɛ ma yɔŋguŋ le Toŋgo leMasaa a fondaŋ naŋ bii bɔŋaŋ ibuŋgaa wo dindioo a ndu bɛɛndiaa. Te bahawɛi numndo chɛl num pɛ, a yɔŋguŋ vɛlɛ le wanaa kpundɔɔ komalla malaa. Te a tosa pɛ sɔɔŋ muŋ, mɛɛ a cho chɔm kpendekele maa a cho o bɛɛndiaŋ le malaa yɔ­ŋgoo naa yeemɛi wa pɛ. Nyunaŋndɔ aa: ‘Wali kuɛɛ ya pɛɛku yɛ suŋ suŋ le mi soliŋ ndu kpeku, te o yɔŋ pɛ mi Chɛhowa chɛlla le mi huŋ wa o chieeŋndo choo?’

BƐƐNDIAŊ LE WANAA MIIŊGU NIŊ YOOMU WA NAA LƆLAA KIOO

Mɛɛ Chiisu miŋgi dɔɔ chua Chaliɔɔ wo yoomu, mbo dimul wanaa velu ndu wa le ma ke ndu nyɛdiaa mbo de. (Maki 5:​42, 43) Naapum, i ve suɛi kala le chuaambɔ wɔsila 12 koŋ nyɛdiaa kioo le. Kɛ yiyaŋndɔ mɛɛ wallo wa niŋ yɛ, te diomnde mɛyaale Chiisuleŋ ndeŋ le peeluŋ pɛ. Mbo dimi maa, “teleŋ cho fuuluu mi wanaa cho o sɛila loonaŋndaŋ niŋnda kpou tuei diom ndɔɔ, okoŋ ma fula.” (Chɔŋ 5:​28, 29) Mi che bɛɛ Baabuiyo chɔm sɔɔŋ yɔŋnuŋ niŋndoŋ kpou le, kɛ wana che pɛ maa, wanaa cho miiŋgu yoomu wa yeema niŋ nyɛdiaa, naa lɔlaa, a nyɛlaŋ. A tiuba pa ma chɔm suŋ suŋ maa, a cho o bɛɛndiaŋ le nda malaa? Yiyaŋndɔ o nyunalaŋ ndaŋ choo.

Te o yɔŋ pɛ ma yonda maa buɛi ibuŋgaa cho hunɔɔ kunda nyaa yilɔɔ, baa ma yɔŋguŋ pa le ndu veeloo o numndo bɛɛ le nyɛdiaa? Te a soli pɛ wana cho wallo o Bɛɛtɛllo o Bɛtɛɛl, ɔɔ mi buɛi ibuŋgaa fuuluu wɔsila o nɔ lɛ mbo wa buɛile ibuŋgaleŋ tosaa le laŋ, baa a yɔŋguŋ pa le ndu naa lɔlaa kioo? Te bɔŋaŋ bɛndoo ɔɔ bɔŋaŋ teŋgeŋndo wa pɛ biinɔŋndo o fondaŋ nyaa, baa ma yɔŋguŋ pa le fondaŋ o cho wa biinɔŋndo wo dindioo tuupa bɔŋaŋndo ɔɔ te o chuu pɛ? Baa ma yɔŋguŋ pa le wanaa cho lakɔ o bɔŋaŋ koŋ nda achaa hunɔɔ wo dimullo?

WA O BƐƐNDIAŊ LE WANAA CHO MIIŊGU YOOMU WA PƐƐKOO

A mɛɛ Walta Kiilaa 24:​15 dimi yɛ, ŋ nɔ tiindaŋndo maa waŋnda o biiliɔŋndaŋ niŋ cho miiŋgu yoomu ni. Waŋnda haa apum sɔla dikeŋnaŋndo le pɛɛkoo a Chɛhowa okɔɔ le. Nduyɛ a cho dikeŋnaŋndo hoo sɔla te a miiŋgu pɛ yoomu.a Wanaa cho loo o laalaŋ ndaa choo ma nɔ taasioo tau wa cho waŋnda haa pɛɛku ni. (Aisaya 11:9) Shalɔti dimi niŋ yooŋgu kɛndɔɔ Yulopi, Amɛlika Batouwo a o Afilika niŋ. Nduyɛ, o nɔ yeemɛi kpeekpei le wallo hoo hunɔɔ tosaa. Mbo dimi a kɔl kɛndɛ aa: “I cho lehɔl o nɛi le wanaa miiŋgu niŋ yoomu wa pɛɛkoo. Te I veelu pɛ diomndaŋ a wana wa o sindɔɔ niŋndo okɔɔ, mi dimi aa: ‘Te waŋndo hoo ndoo sina pɛ Chɛhowa, naapum yoomu ndɔɔ ve wa nuaa le.’ I cho a yeemɛi kpeekpei le wanaa miiŋgu niŋ yoomu wa chɔmndo mɛɛ sɔɔŋ wa o chieeŋndo niŋ o piɔm ndaa kɔɔli yɛ.”

Buɛiyaa laalaŋaa Chɛhowaa vi o laalaŋndo choo, tuupa mi Chiisu huŋ o chieeŋndo choo wa bɛɛ nɔ ma sɔla pɛɛkoo. Yiyaŋndɔ mɛɛ i wa niŋ suɛi kɔl kɛndɛ bɛndu le Daaniɛɛ wana ndoo suaa le Mɛlɛka wo tɛɛsiallo, mɛɛ huuluŋ o poonyiaa a muŋ okɔɔ woŋ peeluŋ yɛ mi che bɛɛ ndoo bii muŋ bila a teleŋ koŋ te. (Daan. 12:8) O pulale Lufu nda Naomi leŋ choo Mɛsayanɔɔ fula ni. Yiyaŋndɔ mɛɛ i wa niŋ suɛi kɔl kɛndɛ yɛ le nda pɛɛkoo a hei okɔɔ. I wa niŋ bɔɔ suɛi nyaale le wali bɛndu wa niŋ hoo wo tosaa. Kɔl landɛi ve niŋ naa le nyɛ o nyɛ le, nduyɛ nyɛ o nyɛ feŋa niŋ naa kɔllo o wallo hoo choo le!

Vɛɛ ŋ chɔm yɛ suŋ suŋ maa a cho o bɛɛndiaŋ le wali koŋ tosaa? Nɛiyo opilɛ cho kindiŋndo le hiouwɔɔ lachioo tosaa suŋ suŋ o waŋnda pɛɛkoo niŋ ni, nduyɛ ma wa lɔɔlɔɔ wali dimiaa yooŋgu kɛndɔɔ tosaa. (Maa. 24:​14) O yɔŋ bɛɛ mi yuwɛi ɔɔ bahawɛila cheleŋ la kuuna num tosaa tau o wallo hoo niŋ mɛɛ ŋ yeema yɛ, sɛmbɛ ŋ cho dɔwɔɔ wo cho chɔm mɛɛ kpɛ ŋ cho o bɛɛndiaŋ le wanaa miiŋgu niŋ yoomu wa pɛɛkoo yɛ.

Lelaŋ nyunaa cho ni aa, A cho pa lehɔl le waa o lɛŋndeŋ choo? A cho pa a kɔl kɛndɛ le chieeŋndo hunɔɔ siiŋguuwo kpele hɛnɛkiɔɔ, le wanaa miiŋgu niŋ yoomu wa naa lɔlaa kioo a nda pɛɛkoo? A chɔm maa a cho o bɛɛndiaŋ le hei tosaa, te a soliŋ pɛ teleŋ kɛ kɛ kpeku le walta velaŋ a walta naŋ tosa niŋ o chilaŋ niŋndaŋ tosaa.