Nyunala Wanaa Nua O yaula Naalaŋ Niŋnda
Mɛɛ Chiisu veluŋ, le yɛɛ Choosɛ nda Meele chalnuŋ yɛ Bɛtilɛhɛm a miiŋgu o ndalo chiee Naasaluɛi le?
Baabuiyo chɔm naa sabu koŋ te. Kɛ o chɔm naa sɔɔŋ sɔviɔŋ ŋpum. Naapum sɔɔŋ muŋ nyindu nda ni le challe Bɛtilɛhɛm a miiŋgu Naasaluɛi le.
Mi maalikɛinɔɔ dimul Meele maa o cho poo violɔɔ. Teleŋ maalikɛinɔɔ dimul ndu yooŋgoo hoo wo, o Naasaluɛi niŋ o wa ni. Nduyɛ loŋ Choosɛ bɛɛ wa ni. Chioo hoo wa o tanda Kalili wo niŋ. (Luku 1:26-31; 2:4) Okoŋ kɔɔli, mɛɛ nda fula Ichipi, ma miiŋgu Naasaluɛi. Loŋ Chiisu sul ni, nduyɛ mbo simnuŋ Naasaluɛinɔɔ. (Maa. 2:19-23) Lelaŋ, teleŋ o teleŋ naŋ wa pɛ suɛi a Chiisu, Choosɛ, vɛlɛ a Meele, miŋ yiyaŋ a Naasaluɛi okɔɔ.
Meele ndoo nɔ wanayɛi pilɛ o Chuda niŋ diolaŋ Elisabɛɛ. Lanɔɔ Sɛkalaya, wana soliaa lasalaa Elisabɛɛ wa ni, nduyɛ ndu velu Chɔŋ Wana Yiŋaa ni. (Luku 1:5, 9, 13, 36) Mi Meele kua Elisabɛɛ yilɔɔ. Mbo chua paŋgoŋ ŋgaa a Elisabɛɛ latulu o Chuda niŋ. Okoŋ kɔɔli, mbo miiŋgu Naasaluɛi. (Luku 1:39, 40, 56) Naapum Meele ndoo sina tanda Chuda wo nyɛɛmbɔ.
Mɛɛ teleŋ tiŋ hiou, mi Choosɛ diikuŋ nɛi chɔmaa ndoo sɔla wo. Mbo kua Bɛtilɛhɛm o chiee Deeve wo niŋ le “ma poonyiaa nda diolaŋ.” Mi huuluei dimi maa, o chiee koŋ niŋ Mɛsayanɔɔ wa violɔŋ ni. (Luku 2:3, 4; 1 Saam. 17:15; 20:6; Makal 5:2) Mɛɛ Meele velu Chiisu, Choosɛ ve ndu kɔl le mbo buli tiŋ vilɛi koŋ le miiŋgoo Naasaluɛi a chɛlɛkpɛ lende koŋ te. Le hei, ma chalnuŋ Bɛtilɛhɛm. Nduyɛ chɔŋ loŋ kɔ Chulusalɛm, tiŋndo wa le mɛɛliilaŋ 6. Lelaŋ, i wa tɛtɛlɛ le ma kuɛ Chulusalɛm a chɛlɛkpɛ lende koŋ le salalaŋ solioo.—Lɛvi. 12:2, 6-8; Luku 2:22-24.
Mi maalikɛinɔɔ dimul Meele o tasela ndɔ maa, po ndɔɔ cho ichali o “kpeŋgbei lemasa Deeve finya ndɔ wo” choo, mbo wa “masaa.” Naapum, mi Meele nda Choosɛ cha maa i cho suɛi sɔvɛ le mi Chiisu veluŋ o chiee Deevioo niŋ. (Luku 1:32, 33; 2:11, 17) Kɛlɛŋgaa ma yiyaŋ maa, i cho suɛi taasi le ma chal o chiee koŋ niŋ haaa ma che nyɛ cheleŋ Mɛlɛka wa nda dimullo.
Tuupa mi wanaa pɛɛku a looŋ okɔɔ wa kua Bɛtilɛhɛm, ŋ sina mɛɛ kpɛ Meele nda Choosɛ viou loŋ yɛ le. A teleŋ koŋ niŋ, Meele nda Choosɛ ndaa nɔ niŋ chiɛiyo, nduyɛ po ndaa ve lɛ chɛlɛkpɛ le. O wa niŋ ‘poombɔ pɔmbɔ.’ (Maa. 2:11) Wana che pɛ maa, mi Choosɛ nda Meele siiŋguu Bɛtilɛhɛm chiee ndaa. Le hei, a keleŋa miiŋgu Naasaluɛi le.
Mi Hɛlɔɔ viam waŋnda maa a diu “puaambuaa pɔmbuaa kpou Bɛtilɛhɛm. . . . Chɔŋ a puaambuaa nda velu sɛnɛiya mbo kɔ bii a puaambuaa wa wɔsilaŋ la tiɔɔŋ nda.” (Maa. 2:16) Mɛɛ Choosɛ nda Meele sɔla nɛi chɔmaa Mɛlɛka o ba a nyɛ Hɛlɔɔ ndoo dimi koŋ ndo okɔɔ, ma nyaanuŋ Ichipi. A lo loŋ haaa mi Hɛlɔɔ wu. Okoŋ kɔɔli, mi Choosɛ miiŋgu a yuŋgu ndɔɔ Naasaluɛi. Le yɛɛ a miiŋgu Bɛtilɛhɛm te? Kanifuule mi Choosɛ tuɛi maa Akelɔɔ, po Hɛlɔɔ wo miiŋgu o masaleŋ choo Chudiaa ni. Nduyɛ Choosɛ ndoo yeema mbo diikuŋ nɛi chɔmaa Mɛlɛkaa. Ndoo tiuba mbo manda Chiisu Naasaluɛi le mbo piɛi Mɛlɛka tonyaa nyɛ o nyɛ yɔŋnuŋ ndu le.—Maa. 2:19-22; 13:55; Luku 2:39, 52.
Wana che pɛ maa, Choosɛ sɔla fɛŋ piɔmndo malaŋ Chiisu kumbi nɛiyo le mi waŋnda kuɛ choo choo. Le hei, naapum o chieeŋndo choo o cho miiŋgu yoomu ni. Wanaa bɔɔbɔɔ cho chiikaŋ a ndu, nduyɛ mbo chɔɔlu nda tɛɛsial le sabu ndu nda Meele chalnuŋ Bɛtilɛhɛm teleŋ Chiisu veluŋndo.