Bɛɛndiaa Kɔl Numndo le Pɛɛkoo

Te ŋ pɛɛku pɛ Baabuiyo, ŋ yeema mi nyɛ naŋ pɛɛku a Chɛhowa okɔɔ wo pilaŋ naa kɔllo, yiyaŋnda naalaŋ, vɛlɛ a yeemaŋ naŋ. Mi Ɛsilua kɛsi tamasi kɛndɔɔ o hei niŋ mɛɛ o “bɛɛndiaa kɔl ndɔɔ le Sawala Chɛhowa laŋ pɛɛkoo.” (Ɛsil. 7:10) Vɛɛ naŋ bɛɛndiaa yɛ kɔl naa?

Piɛi. Tuupa ma kandu pɛɛku kɛ kɛ tosaa, a nɔ fɛŋ ma piɛi. Nyuna Chɛhowa le mbo mala num, ma bii nyɛ ŋ cho pɛɛkoo wo bila, nduyɛ ma dɔu ndu o wali niŋ.—Sam 119:​18, 34.

Wa wana tusiaŋ. Mi Mɛlɛka viŋ wanaa chɔm kaa heelaŋndo wa tonyaa, kanifuule ma yiyaŋ maa, a yeema mala ndɔɔ le ma bii Baabuiyo bila le. (Luku 10:21) Nduyɛ, ŋ yeema miŋ pɛɛku le acheleŋnda chɔmndo kinɛi mɛɛ kpɛ naŋ sina yɛ le. Chɔm kaa tusiaŋndo le yiyaŋnda numndaŋ siŋgaa te la chɛlaŋ a hɛnaŋ Mɛlɛkaa le.

Kindiŋ ma yaŋ chonduŋ naŋ leMasaŋ i pilɛ nilaŋ. Chondoŋ nɔ kpaayaa tau le naa kɔllo pilaŋndo, nduyɛ miŋ bɛɛndiaa naa nyɛkɛndɛi le Chɛhowa piɛiyo. Lelaŋ te ŋ yaŋ pɛ nilaŋ o chondei tuupa miŋ kandu pɛɛkoo, mi keŋ bɛɛndiaa kɔl naa le pɛɛkoo a Chɛhowa okɔɔ, nduyɛ mi nyɛ naŋ pɛɛku wo pilaŋ naa kɔllo tau.