လူၤကၣ်
၂၁ ဖဲအဝဲ ကွၢ်ထီၣ်တၢ်အခါ ထံၣ်ဝဲပှၤထူးပှၤတီၤတဖၣ် ထၢနုာ်လီၤဝဲ တၢ်မၤဘူၣ်လၢ တိၢ်မၤဘူၣ် အတလါတဖၣ်အပူၤလီၤ. ၂ ဝံၤဒီးအဝဲထံၣ်ဝဲ မုၣ်ကမဲလၢအဖှီၣ်တဂၤ ထၢနုာ်လီၤဝဲ စ့ခံဘ့ၣ်* လၢအလုၢ်အပှ့ၤ အိၣ်ထဲတစဲးဖိန့ၣ်လီၤ. ၃ ဒီးယ့ၣ်ၡူးတဲဝဲလၢ “ယကတဲဘၣ်သု တီတီလၢ မုၣ်ကမဲလၢ အဖှီၣ်တဂၤအံၤ ထၢနုာ်တၢ်အါန့ၢ်ဒံး အဝဲသ့ၣ်ခဲလၢာ်လီၤ. ၄ အဝဲသ့ၣ် ကိးဂၤဒဲး ဟံးန့ၢ်ဝဲ အတၢ်ထူးတၢ်တီၤ အဘျဲၣ်အစဲၢ်တဖၣ် ဒီးထၢနုာ်လီၤဝဲ တၢ်မၤဘူၣ်လီၤ. မ့မ့ၢ် မုၣ်ကမဲအံၤ ဖှီၣ်ဒိၣ်မး သနာ်က့ ထၢနုာ်ဝဲ တၢ်ခဲလၢာ်လၢ အအိၣ်ဒီးအီၤလၢ အကလုၢ်အီၣ်လုၢ်အီ အသးသမူအဂီၢ်လီၤ.”
၅ လၢခံ ဖဲပှၤတနီၤ တဲဝဲဘၣ်ဃး တၢ်လုၢ်ဟံၣ်အဂ့ၢ်လၢ အဘၣ် တၢ်မၤဃံမၤလၤအီၤလၢ လၢၢ်လၢအဃံလၤ ဒီးတၢ်လၢဘၣ် တၢ်ဟ့ၣ်လုၢ်ထီၣ်အီၤလၢ ယွၤအဂီၢ်တဖၣ်အခါ ၆ ယ့ၣ်ၡူး တဲဝဲလၢ “တၢ်လၢသုထံၣ် ခဲအံၤတဖၣ်န့ၣ် မုၢ်နံၤတဖၣ်ကဟဲဝဲလၢ တၢ်ကမၤ လီၤပှီၢ်ကွံာ်အီၤခဲလၢာ် ဒီးလၢၢ်တဖၣ်အံၤ တအိၣ်လၢ တဖျၢၣ်ဒီးတဖျၢၣ် အဖီခိၣ်လၢၤဘၣ်.” ၇ ဝံၤဒီးအဝဲသ့ၣ်သံကွၢ်အီၤလၢ “သရၣ်ဧၢ, တၢ်သ့ၣ်တဖၣ်အံၤ ကမၤအသး ဆံးယံာ်လဲၣ်. ဒီးဖဲတၢ်သ့ၣ်တဖၣ်အံၤ ကကဲထီၣ်အခါ တၢ်ပနီၣ် ကအိၣ်ဒ်လဲၣ်.” ၈ အဝဲတဲဝဲလၢ “ဒ်သိး ပှၤသုတလီန့ၢ်သု နီတဂၤတဂ့ၤအဂီၢ် ပလီၢ်သုသးတက့ၢ်. ပှၤအါဂၤန့ၣ် ကဟဲလၢယမံၤ ဒီးကတဲဝဲလၢ ‘ယမ့ၢ်ခရံာ်’ ဒီး ‘တၢ်ဆၢကတီၢ်န့ၣ် ဘူးထီၣ်လံ.’ ပိာ်အဝဲသ့ၣ် အခံတဂ့ၤ. ၉ တကးဒံးဘၣ် ဖဲသုနၢ်ဟူဘၣ် တၢ်ဒုးတၢ်ယၤ ဒီးတၢ်တၢထီၣ်တၢလီၤအခါ တဘၣ်ပျံၤတၢ်တဂ့ၤ. တၢ်သ့ၣ်တဖၣ်အံၤ ကဘၣ် ဟဲကဲထီၣ်ဆိအသး ဘၣ်ဆၣ် တၢ်အကတၢၢ်န့ၣ် တကဲထီၣ် အသးတဘျီဃီဒံးဘၣ်.”
၁၀ ဝံၤဒီး အဝဲတဲဘၣ် အဝဲသ့ၣ်လၢ “ပှၤကလုာ် တဒူၣ်ဒီးတဒူၣ် ကဒုးလိာ်အသး ဒီးဘီမုၢ်တဘ့ၣ် ဒီးတဘ့ၣ် ကဒုးလိာ်အသးလီၤ. ၁၁ ဒီးဟီၣ်ခိၣ် ကဟူးဝဲဖးဒိၣ်, တၢ်သၣ်ဝံၤလီၤဒိ ဒီးတၢ်ဆါသံသတြိာ်တဖၣ် ကအိၣ်ထီၣ်ဝဲလၢ တၢ်လီၢ်တတီၤ ဝံၤတတီၤ ဒီးပှၤကထံၣ်ဘၣ် တၢ်လၢ အလီၤပျံၤလီၤဖုးတဖၣ် ဒီးတၢ်ပနီၣ်ဖးဒိၣ်တဖၣ် ကဟဲကဲထီၣ်အသးလၢ မူခိၣ်လီၤ.
၁၂ “ဘၣ်ဆၣ် တချုးလၢ တၢ်သ့ၣ်တဖၣ်အံၤခဲလၢာ် ကဲထီၣ်အသးဒံးဘၣ်န့ၣ် ပှၤကဖီၣ်သုဒီး မၤအၢမၤနးသု, ကဟ့ၣ်လီၤကွံာ်သုလၢ ဘူၣ်ဘျီၣ်အပူၤ ဒီးဃိာ်တဖၣ်အပူၤလီၤ. ပှၤကလဲၤကိးသုလၢ စီၤပၤတဖၣ် ဒီးပဒိၣ်ပပှၢ်တဖၣ် အမဲာ်ညါ လၢယမံၤအဃိလီၤ. ၁၃ ကကဲထီၣ် တၢ်ခွဲးတၢ်ယာ်လၢ သုကအုၣ်သုသးအဂီၢ်လီၤ. ၁၄ အဃိ သုကတဲဆၢက့ၤ အဝဲသ့ၣ် ဒ်လဲၣ်ဒ်လဲၣ်န့ၣ် ဆၢတဲာ်လီၤသုသး ဒ်သိး သုသုတတဲလိပာ်စၢၤ သုသးတဂ့ၤ. ၁၅ ယကဟ့ၣ်လီၤသု တၢ်ကတိၤဒီးတၢ်ကူၣ်သ့ ဒ်သိးပှၤလၢ အထီဒါသုခဲလၢာ် မ့ၢ်ပာ်ဖှိၣ်ထီၣ် အသးဘၣ်ဆၣ် ထီဒါသုမ့ၢ်ဂ့ၤ, တဲအါသုမ့ၢ်ဂ့ၤ, တနၢၤဘၣ်. ၁၆ တကးဒံးဘၣ် သုမိၢ်သုပၢ်, သုဒီပုၢ်ဝဲၢ်တဖၣ်, သုဘူးသုတံၢ်တဖၣ် ဒီးသုတံၤသကိးတဖၣ်ဒၣ်လဲာ် ကဟ့ၣ်လီၤကွံာ်သု ဒီးအဝဲသ့ၣ် ကမၤသံသုတနီၤ ၁၇ ဒီးပှၤခဲလၢာ် ကသးဟ့သုလၢ ယမံၤအဃိလီၤ. ၁၈ ဘၣ်ဆၣ် သုခိၣ်ဆူၣ်တဘိဒၣ်လဲာ် တဟးဂီၤဘၣ်. ၁၉ ခီဖျိလၢ သုတၢ်တူၢ်န့ၢ်ခီၣ်ကဲအဃိ သုကအုၣ်က့ၤခီၣ်က့ၤ သုသးသမူလီၤ.
၂၀ “ဘၣ်ဆၣ် ဖဲသုထံၣ် သုးမုၢ်သံၣ်ဘိတဖၣ် ဆီလီၤအသးဒီး ကဝီၤဃာ် ဝ့ၢ်ယရူၤၡလ့ၣ်အခါ သ့ၣ်ညါလၢ တၢ်မၤဟးဂီၤအီၤ အဆၢကတီၢ် ဘူးထီၣ်လံန့ၣ်တက့ၢ်. ၂၁ ဖဲန့ၣ်အခါ ပှၤလၢအအိၣ်လၢ ကီၢ်ယူဒၤအပူၤန့ၣ် မ်အလဲၤဃ့ၢ်ထီၣ်လၢ ကစၢၢ်ကလိအကျါတက့ၢ်. ဒီးပှၤလၢအအိၣ်လၢ ယရူၤၡလ့ၣ်အပူၤန့ၣ် မ်အဟးထီၣ်ကွံာ်တက့ၢ်. ဒီးပှၤလၢအအိၣ်လၢ ခိခိၣ်န့ၣ် တဘၣ်နုာ်လီၤဆူ ယရူၤၡလ့ၣ်အပူၤတဂ့ၤ. ၂၂ မုၢ်နံၤတဖၣ်အံၤ မ့ၢ်တၢ်ဟ့ၣ်ကၣ်တၢ် အမုၢ်နံၤ ဒ်သိး တၢ်ကွဲးအသးခဲလၢာ် ကလၢထီၣ်ပှဲၤထီၣ် အဂီၢ်လီၤ. ၂၃ လၢမုၢ်နံၤတဖၣ်န့ၣ်အတီၢ်ပူၤ တၢ်ကီတၢ်ခဲဖးဒိၣ် ကဟဲဘၣ်ကီၢ်အံၤဒီး တၢ်သးဒိၣ်ထီၣ် ကဟဲဘၣ် ပှၤတဖၣ်အံၤအဃိ ပှၤမိၢ်ဒၢဒီး ပှၤလၢအဒုးအီ အဖိနုၢ်တဖၣ်န့ၣ် ကဘၣ်အဖှီၣ်လီၤ. ၂၄ ဒီးအဝဲသ့ၣ်တဖၣ်န့ၣ် ကဘၣ် တၢ်မၤသံအီၤလၢနး ဒီးကဘၣ် တၢ်ဖီၣ်န့ၢ်အီၤဒီး ကလဲၤကိးအီၤဆူ ထံကီၢ်အဂၤခဲလၢာ်လီၤ. ဒီးပှၤကလုာ်တဖၣ် ကယီၢ်တံၢ် ယရူၤၡလ့ၣ်တုၤလီၤလၢ တၢ်ဆၢကတီၢ်လၢ အဘၣ် တၢ်ပာ်ပနီၣ်အီၤလၢ ပှၤကလုာ်တဖၣ်အဂီၢ်* လၢထီၣ်ပှဲၤထီၣ်ဝဲ တစုန့ၣ်လီၤ.
၂၅ “တကးဒံးဘၣ် တၢ်ပနီၣ်တဖၣ် ကအိၣ်ထီၣ်လၢ မုၢ်, လါ ဒီးဆၣ်တဖၣ် အလိၤလီၤ. ဒီးလၢဟီၣ်ခိၣ်န့ၣ် ပှၤကလုာ်တဖၣ် ကသူၣ်ကိၢ်သးဂီၤတၢ် ဒီးအခိၣ်နူာ် ကဘံဘူဝဲ မ့ၢ်လၢ ပီၣ်လဲၣ်သီၣ်ဝဲ ဒီးဟူးဝးဝဲအဃိလီၤ. ၂၆ ဒီးမ့ၢ်လၢ မူခိၣ်အစိကမီၤတဖၣ် ကဘၣ် တၢ်မၤဟူးမၤဝးအီၤအဃိ ပှၤကဘၣ်ယိၣ်တၢ် ဘၣ်ဃးဒီး တၢ်လၢ ကမၤအသးလၢ ဟီၣ်ခိၣ်ချၢ ဒီးကပျံၤတၢ် တုၤဒၣ်လဲာ် ကသးပ့ၤနီၣ်လီၤအသးလီၤ. ၂၇ ဒီးအဝဲသ့ၣ် ကထံၣ်ဘၣ် ပှၤကညီဖိခွါအံၤ ဟဲဝဲလၢ တၢ်အၢၣ်အကျါ ပှဲၤဒီးတၢ်စိတၢ်ကမီၤ ဒီးတၢ်လၤတၢ်ကပီၤ ဒိၣ်မးလီၤ. ၂၈ ဘၣ်ဆၣ် ဖဲတၢ်သ့ၣ်တဖၣ်အံၤ စးထီၣ် ကဲထီၣ်အသးအခါ တၢ်အုၣ်က့ၤခီၣ်က့ၤသု ဘူးထီၣ်လံအဃိ ဆၢထၢၣ်ဘျၢဘျၢ ဒီးမိာ်ထီၣ် သုခိၣ်တက့ၢ်.”
၂၉ ဒီးအဝဲ တဲဘၣ်အဝဲသ့ၣ်လၢ တၢ်ကတိၤဒိတခါလၢ “ပာ်သူၣ်ပာ်သးလၢ ချၢၣ်ဒၢ ဒီးသ့ၣ်အဂၤ ခဲလၢာ်တက့ၢ်. ၃၀ ဖဲအဝဲသ့ၣ် ဒိးထီၣ်အခါ သုထံၣ်ဘၣ်လၢ သုနီၢ်ကစၢ်ဒီးသ့ၣ်ညါလၢ တၢ်ကိၢ်ခါ ဘူးကတုၤလံ. ၃၁ ဒ်န့ၣ်အသိး သုစ့ၢ်ကီး ဖဲသုထံၣ်ဘၣ် တၢ်သ့ၣ်တဖၣ်အံၤ မၤအသးအခါ သ့ၣ်ညါလၢ ကစၢ်ယွၤအဘီအမုၢ် ဘူးထီၣ်လံ. ၃၂ ယကတဲဘၣ်သု တီတီလၢ ပှၤတစိၤအံၤ တချုး လၢာ်ကွံာ်ဒံးဘၣ်န့ၣ် တၢ်သ့ၣ်တဖၣ်အံၤ ကမၤအသးခဲလၢာ်လီၤ. ၃၃ မူခိၣ်ဒီးဟီၣ်ခိၣ် ကဒံကွံာ်ဝဲ ဘၣ်ဆၣ် ယတၢ်ကတိၤတဖၣ်န့ၣ် လ့ၤတက့ၤ တဒံကွံာ်ဝဲဘၣ်.
၃၄ “ဘၣ်ဆၣ် ဒ်သိး တၢ်အီၣ်တၢ်အီတၢ် အါတလၢ ဒီးတၢ်အိၣ်မူ အတၢ်ကိၢ်တၢ်ဂီၤတဖၣ် သုတထုးဃၢ သုတဂ့ၤအဂီၢ်န့ၣ် ပလီၢ်သုသးတက့ၢ်. မ့တမ့ၢ်ဘၣ်န့ၣ် လၢတၢ်တဆိကမိၣ်ဘၣ်အပူၤ မုၢ်နံၤအဝဲန့ၣ် ကဟဲဘၣ်သု သတူၢ်ကလာ် ၃၅ ဒ်ပျံၤသကွီၤအသိးလီၤ. ဒီးကဟဲဘၣ်ဝဲပှၤလၢ အအိၣ်လၢ ဟီၣ်ခိၣ်ချၢ ခဲလၢာ်လီၤ. ၃၆ အဃိ ဒ်သိးသုလဲၤခီဖျိ တၢ်သ့ၣ်တဖၣ်အံၤကန့ၢ် ဒီးဆၢထၢၣ်လၢ ပှၤကညီဖိခွါအံၤ အမဲာ်ညါကန့ၢ်အဂီၢ် စီၣ်မဲာ်စီၣ်နါ ဒီးဃ့ကညးယွၤ ထီဘိတက့ၢ်.”
၃၇ ဒီးလၢမုၢ်ဆါခီန့ၣ် အဝဲလဲၤသိၣ်လိတၢ်လၢ တၢ်လုၢ်ဟံၣ်အပူၤ မ့မ့ၢ် လၢမုၢ်နၤခီန့ၣ် အဝဲလဲၤအိၣ်ဝဲလၢ ကစၢၢ်လၢ အဘၣ်တၢ်ကိးအီၤလၢ ကစၢၢ်သ့ၣ်စၤယံးတဖျၢၣ်န့ၣ် အလိၤလီၤ. ၃၈ ဒီးပှၤခဲလၢာ် ဟဲဝဲဆူအအိၣ် လၢဂီၤခီဂီၤဂီၤ ဒ်သိး ကဒိကနၣ်အီၤလၢ တၢ်လုၢ်ဟံၣ်အပူၤန့ၣ်လီၤ.