လူၤကၣ်
၇ ဖဲအဝဲတဲတၢ်လၢ အကဘၣ်တဲ ပှၤဂီၢ်မုၢ်တဖၣ် ဝံၤအခါ လဲၤနုာ်လီၤဝဲလၢ ဝ့ၢ်ကပ့းရနီၣ် အပူၤလီၤ. ၂ ဒီးကုၢ်လၢသုးခိၣ် အဲၣ်ဝဲဒိၣ်မးတဂၤ ဆိးက့နးမး ဘူးထီၣ်လၢ အကသံလီၤ. ၃ ဖဲအဝဲနၢ်ဟူ ယ့ၣ်ၡူးအဂ့ၢ်အခါ အဝဲဆှၢလီၤဝဲ ပှၤယူဒၤဖိ အပှၤသူၣ်က့သးပှၢ်တနီၤ ဒ်သိးကမၢ ယ့ၣ်ၡူးဟဲမၤဘျါက့ၤ အကုၢ်န့ၣ်လီၤ. ၄ အဝဲသ့ၣ်ဟဲလၢ ယ့ၣ်ၡူးအအိၣ် ဒီးဃ့ကညးအီၤသပှၢ်တၢၢ် ဒီးတဲဝဲလၢ “သုးခိၣ်တဂၤအံၤ ကြၢးဝဲဒီးနတၢ်မၤစၢၤ ၅ မ့ၢ်လၢ အဝဲအဲၣ်ပပှၤကလုာ် ဒီးအဝဲတ့ထီၣ်န့ၢ်ပှၤ ဘူၣ်ဘျီၣ်အဃိလီၤ.” ၆ အဃိ ယ့ၣ်ၡူး လဲၤဒီးအဝဲသ့ၣ်လီၤ. ဘၣ်ဆၣ် ဖဲအဝဲလဲၤဘူးထီၣ် လၢအဟံၣ်အခါ သုးခိၣ်န့ၣ်ဆှၢလီၤဝဲ အသကိးတဖၣ် ဒ်သိး ကတဲဘၣ်ယ့ၣ်ၡူးလၢ “ကစၢ်ဧၢ, တဘၣ်ဟဲလၢ ယဟံၣ်တဂ့ၤ. ယတကြၢးတဘၣ်လၢ နကဟဲနုာ်လီၤလၢ ယဟံၣ်ပူၤဘၣ်. ၇ အဃိ ယတူၢ်ဘၣ်လၢ ယတမ့ၢ်ပှၤလၢအကြၢး လဲၤဆူနအိၣ်ဘၣ်. ဘၣ်ဆၣ် ဟ့ၣ်လီၤနကလုၢ်ဒီး ယပျဲၢ်ကဘျါက့ၤဝဲလီၤ. ၈ ယၤစ့ၢ်ကီး ယအိၣ်လၢ ပှၤလၢအဒိၣ်န့ၢ်ယၤတဖၣ် အဖီလာ် ဒီးသုးဖိလၢအအိၣ်လၢ ယဖီလာ် အိၣ်ဝဲစ့ၢ်ကီးလီၤ. ယမ့ၢ်တဲ အဝဲတဂၤလၢ ‘လဲၤ’ န့ၣ် အဝဲလဲၤဝဲလီၤ. ဒီးယမ့ၢ်တဲ အဝဲတဂၤလၢ ‘ဟဲ’ န့ၣ် အဝဲဟဲဝဲလီၤ. ဒီးယမ့ၢ်တဲယကုၢ်လၢ ‘မၤတၢ်အံၤ’ န့ၣ် အဝဲမၤဝဲလီၤ.” ၉ ဖဲယ့ၣ်ၡူး နၢ်ဟူဝဲဒ်န့ၣ်အခါ အဝဲကမၢကမၣ်ဝဲ ဒီးအဝဲ ဃၣ်ဃီၤအသးဆူ ပှၤဂီၢ်မုၢ်လၢ အပိာ်အခံအအိၣ် ဒီးတဲဝဲလၢ “ယကတဲဘၣ်သု, လၢအံၣ်စရ့လးအပူၤဒၣ်လဲာ် ယတထံၣ်ဘၣ် ပှၤလၢ အတၢ်နာ်အိၣ်ထဲအံၤ နီတဂၤဘၣ်.” ၁၀ ဒီးဖဲပှၤလၢ ဘၣ်တၢ်ဆှၢလီၤအီၤတဖၣ် က့ၤတုၤလၢဟံၣ်အခါ အဝဲသ့ၣ်ထံၣ်ဝဲလၢ ကုၢ်တဂၤန့ၣ် အိၣ်ဆူၣ်ထီၣ်က့ၤဝဲလံ.
၁၁ တယံာ်ဘၣ်န့ၣ် အဝဲလဲၤလၢ ဝ့ၢ်နၤအံၣ် ဒီးအပျဲၢ်အဘီၣ် ဒီးပှၤဂီၢ်မုၢ်ဖးဒိၣ် လဲၤဒီးအီၤလီၤ. ၁၂ ဖဲအဝဲလဲၤဘူးထီၣ်ဒီး ဝ့ၢ်အတြဲၤအခါ ထံၣ်ဝဲပှၤသံတဂၤ ဘၣ်တၢ်ဟဲယိးအီၤ ဒီးအဝဲမ့ၢ် မုၣ်ကမဲအဖိခွါလီၤ. ဒီးမုၣ်ကမဲအံၤ အဖိခွါအိၣ်ထဲတဂၤလီၤ. ဒီးပှၤဂီၢ်မုၢ်လၢ အဟဲလၢဝ့ၢ်ပူၤန့ၣ် အိၣ်ဒီးအီၤစ့ၢ်ကီးလီၤ. ၁၃ ဖဲကစၢ် ထံၣ်အီၤအခါ အဝဲသးကညီၤဘၣ်အီၤ ဒီးတဲအီၤလၢ “ဟီၣ်လၢၤတဂ့ၤ.” ၁၄ ဒီးအဝဲလဲၤဃီၤဝဲ ဒီးဖီၣ်ဝဲပှၤသံအလီၢ်မံ ဒီးပှၤယိးတၢ်ဖိတဖၣ် အိၣ်ပတုာ်ဝဲလီၤ. ဒီးအတဲဝဲလၢ “ပိာ်ခွါသးစၢ်ဧၢ, ယတဲဘၣ်နၤ ဂဲၤဆၢထၢၣ်တက့ၢ်.” ၁၅ ဒီးပှၤသံတဂၤန့ၣ် ဂဲၤဆၢထၢၣ်ဆ့ၣ်နီၤ ဒီးတဲတၢ်လီၤ. ယ့ၣ်ၡူးဟ့ၣ်လီၤက့ၤအီၤလၢ အမိၢ်အအိၣ်လီၤ. ၁၆ ပှၤခဲလၢာ်ပျံၤတၢ် ဒီးအဝဲသ့ၣ်စးထီၣ် မၤလၤကပီၤ ကစၢ်ယွၤ ဒီးတဲဝဲလၢ “ဝံဖးဒိၣ်တဂၤ ဟဲအိၣ်ထီၣ်လၢပကျါ” ဒီး “ကစၢ်ယွၤ ဃၣ်ကဒါက့ၤအသးဆူ အပှၤဂီၢ်မုၢ်အအိၣ်လံ.” ၁၇ ဒီးတၢ်ကစီၣ် ဘၣ်ဃးဒီးယ့ၣ်ၡူးန့ၣ် ရၤလီၤအသးလၢ ကီၢ်ယူဒၤဒီဘ့ၣ်ညါဒီး တၢ်လီၢ်လၢ အခိၣ်အဃၢၤ ဝးဝးလီၤ.
၁၈ ဒီးစီၤယိၤဟၣ်န့ၣ် အပျဲၢ်အဘီၣ်တဖၣ် တဲဘၣ်အီၤလၢ တၢ်ဂ့ၢ်တၢ်ကျိၤတဖၣ်အံၤ ခဲလၢာ်လီၤ. ၁၉ အဃိ စီၤယိၤဟၣ် ကိးန့ၢ်ဝဲအပျဲၢ်အဘီၣ်ခံဂၤ ဒီးမၢအဝဲသ့ၣ် လဲၤလၢကစၢ်အအိၣ် ဒ်သိး ကသံကွၢ်အီၤလၢ “မ့ၢ်နကဲပှၤလၢ ပခိးကွၢ်လၢ်အီၤတဂၤန့ၣ်ဧါ. မ့တမ့ၢ် ပကဘၣ်ခိးကွၢ်လၢ် ပှၤလၢအဂၤတဂၤဒံးဧါ.” ၂၀ ဖဲအဝဲသ့ၣ် ဟဲတုၤလၢ ယ့ၣ်ၡူးအအိၣ်အခါ သံကွၢ်ဝဲလၢ “ပှၤဘျၢတၢ် စီၤယိၤဟၣ် ဆှၢလီၤပှၤဆူနအိၣ် ဒ်သိးကသံကွၢ်နၤလၢ ‘မ့ၢ်နကဲပှၤလၢ ပခိးကွၢ်လၢ်အီၤ တဂၤန့ၣ်ဧါ. မ့တမ့ၢ် ပဘၣ်အိၣ်ခိးကွၢ်လၢ် ပှၤလၢ အဂၤတဂၤဒံးဧါ.’” ၂၁ ဖဲနၣ်ရံၣ်ဝဲန့ၣ် ယ့ၣ်ၡူးမၤဘျါ ပှၤဆူးပှၤဆါတဖၣ်, တၢ်ဆါလၢအနး, နီဟးထီၣ်ကွံာ် တၢ်ဝံတၢ်နါ ဒီးပှၤလၢ အမဲာ်တထံၣ်တၢ်အါဂၤ ထံၣ်ထီၣ်က့ၤတၢ်လီၤ. ၂၂ ဒီးယ့ၣ်ၡူး တဲဆၢအဝဲသ့ၣ်လၢ “က့ၤတဲဘၣ် စီၤယိၤဟၣ် တၢ်လၢသုထံၣ်ဘၣ် ဒီးနၢ်ဟူဘၣ်တဖၣ်န့ၣ်တက့ၢ်. ပှၤလၢ အမဲာ်တထံၣ်တၢ်တဖၣ်န့ၣ် ထံၣ်ထီၣ်က့ၤတၢ်လံ, ပှၤလၢ အခီၣ်ဟးဂီၤတဖၣ်န့ၣ် ဟးသ့ထီၣ်က့ၤလံ, ပှၤလၢ အဘၣ်တၢ်ဆါအၢတဖၣ်န့ၣ် ကဆှီထီၣ်က့ၤလံ, ပှၤလၢ အတနၢ်ဟူတၢ်တဖၣ်န့ၣ် နၢ်ဟူထီၣ်က့ၤတၢ်လံ, ပှၤလၢ အသံတဖၣ်န့ၣ် ဘၣ်တၢ်မၤ သမူထီၣ်က့ၤအီၤလံ ဒီးပှၤလၢ အဖှီၣ်အယာ်တဖၣ်န့ၣ် ဘၣ်တၢ်စံၣ်တဲၤတဲလီၤ အဝဲသ့ၣ်လၢ တၢ်သးခုကစီၣ်လီၤ. ၂၃ ပှၤလၢအတလီၤဃံၢ်လၢ ယဃိဘၣ်န့ၣ် ကသးခုဝဲလီၤ.”
၂၄ ဖဲစီၤယိၤဟၣ် အပျဲၢ်အဘီၣ်တဖၣ် က့ၤဝံၤအလီၢ်ခံ ယ့ၣ်ၡူးတဲဘၣ် ပှၤဂီၢ်မုၢ်ဘၣ်ဃးဒီး စီၤယိၤဟၣ်အဂ့ၢ် ဒ်အံၤလီၤ. “သုလဲၤလၢ ပှၢ်မုၢ်ကနၢ ဒ်သိးသုကလဲၤကွၢ် တၢ်မနုၤလဲၣ်. မ့ၢ်ဒ်သိး သုကထံၣ် တပိၢ်တဘိလၢ အဟူးဝးဝဲခီဖျိ ကလံၤအူဝဲန့ၣ်ဧါ. ၂၅ မ့တမ့ၢ်ဘၣ်န့ၣ် မ့ၢ်သုကလဲၤကွၢ် တၢ်မနုၤလဲၣ်. မ့ၢ်သုလဲၤဒ်သိး သုကထံၣ် ပှၤတဂၤလၢ အသိးဝဲဆ့ကၤ ကပုာ်လုးန့ၣ်ဧါ. ပှၤလၢ အသိးဆ့ကၤ ဃံဃံလၤလၤ ဒီးအိၣ်ဘၣ် ဘီၣ်ဘီၣ်ညီညီန့ၣ် အိၣ်ဝဲလၢ စီၤပၤအဟံၣ်ပူၤလီၤ. ၂၆ မ့မ့ၢ်ဒ်န့ၣ်န့ၣ် သုလဲၤကွၢ် တၢ်မနုၤလဲၣ်, ဝံတဂၤဧါ. မ့ၢ်, ယကတဲဘၣ်သုလၢ အဝဲန့ၣ် ဒိၣ်န့ၢ်ဒံးဝံတဂၤလီၤ. ၂၇ ဘၣ်ဃးဒီး ပှၤတဂၤအံၤအဂ့ၢ်န့ၣ် တၢ်ကွဲးအသး အိၣ်ဒ်အံၤလီၤ. ‘ကွၢ်မီၤ, ယကမၢလီၤ ယပှၤစိာ်တၢ်ကစီၣ်တဂၤ လၢနမဲာ်ညါ ဒ်သိးအဝဲ ကကတဲာ်ကတီၤဆိန့ၢ် ကျဲလၢနမဲာ်ညါလီၤ.’ ၂၈ ယကတဲဘၣ်သုလၢ ပှၤလၢ ပိာ်မုၣ်အိၣ်ဖျဲၣ်ဝဲ ခဲလၢာ်အကျါန့ၣ် ပှၤလၢအဒိၣ်န့ၢ် စီၤယိၤဟၣ် တအိၣ်နီတဂၤဘၣ်. ဘၣ်ဆၣ် ပှၤအဆံးတဂၤလၢ ကစၢ်ယွၤ အဘီအမုၢ်အပူၤန့ၣ် ဒိၣ်န့ၢ်ဒံးအီၤလီၤ.” ၂၉ (ပှၤဃ့သွဲဖိ ဒီးပှၤခဲလၢာ်န့ၣ် ဒိးဘျၢတ့ၢ်အသးလၢ ပှၤဘျၢတၢ် စီၤယိၤဟၣ် အတၢ်ဒိးဘျၢဝံၤလံအဃိ ဖဲအဝဲသ့ၣ် နၢ်ဟူဝဲဒ်န့ၣ်အခါ အဝဲသ့ၣ်တူၢ်လိာ်ဝဲလၢ ကစၢ်ယွၤမ့ၢ် ပှၤတီပှၤလိၤလီၤ. ၃၀ ဘၣ်ဆၣ် ပှၤဖၤရံၤၡဲ ဒီးပှၤလၢ အသ့စီၤမိၤၡ့ အတၢ်သိၣ်တၢ်သီန့ၣ် အဝဲသ့ၣ် တတူၢ်လိာ်ဝဲ ကစၢ်ယွၤအတၢ်ဟံးစုနဲၣ်ကျဲ ဘၣ်အဃိ တဒိးဘျၢအသးလၢ စီၤယိၤဟၣ် အအိၣ်ဘၣ်.)
၃၁ “လၢတၢ်န့ၣ်အဃိ ယကြၢးထိၣ်သတြီၤ ပှၤတစိၤအံၤဒီး မတၤတဖၣ်လဲၣ် ဒီးအဝဲသ့ၣ် လီၤဂာ်ဒီး မတၤလဲၣ်. ၃၂ အဝဲသ့ၣ်န့ၣ် လီၤဂာ်ဒီးဖိသၣ်လၢ အဆ့ၣ်နီၤလၢ တၢ်ဆါတၢ်ပှ့ၤအလီၢ် ဒီးတဲလိာ်အသး တဂၤဒီးတဂၤလၢ ‘ပအူပံလၢသုဂီၢ် ဘၣ်ဆၣ် သုတဂဲၤကလံၣ်ဘၣ်. ပဟီၣ်ကိးပသူ ဘၣ်ဆၣ် သုတဟီၣ်ဘၣ်.’ ၃၃ ဒ်န့ၣ်အသိး ပှၤဘျၢတၢ် စီၤယိၤဟၣ်န့ၣ် ဟဲဒီးတအီၣ်ကိၣ် ဒီးတအီစပံးထံဘၣ်. ဘၣ်ဆၣ် သုတဲလၢ ‘တၢ်ဝံတၢ်နါ အိၣ်လၢအလိၤလီၤ.’ ၃၄ မ့မ့ၢ်ပှၤကညီဖိခွါအံၤ ဟဲအီၣ်တၢ်ဒီးအီတၢ် ဘၣ်ဆၣ် သုတဲလၢ ‘ကွၢ်မီၤ, အဝဲမ့ၢ်ပှၤလၢ အအီၣ်တၢ်အါတလၢ ဒီးအီစပံးထံအါတလၢ ဒီးအဒီတံၤဒီသကိးဒီး ပှၤဃ့သွဲဖိ ဒီးပှၤတၢ်ဒဲးဘးဖိတဖၣ်လီၤ.’ ၃၅ ဒ်လဲၣ်ဂ့ၤဒ်လဲၣ်ဂ့ၤ တၢ်ကူၣ်သ့န့ၣ် ဘၣ်တၢ်ပာ်တီပာ်လိၤအီၤ* ခီဖျိလၢအဖိ* ခဲလၢာ်အဃိလီၤ.”
၃၆ ပှၤဖၤရံၤၡဲတဂၤ ကွဲမုာ်ယ့ၣ်ၡူးဒ်သိး ကဟဲအီၣ်တၢ် ဒီးအီၤအဂီၢ်လီၤ. အဃိ ယ့ၣ်ၡူး လဲၤနုာ်လီၤလၢ ပှၤဖၤရံၤၡဲအဟံၣ်ပူၤ ဒီးလဲၤဆ့ၣ်နီၤလၢ စီၢ်နီၤခိၣ်အကပၤလီၤ. ၃၇ ဒီးပိာ်မုၣ်လၢ အအိၣ်လၢ ဝ့ၢ်ပူၤတဂၤ ဘၣ်တၢ်သ့ၣ်ညါအီၤလၢ အမ့ၢ်ပှၤတၢ်ဒဲးဘးဖိန့ၣ် နၢ်ဟူဝဲလၢ ယ့ၣ်ၡူးဟဲအီၣ်တၢ်လၢ ပှၤဖၤရံၤၡဲအဟံၣ်လီၤ. အဃိ အဝဲဟဲစိာ်ဝဲ သိနၢမူလၢ ပလီလၢၢ်ဝါတဖျၢၣ် အပူၤလီၤ. ၃၈ အဝဲဟဲချံးလီၤအခီၣ်လၢ ယ့ၣ်ၡူးအခီၣ်ထံး, ဟီၣ်ဝဲဒီးမၤဘၣ်စီၣ်ယ့ၣ်ၡူးအခီၣ် လၢအမဲာ်ထံလီၤ. ဒီးထွါကွံာ်ဝဲ ယ့ၣ်ၡူးအခီၣ်လၢအခိၣ်ဆူၣ် တကးဒံးဘၣ် နၢမူဝဲအခီၣ်ကဖီလီဖိ ဒီးလူလီၤဝဲ သိနၢမူလၢ အခီၣ်လိၤလီၤ. ၃၉ ဖဲပှၤဖၤရံၤၡဲတဂၤလၢ အကွဲမုာ်ယ့ၣ်ၡူးန့ၣ် ထံၣ်ဝဲ တၢ်မၤအသးအံၤအခါ ဆိကမိၣ်ထီၣ်ဝဲလၢ “ပှၤအံၤ မ့မ့ၢ်ဝံနီၢ်ကီၢ်တဂၤန့ၣ် ပိာ်မုၣ်လၢ အထိးအီၤတဂၤအံၤ မ့ၢ်မတၤတဂၤလဲၣ်, မ့ၢ်ပှၤဒ်လဲၣ်တဂၤလဲၣ် ဒီးမ့ၢ်ဝဲ ပှၤတၢ်ဒဲးဘးဖိန့ၣ် အဝဲကသ့ၣ်ညါဝဲလီၤ.” ၄၀ ဘၣ်ဆၣ် ယ့ၣ်ၡူးတဲဆၢက့ၤအီၤလၢ “စီၤၡံမိၣ်ဧၢ,* ယကဘၣ်တဲနၤ တၢ်တမံၤနီၤ.” ဒီးအဝဲတဲဝဲ “သရၣ်ဧၢ, တဲသၢၤ.”
၄၁ “ပှၤခံဂၤ အကမၢ်ထီၣ်ဒီး ပှၤလၢ အဟ့ၣ်လိၢ်တၢ်တဂၤလီၤ. တဂၤန့ၣ် အကမၢ်အိၣ်ဝဲ ဒန့ၤရံၤ ၅၀၀ မ့မ့ၢ် လၢအဝဲတဂၤန့ၣ် ၅၀ လီၤ. ၄၂ ဖဲအဝဲသ့ၣ် ကလိးက့ၤအီၤအဂီၢ် အတၢ်တအိၣ် နီတမံၤလၢၤဘၣ်အခါန့ၣ် ပှၤဟ့ၣ်လိၢ်တၢ်တဂၤ ပျၢ်ကွံာ် အဝဲသ့ၣ်အကမၢ် လၢတၢ်သူၣ်အိၣ်သးအိၣ်အပူၤလီၤ. အဃိ ပှၤခံဂၤအံၤ ကအဲၣ်အီၤဒိၣ် ဖဲလဲၣ်တဂၤလဲၣ်.” ၄၃ စီၤၡံမိၣ် စံးဆၢက့ၤဝဲလၢ “ယဆိကမိၣ် ပှၤလၢအကမၢ် ဘၣ်တၢ်ပျၢ်ကွံာ်အီၤ အါတဂၤန့ၣ်လီၤ.” ယ့ၣ်ၡူးတဲအီၤလၢ “နစံးဆၢတၢ်န့ၣ် ဘၣ်ဝဲလီၤ.” ၄၄ ဒီးယ့ၣ်ၡူး ဃၣ်အသးဆူ ပိာ်မုၣ်တဂၤန့ၣ်အအိၣ် ဒီးတဲဘၣ် စီၤၡံမိၣ်လၢ “နထံၣ် ပိာ်မုၣ်တဂၤအံၤဧါ. ယဟဲနုာ်လီၤလၢ နဟံၣ်ပူၤ ဒီးနတဟ့ၣ်ယၤထံလၢ ယခီၣ်အဂီၢ်ဘၣ်. ဘၣ်ဆၣ် ပိာ်မုၣ်တဂၤအံၤ မၤဘၣ်စီၣ် ယခီၣ်လၢ အမဲာ်ထံ ဒီးထွါကွံာ်ဝဲလၢ အခိၣ်ဆူၣ်လီၤ. ၄၅ နတနၢမူယၤဘၣ် ဘၣ်ဆၣ် စးထီၣ်လၢ ယဟဲနုာ်လီၤန့ၣ် ပိာ်မုၣ်အံၤ နၢမူဝဲယခီၣ်ကဖီလီဖိ တုၤခဲအံၤလီၤ. ၄၆ နတလူလီၤသိလၢ ယခိၣ်လိၤဘၣ် ဘၣ်ဆၣ် ပိာ်မုၣ်တဂၤအံၤ လူလီၤသိနၢမူလၢယခီၣ်လိၤလီၤ. ၄၇ လၢတၢ်ဂ့ၢ်အံၤအဃိ ယကတဲဘၣ်နၤ, မ့ၢ်လၢ ပိာ်မုၣ်တဂၤအံၤ ပာ်ဖျါထီၣ် တၢ်အဲၣ်အါအဃိ အတၢ်ဒဲးဘး မ့ၢ်အိၣ်ဝဲအါမး ဘၣ်ဆၣ် ဘၣ်တၢ်ပျၢ်ကွံာ်အီၤလီၤ. မ့မ့ၢ် ပှၤလၢအဘၣ် တၢ်ပျၢ်အီၤစှၤန့ၣ် ပာ်ဖျါထီၣ်ဝဲ တၢ်အဲၣ်စှၤလီၤ.” ၄၈ ဝံၤဒီး ယ့ၣ်ၡူးတဲဘၣ် ပိာ်မုၣ်တဂၤအံၤလၢ “နတၢ်ဒဲးဘးန့ၣ် ဘၣ်တၢ်ပျၢ်ကွံာ်အီၤလံ.” ၄၉ ဒီးပှၤလၢအဆ့ၣ်နီၤ ဃုာ်ဒီးအီၤလၢ စီၢ်နီၤခိၣ်အကပၤတဖၣ်န့ၣ် တဲလိာ်အသး တဂၤဒီးတဂၤလၢ “ပှၤဂၤအတၢ်ဒဲးဘးဒၣ်လဲာ် အဝဲပျၢ်ကွံာ်ဝဲသ့အဃိ အမ့ၢ်ပှၤဒ်လဲၣ်တဂၤလဲၣ်.” ၅၀ ဘၣ်ဆၣ် ယ့ၣ်ၡူးတဲဘၣ် ပိာ်မုၣ်တဂၤန့ၣ်လၢ “နတၢ်နာ်မၤပူၤဖျဲးနၤလံ. အဃိ က့ၤမုာ်မုာ်တက့ၢ်.”