မၤတၢ်
၁၇ အဝဲသ့ၣ်လဲၤခီဂာ် ဝ့ၢ်အၣ်ဖံပလံၤ ဒီးဝ့ၢ်အၤပလိၤနံ ဝံၤဒီးလဲၤတုၤဝဲလၢ ဝ့ၢ်သ့းစၤလနံလီၤ. ဖဲန့ၣ်ပှၤယူဒၤဖိ အဘူၣ်ဘျီၣ် အိၣ်ဝဲတဖျၢၣ်လီၤ. ၂ ဒ်စီၤပီလူး မၤညီနုၢ်ဝဲအသိး အဝဲလဲၤနုာ်လီၤဝဲလၢ အဝဲသ့ၣ်အအိၣ် လၢမုၢ်အိၣ်ဘှံးနံၤ သၢနွံလၢာ် ဒီးသိၣ်လိအဝဲသ့ၣ် ဘၣ်ဃးဒီး တၢ်ကွဲးအသးတဖၣ်လီၤ. ၃ စီၤပီလူး တဲနၢ်ပၢၢ်အဝဲသ့ၣ် တကးဒံးဘၣ် သူဝဲ တၢ်ကွဲးအသးတဖၣ် ဒ်သိး ကပာ်ဖျါထီၣ်လၢ ခရံာ်ကဘၣ်တူၢ် တၢ်နးတၢ်ဖှီၣ်ဒီး ဂဲၤဆၢထၢၣ်လၢ တၢ်သံအဂ့ၢ်လီၤ. ဒီးအဝဲတဲဝဲလၢ “ယ့ၣ်ၡူးလၢ ယစံၣ်တဲၤတဲလီၤသု အဂ့ၢ်တဂၤန့ၣ် မ့ၢ်ဝဲခရံာ်လီၤ.” ၄ အဃိ ပှၤတနီၤလၢ အဝဲသ့ၣ်အကျါန့ၣ် ကဲထီၣ်ပှၤစူၢ် က့ၤနာ်က့ၤတၢ် ဒီးပာ်ဖှိၣ် မၤသကိးတၢ်ဒီး စီၤပီလူး ဒီးစီၤစံလၤလီၤ. တကးဒံးဘၣ် ပှၤကြံးဖိအါဂၤလၢ အဘူၣ်ထီၣ်ဘါထီၣ်ယွၤ ဒီးပှၤပိာ်မုၣ်လၢ အရ့ဒိၣ်တဘျုးဂၤညါ မၤဝဲဒ်န့ၣ်စ့ၢ်ကီးလီၤ.
၅ မ့မ့ၢ် ပှၤယူဒၤဖိတဖၣ်န့ၣ် အသးက့ၣ်တၢ်အဃိ ကိးဖှိၣ် ပှၤအၢပှၤသီတနီၤလၢ အအိၣ်ကလီလၢ တၢ်ဆါတၢ်ပှ့ၤအလီၢ် ဒီးဒုးအိၣ်ဖှိၣ် ပှၤဂီၢ်မုၢ်တဒူၣ်လၢ အကမၤ တၢထီၣ်တၢလီၤတၢ်လၢ ဝ့ၢ်ပူၤလီၤ. အဝဲသ့ၣ် နုာ်လီၤဆူၣ်ဝဲလၢ စီၤယါစီၣ်အဟံၣ်ပူၤ ဒ်သိးကကိးထီၣ် စီၤပီလူး ဒီးစီၤစံလၤလၢ ပှၤဂီၢ်မုၢ်တဒူၣ်န့ၣ် အမဲာ်ညါလီၤ. ၆ အဝဲသ့ၣ်ဃု စီၤပီလူးဒီးစီၤစံလၤ တဘၣ်ဘၣ်အဃိ အဝဲသ့ၣ်တွံၢ်ထီၣ် စီၤယါစီၣ်ဒီး ဒီပုၢ်ဝဲၢ်ခွါတနီၤ လၢဝ့ၢ်အပှၤခိၣ်ပှၤနၢ်တဖၣ် အမဲာ်ညါ ဒီးကိးပသူထီၣ်ဝဲလၢ “ပိာ်ခွါလၢ အမၤတၢထီၣ် တၢလီၤတၢ်လၢ တၢ်လီၢ်ဝးဝးန့ၣ် ဟဲတုၤဖဲအံၤလံ. ၇ ဒီးစီၤယါစီၣ် တူၢ်လိာ်မုာ် အဝဲသ့ၣ်လၢ အဟံၣ်လီၤ. ပှၤတဖၣ်အံၤ ထီဒါကဲစၢ် အတၢ်သိၣ်တၢ်သီတဖၣ် ခီဖျိတဲဝဲလၢ စီၤပၤအိၣ်ဒံးဝဲတဂၤလၢ အမ့ၢ်ယ့ၣ်ၡူးန့ၣ်လီၤ.” ၈ ဖဲပှၤဂီၢ်မုၢ်ဒီး ဝ့ၢ်အပှၤခိၣ်ပှၤနၢ်တဖၣ် နၢ်ဟူဝဲဒ်န့ၣ်အခါ အဝဲသ့ၣ် သူၣ်ကိၢ်သးဂီၤတၢ်လီၤ. ၉ ဒီးဒ်သိး တၢ်ကပျၢ်ကွံာ် စီၤယါစီၣ်ဒီး ဒီပုၢ်ဝဲၢ်အဂၤတဖၣ်အဂီၢ် စ့လၢပှၤကဘၣ်ဟ့ၣ်လီၤန့ၣ် ပှၤတဖၣ်အံၤ ဟံးန့ၢ်လၢ အဝဲသ့ၣ်အအိၣ် ဝံၤဒီးပျၢ်ကွံာ် အဝဲသ့ၣ်လီၤ.
၁၀ လၢမုၢ်နၤခီန့ၣ် ဒီပုၢ်ဝဲၢ်ခွါတဖၣ် ဆှၢလီၤစီၤပီလူး ဒီးစီၤစံလၤဆူ ဝ့ၢ်ဘ့းရံၤ တဘျီဃီလီၤ. ဖဲအဝဲသ့ၣ် လဲၤတုၤအခါ လဲၤနုာ်လီၤဝဲလၢ ပှၤယူဒၤဖိ အဘူၣ်ဘျီၣ်ပူၤလီၤ. ၁၁ ဒီးပှၤဖဲန့ၣ်တဖၣ် အတၢ်ပာ်သူၣ်ပာ်သး ဂ့ၤဒိၣ်န့ၢ်ဒံး ပှၤသ့းစၤလနံဖိလီၤ. အဝဲသ့ၣ်တူၢ်လိာ် ကစၢ်ယွၤ အကလုၢ်ကထါလၢ တၢ်သူၣ်ဆူၣ် သးဆူၣ်အပူၤ ဒီးတနံၤဘၣ် တနံၤန့ၣ် အဝဲသ့ၣ်ဃုကွၢ်ဝဲ တၢ်ကွဲးအသးတဖၣ် လီၤတံၢ်လီၢ်ဆဲး ဒ်သိးကသ့ၣ်ညါဝဲလၢ တၢ်လၢအဝဲသ့ၣ် နၢ်ဟူဝဲတဖၣ်န့ၣ် မ့ၢ်အဘၣ်ဧါ တဘၣ်ဧါန့ၣ်လီၤ. ၁၂ အဃိ အဝဲသ့ၣ် အါဂၤကဲထီၣ် ပှၤလၢအစူၢ်က့ၤနာ်က့ၤတၢ် တကးဒံးဘၣ် ကြံးမုၣ်လၢ အရ့ဒိၣ်တဘျုးဂၤ ဒီးကြံးခွါ တနီၤစ့ၢ်ကီး ကဲထီၣ်ပှၤလၢ အစူၢ်က့ၤနာ်က့ၤတၢ်လီၤ. ၁၃ ဘၣ်ဆၣ် ဖဲပှၤယူဒၤဖိတဖၣ်လၢ အအိၣ်လၢ ဝ့ၢ်သ့းစၤလနံန့ၣ် သ့ၣ်ညါဝဲလၢ စီၤပီလူးစံၣ်တဲၤတဲလီၤ ယွၤအကလုၢ်ကထါလၢ ဝ့ၢ်ဘ့းရံၤအခါ အဝဲသ့ၣ် လဲၤဖဲန့ၣ် ဒ်သိး ကထိၣ်ဟူးထိၣ်ဂဲၤထီၣ် ပှၤဂီၢ်မုၢ်တဖၣ်လၢ ကထီဒါတၢ်အဂီၢ်လီၤ. ၁၄ တဘျီဃီန့ၣ် ဒီပုၢ်ဝဲၢ်ခွါတဖၣ် ဆှၢလီၤစီၤပီလူးလၢ ပီၣ်လဲၣ်နံၤလီၤ. မ့မ့ၢ် စီၤစံလၤ ဒီးစီၤတံၤမသ့းန့ၣ် အိၣ်တ့ၢ်ဝဲဖဲန့ၣ်လီၤ. ၁၅ ဘၣ်ဆၣ် ပှၤလၢအလဲၤတၢ်ဒီး စီၤပီလူးန့ၣ် လဲၤဆှၢအီၤတုၤလၢ ဝ့ၢ်အၤသ့ၣ်လီၤ. ဒီးစီၤပီလူးတဲဘၣ် အဝဲသ့ၣ်လၢ အဝဲသ့ၣ် ကဘၣ်မၢစီၤစံလၤ ဒီးစီၤတံၤမသ့း ဟဲလၢအအိၣ်လၢ အဆိအချ့လီၤ. ဒီးအဝဲသ့ၣ်က့ၤဝဲလီၤ.
၁၆ ဖဲစီၤပီလူး အိၣ်ခိးအဝဲသ့ၣ် လၢဝ့ၢ်အၤသ့ၣ်အခါ ထံၣ်ဝဲလၢ ဝ့ၢ်တဖျၢၣ်အံၤ ပှဲၤဒီးတၢ်ဂီၤတၢ်ဖှီၣ် တဖၣ်အဃိ အသးဘၣ်တံာ်တာ်ဝဲ ဒိၣ်မးလီၤ. ၁၇ အဃိ လၢဘူၣ်ဘျီၣ်အပူၤန့ၣ် စီၤပီလူး သိၣ်လိဝဲ ပှၤယူဒၤဖိ ဒီးပှၤအဂၤလၢ အဘူၣ်ထီၣ်ဘါထီၣ် ယွၤလီၤ. ဒီးကိးနံၤဒဲးန့ၣ် အဝဲ သိၣ်လိစ့ၢ်ကီး ပှၤလၢအထံၣ်ဝဲလၢ တၢ်ဆါတၢ်ပှ့ၤအလီၢ် န့ၣ်လီၤ. ၁၈ ဘၣ်ဆၣ် ပှၤအ့းပံၤကူၤရူးဖိ ဒီးပှၤစတီးအၤဖိ အပှၤကူၣ်ဘၣ်ကူၣ်သ့တနီၤ တဲအါလိာ်သးဒီး အီၤလီၤ. ဒီးမ့ၢ်လၢ စီၤပီလူး စံၣ်တဲၤတဲလီၤ တၢ်သးခုကစီၣ် ဘၣ်ဃးဒီးယ့ၣ်ၡူး ဒီးတၢ်ဂဲၤဆၢထၢၣ် သမူထီၣ်က့ၤအဂ့ၢ်အဃိ အဝဲသ့ၣ်တနီၤန့ၣ် တဲဝဲလၢ “ပှၤလၢအဟး တဲကြီတၢ်တဂၤအံၤ အဲၣ်ဒိးတဲ တၢ်မနုၤလဲၣ်.” မ့မ့ၢ် ပှၤအဂၤတနီၤ တဲဝဲလၢ “ဖျါလၢအဝဲ စံၣ်တဲၤတဲလီၤတၢ် ဘၣ်ဃးဒီး ပှၤထံဂၤကီၢ်ဂၤ အယွၤတဖၣ်အဂ့ၢ်လီၤ.” ၁၉ အဃိ အဝဲသ့ၣ်ဟံးန့ၢ်အီၤ ဒီးလဲၤကိးအီၤလၢ အၤရံအါဖကၢး* ဒီးတဲဝဲလၢ “ဘၣ်ဃးဒီး တၢ်သိၣ်လိအသီလၢ နသိၣ်လိတခါအံၤန့ၣ် နတဲနၢ်ပၢၢ်အါထီၣ်ပှၤ ကသ့ဧါ. ၂၀ တၢ်ဂ့ၢ်လၢ နတဲတဖၣ်န့ၣ် သီၣ်ဘၣ်ပနၢ် လီၤဆီဒိၣ်မး. ဒီးပအဲၣ်ဒိးသ့ၣ်ညါလၢ တၢ်ဂ့ၢ်တဖၣ်အံၤ အခီပညီဒ်လဲၣ်.” ၂၁ တၢ်လၢ ပှၤအၤသ့ၣ်ဖိကိးဂၤဒဲး ဒီးပှၤလၢ ထံဂၤကီၢ်ဂၤလၢ အအိၣ်ဖဲန့ၣ်တဖၣ်န့ၣ် ဖဲအဝဲသ့ၣ် ချုးအဆၢကတီၢ် တမၤတၢ်အဂၤ နီတမံၤဘၣ်, အိၣ်ဒၣ်ထဲ အဝဲသ့ၣ် တဲသကိးဝဲ မ့တမ့ၢ် ဒိကနၣ်ဝဲ တၢ်ဂ့ၢ်အသီ တမံၤမံၤလီၤ. ၂၂ ဒီးစီၤပီလူး ဆၢထၢၣ်လၢ အၤရံအါဖကၢး အခၢၣ်သး ဒီးတဲဝဲလၢ
“ပှၤအၤသ့ၣ်ဖိသ့ၣ်ဧၢ, လၢတၢ်ခဲလၢာ်အပူၤန့ၣ် ယထံၣ်လၢ သုယူးယီၣ်ကစၢ်တဖၣ် အါန့ၢ်ဒံးပှၤဂၤလီၤ. ၂၃ အဒိ ဖဲယဟးဖဲအံၤအခါ ယကွၢ်တၢ်လၢ သုဘူၣ်ထီၣ်ဘါထီၣ်အီၤတဖၣ် လီၤတံၢ်လီၤဆဲး ဒီးယထံၣ် တၢ်လုၢ်လီၢ်တတီၤလၢ အိၣ်ဒီးတၢ်ကွဲးအသးလၢ အလိၤ, တဲဝဲလၢ ‘ယွၤလၢ ပတသ့ၣ်ညါအီၤဘၣ် တဂၤအဂီၢ်လီၤ.’ အဃိ ယွၤလၢ သုဘူၣ်ထီၣ်ဘါထီၣ် ဘၣ်ဆၣ် သုတသ့ၣ်ညါအီၤဘၣ် တဂၤန့ၣ် ယစံၣ်တဲၤတဲလီၤသုလၢ အဝဲအဂ့ၢ်လီၤ. ၂၄ ကစၢ်ယွၤလၢ အတ့လီၤ ဟီၣ်ခိၣ်ဒီးတၢ်အိၣ်လၢ အပူၤခဲလၢာ်န့ၣ် အဝဲမ့ၢ်မူခိၣ်ဒီး ဟီၣ်ခိၣ်အကစၢ်အဃိ တၢ်လုၢ်ဟံၣ်လၢ ပှၤတ့ထီၣ်ဝဲလၢပှၤစုန့ၣ် အဝဲတအိၣ်တဆိးလၢ အပူၤဘၣ်. ၂၅ ဒီးမ့ၢ်လၢ အနီၢ်ကစၢ်ဒၣ်ဝဲ ဟ့ၣ်လီၤ ပှၤခဲလၢာ်လၢ သးသမူ, ဒုးကသါပှၤ ဒီးဟ့ၣ်ပှၤတၢ်အဂၤ ခဲလၢာ်အဃိ အဝဲတလိၣ်ဘၣ် ပှၤဟီၣ်ခိၣ်ဖိတဖၣ် မၤန့ၢ်တၢ်လၢ အဂီၢ်နီတမံၤဘၣ်. ၂၆ ဒီးအဝဲဒုးအိၣ်ထီၣ် ပှၤဟီၣ်ခိၣ်ဖိ ကိးကလုာ်ဒဲးလၢ အအိၣ်ဝဲဆိးဝဲလၢ ဟီၣ်ခိၣ်ဒီဘ့ၣ်အပူၤ ခီဖျိလၢ ပိာ်ခွါတဂၤလီၤ. အဝဲပာ်ပနီၣ်ဆိ တၢ်ဆၢကတီၢ် ဒီးတၢ်လီၢ်တၢ်ကျဲလၢ ပှၤကအိၣ်ကဆိးအဂီၢ် ၂၇ ဒ်သိးအဝဲသ့ၣ် ကဃုကစၢ်ယွၤအဂီၢ်လီၤ. အဝဲသ့ၣ် မ့ၢ်ဂုာ်ကျဲးစၢးဃုအီၤန့ၣ် ကထံၣ်န့ၢ်အီၤ သပှၢ်ကတၢၢ်လီၤ. နီၢ်ကီၢ်န့ၣ် အဝဲအိၣ်တယံၤဒီး ပဝဲနီတဂၤဘၣ်. ၂၈ လၢအဝဲဒၣ် အဃိန့ၣ် ပမူ, ပဟူးပဂဲၤ ဒီးပဟဲကဲထီၣ်လၢ အဃိလီၤ. ဒ်ပှၤကွဲးထါလၢ သုကျါတနီၤ တဲဝဲအသိး ‘ပဝဲစ့ၢ်ကီး ပမ့ၢ်အဝဲဒၣ် အဖိတဖၣ်လီၤ.’
၂၉ “အဃိ ဒ်ပမ့ၢ် ကစၢ်ယွၤအဖိအလံၤအသိး ပတကြၢးဆိကမိၣ်လၢ ကစၢ်ယွၤန့ၣ် မ့ၢ်တၢ်လၢ အလီၤဂာ်ဒီး ထူ, စ့ မ့တမ့ၢ် လၢၢ်လၢ ပှၤဟီၣ်ခိၣ်ဖိစိးပျၤ ဒီးတ့ထီၣ်ဝဲန့ၣ်ဘၣ်. ၃၀ ဖဲပှၤတသ့ၣ်ညါအီၤ ဒံးဘၣ်အခါ ကစၢ်ယွၤ ကွၢ်ကပာ်ကွံာ် တၢ်ကမၣ်တဖၣ်အံၤ သနာ်က့ မ့မ့ၢ်ခဲအံၤ အဝဲတဲဘၣ် ပှၤခဲလၢာ်လၢ အအိၣ်လၢ တၢ်လီၢ်ကိးတီၤဒဲးန့ၣ် အဝဲသ့ၣ် ကြၢးပီၢ်ယၢ်လီၤက့ၤအသး, ၃၁ မ့ၢ်လၢ အဝဲပာ်ပနီၣ် မုၢ်တနံၤလၢ အကစံၣ်ညီၣ်ဟီၣ်ခိၣ် တီတီလိၤလိၤ ခီဖျိပှၤတဂၤ လၢအဝဲ ဃုထၢထီၣ်ဝဲလီၤ. ဘၣ်ဃးဒီး တၢ်ဂ့ၢ်အံၤန့ၣ် အဝဲဟ့ၣ် ပှၤကိးဂၤဒဲး တၢ်အုၣ်အသး ခီဖျိလၢ အဝဲဒုးဂဲၤဆၢထၢၣ် ပှၤတဂၤန့ၣ်လၢ တၢ်သံအဃိလီၤ.”
၃၂ ဖဲအဝဲသ့ၣ်နၢ်ဟူ ဘၣ်ဃးဒီး ပှၤသံကဂဲၤဆၢထၢၣ် သမူထီၣ်က့ၤအခါ ပှၤတနီၤ နံၤဘၣ်အီၤ ဒီးတနီၤတဲဝဲလၢ “ပကဒိကနၣ် တၢ်ဂ့ၢ်အံၤလၢနအိၣ် တဘျီကဒီးသၢၤ.” ၃၃ အဃိ စီၤပီလူးဟးထီၣ်ကွံာ်လၢ အဝဲသ့ၣ်အအိၣ်လီၤ. ၃၄ ဘၣ်ဆၣ် ပှၤတနီၤ ပိာ်ထီၣ်စီၤပီလူးအခံ ဒီးကဲထီၣ် ပှၤစူၢ်က့ၤနာ်က့ၤတၢ်လီၤ. လၢအဝဲသ့ၣ် အကျါတနီၤန့ၣ် မ့ၢ်ဝဲ စီၤဒံၤနူၤစံၤ လၢအမ့ၢ် စံၣ်ညီၣ်ကွီၢ်တဂၤလၢ အၤရံအါဖကၢး အရူ, ပိာ်မုၣ်တဂၤလၢ အမံၤမ့ၢ် နီၢ်ဒမၤရံ ဒီးပှၤအဂၤတဖၣ်လီၤ.