မၤတၢ်
၄ ဖဲအဝဲသ့ၣ်ခံဂၤ တဲတၢ်ဒီး ပှၤဂီၢ်မုၢ်အခါန့ၣ် ပှၤလုၢ်တၢ်ဒိၣ်တဖၣ်, ပှၤကွၢ်ထွဲ တၢ်လုၢ်ဟံၣ်အခိၣ် ဒီးပှၤစးဒူၤကဲတဖၣ် ဟဲလၢအဝဲသ့ၣ် အအိၣ်လီၤ. ၂ ဒီးမ့ၢ်လၢ တၢ်မၢဖိတဖၣ် သိၣ်လိပှၤဂီၢ်မုၢ် ဒီးစံၣ်တဲၤတဲလီၤဝဲလၢ ယ့ၣ်ၡူးဘၣ်တၢ် မၤသမူထီၣ်က့ၤအီၤလၢ တၢ်သံအဂ့ၢ် ပျီပျီအဃိ အဝဲသ့ၣ်အသး ဘၣ်တံာ်တာ်ဝဲလီၤ. ၃ အဃိ အဝဲသ့ၣ် ဖီၣ်တၢ်မၢဖိတဖၣ် ဒီးဘၣ်လၢ မုၢ်ဟါလီၤလံအဃိ အဝဲသ့ၣ် ဖၢနုာ်အီၤလၢဃိာ်ပူၤ တုၤလီၤလၢ လၢခံတနံၤလီၤ. ၄ ဘၣ်ဆၣ် ပှၤအါဂၤလၢ အနၢ်ဟူဘၣ် တၢ်စံၣ်တဲၤတဲလီၤန့ၣ် စူၢ်က့ၤနာ်က့ၤတၢ် ဒီးပိာ်ခွါလၢ အစူၢ်က့ၤနာ်က့ၤတၢ်တဖၣ်န့ၣ် အနီၣ်ဂံၢ်အါထီၣ် တုၤလၢ အဂၤ ၅,၀၀၀ လီၤ.
၅ လၢခံတနံၤန့ၣ် အဝဲသ့ၣ် အပှၤခိၣ်ပှၤနၢ်, ပှၤသူၣ်က့သးပှၢ်တဖၣ် ဒီးပှၤကွဲးလံာ်တဖၣ် ပာ်ဖှိၣ်ထီၣ်အသးလၢ ယရူၤၡလ့ၣ်အပူၤ ၆ ဃုာ်ဒီး ပှၤလုၢ်တၢ်ဒိၣ်အခိၣ် စီၤအၣ်နၣ်, စီၤကၤယါဖၤ, စီၤယိၤဟၣ်, စီၤအလ့းစၣ်ဒြူး ဒီးပှၤခဲလၢာ်လၢ အဒီဘူးဒီတံၢ်ဒီး ပှၤလုၢ်တၢ်ဒိၣ်အခိၣ်န့ၣ်လီၤ. ၇ အဝဲသ့ၣ်မၢ စီၤပ့းတရူး ဒီးစီၤယိၤဟၣ် ဆၢထၢၣ်လၢ အဝဲသ့ၣ် အခၢၣ်သးဒီး သံကွၢ်ဝဲလၢ “သုမၤတၢ်အံၤလၢ မတၤအစိအကမီၤ ဒီးလၢမတၤ အမံၤလဲၣ်.” ၈ စီၤပ့းတရူး လၢထီၣ်ပှဲၤထီၣ် ဒီးသးစီဆှံ ဒီးတဲဘၣ် အဝဲသ့ၣ်လၢ
“ပှၤဂီၢ်မုၢ်ခိၣ်နၢ်တဖၣ် ဒီးပှၤသူၣ်က့သးပှၢ်သ့ၣ်ဧၢ, ၉ တနံၤအံၤ သုမ့ၢ်သံကွၢ်သံဒိးပှၤ ဘၣ်ဃးဒီး ပှၤလၢ အခီၣ်တဂ့ၤတဂၤအံၤ လၢအဘၣ် တၢ်မၤဂ့ၤထီၣ်အီၤအဂ့ၢ် ဒီးသုမ့ၢ်အဲၣ်ဒိး သ့ၣ်ညါလၢ မတၤမၤဘျါက့ၤအီၤ တဂၤလဲၣ်န့ၣ် ၁၀ မ်သုဝဲခဲလၢာ် ဒီးပှၤအံၣ်စရ့လးဖိခဲလၢာ် သ့ၣ်ညါတၢ်ဂ့ၢ်အံၤတက့ၢ်. ပှၤတဂၤအံၤ အိၣ်ဆၢထၢၣ်လၢ သုမဲာ်ညါ ပှဲၤဒီးတၢ်အိၣ်ဆူၣ်အိၣ်ချ့န့ၣ် မ့ၢ်လၢ ပှၤနစၤရ့းဖိယ့ၣ်ၡူးလၢ သုပျၤထီအီၤလၢ သ့ၣ်တၢၣ်အလိၤ ဘၣ်ဆၣ် ကစၢ်ယွၤ ဒုးဂဲၤဆၢထၢၣ်က့ၤအီၤလၢ တၢ်သံတဂၤန့ၣ် အမံၤအဃိလီၤ. ၁၁ ဒီးအဝဲမ့ၢ် ‘လၢၢ်တဖျၢၣ်လၢ သုဝဲသ့ၣ်လၢအမ့ၢ် ပှၤသူၣ်ဟံၣ်ဖိတဖၣ် တပာ်ကဲအီၤဘၣ်, ဘၣ်ဆၣ် အဝဲ ကဲထီၣ်လၢၢ်လၢ အရ့ဒိၣ်ကတၢၢ်တဖျၢၣ်လီၤ.’ ၁၂ တကးဒံးဘၣ် ပှၤအဂၤလၢ အကအုၣ်က့ၤခီၣ်က့ၤပှၤန့ၣ် တအိၣ်နီတဂၤဘၣ်. ဒီးလၢမူခိၣ်အဖီလာ်န့ၣ် မံၤအဂုၤအဂၤလၢ ကစၢ်ယွၤ ဟ့ၣ်လီၤဝဲဒ်သိး ပကဒိးန့ၢ်ဘၣ် တၢ်အုၣ်က့ၤခီၣ်က့ၤ ခီဖျိလၢအီၤန့ၣ် တအိၣ်နီတဖျၢၣ်ဘၣ်.”
၁၃ ဖဲအဝဲသ့ၣ် ထံၣ်ဝဲလၢ စီၤပ့းတရူး ဒီးစီၤယိၤဟၣ် တဲတၢ်ဒူဒူ ဒီးသ့ၣ်ညါဝဲလၢ ပှၤခံဂၤအံၤ တမ့ၢ် ပှၤကူၣ်ဘၣ်ကူၣ်သ့ဘၣ်, မ့ၢ်ဒၣ် ပှၤမုၢ်ဆ့ၣ်မုၢ်ဂီၤဖိအခါ အဝဲသ့ၣ် ကမၢကမၣ်ဝဲ ဒိၣ်မးလီၤ. ဒီးအဝဲသ့ၣ် သ့ၣ်ညါနၢ်ပၢၢ်ထီၣ်ဝဲလၢ ပှၤခံဂၤအံၤ မ့ၢ်ပှၤလၢ အအိၣ်ဝဲဒီး ယ့ၣ်ၡူးလၢအပူၤကွံာ်န့ၣ်လီၤ. ၁၄ ဖဲအဝဲသ့ၣ်ကွၢ်ဝဲ ပှၤလၢအဘၣ် တၢ်မၤဘျါက့ၤအီၤတဂၤ ဆၢထၢၣ်ဃုာ်ဒီး ပှၤခံဂၤန့ၣ်အခါ အဝဲသ့ၣ် စံးဆၢက့ၤတၢ် တဘၣ်နီတမံၤဘၣ်. ၁၅ အဃိ အဝဲသ့ၣ် မၢပှၤသၢဂၤန့ၣ် ဟးထီၣ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်တဖျၢၣ်အချၢ ဒီးအဝဲသ့ၣ် တၢၣ်ပီၣ်တၢၣ်ပီလိာ်အသး တဂၤဒီးတဂၤ ၁၆ ဒီးတဲဝဲလၢ “ပှၤတဖၣ်အံၤ ပကြၢးမၤအဝဲသ့ၣ်ဒ်လဲၣ်. အဝဲသ့ၣ် မၤတၢ်ပနီၣ်လီၤလး တခါအံၤ ဒီးပှၤလၢ အအိၣ်ဝဲဆိးဝဲလၢ ယရူၤၡလ့ၣ်အပူၤကိးဂၤဒဲး သ့ၣ်ညါဝဲအဃိ ပဂ့ၢ်လိာ်အီၤ တသ့ဘၣ်. ၁၇ အဃိ ဒ်သိးတၢ်ကစီၣ်အံၤ သုတဟူထီၣ်သါလီၤလၢ ပှၤဂီၢ်မုၢ်အကျါ လၢၤတဂ့ၤအဂီၢ် ပကတဲပျံၤ တဲဖုးအဝဲသ့ၣ် ဒီးမၤလိာ်အဝဲသ့ၣ် ဒ်သိးအသုတတဲဘၣ် ပှၤဂၤလၢ ပှၤတဂၤအံၤ အမံၤအပူၤလၢၤတဂ့ၤအဂီၢ် န့ၣ်တက့ၢ်.”
၁၈ အဃိ ပှၤတဖၣ်န့ၣ် ကိးန့ၢ်အဝဲသ့ၣ် ဒီးမၤလိာ် အဝဲသ့ၣ်ဒ်သိး အသု တစံၣ်တဲၤတဲလီၤတၢ် ဒီးသိၣ်လိတၢ်လၢ ယ့ၣ်ၡူးအမံၤအပူၤ နီတစဲးလၢၤတဂ့ၤ အဂီၢ်လီၤ. ၁၉ ဘၣ်ဆၣ် စီၤပ့းတရူး ဒီးစီၤယိၤဟၣ် တဲဘၣ်အဝဲသ့ၣ် “လၢပကဒိကနၣ် ကစၢ်ယွၤအလီၢ် ပမ့ၢ်ဒိကနၣ်က့ၤလၢ သုကလုၢ်န့ၣ် မ့ၢ်ကစၢ်ယွၤ ကထံၣ်ဝဲလၢ အဘၣ်ဧါ တဘၣ်ဘၣ်ဧါန့ၣ် ဆၢတဲာ်တၢ်လၢ သုနီၢ်ကစၢ်တက့ၢ်. ၂၀ ဘၣ်ဆၣ် မ့မ့ၢ်ပှၤန့ၣ် တၢ်လၢပထံၣ်ဘၣ် ဒီးပနၢ်ဟူဘၣ်တဖၣ်န့ၣ် ပဘၣ်စံၣ်တဲၤတဲလီၤအီၤ ဒီးပပတုာ်တသ့ဘၣ်.” ၂၁ အဃိ အဝဲသ့ၣ် ဆဲးတဲပျံၤတဲဖုး စီၤပ့းတရူး ဒီးစီၤယိၤဟၣ် ဝံၤဒီးပျၢ်ကွံာ်အဝဲသ့ၣ် မ့ၢ်လၢ တထံၣ်အတၢ်ကမၣ်လၢ အကြၢးဘၣ် တၢ်စံၣ်ညီၣ်အီၤဘၣ်အဃိ ဒီးမ့ၢ်လၢ ပှၤဂီၢ်မုၢ်ခဲလၢာ် မၤလၤကပီၤ ကစၢ်ယွၤလၢ တၢ်မၤအသးတခါအံၤ အဃိလီၤ. ၂၂ ဒီးပှၤလၢ အဘၣ်တၢ်မၤဘျါက့ၤအီၤလၢ တၢ်လီၤလးအဃိ တဂၤအံၤန့ၣ် အသးနံၣ်အိၣ်ဝဲ ၄၀ ဘျဲၣ်လီၤ.
၂၃ ဖဲအဝဲသ့ၣ် ထူၣ်ဖျဲးထီၣ်ဝံၤအလီၢ်ခံ အဝဲသ့ၣ်က့ၤဝဲဆူ ပှၤလၢ အစူၢ်က့ၤနာ်က့ၤတၢ် ကဒဲကဒဲအအိၣ် ဒီးတဲဖျါထီၣ်ဝဲ တၢ်လၢ ပှၤလုၢ်တၢ်ဒိၣ်အခိၣ်တဖၣ် ဒီးပှၤသူၣ်က့သးပှၢ်တဖၣ် တဲဘၣ် အဝဲသ့ၣ်န့ၣ်လီၤ. ၂၄ ဖဲနၢ်ဟူဝဲဒ်န့ၣ်အခါ လၢတၢ်သးတဖျၢၣ်ဃီအပူၤ အဝဲသ့ၣ် ဃ့ဘါထုကဖၣ်တၢ်ဆူ ကစၢ်ယွၤ အအိၣ်လၢ
“တၢ်ပၢကစၢ်ဧၢ, နမ့ၢ်ပှၤလၢအတ့လီၤ မူခိၣ်ဒီးဟီၣ်ခိၣ် ဒီးပီၣ်လဲၣ် ဒီးကယဲၢ်တၢ်အိၣ်လၢ အပူၤခဲလၢာ်လီၤ. ၂၅ နသူသးစီဆှံဒ်သိး နကတဲတၢ်ခီဖျိလၢ နခ့နပှၤပဖုဖးဒိၣ် စီၤဒၤဝံးအထးခိၣ်လၢ ‘ဘၣ်မနုၤအဃိ ပှၤကလုာ်တဖၣ် အသးဘၣ်တံာ်တာ် ဒီးပှၤဟီၣ်ခိၣ်ဖိတဖၣ် ဆိကမိၣ်တၢ်လၢ အဘျုးတအိၣ်ဘၣ်တဖၣ် အဂ့ၢ်န့ၣ်လဲၣ်. ၂၆ ဟီၣ်ခိၣ်အစီၤပၤတဖၣ် ဆၢထၢၣ်ကတဲာ်ကတီၤ ပာ်စၢၤအသး ဒီးပှၤခိၣ်ပှၤနၢ်တဖၣ် အိၣ်ဖှိၣ်ဝဲတပူၤဃီ ဒ်သိးကထီဒါ ယဟိဝၤယွၤ ဒီးထီဒါဝဲ အပှၤဒိးဖှူသးန့ၣ်လီၤ.’* ၂၇ မ့ၢ်လီၤ, စီၤဟ့ၤရိာ် ဒီးစီၤပီၣ်တံၤပံၤလး ဒီးပှၤကလုာ်အဂၤတဖၣ် ဒီးပှၤအံၣ်စရ့လးဖိတဖၣ် အိၣ်ဖှိၣ်ဝဲတပူၤဃီ လၢဝ့ၢ်တဖျၢၣ်အံၤအပူၤ ဒ်သိးကထီဒါဝဲ နခ့နပှၤစီဆှံယ့ၣ်ၡူးလၢ နဒိးဖှူအီၤလီၤ. ၂၈ ဒီးအဝဲသ့ၣ် အိၣ်ဖှိၣ်ဝဲ ဒ်သိးကမၤတၢ်လၢ နတဲပာ်စၢၤဝဲအဂီၢ် ဒီးတၢ်သ့ၣ်တဖၣ်အံၤ ကဲထီၣ်အသး ခီဖျိလၢနစု ဒ်နတၢ်ဘၣ်သး အိၣ်ဝဲအသိးလီၤ. ၂၉ ယဟိဝၤယွၤဧၢ, ခဲအံၤ မ်နနၢ်ဟူအဝဲသ့ၣ် အတၢ်တဲပျံၤတဲဖုး ဒီးမၤစၢၤနကုၢ်တဖၣ် ဒ်သိး ကဆဲးစံၣ်တဲၤတဲလီၤ နကလုၢ်ကထါ ဒူဒူအဂီၢ်တက့ၢ်. ၃၀ ဒီးဆဲးယူာ်ထီၣ်နစုဒ်သိး ကမၤဘျါက့ၤ တၢ်ဆူးတၢ်ဆါအဂီၢ် ဒီးမၤတၢ်ပနီၣ်လီၤလး ဒီးတၢ်လီၤလိၢ်လီၤလးတဖၣ် ခီဖျိလၢ နခ့နပှၤစီဆှံ ယ့ၣ်ၡူးအမံၤန့ၣ်တက့ၢ်.”
၃၁ ဖဲအဝဲသ့ၣ် ဃ့ကညးတၢ် ဝံၤအလီၢ်ခံ တၢ်လီၢ်လၢအဝဲသ့ၣ် အိၣ်ဖှိၣ်ဝဲ တပူၤဃီန့ၣ် ဟူးဝးဝဲဒီး အဝဲသ့ၣ်ခဲလၢာ် လၢထီၣ်ပှဲၤထီၣ်ဒီး သးစီဆှံ ဒီးစံၣ်တဲၤတဲလီၤ ကစၢ်ယွၤ ကလုၢ်ကထါဒူဒူလီၤ.
၃၂ တကးဒံးဘၣ် ပှၤလၢ အစူၢ်က့ၤနာ်က့ၤတၢ် ကိးဂၤဒဲး အိၣ်ဒီး တၢ်သးတဖျၢၣ်ဃီ ဒီးတၢ်တိာ်ပာ် တမံၤဃီ ဒီးအဝဲသ့ၣ် တတဲဝဲလၢ တၢ်လၢအအိၣ်ဒီးအီၤန့ၣ် မ့ၢ်အတၢ်ဒၣ်ဝဲ နီတဂၤဘၣ်. မ့မ့ၢ် တၢ်လၢအအိၣ်ဒီး အဝဲသ့ၣ်ခဲလၢာ်န့ၣ် အဝဲသ့ၣ် ဟ့ၣ်နီၤလီၤလိာ်အသး တဂၤဒီးတဂၤလီၤ. ၃၃ ဒီးတၢ်မၢဖိတဖၣ် ဆဲးအုၣ်အသး သ့သ့ဘၣ်ဘၣ် ဘၣ်ဃးဒီး ကစၢ်ယ့ၣ်ၡူး အတၢ်ဂဲၤဆၢထၢၣ် သမူထီၣ်က့ၤအဂ့ၢ် ဒီးကစၢ်ယွၤ ပာ်ဖျါထီၣ် အတၢ်သးကညီၤ ဒိၣ်ဒိၣ်မုၢ်မုၢ် လၢအဝဲသ့ၣ်ခဲလၢာ် အဖီခိၣ်လီၤ. ၃၄ ဒီးလၢ အဝဲသ့ၣ်အကျါန့ၣ် ပှၤလၢ အတၢ်အိၣ်တယၢဘၣ်န့ၣ် တအိၣ်နီတဂၤဘၣ်, မ့ၢ်လၢ ပှၤကိးဂၤဒဲးလၢ အအိၣ်ဒီး ဟီၣ်ခိၣ်အလီၢ်တဖၣ်မ့ၢ်ဂ့ၤ, အဟံၣ်အဃီတဖၣ်မ့ၢ်ဂ့ၤ, ဆါကွံာ်ဝဲ ဒီးကျိၣ်စ့လၢ အဒိးန့ၢ်ဘၣ်ဝဲ တဖၣ်န့ၣ် အဝဲသ့ၣ်ဟဲစိာ် ၃၅ ဒီးအးလီၤဝဲလၢ တၢ်မၢဖိတဖၣ်အစုပူၤ ဒီးတၢ်ဟ့ၣ်နီၤလီၤအီၤ ဒ်ပှၤတဂၤစုာ်စုာ် အတၢ်လိၣ်ဘၣ် အိၣ်ဝဲအသိးန့ၣ်လီၤ. ၃၆ အဃိ ပှၤလ့ၤဝံဖိ စီၤယိၤသးလၢ အအိၣ်ဖျဲၣ်ထီၣ်လၢ ကီးကူပြူးအပူၤ, လၢတၢ်မၢဖိတဖၣ် ကိးစ့ၢ်ကီးအီၤလၢ စီၤဘၢ်နါဘၤ (အခီပညီမ့ၢ်ဝဲ “တၢ်မၤမုာ်ထီၣ်အဖိခွါ”) န့ၣ် ၃၇ အဝဲအိၣ်ဒီး ဟီၣ်ခိၣ်တကဝီၤ ဒီးဆါလီၤကွံာ်ဝဲဝံၤဒီး လဲၤစိာ်ဝဲအစ့ဒီး အးလီၤဝဲလၢ တၢ်မၢဖိတဖၣ် အစုပူၤလီၤ.