ရိမ့ၤ
၈ လၢတၢ်န့ၣ်အဃိ ပှၤလၢအအိၣ်လၢ ယ့ၣ်ၡူးခရံာ်အပူၤန့ၣ် တဘၣ်တၢ်စံၣ်ညီၣ် အဝဲသ့ၣ်ဘၣ်. ၂ သး* အတၢ်သိၣ်တၢ်သီ လၢအဒုးမူနၤဒ်သိး နကအိၣ်လၢ ယ့ၣ်ၡူးခရံာ်အပူၤန့ၣ် မၤထူၣ်ဖျဲးကွံာ်နၤလၢ တၢ်ဒဲးဘးဒီးတၢ်သံ အတၢ်သိၣ်တၢ်သီလံ. ၃ ဒီးမ့ၢ်လၢပှၤဟီၣ်ခိၣ်ဖိ အဂံၢ်စၢ်ဘါစၢ် ဒီးအိၣ်ဒီးတၢ်ဒဲးဘးအဃိ စီၤမိၤၡ့ အတၢ်သိၣ်တၢ်သီ တအိၣ်ဒီးတၢ်စိတၢ်ကမီၤလၢ ကမၤပူၤဖျဲးထီၣ်သုဘၣ်. ဘၣ်ဆၣ် ကစၢ်ယွၤမၤဝဲခီဖျိ အဆှၢလီၤအဖိခွါ လၢအလီၤဂာ်ဒီး ပှၤဟီၣ်ခိၣ်ဖိလၢ အအိၣ်ဒီးတၢ်ဒဲးဘး ဒ်သိးကမၤလီၤမၢ်ကွံာ် တၢ်ဒဲးဘးအဂီၢ်လီၤ. အဃိ ကစၢ်ယွၤစံၣ်ညီၣ်ဝဲ တၢ်ဒဲးဘးလၢ အအိၣ်လၢ တၢ်ဖံးတၢ်ညၣ်အပူၤလီၤ. ၄ လၢတၢ်န့ၣ်အဃိ တၢ်မၤလိာ်အတီအလိၤလၢ အဘၣ်ဃးဒီး စီၤမိၤၡ့ အတၢ်သိၣ်တၢ်သီန့ၣ် ဟဲလၢထီၣ်ပှဲၤထီၣ် သ့ခီဖျိလၢ ပဝဲလၢအလဲၤတၢ်ဒ် သးစီဆှံ အတၢ်ဟံးစုနဲၣ်ကျဲအသိး ဒီးတမ့ၢ်ဒ် တၢ်ဖံးတၢ်ညၣ် အတၢ်သူၣ်လီသးကွံ အိၣ်ဝဲအသိးဘၣ်. ၅ ပှၤလၢအအိၣ်မူမၤထွဲ ဒ်တၢ်ဖံးတၢ်ညၣ် အတၢ်သူၣ်လီသးကွံ အိၣ်ဝဲအသိးန့ၣ် ဆိကမိၣ်ဝဲ ဘၣ်ဃးဒီး တၢ်လၢအဘၣ်ထွဲလိာ်သးဒီး တၢ်ဖံးတၢ်ညၣ်ထီဘိလီၤ. မ့မ့ၢ် ပှၤလၢအိၣ်မူမၤထွဲဒ် သးစီဆှံ အတၢ်ဟံးစုနဲၣ်ကျဲအသိးန့ၣ် ဆိကမိၣ်ဝဲဘၣ်ဃးဒီး တၢ်လၢ အဘၣ်ထွဲလိာ်သးဒီး သးစီဆှံထီဘိလီၤ. ၆ ပှၤလၢအဆိကမိၣ် ဘၣ်ဃးဒီး တၢ်ဖံးတၢ်ညၣ် အတၢ်သူၣ်လီသးကွံ ထီဘိန့ၣ် ကဒိးန့ၢ်ဘၣ်တၢ်သံလီၤ. မ့မ့ၢ်ပှၤလၢ အဆိကမိၣ်ဘၣ်ဃးဒီး သးစီဆှံထီဘိန့ၣ် ကဒိးန့ၢ်ဘၣ်တၢ်မူ ဒီးတၢ်ဃူတၢ်ဖိးလီၤ. ၇ ပှၤလၢအဆိကမိၣ် ဘၣ်ဃးဒီး တၢ်ဖံးတၢ်ညၣ် အတၢ်သူၣ်လီသးကွံ ထီဘိန့ၣ် ကဲထီၣ်ကစၢ်ယွၤ အဒုၣ်အဒါ, မ့ၢ်လၢ တၢ်ဖံးတၢ်ညၣ်န့ၣ် တဒိကနၣ်ကစၢ်ယွၤ အတၢ်သိၣ်တၢ်သီဘၣ် ဒီးဒိကနၣ်ဝဲ တသ့ဘၣ်အဃိလီၤ. ၈ ပှၤလၢအအိၣ်မူဒ် တၢ်ဖံးတၢ်ညၣ် အတၢ်သူၣ်လီသးကွံ အသိးန့ၣ် မၤတၢ်ဘၣ် ကစၢ်ယွၤအသး တသ့ဘၣ်.
၉ ဘၣ်ဆၣ် ကစၢ်ယွၤအသးစီဆှံ မ့ၢ်အိၣ်လၢသုပူၤနီၢ်ကီၢ်န့ၣ် သုကအိၣ်မူ ဒ်သးစီဆှံ အတၢ်ဟံးစုနဲၣ်ကျဲအသိး ဒီးတမ့ၢ်ဒ် တၢ်ဖံးတၢ်ညၣ် အတၢ်သူၣ်လီသးကွံ အသိးဘၣ်. ဘၣ်ဆၣ် ပှၤတဂၤဂၤ မ့ၢ်တအိၣ်ဒီး ခရံာ်အသးဘၣ်န့ၣ် အဝဲတမ့ၢ် ခရံာ်အတၢ်ဘၣ်. ၁၀ ဘၣ်ဆၣ် ခရံာ်မ့ၢ်အိၣ်လၢ သုပူၤန့ၣ် သုနီၢ်ခိသံလၢ တၢ်ဒဲးဘးအဃိ သနာ်က့ သးစီဆှံန့ၣ် ဒုးမူထီၣ်သု ခီဖျိလၢ တၢ်တီတၢ်လိၤအဃိလီၤ. ၁၁ ကစၢ်ယွၤ အသးစီဆှံ ဒုးဂဲၤဆၢထၢၣ် ယ့ၣ်ၡူးလၢ တၢ်သံလီၤ. ဒီးသးစီဆှံအံၤ မ့ၢ်အိၣ်လၢသုပူၤန့ၣ် ပှၤလၢအဒုးဂဲၤဆၢထၢၣ် ယ့ၣ်ၡူးခရံာ်လၢ တၢ်သံတဂၤအံၤ ကဒုးမူထီၣ်စ့ၢ်ကီး သုနီၢ်ခိလၢ အသံသ့အံၤ ခီဖျိလၢ အသးစီဆှံလၢ အအိၣ်လၢ သုပူၤအဃိလီၤ.
၁၂ အဃိ ဒီပုၢ်ဝဲၢ်သ့ၣ်ဧၢ, ပအိၣ်ဒီးမူဒါ ဘၣ်ဆၣ် အတမ့ၢ်လၢ ပကအိၣ်မူမၤထွဲ ဒ်တၢ်ဖံးတၢ်ညၣ် အတၢ်သူၣ်လီသးကွံ အိၣ်ဝဲအသိးဘၣ်, ၁၃ မ့ၢ်လၢ သုမ့ၢ်အိၣ်မူမၤထွဲဒ် တၢ်ဖံးတၢ်ညၣ် အတၢ်သူၣ်လီသးကွံ အိၣ်ဝဲအသိးန့ၣ် သုကသံ သပှၢ်ကတၢၢ်လီၤ. ဘၣ်ဆၣ် ခီဖျိလၢ သးစီဆှံအဃိ သုမ့ၢ်မၤသံကွံာ် သုနီၢ်ခိအတၢ်မၤန့ၣ် သုကမူလီၤ. ၁၄ ဒီးပှၤခဲလၢာ်လၢ ယွၤအသးစီဆှံ ဟံးစုနဲၣ်ကျဲအီၤန့ၣ် မ့ၢ်ဝဲ ကစၢ်ယွၤအဖိခွါတဖၣ်လီၤ. ၁၅ သုတဒိးန့ၢ်ဘၣ်သးလၢ အဒုးကဲထီၣ် သုလၢကုၢ် ဒ်သိးသု ကဘၣ်ပျံၤဘၣ်ဖုး ကဒီးတၢ်ဘၣ်. လၢတၢ်န့ၣ်အလီၢ် သုဒိးန့ၢ်ဘၣ်သးလၢ အလုၢ်ဖိသု ဒီးခီဖျိလၢ သးအဝဲအံၤအဃိ ပကိးထီၣ် “အးဘၤ* ပၢ်ဧၢ” န့ၣ်လီၤ. ၁၆ ဒီးသးစီဆှံ အုၣ်ဃုာ်အသးဒီးပသးလၢ ပမ့ၢ်ကစၢ်ယွၤ အဖိတဖၣ်န့ၣ်လီၤ. ၁၇ ဒီးပမ့မ့ၢ်ကစၢ်ယွၤ အဖိတဖၣ်န့ၣ် ပမ့ၢ်စ့ၢ်ကီး ပှၤန့ၢ်သါဘၣ်တၢ်လၢ ကစၢ်ယွၤအအိၣ် ဒီးပှၤန့ၢ်သါဘၣ်တၢ် ဃုာ်ဒီးခရံာ်လီၤ. ဘၣ်ဆၣ် ဒ်သိးပကဒိးန့ၢ်ဘၣ် တၢ်လၤတၢ်ကပီၤ ဃုာ်ဒီးအီၤအဂီၢ် ပကဘၣ်တူၢ်ဆိ တၢ်နးတၢ်ဖှီၣ်ဃုာ်ဒီးအီၤလီၤ.
၁၈ ဒီးတၢ်နးတၢ်ဖှီၣ်လၢ ပထံၣ်ဘၣ်အီၤလၢ ဆၢကတီၢ်ခဲအံၤ ယမ့ၢ် ထိၣ်သတြီၤအီၤဒီး တၢ်လၤကပီၤလၢ အကဘၣ် တၢ်လီၣ်ဖျါထီၣ်အီၤ ခီဖျိလၢပှၤန့ၣ် တၢ်နးတၢ်ဖှီၣ်တဖၣ်အံၤ တမ့ၢ် တၢ်နီတမံၤဘၣ်. ၁၉ လၢတၢ်သးဆူၣ်အပူၤ တၢ်ဘၣ်တ့တဖၣ်န့ၣ် အိၣ်ခိးကွၢ်လၢ်ဝဲလၢ တၢ်ကလီၣ်ဖျါထီၣ် ကစၢ်ယွၤ အဖိခွါတဖၣ်, ၂၀ မ့ၢ်လၢ တၢ်ဘၣ်တ့တဖၣ်န့ၣ် ဘၣ်တၢ်ဟ့ၣ်လီၤကွံာ် အဝဲသ့ၣ်ဆူ တၢ်ကလီကလီ အပူၤလီၤ. ဘၣ်ဆၣ် တမ့ၢ်လၢ အဝဲသ့ၣ်အနီၢ်ကစၢ် အတၢ်ဘၣ်သးဘၣ်, မ့ၢ်ဖဲဒၣ်ကစၢ်ယွၤလၢ အဟ့ၣ်လီၤကွံာ်အီၤ တဂၤအသးလီၤ. သနာ်က့ ဖဲန့ၣ်န့ၣ် အဝဲဟ့ၣ် တၢ်မုၢ်လၢ် စ့ၢ်ကီးလီၤ. ၂၁ တၢ်ဘၣ်တ့တဖၣ်စ့ၢ်ကီး ကထူၣ်ဖျဲးထီၣ်လၢ တၢ်အုၣ်တၢ်ကျၣ် အတၢ်ကဲကုၢ်အပူၤ ဒီးကဒိးန့ၢ်ဘၣ်ဝဲ ကစၢ်ယွၤအဖိတဖၣ် အတၢ်သဘျ့ လၢအပှဲၤဒီး တၢ်လၤကပီၤလီၤ. ၂၂ ပသ့ၣ်ညါလၢ တုၤခဲအံၤန့ၣ် တၢ်ဘၣ်တ့ခဲလၢာ် ဆဲးကအုကစွါဒီး တူၢ်ဘၣ်တၢ်ဒ်သိးသိးလီၤ. ၂၃ တကးဒံးဘၣ် ပဝဲလၢ အအိၣ်ဒီး တၤသၣ်ဆိတခါ လၢအမ့ၢ်သးစီဆှံန့ၣ် ဖဲပအိၣ်ခိးဒံးတၢ်လၢ တၢ်သူၣ်ဆူၣ်သးဆူၣ် အပူၤန့ၣ် ပဝဲစ့ၢ်ကီး ပကအုကစွါလၢ ပသးပူၤ တုၤလၢယွၤကလုၢ်ဖိပှၤ အဆၢကတီၢ်န့ၣ်လီၤ. ဖဲန့ၣ်အဆၢကတီၢ် မ့ၢ်တုၤန့ၣ် ပကထူၣ်ဖျဲးထီၣ်လၢ ပနီၢ်ခိခီဖျိလၢ တၢ်ပှ့ၤက့ၤအဃိလီၤ. ၂၄ ခီဖျိလၢ တၢ်မုၢ်လၢ်အံၤအဃိ ပဘၣ် တၢ်အုၣ်က့ၤခီၣ်က့ၤပှၤလီၤ. ဘၣ်ဆၣ် တၢ်မုၢ်လၢ်လၢ ပထံၣ်ဘၣ်အီၤန့ၣ် တမ့ၢ်တၢ်မုၢ်လၢ်ဘၣ်, မ့ၢ်လၢပှၤတဂၤ မ့ၢ်ထံၣ်ဘၣ် တၢ်တမံၤမံၤန့ၣ် မ့ၢ်အလိၣ် မုၢ်လၢ်ဝဲဒံးဧါ. ၂၅ ဘၣ်ဆၣ် ပမ့ၢ်မုၢ်လၢ်တၢ်လၢ ပတထံၣ်ဘၣ်န့ၣ် လၢတၢ်သးဆူၣ်အပူၤ ပဆဲးခိးကွၢ်လၢ်အီၤပှဲၤဒီး တၢ်တူၢ်န့ၢ်ခီၣ်ကဲလီၤ.
၂၆ ဒ်န့ၣ်အသိး သးစီဆှံစ့ၢ်ကီး မၤစၢၤပှၤ ဖဲပဂံၢ်စၢ်ဘါစၢ်အခါလီၤ. ဒ်ပကြၢး ဃ့ထုကဖၣ်အသိး ပကဘၣ်ဃ့ တၢ်မနုၤလဲၣ်န့ၣ် ပတသ့ၣ်ညါဘၣ်. ဘၣ်ဆၣ် သးစီဆှံဃ့သကွံၢ်ကညး တၢ်လၢပဂီၢ် ဘၣ်ဃးဒီး ပတၢ်ကအုကစွါလၢ ပတဲဖျါထီၣ်အီၤ တဘၣ်ဘၣ်တဖၣ်န့ၣ်လီၤ. ၂၇ ကစၢ်ယွၤလၢ အဃုကွၢ်ပသးန့ၣ် သ့ၣ်ညါဝဲ တၢ်လၢသးစီဆှံ ဃ့န့ၢ်ဝဲလၢ ပှၤစီဆှံတဖၣ်အဂီၢ် မ့ၢ်လၢ သးစီဆှံဃ့တၢ်ဒ် ကစၢ်ယွၤ အတၢ်ဘၣ်သး အသိးအဃိလီၤ.
၂၈ ပသ့ၣ်ညါလၢ ကစၢ်ယွၤမၤဝဲဒ်သိး တၢ်ခဲလၢာ် ကမၤသကိးတၢ် ဒ်သိးကကဲဘျုးလၢ ပှၤလၢ အအဲၣ်ယွၤအဂီၢ်လီၤ. ပှၤတဖၣ်အံၤ ဘၣ်တၢ်ကိးအဝဲသ့ၣ် ဒ်အတၢ်တိာ်ပာ် အိၣ်ဝဲအသိးလီၤ. ၂၉ ပှၤလၢကစၢ်ယွၤ ဆိကမိၣ်ပာ်စၢၤအီၤလၢ အခီၣ်ထံးန့ၣ် အဝဲဃုထၢပာ်စၢၤ အဝဲသ့ၣ် လၢကလီၤဂာ် ဒ်အဖိခွါ အက့ၢ်အဂီၤအသိး ဒ်သိးအဖိခွါ ကကဲထီၣ်ဖိဝဲၢ်ကိလၢ အဒီပုၢ်ဝဲၢ်ခွါအါဂၤ အကျါန့ၣ်လီၤ. ၃၀ ဒီးပှၤလၢ အဝဲ ဃုထၢပာ်စၢၤအီၤတဖၣ်န့ၣ် မ့ၢ်ပှၤလၢ အဝဲကိးဝဲစ့ၢ်ကီးလီၤ. ဒီးပှၤလၢ အကိးဝဲတဖၣ်န့ၣ် မ့ၢ်ပှၤလၢ အဝဲပာ်တီပာ်လိၤဝဲ စ့ၢ်ကီးလီၤ. ဒီးပှၤလၢ အဝဲပာ်တီပာ်လိၤဝဲတဖၣ်န့ၣ် မ့ၢ်ပှၤလၢအဝဲ မၤလၤကပီၤဝဲ စ့ၢ်ကီးလီၤ.
၃၁ ဘၣ်ဃးဒီး တၢ်ဂ့ၢ်တဖၣ်အံၤန့ၣ် ပကတဲဒ်လဲၣ်. ကစၢ်ယွၤမ့ၢ်အိၣ်လၢ ပအိၣ်တခီန့ၣ် မ့ၢ်မတၤ ကထီဒါပှၤတဂၤလဲၣ်. ၃၂ အဖိခွါဒၣ်လဲာ် ကဘၣ်တူၢ်တၢ်န့ၣ် အဝဲတတြီဝဲဘၣ်, ဒီးဟ့ၣ်လီၤဝဲလၢ ပဝဲခဲလၢာ်အဂီၢ်လီၤ. အဃိအကဟ့ၣ်လီၤ အဖိခွါတကးဒံးဘၣ် လၢတၢ်သူၣ်ဂ့ၤသးဝါအပူၤ အဝဲကဟ့ၣ်လီၤပှၤ တၢ်အဂၤခဲလၢာ်စ့ၢ်ကီး တမ့ၢ်ဘၣ်ဧါ. ၃၃ မ့ၢ်မတၤတဂၤ ကပာ်ဒ့ၣ်ပာ်ကမၣ် ပှၤလၢကစၢ်ယွၤ ဃုထၢထီၣ်ဝဲ တဖၣ်လဲၣ်. ပှၤလၢအပာ်တီပာ်လိၤ အဝဲသ့ၣ်န့ၣ် မ့ၢ်ဝဲကစၢ်ယွၤလီၤ. ၃၄ မ့ၢ်မတၤတဂၤ ကစံၣ်ညီၣ် အဝဲသ့ၣ်လဲၣ်. ယ့ၣ်ၡူးခရံာ် တူၢ်သံအသးဝံၤလံ တကးဒံးဘၣ် ဘၣ်တၢ်မၤဂဲၤဆၢထၢၣ် သမူထီၣ်က့ၤအီၤ ဒီးအဝဲအိၣ်လၢ ကစၢ်ယွၤအစုထွဲတခီ ဒီးအဝဲဃ့ကညးန့ၢ်တၢ်လၢ ပဂီၢ်စ့ၢ်ကီးလီၤ.
၃၅ မ့ၢ်မတၤ ကမၤလီၤဖးပှၤဒီး ခရံာ်အတၢ်အဲၣ် တဂၤလဲၣ်. မ့ၢ်တၢ်နးတၢ်ဖှီၣ်, တၢ်ကိၢ်တၢ်ဂီၤ, တၢ်မၤအၢမၤနး, တၢ်သၣ်ဝံၤလီၤဒိ, တၢ်အိၣ်ဘ့ၣ်ဆ့, တၢ်လီၤဘၣ်ယိၣ် မ့တမ့ၢ် နးဧိၤဘီဧိၤ မၤဝဲကသ့ဧါ. ၃၆ ဒ်တၢ်ကွဲးအသးအသိး “ပဘၣ်တၢ်မၤသံပှၤလၢ နဃိဒီတနံၤ ဒီးပဘၣ်တၢ်ပာ်ပှၤဒ် သိလၢအကဘၣ် တၢ်မၤသံအီၤ အသိးန့ၣ်လီၤ.” ၃၇ ဘၣ်ဆၣ် လၢတၢ်သ့ၣ်တဖၣ်အံၤ ခဲလၢာ်အပူၤ ပမၤနၢၤတၢ် လၢလၢပှဲၤပှဲၤ ခီဖျိပှၤတဂၤလၢ အအဲၣ်ပှၤ အဃိန့ၣ်လီၤ. ၃၈ ယနာ် သပှၢ်ကတၢၢ်လၢ တၢ်သံမ့ၢ်ဂ့ၤ, တၢ်မူမ့ၢ်ဂ့ၤ, မူခိၣ်ကလူးတဖၣ်မ့ၢ်ဂ့ၤ, ပဒိၣ်တဖၣ်မ့ၢ်ဂ့ၤ, တၢ်လၢ အအိၣ်ခဲအံၤတဖၣ်မ့ၢ်ဂ့ၤ, တၢ်လၢ အကဟဲခါဆူညါတဖၣ်မ့ၢ်ဂ့ၤ, တၢ်စိတၢ်ကမီၤတဖၣ်မ့ၢ်ဂ့ၤ, ၃၉ တၢ်လၢထးခီမ့ၢ်ဂ့ၤ, တၢ်လၢလာ်ခီမ့ၢ်ဂ့ၤ, တၢ်လၢ အဘၣ်တၢ်တ့လီၤအီၤ တမံၤဂ့ၤတမံၤဂ့ၤ, မၤလီၤဖးပှၤဒီး ကစၢ်ယွၤအတၢ်အဲၣ် လၢအအိၣ်လၢ ပကစၢ် ယ့ၣ်ၡူးခရံာ်အပူၤန့ၣ် တသ့နီတမံၤဘၣ်.