၁ ကရံၣ်သူး

၁၂ ဒီပုၢ်ဝဲၢ်သ့ၣ်ဧၢ, ဘၣ်ဃးဒီး သးစီဆှံ အတၢ်ဟ့ၣ်တဖၣ်အဂ့ၢ်န့ၣ် ယအဲၣ်ဒိးလၢ သုကသ့ၣ်ညါအီၤဂ့ၤဂ့ၤလီၤ. ၂ သုသ့ၣ်ညါလၢ ဖဲသုမ့ၢ်ဒံး ပှၤကလုာ်တဖၣ်အခါ သုဘါထီၣ် တၢ်ဂီၤတၢ်ဖှီၣ်လၢ အတဲတၢ်တသ့ဘၣ်တဖၣ် ဒီးလဲၤဖဲ အဝဲသ့ၣ်ဆှၢသုန့ၣ်လီၤ. ၃ အဃိ ယအဲၣ်ဒိးလၢသု ကနၢ်ပၢၢ်လၢ ပှၤလၢအတဲတၢ် ခီဖျိကစၢ်ယွၤ အသးစီဆှံန့ၣ် တတဲဝဲလၢ “ယ့ၣ်ၡူးန့ၣ် ဘၣ်တၢ်ဆိၣ်အၢအီၤ” ဘၣ်. ဒီးမ့တမ့ၢ်လၢ သးစီဆှံအဃိဘၣ်န့ၣ် ပှၤတဲလၢ “ယ့ၣ်ၡူးမ့ၢ်ကစၢ်” န့ၣ် တသ့နီတဂၤစ့ၢ်ကီးဘၣ်.

၄ တၢ်ဟ့ၣ်တဖၣ် အိၣ်ဝဲအကလုာ်ကလုာ်လီၤ. ဘၣ်ဆၣ် သးစီဆှံန့ၣ် အိၣ်ထဲတမံၤလီၤ. ၅ ဒီးတၢ်ဖံးတၢ်မၤလၢ ကမၤစၢၤပှၤဂၤန့ၣ် အိၣ်ဝဲအကလုာ်ကလုာ်လီၤ. ဘၣ်ဆၣ် ကစၢ်အိၣ်ဝဲထဲတဂၤလီၤ. ၆ တၢ်ဖံးတၢ်မၤအိၣ်ဝဲ အကလုာ်ကလုာ်လီၤ. ဘၣ်ဆၣ် ကစၢ်ယွၤအိၣ်ထဲတဂၤ လၢအမၤစၢၤတၢ် ဒ်သိးပှၤခဲလၢာ် မၤဝဲတၢ်သ့ၣ်တဖၣ်အံၤ ကသ့အဂီၢ်လီၤ. ၇ သးစီဆှံအိၣ်ဖျါထီၣ် ခီဖျိလၢ အဝဲသ့ၣ်တဂၤစုာ်စုာ် ဒ်သိးကကဲဘျုးလၢ ပှၤဂၤအဂီၢ်လီၤ. ၈ ခီဖျိလၢ သးစီဆှံအဃိ ပှၤတဂၤတဲတၢ်လၢ တၢ်ကူၣ်သ့အပူၤ ဒီးလၢသးစီဆှံ တမံၤဃီအံၤအဃိ ပှၤအဂၤတဂၤတဲတၢ် ပှဲၤဒီးတၢ်သ့ၣ်ညါနၢ်ပၢၢ်လီၤ. ၉ ဒီးလၢသးစီဆှံ တမံၤဃီအံၤအဃိ ပှၤအဂၤတဂၤအိၣ်ဒီး တၢ်စူၢ်တၢ်နာ် ဒီးခီဖျိလၢ သးစီဆှံ တမံၤဃီအံၤအဃိ ပှၤအဂၤတဂၤ ဒိးန့ၢ်ဘၣ်တၢ်ဟ့ၣ်လၢ အမၤဘျါတၢ်သ့န့ၣ်လီၤ. ၁၀ တကးဒံးဘၣ် ပှၤအဂၤတဂၤ မၤတၢ်လီၤလးသ့ ဒီးအဂၤတဂၤ တဲတၢ်ဒ်ဝံအသိးသ့ ဒီးအဂၤတဂၤန့ၣ် ပဲာ်ထံနီၤဖးဝဲလၢ မ့ၢ်တၢ်သိၣ်လိတဖၣ် ဟဲလၢကစၢ်ယွၤအအိၣ်ဧါ တဟဲဘၣ်ဧါန့ၣ်သ့ဝဲလီၤ. ဒီးပှၤအဂၤတဂၤ တဲဝဲကျိာ်လၢ အဂၤတဖၣ်သ့ ဒီးပှၤအဂၤတဂၤ ကျိာ်ထံဝဲ တၢ်လၢပှၤတဲလၢ ကျိာ်လၢအဂၤတဖၣ်န့ၣ်သ့ဝဲလီၤ. ၁၁ ဘၣ်ဆၣ် တၢ်မၤတဖၣ်အံၤခဲလၢာ်န့ၣ် ကဲထီၣ်ဝဲခီဖျိလၢ သးစီဆှံတမံၤဃီအံၤအဃိလီၤ. ဒီးသးစီဆှံနီၤလီၤဝဲ တၢ်သ့တၢ်ဘၣ်တဖၣ်အံၤ ဆူပှၤတဂၤစုာ်စုာ်အအိၣ် ဒ်အတၢ်ဘၣ်သး အိၣ်ဝဲအသိးလီၤ.

၁၂ နီၢ်ခိအိၣ်ဝဲထဲတဂၤ ဘၣ်ဆၣ် နီၢ်ခိက့ၢ်ဂီၤတဖၣ် အိၣ်ဝဲအါမံၤလီၤ. နီၢ်ခိအံၤ အက့ၢ်ဂီၤတဖၣ် အိၣ်ဝဲအါမံၤ ဘၣ်ဆၣ် နီၢ်ခိအိၣ်ဝဲထဲတဂၤ ဒီးခရံာ်စ့ၢ်ကီး မ့ၢ်ဝဲဒ်န့ၣ်လီၤ. ၁၃ ပမ့ၢ် ပှၤယူဒၤဖိမ့ၢ်ဂ့ၤ, ပှၤကြံးဖိမ့ၢ်ဂ့ၤ, ကုၢ်မ့ၢ်ဂ့ၤ, ပှၤသဘျ့မ့ၢ်ဂ့ၤ, ခီဖျိလၢ သးစီဆှံတမံၤဃီအဃိ ပဝဲခဲလၢာ် ပဒိးဘျၢပသးလၢ နီၢ်ခိတဂၤဃီအပူၤလီၤ. ဒီးပဝဲခဲလၢာ်န့ၣ် ပဘၣ်တၢ်ဒုးအီပှၤလၢ သးစီဆှံတမံၤဃီလီၤ.

၁၄ နီၢ်ကီၢ်န့ၣ် နီၢ်ခိအံၤ အိၣ်ဒီးနီၢ်ခိက့ၢ်ဂီၤ အါမံၤ, ဒီးတအိၣ်ထဲတမံၤဘၣ်. ၁၅ ခီၣ်န့ၣ် မ့ၢ်တဲဝဲလၢ “ယတမ့ၢ်စုဘၣ်အဃိ ယတဘၣ်ဃးဒီးနီၢ်ခိဘၣ်” သနာ်က့ အဘၣ်ဃးဒီး နီၢ်ခိဒံးလီၤ. ၁၆ ဒီးနၢ်န့ၣ် မ့ၢ်တဲဝဲလၢ “ယတမ့ၢ် မဲာ်ချံဘၣ်အဃိ ယတဘၣ်ဃးဒီး နီၢ်ခိဘၣ်” သနာ်က့ အဘၣ်ဃးဒီး နီၢ်ခိဒံးလီၤ. ၁၇ နီၢ်ခိဒီတဂၤ မ့မ့ၢ် မဲာ်ချံန့ၣ် ပနၢ်ဟူတၢ်ကသ့ဒ်လဲၣ်. ဒီးနီၢ်ခိဒီတဂၤ မ့မ့ၢ် နၢ်ကုန့ၣ် ပနၢတၢ်ကသ့ဒ်လဲၣ်. ၁၈ ဘၣ်ဆၣ် ကစၢ်ယွၤရဲၣ်လီၤကျဲၤလီၤဝဲ နီၢ်ခိက့ၢ်ဂီၤတခါစုာ်စုာ် ဒ်အတၢ်ဘၣ်သး အိၣ်ဝဲအသိးလီၤ.

၁၉ အဝဲသ့ၣ်ခဲလၢာ် မ့မ့ၢ်က့ၢ်ဂီၤတမံၤဃီန့ၣ် အကဲနီၢ်ခိကသ့ဒ်လဲၣ်. ၂၀ အဝဲသ့ၣ်မ့ၢ်ဝဲ နီၢ်ခိက့ၢ်ဂီၤအါမံၤ ဘၣ်ဆၣ် မ့ၢ်ဝဲနီၢ်ခိထဲတဂၤလီၤ. ၂၁ မဲာ်ချံန့ၣ် တဲစုလၢ “ယတလိၣ်နၤဘၣ်” န့ၣ် တသ့ဘၣ် ဒီးခိၣ်သၣ်ဃံန့ၣ် တဲခီၣ်လၢ “ယတလိၣ်နၤဘၣ်” န့ၣ် တသ့ဘၣ်. ၂၂ လၢတၢ်န့ၣ်အလီၢ် နီၢ်ခိက့ၢ်ဂီၤလၢ အဖျါလၢ အဂံၢ်စၢ်ဘါစၢ်တဖၣ်ဒၣ်လဲာ် အရ့ဒိၣ်ဝဲလီၤ. ၂၃ ဒီးနီၢ်ခိက့ၢ်ဂီၤလၢ ပဆိကမိၣ်လၢ အလၤကပီၤတအိၣ် အါအါဘၣ်တဖၣ်န့ၣ် ပပာ်သူၣ်ပာ်သးအီၤ အါတစဲးလီၤ. အဃိ နီၢ်ခိက့ၢ်ဂီၤလၢ ပကွၢ်အီၤ တဂ့ၤအါအါဘၣ်တဖၣ်န့ၣ် ပကယၢကယဲထီၣ်အီၤ အါတစဲးလီၤ. ၂၄ မ့မ့ၢ် ပနီၢ်ခိက့ၢ်ဂီၤလၢ အဖျါဃံဖျါလၤတဖၣ်န့ၣ် တလိၣ်တၢ်နီတမံၤဘၣ်. ဒ်လဲၣ်ဂ့ၤဒ်လဲၣ်ဂ့ၤ ကစၢ်ယွၤ ရဲၣ်လီၤကျဲၤလီၤနီၢ်ခိ ဒီးအဝဲဟ့ၣ် တၢ်လၤကပီၤဒိၣ်လၢ နီၢ်ခိက့ၢ်ဂီၤတဖၣ်လၢ အလၤကပီၤအိၣ်စှၤ, ၂၅ ဒ်သိးတၢ်လီၤမုၢ်လီၤဖး သုတအိၣ်လၢ နီၢ်ခိအပူၤတဂ့ၤ အဂီၢ်လီၤ. မ့မ့ၢ် နီၢ်ခိက့ၢ်ဂီၤတဖၣ် ကြၢးအံးထွဲကွၢ်ထွဲလိာ်သး ကဒဲကဒဲလီၤ. ၂၆ ဒီးနီၢ်ခိက့ၢ်ဂီၤတခါ မ့ၢ်ဘၣ်ဒိဘၣ်ထံးန့ၣ် နီၢ်ခိက့ၢ်ဂီၤလၢ အဂၤခဲလၢာ် တူၢ်ဘၣ်တၢ်ဃုာ်ဒီးအီၤလီၤ. ဒီးနီၢ်ခိက့ၢ်ဂီၤတခါ မ့ၢ်ဘၣ် တၢ်မၤလၤကပီၤအီၤန့ၣ် နီၢ်ခိက့ၢ်ဂီၤလၢ အဂၤခဲလၢာ် သးခုဃုာ်ဒီးအီၤလီၤ.

၂၇ သုဝဲသ့ၣ်အံၤ သုမ့ၢ်ခရံာ်အနီၢ်ခိလီၤ. ဒီးသုဝဲတဂၤစုာ်စုာ်န့ၣ် မ့ၢ်ဝဲနီၢ်ခိအက့ၢ်အဂီၤတခါလီၤ. ၂၈ ကစၢ်ယွၤပာ်လီၤ တၢ်အိၣ်ဖှိၣ်ဖိတဖၣ်လၢ အလီၢ်ဒၣ်ဝဲလၢ တၢ်အိၣ်ဖှိၣ်အပူၤလီၤ. တၢန့ၣ် တၢ်မၢဖိတဖၣ်, ခံန့ၣ် ဝံတဖၣ်, သၢန့ၣ် ပှၤလၢ အသိၣ်လိတၢ်တဖၣ် ဝံၤဒီးပှၤမၤတၢ်လီၤလးတဖၣ်, ဝံၤဒီးပှၤလၢ အအိၣ်ဒီးတၢ်ဟ့ၣ်လၢ ကမၤဘျါက့ၤ တၢ်ဆူးတၢ်ဆါတဖၣ်, ပှၤလၢ အမၤစၢၤပှၤဂၤတဖၣ်, ပှၤလၢ အဟံးစုနဲၣ်ကျဲတၢ်သ့ ဒီးပှၤလၢ အတဲတၢ်လၢ ကျိာ်အဂၤတဖၣ်လီၤ. ၂၉ အဝဲသ့ၣ်ခဲလၢာ် မ့ၢ်တၢ်မၢဖိတဖၣ်ဧါ. အဝဲသ့ၣ်ခဲလၢာ် မ့ၢ်ဝံတဖၣ်ဧါ. အဝဲသ့ၣ်ခဲလၢာ် မ့ၢ်ပှၤသိၣ်လိတၢ်တဖၣ်ဧါ. အဝဲသ့ၣ်ခဲလၢာ် မ့ၢ်ပှၤလၢ အမၤတၢ်လီၤလးတဖၣ်ဧါ. ၃၀ အဝဲသ့ၣ်ခဲလၢာ် အိၣ်ဒီးတၢ်ဟ့ၣ်လၢ ကမၤဘျါက့ၤ တၢ်ဆူးတၢ်ဆါတဖၣ်ဧါ. အဝဲသ့ၣ်ခဲလၢာ် တဲတၢ်လၢ ကျိာ်အဂၤတဖၣ်ဧါ. အဝဲသ့ၣ်ခဲလၢာ် မ့ၢ်ပှၤလၢ အကတိၤကျိာ်ထံတၢ်ဧါ. ၃၁ ဂုာ်ကျဲးစၢးဆူၣ်ဆူၣ် ဒ်သိးသုကဒိးန့ၢ်ဘၣ် တၢ်ဟ့ၣ်လၢ အဂ့ၤဒိၣ်တဖၣ်တက့ၢ်. ဘၣ်ဆၣ် ယကပာ်ဖျါထီၣ်န့ၢ်သု တၢ်တမံၤလၢ အဂ့ၤဒိၣ်န့ၢ်ဒံး တၢ်သ့ၣ်တဖၣ်အံၤလီၤ.