၁ ကရံၣ်သူး

၃ အဃိ, ဒီပုၢ်ဝဲၢ်သ့ၣ်ဧၢ, ယတဲတၢ်ဒီးသု ဒ်ယတဲတၢ်ဒီးပှၤလၢ သးစီဆှံ ဟံးစုနဲၣ်ကျဲအီၤတဖၣ်အသိး တသ့ဘၣ်. ယကဘၣ်တဲတၢ်ဒီးသု ဒ်ပှၤလၢအအိၣ်ဒီး ဟီၣ်ခိၣ် အတၢ်သူၣ်လီသးကွံအသိး, ဒ်ဖိဒံဖိသၣ်လၢ ခရံာ်အပူၤအသိးလီၤ. ၂ မ့ၢ်လၢ သုတဒိၣ်တုာ်ခိၣ်ပှဲၤလၢ နီၢ်သးတခီ ဒံးဘၣ်အဃိ ယတဒုးအီၣ်သုလၢ တၢ်အီၣ်အသံးအကာ်ဘၣ်. မ့မ့ၢ် ယဒုးအီသုလၢ တၢ်နုၢ်ထံလီၤ. ခဲအံၤဒၣ်လဲာ် သုတဒိၣ်တုာ်ခိၣ်ပှဲၤလၢ နီၢ်သးတခီဒံးဘၣ်, ၃ မ့ၢ်လၢသုသးအိၣ် ဟီၣ်ခိၣ် အတၢ်သူၣ်လီသးကွံဒံး အဃိလီၤ. တၢ်သူၣ်က့ၣ်သးကါ ဒီးတၢ်အ့ၣ်လိာ်ဆိးက့ အိၣ်လၢသုကျါဒံးအဃိ သုအိၣ်ဒီး ဟီၣ်ခိၣ် အတၢ်သူၣ်လီသးကွံ ဒီးသုလဲၤတၢ်ဒ် ပှၤတၢ်ချၢအသိး တမ့ၢ်ဘၣ်ဧါ. ၄ ဖဲပှၤတဂၤတဲလၢ “ယမ့ၢ် စီၤပီလူးအပျဲၢ်” ဘၣ်ဆၣ် အဂၤတဂၤတဲလၢ “ယမ့ၢ် စီၤအပီးလိၤအပျဲၢ်” အခါ မ့ၢ်သုလီၤဆီဒီး ပှၤတၢ်ချၢတဖၣ်ဧါ.

၅ မ့မ့ၢ်ဒ်န့ၣ်န့ၣ် စီၤအပီးလိၤ မ့ၢ်မတၤတဂၤလဲၣ်. ဒီးစီၤပီလူး မ့ၢ်မတၤတဂၤလဲၣ်. ပဝဲဒၣ်အံၤ ပမ့ၢ်ဒၣ်တၢ်အခ့အပှၤလၢ ကစၢ်ဟ့ၣ်လီၤပှၤ တၢ်မၤတဂၤစုာ်စုာ် ဒီးသုကဲထီၣ် ပှၤစူၢ်က့ၤနာ်က့ၤတၢ် ခီဖျိလၢပှၤလီၤ. ၆ ယသူၣ်လီၤတၢ်, စီၤအပီးလိၤ လူအထံ မ့မ့ၢ်ကစၢ်ယွၤန့ၣ် ဒုးဒိၣ်ထီၣ်တၢ် ကွ့ၢ်ကွ့ၢ်လီၤ. ၇ အဃိ ပှၤလၢအသူၣ်လီၤတၢ်မ့ၢ်ဂ့ၤ, ပှၤလၢအလူထံမ့ၢ်ဂ့ၤ, တမ့ၢ်တၢ်နီတမံၤဘၣ်, ကစၢ်ယွၤမ့ၢ်ပှၤလၢ အဒုးဒိၣ်ထီၣ်တၢ်လီၤ. ၈ ပှၤလၢအသူၣ်လီၤတၢ် ဒီးပှၤလၢအလူထံန့ၣ် မ့ၢ်တၢ်တမံၤဃီလီၤ.* ဘၣ်ဆၣ် ပှၤတဂၤစုာ်စုာ် ကန့ၢ်ဘၣ်ခိၣ်ဖး ဒ်အမၤဝဲအသိးလီၤ. ၉ ပမ့ၢ်ပှၤလၢ အမၤသကိးတၢ်ဒီး ကစၢ်ယွၤလီၤ. ဒီးသုမ့ၢ်ကစၢ်ယွၤ အစံာ်ပျီလၢ အဝဲသူၣ်လီၤဖျးလီၤဝဲ ဒီးကစၢ်ယွၤ အတၢ်သူၣ်ထီၣ်လီၤ.

၁၀ ခီဖျိ ကစၢ်ယွၤပာ်ဖျါထီၣ် တၢ်သးကညီၤဒိၣ်ဒိၣ်မုၢ်မုၢ် လၢယဖီခိၣ်အဃိ ယပာ်လီၤ တၢ်သူၣ်ထီၣ်အခီၣ်ထံး ဒ်ပှၤသူၣ်ထီၣ်ဘှီထီၣ်တၢ် သ့ဂ့ၤဂ့ၤတဂၤအသိးလီၤ. ဘၣ်ဆၣ် ပှၤလၢအဂၤတဂၤ သူၣ်ထီၣ်တၢ်လၢအဖီခိၣ်လီၤ. ဒီးပှၤသူၣ်ထီၣ်တၢ်လၢအဖီခိၣ် ဒ်လဲၣ်ဒ်လဲၣ်န့ၣ် မ်အဝဲသ့ၣ်ကိးဂၤဒဲး ပလီၢ်အသးတက့ၢ်. ၁၁ ယ့ၣ်ၡူးခရံာ်မ့ၢ်ဝဲ တၢ်သူၣ်ထီၣ်အခီၣ်ထံးလၢ အဘၣ်တၢ်ပာ်လီၤအီၤ တခါအံၤလီၤ. အဃိ ပှၤပာ်လီၤ တၢ်သူၣ်ထီၣ်အခီၣ်ထံး လၢအဂုၤအဂၤ တသ့နီတမံၤဘၣ်. ၁၂ ဒီးပှၤမ့ၢ်သူၣ်ထီၣ်တၢ်လၢ ထူ, စ့, လၢၢ်လၢ အလုၢ်ဒိၣ်ပှ့ၤဒိၣ်တဖၣ်, သ့ၣ်, နီၣ်ဃ့ မ့တမ့ၢ် လီၢ်ဘိလၢ တၢ်သူၣ်ထီၣ်အခီၣ်ထံး အဖီခိၣ်န့ၣ် ၁၃ ပှၤတဂၤစုာ်စုာ် အတၢ်မၤ မ့ၢ်ဒ်လဲၣ်န့ၣ် ကအိၣ်ဖျါထီၣ်ဝဲ, မ့ၢ်လၢဖဲမုၢ်နံၤအဝဲန့ၣ် မ့ၣ်အူကလီၣ်ဖျါထီၣ်အီၤ အဃိလီၤ. ဒီးတၢ်သူၣ်ထီၣ်လၢ ပှၤတဂၤစုာ်စုာ် မၤတ့ၢ်ဝဲ မ့ၢ်အဂ့ၤထဲလဲၣ်န့ၣ် မ့ၣ်အူ ကပာ်ဖျါထီၣ်ဝဲလီၤ. ၁၄ တၢ်လၢ ပှၤတဂၤဂၤ သူၣ်ထီၣ်ဝဲလၢ တၢ်သူၣ်ထီၣ်အခီၣ်ထံးအံၤ အဖီခိၣ် မ့ၢ်အိၣ်ဂၢၢ်ဆိးကျၢၤဝဲန့ၣ် အကဒိးန့ၢ်ဘၣ် ခိၣ်ဖးလီၤ. ၁၅ မ့ၣ်အူမ့ၢ်အီၣ်ကွံာ် ပှၤတဂၤဂၤအတၢ်မၤန့ၣ် အဝဲကၡူကွံာ်ဝဲလီၤ. ဘၣ်ဆၣ် အနီၢ်ကစၢ်န့ၣ် ကပူၤဖျဲးဝဲဒ် ပှၤလၢ အဘၣ်တၢ်မၤပူၤဖျဲးအီၤလၢ မ့ၣ်အူပူၤအသိးလီၤ.

၁၆ သုမ့ၢ် ကစၢ်ယွၤအတၢ်လုၢ်ဟံၣ် ဒီးကစၢ်ယွၤအသးစီဆှံ အိၣ်ဝဲလၢသုပူၤန့ၣ် မ့ၢ်သုတသ့ၣ်ညါဘၣ်ဧါ. ၁၇ ပှၤတဂၤဂၤမ့ၢ် မၤဟးဂီၤဝဲကစၢ်ယွၤ အတၢ်လုၢ်ဟံၣ်န့ၣ် ကစၢ်ယွၤ ကမၤဟးဂီၤအီၤမ့ၢ်လၢ ကစၢ်ယွၤ အတၢ်လုၢ်ဟံၣ်န့ၣ် စီဆှံဝဲအဃိလီၤ. ဒီးသုဝဲသ့ၣ်အံၤ သုမ့ၢ်တၢ်လုၢ်ဟံၣ် အဝဲန့ၣ်လီၤ.

၁၈ ပှၤတဘၣ်လီလီၤ အနီၢ်ကစၢ်အသး နီတဂၤဘၣ်. ပှၤလၢ သုကျါတဂၤဂၤ မ့ၢ်ဆိကမိၣ်လီၤ အသးလၢ အမ့ၢ်ပှၤကူၣ်တၢ်သ့ ဒ်ဟီၣ်ခိၣ် အတၢ်ထံၣ် အိၣ်ဝဲအသိးန့ၣ်, ဒ်သိး အဝဲကကဲထီၣ် ပှၤကူၣ်တၢ်သ့နီၢ်ကီၢ်အဂီၢ် မ်အဝဲကဲထီၣ် ပှၤဟးဂီၤဖိတက့ၢ်. ၁၉ ဟီၣ်ခိၣ်အံၤ အတၢ်ကူၣ်သ့န့ၣ် မ့ၢ်တၢ်ကလီကလီလၢ ကစၢ်ယွၤအမဲာ်ညါလီၤ. ဒ်တၢ်ကွဲးအသးအိၣ်ဝဲအသိး “ကစၢ်ယွၤမၤလီၤဃံၢ် ပှၤကူၣ်တၢ်သ့လၢ အဝဲသ့ၣ်အနီၢ်ကစၢ် အပျံၤသကွီၤအပူၤလီၤ.” ၂၀ တကးဒံးဘၣ် “ယဟိဝၤယွၤ သ့ၣ်ညါဝဲလၢ ပှၤကူၣ်တၢ်သ့တဖၣ် အတၢ်ကူၣ်ထီၣ်ဖးလီၤန့ၣ် မ့ၢ်တၢ်ကလီကလီလီၤ.” ၂၁ အဃိ မ်ပှၤသု တပာ်ကဖၢလၢအသးလၢ ပှၤကညီအဃိ နီတဂၤတဂ့ၤ. နီၢ်ကီၢ်န့ၣ် တၢ်ခဲလၢာ်မ့ၢ်ဒၣ် သုတၢ်လီၤ. ၂၂ စီၤပီလူးမ့ၢ်ဂ့ၤ, စီၤအပီးလိၤမ့ၢ်ဂ့ၤ, စီၤက့ၤဖးမ့ၢ်ဂ့ၤ, ဟီၣ်ခိၣ်မ့ၢ်ဂ့ၤ, တၢ်မူမ့ၢ်ဂ့ၤ, တၢ်သံမ့ၢ်ဂ့ၤ, တၢ်လၢ အအိၣ်ခဲအံၤတဖၣ်မ့ၢ်ဂ့ၤ, တၢ်လၢ အကဟဲခါဆူညါမ့ၢ်ဂ့ၤ, တၢ်ခဲလၢာ် မ့ၢ်သုတၢ်လီၤ. ၂၃ သုန့ၣ် မ့ၢ်ခရံာ်အတၢ် ဒီးခရံာ်န့ၣ် မ့ၢ်ဝဲကစၢ်ယွၤအတၢ်လီၤ.