၁ ကရံၣ်သူး
၅ ပှၤဒုးသ့ၣ်ညါယၤလၢ ပှၤအိၣ်ဝဲလၢ သုကျါတဂၤလၢ အမၤကမၣ်မုၣ်ကမၣ်ခွါလီၤ.* အဝဲအိၣ်ဃုာ်ဒီး အပၢ်အမါ ဒီးတၢ်မၤကမၣ်မုၣ်ကမၣ်ခွါ ဒ်အံၤတကလုာ်န့ၣ် လၢပှၤကလုာ်တဖၣ် အကျါဒၣ်လဲၣ် တအိၣ်ဘၣ်. ၂ မ့ၢ်သုပာ်ကဖၢလၢသုသးလၢ တၢ်ဂ့ၢ်အံၤအဃိဧါ. လၢတၢ်န့ၣ်အလီၢ် မ့ၢ်သုတကြၢး သးအုးဘၣ်ဧါ. ပှၤလၢအမၤတၢ် ဒ်အံၤတဂၤန့ၣ် မ့ၢ်အတကြၢး တၢ်နီဟးထီၣ်ကွံာ်အီၤလၢ သုကျါဘၣ်ဧါ. ၃ ယတအိၣ်ဒီးသုလၢ နီၢ်ခိတခီဘၣ်. ဘၣ်ဆၣ် ယအိၣ်ဒီးသုလၢ သးတခီလီၤ. ဒီးယစံၣ်ညီၣ်ပှၤလၢ အမၤတၢ်ဒ်အံၤတဂၤလံ အဃိ လီၤဂာ်ဒ်ယအိၣ်ဒီးသု အနီၢ်ကီၢ်အသိးလီၤ. ၄ ဖဲသုအိၣ်ဖှိၣ် တပူၤဃီလၢ ပကစၢ်ယ့ၣ်ၡူး အမံၤအခါ သ့ၣ်ညါလၢ ယအိၣ်ဒီးသု လၢသးတခီဃုာ်ဒီး ပကစၢ်ယ့ၣ်ၡူး အစိကမီၤလီၤ. ၅ သုကဘၣ်ဟ့ၣ်လီၤကွံာ် ပှၤဒ်အံၤတဂၤ လၢမုၣ်ကီၤလံၢ်* အစုပူၤ ဒ်သိးသးလၢ အအဲၣ်ဒိးမၤ တၢ်ဒဲးဘးန့ၣ် ကဘၣ်တၢ်မၤဟးဂီၤကွံာ်အီၤ အဂီၢ်လီၤ. မ့မ့ၢ်ဒ်န့ၣ်န့ၣ် တၢ်အိၣ်ဖှိၣ်အနီၢ်သး ကဘၣ်တၢ်ဒီသဒၢအီၤ ဖဲကစၢ်အမုၢ်နံၤ အတီၢ်ပူၤလီၤ.
၆ သုပာ်ကဖၢလၢသုသး ဒ်န့ၣ်န့ၣ်တဂ့ၤဘၣ်. ကိၣ်မံၣ်ထဲတစဲးဖိ မၤပွးထီၣ် ကိၣ်ဒီတလိၣ်ညါန့ၣ် မ့ၢ်သုတသ့ၣ်ညါဘၣ်ဧါ. ၇ သုကဘၣ်ထုးထီၣ်ကွံာ် ကိၣ်မံၣ်လီၢ်လံၤ ဒ်သိးသုကကဲထီၣ် ကိၣ်အသီတလိၣ်အဂီၢ်လီၤ. သုဝဲသ့ၣ်အံၤ သုလီၤဂာ်ဒ် ကိၣ်တလိၣ်လၢ အတပၣ်ဃုာ်ဒီး ကိၣ်မံၣ်ဘၣ်, မ့ၢ်လၢ ခရံာ်လၢအမ့ၢ် ပဘူၣ်လဲၤကပာ် အသိဖိအံၤ ဟ့ၣ်လုၢ်ထီၣ်အသးဝံၤလံ အဃိလီၤ. ၈ အဃိ ဘူၣ်လဲၤကပာ်လၢ ကဟဲန့ၣ် မ်ပသုတမၤအီၤဒီး ကိၣ်မံၣ်လီၢ်လံၤ မ့တမ့ၢ် ကိၣ်မံၣ်လၢ အအဲၣ်ဒိးတဲဝဲ တၢ်အၢတၢ်သီ ဒီးတၢ်ဒဲးဘးတဂ့ၤ. လၢတၢ်န့ၣ်အလီၢ် မ်ပမၤအီၤဒီးကိၣ်လၢ အတပၣ်ဃုာ်ဒီး ကိၣ်မံၣ်လၢ အအဲၣ်ဒိးတဲဝဲ တၢ်သူၣ်ဘျၢသးဘျၢ ဒီးတၢ်တီတၢ်လိၤန့ၣ်တက့ၢ်.
၉ လၢယလံာ်ပရၢအပူၤန့ၣ် ယကွဲးန့ၢ်သုလၢ သုတဘၣ်ရ့လိာ်သးဒီး ပှၤလၢ အမၤကမၣ်မုၣ်ကမၣ်ခွါ လၢၤတဂ့ၤ. ၁၀ ဘၣ်ဆၣ် အခီပညီ သုရ့ဒီးပှၤလၢ အမၤကမၣ်မုၣ်ကမၣ်ခွါ လၢအအိၣ်လၢ ဟီၣ်ခိၣ်ချၢ, ပှၤလၢအသးကွံတၢ်, ပှၤလၢအဟံးန့ၢ်ဆူၣ် ပှၤဂၤအတၢ် ဒီးပှၤလၢ အဘါတၢ်ဂီၤတဖၣ် လ့ၤတက့ၤ တသ့ဘၣ်န့ၣ်တမ့ၢ်ဘၣ်. သုမ့ၢ်ဘၣ်မၤဒ်န့ၣ်န့ၣ် သုကဘၣ်ဟးထီၣ်ကွံာ်လၢ ဟီၣ်ခိၣ်ချၢလီၤ. ၁၁ အဃိ ခဲအံၤန့ၣ် ယကွဲးန့ၢ်သုလၢ ပှၤလၢ အဘၣ်တၢ်ကိးအီၤလၢ ဒီပုၢ်ဝဲၢ်တဂၤဂၤ မ့မ့ၢ် ပှၤလၢ အမၤကမၣ်မုၣ်ကမၣ်ခွါမ့ၢ်ဂ့ၤ, ပှၤလၢ အသးကွံတၢ်မ့ၢ်ဂ့ၤ, ပှၤဘါတၢ်ဂီၤမ့ၢ်ဂ့ၤ, ပှၤလၢ အဒုၣ်ဒွဲၣ်စံးအၢ ပှၤဂၤမ့ၢ်ဂ့ၤ, ပှၤလၢ အအီမူၤသံးမ့ၢ်ဂ့ၤ, ပှၤလၢ အဟံးန့ၢ်ဆူၣ် ပှၤဂၤအတၢ်မ့ၢ်ဂ့ၤ, သုတဘၣ်ရ့လိာ်သုသးဒီး အီၤတဂ့ၤ, အီၣ်သကိးတၢ်ဒီး ပှၤဒ်န့ၣ်တဂၤဒၣ်လဲာ်တဂ့ၤ. ၁၂ တၢ်စံၣ်ညီၣ် ပှၤတၢ်ချၢတဖၣ်န့ၣ် မ့ၢ်အဘၣ်ဃးဒီးယၤဒ်လဲၣ်. သုကဘၣ်စံၣ်ညီၣ် ပှၤလၢအအိၣ်လၢ တၢ်ကိပူၤ, ၁၃ မ့မ့ၢ် ယွၤန့ၣ်ကစံၣ်ညီၣ် ပှၤလၢတၢ်ချၢတဖၣ်, တမ့ၢ်ဘၣ်ဧါ. “ထုးထီၣ်ကွံာ် ပှၤအၢပှၤသီတဂၤအံၤ လၢသုကျါတက့ၢ်.”