အ့းဖ့းစူး
၆ ဖိသၣ်သ့ၣ်ဧၢ, ဒိကနၣ်သုမိၢ်သုပၢ်လၢ ကစၢ်အပူၤတက့ၢ်, တၢ်အဝဲအံၤ မ့ၢ်တၢ်လၢ အတီအလိၤအဃိလီၤ. ၂ “ယူးယီၣ်ပာ်ကဲ နမိၢ်ဒီးနပၢ်တက့ၢ်.” တၢ်အဝဲအံၤ မ့ၢ်တၢ်မၤလိာ် အဆိကတၢၢ်တထံၣ် လၢအပၣ်ဃုာ်ဒီး တၢ်စံးပာ်လီၤ. ဒီးတၢ်စံးပာ်အဝဲအံၤ တဲဝဲလၢ ၃ “မ့ၢ်ဒ်သိးနတၢ်အိၣ်မူ ကလဲၤအသးဂ့ၤဂ့ၤဘၣ်ဘၣ် ဒီးဒ်သိး နသးသမူကထီလၢ ဟီၣ်ခိၣ်ချၢအဂီၢ်လီၤ.” ၄ ပၢ်သ့ၣ်ဧၢ, မၤအ့န့သုဖိတဖၣ် အသးတဂ့ၤ. မ့မ့ၢ် ဆဲးကွၢ်လုၢ်ဒိၣ်ထီၣ် အဝဲသ့ၣ်လၢ ယဟိဝၤယွၤ အတၢ်သိၣ်လိနဲၣ်လိ ဒီးအတၢ်ဟံးစုနဲၣ်ကျဲ အပူၤန့ၣ်တက့ၢ်.
၅ ကုၢ်သ့ၣ်ဧၢ, ဒ်သုဒိကနၣ် ခရံာ်အသိး ဒိကနၣ် သုကစၢ်လၢ ဟီၣ်ခိၣ်ချၢအံၤ အကလုၢ်လၢ တၢ်သူၣ်ဘျၢသးဘျၢအပူၤ ပှဲၤဒီးတၢ်ပျံၤတၢ်ဖုးဒီး တၢ်ကနိးကစုာ်, ၆ ဒီးတမ့ၢ်ထဲလၢ ပှၤဂၤ ကွၢ်သုအဆၢကတီၢ် ဒ်သိးသုကလူၤဘၣ် ပှၤသးအဂီၢ်ဘၣ်. ဘၣ်ဆၣ် ကဘၣ်မ့ၢ်ဒ် ခရံာ်အကုၢ်လၢ အမၤကစၢ်ယွၤ အတၢ်ဘၣ်သးလၢ အသးဒီဖျၢၣ်န့ၣ်လီၤ. ၇ မၤတၢ်ဒ်ကုၢ်အသိး ဃုာ်ဒီးတၢ်ပာ်သူၣ်ပာ်သး လၢအဂ့ၤ ဒ်အမ့ၢ်လၢ ယဟိဝၤယွၤအဂီၢ် ဒီးတမ့ၢ်လၢ ပှၤဟီၣ်ခိၣ်ဖိအဂီၢ်ဘၣ်. ၈ သုသ့ၣ်ညါလၢ ပှၤတဂၤစုာ်စုာ်လၢအမ့ၢ် ကုၢ်မ့ၢ်ဂ့ၤ, ပှၤလၢအအိၣ်ဒီးတၢ်သဘျ့မ့ၢ်ဂ့ၤ, အဝဲမ့ၢ်မၤတၢ်ဂ့ၤ တမံၤဂ့ၤတမံၤဂ့ၤန့ၣ် အဝဲကန့ၢ်ဘၣ်က့ၤတၢ်လၢ ယဟိဝၤယွၤအအိၣ်လီၤ. ၉ ကုၢ်အကစၢ်သ့ၣ်ဧၢ, ရ့ဒီးအဝဲသ့ၣ်ဒ်န့ၣ် အသိးတက့ၢ်. ဒီးတဘၣ်တဲပျံၤတဲဖုး အဝဲသ့ၣ်တဂ့ၤ. သုသ့ၣ်ညါလၢ သုဒီးအဝဲသ့ၣ်န့ၣ် အကစၢ်မ့ၢ်တဂၤဃီလၢ အအိၣ်လၢမူခိၣ် ဒီးအဝဲတကွၢ်မဲာ် ပှၤနီတဂၤဘၣ်.
၁၀ ဒီးလၢခံကတၢၢ်န့ၣ် မ်သုဆဲးဒိးန့ၢ်ဘၣ် တၢ်စိတၢ်ကမီၤလၢ ကစၢ်အအိၣ်ခီဖျိလၢ အတၢ်ဂံၢ်တၢ်ဘါ ဒိၣ်ဒိၣ်မုၢ်မုၢ် အဃိန့ၣ်တက့ၢ်. ၁၁ ဒ်သိး သုဆၢထၢၣ်ဂၢၢ်ကျၢၤ ဒီးတြီဆၢမုၣ်ကီၤလံၢ် အတၢ်ကူၣ်ထီၣ်ဖးလီၤတဖၣ် ကသ့အဂီၢ် ဟံးထီၣ်ဖီၣ်ထီၣ် တၢ်ဖိတၢ်လံၤခဲလၢာ် လၢအဟဲလၢ ကစၢ်ယွၤအအိၣ်လၢ တၢ်ဒုးအဂီၢ်တက့ၢ်. ၁၂ တမ့ၢ်လၢ ပဒုးလိာ်သးဒီး ပှၤဟီၣ်ခိၣ်ဖိဘၣ်. မ့မ့ၢ် ပဒုးလိာ်သးဒီး တၢ်ပၢတၢ်ပြး ဒီးတၢ်စိတၢ်ကမီၤတဖၣ် လၢအအိၣ်လၢမူခိၣ်, ခိၣ်နၢ်တဖၣ်လၢ အပၢဟီၣ်ခိၣ်လၢအပှဲၤဒီးတၢ်ခံးအံၤ လၢအမ့ၢ် ပှၤနီၢ်သးဖိ လၢအအၢအသီသ့ၣ်တဖၣ်လီၤ. ၁၃ လၢတၢ်ဂ့ၢ်အံၤအဃိ ဟံးထီၣ်ဖီၣ်ထီၣ် တၢ်ဖိတၢ်လံၤခဲလၢာ်လၢ အဟဲလၢကစၢ်ယွၤအအိၣ်လၢ တၢ်ဒုးအဂီၢ် ဒ်သိးသုတြီဆၢတၢ် ဖဲမုၢ်နံၤလၢ အအၢအသီအတီၢ်ပူၤ ကန့ၢ်အဂီၢ် ဒီးဒ်သိးဖဲသုမၤဝံၤ တၢ်ခဲလၢာ်အခါ သုဆၢထၢၣ်ဂၢၢ်ကျၢၤ ကန့ၢ်အဂီၢ်တက့ၢ်.
၁၄ အဃိ ဆၢထၢၣ်ဂၢၢ်ကျၢၤ ဒီးစၢဃာ်သုယီၢ်ဒ့လၢ တၢ်မ့ၢ်တၢ်တီအယီၢ်တကိး* ဒီးသိးထီၣ် တၢ်တီတၢ်လိၤ အသဃိးတက့ၢ်. ၁၅ ဒီးဒိးထီၣ်ပာ်စၢၤ ခီၣ်ဖံးလၢ သုခီၣ်လိၤဒ်သိး သုကအိၣ် ကတဲာ်ကတီၤပာ်စၢၤ သုသးထီဘိ လၢကစံၣ်တဲၤတဲလီၤ တၢ်သးခုကစီၣ် ဘၣ်ဃးဒီး တၢ်ဃူတၢ်ဖိးတက့ၢ်. ၁၆ ထဲန့ၣ်တကးဒံးဘၣ် ဒ်သိးသုမၤလီၤပံာ် မုၣ်ကီၤလံၢ်* အပျၢ်မ့ၣ်အူခဲလၢာ် ကသ့အဂီၢ်န့ၣ် ဟံးထီၣ် တၢ်နာ်အကတီၤဖးဒိၣ် တဘ့ၣ်တက့ၢ်. ၁၇ ဒီးဖျီၣ်ထီၣ် တၢ်အုၣ်က့ၤခီၣ်က့ၤ အခိၣ်ဖျီၣ်ထး ဒီးဟံးထီၣ် သးစီဆှံအနး လၢအမ့ၢ်ကစၢ်ယွၤ အကလုၢ်ကထါန့ၣ်တက့ၢ်. ၁၈ ဒီးဆဲးဃ့ဘါထုကဖၣ်တၢ် ကိးဆၢကတီၢ်ဒဲးလၢ တၢ်ဃ့ထုကဖၣ် ကိးကလုာ်ဒဲး ဒီးတၢ်ဃ့ကညးတၢ် ကိးကလုာ်ဒဲး ခီဖျိလၢ သးစီဆှံန့ၣ်တက့ၢ်. စီၣ်မဲာ်စီၣ်နါ ဒီးဃ့ကညး ကစၢ်ယွၤထီဘိ လၢပှၤစီဆှံခဲလၢာ် အဂီၢ်တက့ၢ်. ၁၉ ဃ့ဘါထုကဖၣ်စ့ၢ်ကီး လၢယဂီၢ် ဒ်သိးဖဲယအိးထီၣ်ယထးခိၣ်အခါ တၢ်ကဟ့ၣ်ယၤလၢ တၢ်ကတိၤ ဒ်သိးယတဲဖျါထီၣ် တၢ်သးခုကစီၣ် အတၢ်ခူသူၣ်စီဆှံအဂ့ၢ် ဒူဒူကသ့အဂီၢ်တက့ၢ်. ၂၀ လၢတၢ်သးခုကစီၣ်အဂီၢ် ယမၤတၢ်ဒ်ပှၤခၢၣ်စးတဂၤ လၢအဘၣ်တၢ်စၢဃာ်အီၤ ဒီးပျံၤထးတဖၣ်လီၤ. ဃ့ဘါထုကဖၣ်တၢ်ဒ်သိး ယကတဲတၢ်သးခုကစီၣ်လၢ တၢ်သးဒူအပူၤ ဒ်ယကြၢးတဲအီၤအသိးန့ၣ်တက့ၢ်.
၂၁ ဒ်သိးသုကသ့ၣ်ညါ တၢ်ဂ့ၢ်လၢအဘၣ်ဃးဒီးယၤ ဒီးတၢ်မၤအသးဒီးယၤ ဒ်လဲၣ်အဂီၢ် ဒီပုၢ်ဝဲၢ်သးဘိ စီၤတူဃံၤကူး လၢအမ့ၢ် ကစၢ်အခ့အပှၤလၢ အသးတီတဂၤအံၤ ကဒုးသ့ၣ်ညါသုလၢ တၢ်ခဲလၢာ်လီၤ. ၂၂ အဃိ ယကဆှၢလီၤအီၤလၢသုအိၣ် ဒ်သိးသုကသ့ၣ်ညါ တၢ်မၤအသးဒီးပှၤဒ်လဲၣ်အဂ့ၢ် ဒီးဒ်သိးအကမၤမုာ်ထီၣ် သုသးအဂီၢ်လီၤ.
၂၃ တၢ်ဃူတၢ်ဖိး ဒီးတၢ်အဲၣ်လၢ အအိၣ်ဒီးတၢ်နာ် လၢအဟဲလၢ ပၢ်ကစၢ်ယွၤ ဒီးကစၢ်ယ့ၣ်ၡူးခရံာ် အအိၣ်န့ၣ် မ်အအိၣ်ဒီးဒီပုၢ်ဝဲၢ်တဖၣ်တက့ၢ်. ၂၄ ဒီးမ်တၢ်သးကညီၤဒိၣ်ဒိၣ်မုၢ်မုၢ် အိၣ်ဒီးပှၤခဲလၢာ်လၢ အအဲၣ်ပကစၢ် ယ့ၣ်ၡူးခရံာ်လၢ တၢ်အဲၣ်လၢ အဟးဂီၤတသ့ဘၣ်န့ၣ်တက့ၢ်.