ဖံလံးပံၤ

၄ ဒီပုၢ်ဝဲၢ်လၢ ယအဲၣ်ဘၣ် ဒီးယသးသယုၢ်ဘၣ်အီၤ သ့ၣ်ဧၢ, သုမ့ၢ်ယတၢ်သးခု ဒီးယခိၣ်သလုးလီၤ. ယပှၤသးဘိသ့ၣ်ဧၢ, ဆၢထၢၣ်ဂၢၢ်ကျၢၤလၢ ကစၢ်အပူၤ ဒ်န့ၣ်တက့ၢ်.

၂ ယဟ့ၣ်သဆၣ်ထီၣ် နီၢ်အူၤအိဒံၤ ဒီးနီၢ်စူၣ်တူဃ့ၤ ဒ်သိးကအိၣ်ဒီး တၢ်သးတဖျၢၣ်ဃီလၢ ကစၢ်အပူၤအဂီၢ်လီၤ. ၃ ဒီးနၤစ့ၢ်ကီး ဒ်နမ့ၢ်ယပှၤမၤသကိးတၢ် အနီၢ်ကီၢ်တဂၤအသိး ယဃ့နၤလၢ နကဆဲးမၤစၢၤ ပိာ်မုၣ်တဖၣ်အံၤလီၤ. အဝဲသ့ၣ် မၤသကိးတၢ်ဒီးယၤလၢ တၢ်သးခုကစီၣ်အဂီၢ် ဃုာ်ဒီးစီၤကျ့မ့ၤ ဒီးယပှၤမၤသကိးတၢ်လၢ အဂၤတဖၣ် လၢအမံၤအိၣ်လၢ လံာ်တၢ်မူအပူၤလီၤ.

၄ သးခုလၢကစၢ်အပူၤ ထီဘိတက့ၢ်. ယကတဲကဒီး သးခုတက့ၢ်. ၅ သုတမ့ၢ်ပှၤလၢအခိၣ်ကိၤဘၣ်န့ၣ် မ်အအိၣ်ဖျါထီၣ်လၢ ပှၤခဲလၢာ်အမဲာ်ညါတက့ၢ်. ကစၢ်အိၣ်ဘူးဝဲလီၤ. ၆ တဘၣ် သူၣ်ကိၢ်သးဂီၤ နီတမံၤတဂ့ၤ. မ့မ့ၢ် လၢတၢ်ခဲလၢာ်အပူၤန့ၣ် ဘိးဘၣ်သ့ၣ်ညါ ကစၢ်ယွၤလၢ သုတၢ်ဃ့တဖၣ် ခီဖျိလၢ တၢ်ဃ့ထုကဖၣ် ဒီးတၢ်ဃ့ကညးတၢ် ဃုာ်ဒီး တၢ်စံးဘျုးစံးဖှိၣ်က့ၤတၢ်တက့ၢ်. ၇ ဒီးတၢ်သူၣ်မံသးမုာ်လၢ အဟဲလၢယွၤအအိၣ် လၢအဒိၣ်န့ၢ်ယိာ်န့ၢ်တၢ်လၢ ပနၢ်ပၢၢ်အီၤသ့န့ၣ် ကပၢၤသုသးဒီး သုတၢ်ဆိကမိၣ်တဖၣ် ခီဖျိလၢ ယ့ၣ်ၡူးခရံာ်လီၤ.

၈ အဃိ ယဒီပုၢ်ဝဲၢ်သ့ၣ်ဧၢ, တၢ်လၢအမ့ၢ်အတီ, တၢ်လၢအရ့ဒိၣ်, တၢ်လၢအတီအလိၤ, တၢ်လၢအစီဆှံ, တၢ်လၢ အထိၣ်ဟူးထိၣ်ဂဲၤထီၣ်ပှၤ ဆူတၢ်အဲၣ်, တၢ်လၢ အကဲထီၣ်တၢ်ဂံၢ်တၢ်ဘါ, တၢ်လၢအဂ့ၤ ဒီးတၢ်လၢ အလီၤစံးပတြၢၤတဖၣ်န့ၣ် ဆိကမိၣ် တၢ်ဂ့ၢ်သ့ၣ်တဖၣ်အံၤ ထီဘိတက့ၢ်. ၉ တၢ်လၢ သုမၤလိဘၣ်အီၤ ဒီးတူၢ်လိာ်အီၤ ဒီးနၢ်ဟူဘၣ်အီၤ ဒီးထံၣ်အီၤလၢ ယအိၣ်တဖၣ်န့ၣ် မၤထွဲအီၤတက့ၢ်. သုမ့ၢ်မၤဒ်န့ၣ်န့ၣ် ကစၢ်လၢအဟ့ၣ်လီၤ တၢ်သူၣ်မံသးမုာ်န့ၣ် ကအိၣ်ဒီးသုလီၤ.

၁၀ ဒီးသုပာ်ဖျါထီၣ်ကဒီး သုတၢ်သးအိၣ်ယၤအဃိ ယသးခုလၢ ကစၢ်အပူၤဒိၣ်မးလီၤ. နီၢ်ကီၢ်န့ၣ် သုသးအိၣ်ယၤထီဘိ ဘၣ်ဆၣ် လၢတၢ်ဆၢကတီၢ် တတီၤဖိအတီၢ်ပူၤ သုတအိၣ်ဒီးတၢ်ခွဲးတၢ်ယာ်လၢ သုကပာ်ဖျါထီၣ် သုတၢ်သးအိၣ်ယၤဘၣ်. ၁၁ ယတဲတၢ်ဒ်အံၤန့ၣ် တမ့ၢ်လၢ ယလိၣ်ဘၣ်တၢ် တမံၤမံၤအဃိဘၣ်. ယတၢ်အိၣ်သးမ့ၢ်အိၣ် ဒ်လဲၣ်ဂ့ၤဒ်လဲၣ်ဂ့ၤ ယန့ၢ်ဘၣ်တၢ်မၤလိလၢ ယကသးမံလၢ တၢ်လၢအအိၣ်ဒီးယၤလီၤ. ၁၂ ယတၢ်အိၣ်အါမ့ၢ်ဂ့ၤ, စှၤမ့ၢ်ဂ့ၤ, ယအိၣ်သ့လီၤ. လၢတၢ်ခဲလၢာ်အပူၤ ဒီးလၢတၢ်အိၣ်သး အကလုာ်ကလုာ်အဖီခိၣ် ယမၤလိန့ၢ်တၢ်ခူသူၣ်တခါ လၢအမ့ၢ် ယအီၣ်ဘၣ်တၢ် ဘျဲဘျဲမ့ၢ်ဂ့ၤ, ယလီၤဘဲမ့ၢ်ဂ့ၤ, ယတၢ်အိၣ်အါမ့ၢ်ဂ့ၤ, ယတၢ်တအိၣ်ဘၣ်မ့ၢ်ဂ့ၤ, ယသူၣ်မံသးမံလီၤ. ၁၃ ယအိၣ်ဒီး တၢ်ဂံၢ်တၢ်ဘါလၢ ယကလဲၤခီဖျိတၢ်ခဲလၢာ် ခီဖျိပှၤတဂၤလၢ အဟ့ၣ်ယၤ တၢ်စိကမီၤန့ၣ်အဃိလီၤ.

၁၄ ဒ်လဲၣ်ဂ့ၤဒ်လဲၣ်ဂ့ၤ ဖဲယထံၣ်ဘၣ်တၢ်နးတၢ်ဖှီၣ်အခါ သုမၤစၢၤယၤအဃိ သုမၤတၢ်ဂ့ၤလီၤ. ၁၅ နီၢ်ကီၢ်န့ၣ် သုဝဲပှၤဖံလံးပံၤဖိသ့ၣ်ဧၢ, သုသ့ၣ်ညါစ့ၢ်ကီးလၢ သုနၢ်ဟူဘၣ် တၢ်သးခုကစီၣ် အဆိကတၢၢ် တဘျီဝံၤအလီၢ်ခံ ဖဲယဟးထီၣ်လၢ ကီၢ်မၤက့းဒနံအခါ သုမ့ၢ်တၢ်အိၣ်ဖှိၣ်ထဲတဖုလၢ အမၤစၢၤယၤန့ၣ်လီၤ. တၢ်အိၣ်ဖှိၣ်လၢအဂၤ တမၤစၢၤယၤဘၣ်. ၁၆ ဖဲယအိၣ်လၢ ဝ့ၢ်သ့းစၤလနံအပူၤအခါ သုဆှၢန့ၢ်ယၤ တၢ်လၢ ယလိၣ်ဘၣ်တဖၣ်န့ၣ် တမ့ၢ်ထဲတဘျီဘၣ် မ့ၢ်ခံဘျီညါလီၤ. ၁၇ တမ့ၢ်လၢ ယဃုတၢ်ဟ့ၣ်တဖၣ်ဘၣ်, မ့ၢ်ယအဲၣ်ဒိးလၢ သုကဒိးန့ၢ်ဘၣ်အမၠး လၢအဟဲခီဖျိ သုမၤတၢ်ဂ့ၤအဃိလီၤ. ၁၈ ဘၣ်ဆၣ်ခဲအံၤ မ့ၢ်လၢ ယဒိးန့ၢ်ဘၣ် တၢ်လၢသုဆှၢန့ၢ်ယၤ ခီဖျိလၢ စီၤအ့းပၤဖရီးဒံတူး အစုပူၤအဃိ ယအိၣ်ဒီးတၢ်ခဲလၢာ် လၢယလိၣ်ဘၣ်အီၤ ဒီးအိၣ်ဝဲအါန့ၢ်ဒံး တၢ်လၢ ယလိၣ်ဘၣ်အီၤတက့ၢ်လီၤ. သုတၢ်ဟ့ၣ်န့ၣ် လီၤဂာ်ဒ် တၢ်လုၢ်တၢ်ပာ်လၢ ကစၢ်ယွၤ ဘၣ်သူၣ်ဘၣ်သးဝဲ ဒီးနၢမူနၢဆှီလၢ အမဲာ်ညါလီၤ. ၁၉ အဃိ ဒ်ကစၢ်ယွၤ အိၣ်ဒီးတၢ်ထူးတၢ်တီၤ လၢအပှဲၤဒီး တၢ်လၤကပီၤအသိး အကဟ့ၣ်သုတၢ်လၢ သုလိၣ်ဘၣ်ခဲလၢာ် ခီဖျိလၢ ယ့ၣ်ၡူးခရံာ်လီၤ. ၂၀ ပပၢ်ကစၢ်ယွၤန့ၣ် မ်တၢ်လၤကပီၤ အိၣ်ဒီးအီၤ အစိၤစိၤဃၣ်ဃၣ် လီၤထူလီၤယိာ်တက့ၢ်. အၤမ့ၣ်.

၂၁ ဆၢဂ့ၤဆၢဝါန့ၢ်ယၤ ပှၤစီဆှံကိးဂၤဒဲးလၢ အအိၣ်လၢ ယ့ၣ်ၡူးခရံာ် အပူၤတက့ၢ်. ဒီပုၢ်ဝဲၢ်တဖၣ် လၢအအိၣ်ဒီးယၤန့ၣ် ဆၢဂ့ၤဆၢဝါသုစ့ၢ်ကီးလီၤ. ၂၂ ပှၤစီဆှံခဲလၢာ် လီၤဆီဒၣ်တၢ် ပှၤစီဆှံတဖၣ်လၢ အအိၣ်လၢ ကဲစၢ်အနီပူၤန့ၣ် ဆၢဂ့ၤဆၢဝါသုလီၤ.

၂၃ မ်ကစၢ် ယ့ၣ်ၡူးခရံာ် အတၢ်သးကညီၤ ဒိၣ်ဒိၣ်မုၢ်မုၢ်န့ၣ် အိၣ်လၢသုသးပူၤတက့ၢ်.