ကလီးစဲ
၂ ယအဲၣ်ဒိးလၢ သုကသ့ၣ်ညါလၢ ယဂုာ်ကျဲးစၢး ဆူၣ်ဆူၣ်လၢ သုဂီၢ်, လၢပှၤလီၤဒံၤကံဖိတဖၣ်အဂီၢ် ဒီးလၢပှၤလၢ အတထံၣ်ဘၣ်ယၤ နီတဘျီဘၣ်တဖၣ်အဂီၢ် ထဲလဲၣ်န့ၣ်လီၤ. ၂ တၢ်အဝဲအံၤ မ့ၢ်ဒ်သိး အဝဲသ့ၣ် အသးကမုာ်ထီၣ် ဒီးကအိၣ်ဃူအိၣ်ဖိးလၢ အသးတဖျၢၣ်ဃီလၢ တၢ်အဲၣ်တၢ်ကွံအပူၤလီၤ. ဒီးမ့မ့ၢ်ဒ်န့ၣ်န့ၣ် အဝဲသ့ၣ်ကအိၣ်ဒီး တၢ်ထူးတၢ်တီၤ အနီၢ်ကီၢ် လၢအဟဲခီဖျိ တၢ်နၢ်ပၢၢ်လၢ အဝဲသ့ၣ်နာ်န့ၢ်ဝဲ လၢလၢပှဲၤပှဲၤ ဒီးကဒိးန့ၢ်ဘၣ် တၢ်သ့ၣ်ညါလီၤတံၢ်လီၤဆဲး ဘၣ်ဃးဒီး ကစၢ်ယွၤ အတၢ်ခူသူၣ်စီဆှံ လၢအမ့ၢ် ခရံာ်န့ၣ်လီၤ. ၃ တၢ်ကူၣ်သ့ ဒီးတၢ်သ့ၣ်ညါလၢ အလုၢ်ဒိၣ်ပှ့ၤဒိၣ် ခဲလၢာ်န့ၣ် အိၣ်ခူသူၣ်ဝဲလၢ ခရံာ်အပူၤ လီၤတံၢ်လီၤဆဲးလီၤ. ၄ ယတဲတၢ်ဒ်အံၤ ဒ်သိးပှၤသုတလီန့ၢ်သုလၢ တၢ်ကတိၤလၢ အလီၤထုးန့ၢ်သူၣ်ထုးန့ၢ်သးတဖၣ် နီတဂၤတဂ့ၤအဂီၢ်လီၤ. ၅ ယတအိၣ်ဒီးသု လၢနီၢ်ခိတခီဘၣ်. ဘၣ်ဆၣ် ယအိၣ်ဒီးသုလၢ သးတခီလီၤ. ဒီးယထံၣ်ဘၣ်လၢ သုရဲၣ်လီၤကျဲၤလီၤတၢ် ဂ့ၤဂ့ၤဘၣ်ဘၣ် ဒီးသုတၢ်နာ် ဂၢၢ်ကျၢၤလၢ ခရံာ်အပူၤအဃိ ယသးခုလီၤ.
၆ အဃိ ဒ်သုတူၢ်လိာ် ယ့ၣ်ၡူးခရံာ် ဒ်ကစၢ်အသိးန့ၣ် ဆဲးလဲၤတၢ်ဒီးအီၤ ဃူဃူဖိးဖိးတက့ၢ်. ၇ ဒီးဒ်သုဘၣ် တၢ်သိၣ်လိသုလၢညါအသိး မ်သုဂံၢ်စဲၤလီၤအသး ကျၢၤကျၢၤ, အိၣ်သူၣ်ထီၣ်သုသးလၢ ခရံာ်အဖီခိၣ်, မၤဂၢၢ်မၤကျၢၤသုတၢ်နာ် ဒီးအိၣ်ဒီး တၢ်စံးဘျုးစံးဖှိၣ် ထီဘိတက့ၢ်.
၈ ဒ်သိး ပှၤသုတဖီၣ်န့ၢ်သု ခီဖျိလၢ ဟီၣ်ခိၣ်အတၢ်ကူၣ်သ့ ဒီးတၢ်လီတၢ်ဝ့ၤ ကလီကလီ နီတဂၤတဂ့ၤအဂီၢ်န့ၣ် ပလီၢ်သုသးတက့ၢ်. တၢ်သ့ၣ်တဖၣ်အံၤ ဒိးသန့ၤထီၣ်အသးလၢ ပှၤဟီၣ်ခိၣ်ဖိ အလုၢ်အလၢ် ဒီးတၢ်အခီၣ်ထံးခီၣ်ဘိတဖၣ် လၢအဘၣ်ဃးဒီး ဟီၣ်ခိၣ်အံၤအဖီခိၣ် ဒီးတဒိးသန့ၤ ထီၣ်အသးလၢ ခရံာ်အဖီခိၣ်ဘၣ်. ၉ ကစၢ်ယွၤ အတၢ်ဂ့ၤတၢ်ဝါခဲလၢာ် အိၣ်ဝဲဆိးဝဲလၢ ခရံာ်အပူၤ လၢလၢပှဲၤပှဲၤလီၤ. ၁၀ ဒီးခီဖျိလၢ ခရံာ်လၢအမ့ၢ် တၢ်ပၢတၢ်ပြး ဒီးတၢ်စိတၢ်ကမီၤခဲလၢာ် အခိၣ်တဂၤအံၤအဃိ သုအိၣ်ဒီးတၢ် လၢလၢပှဲၤပှဲၤလီၤ. ၁၁ သုဘၣ်ထွဲလိာ်သးဒီးအီၤအဃိ သုဒိးတၢ်ကူးတရံးဒီး တမ့ၢ်ခီဖျိလၢ ပှၤစုဘၣ်, မ့ၢ်တၢ်ကူးတရံးတခါ ခီဖျိလၢ သုဘ့ၣ်လီၤကွံာ် သုနီၢ်ခိလၢအအိၣ်ဒီး တၢ်ဒဲးဘးအဃိလီၤ. တၢ်အဝဲအံၤ မ့ၢ်ဝဲတၢ်ကူးတရံး ဘၣ်ဃးဒီးခရံာ်လီၤ. ၁၂ တၢ်ခူၣ်လီၤသု ဃုာ်ဒီးအီၤလၢ အတၢ်ဒိးဘျၢအပူၤန့ၣ်လီၤ. ဒီးသုဘၣ်ထွဲလိာ်သးဒီးအီၤအဃိ သုဘၣ် တၢ်မၤဂဲၤဆၢထၢၣ်သု ဃုာ်ဒီးအီၤ ခီဖျိလၢ သုတၢ်နာ် ကစၢ်ယွၤ အစိကမီၤလီၤ. ကစၢ်ယွၤမ့ၢ်ပှၤလၢ အမၤဂဲၤဆၢထၢၣ်က့ၤအီၤလၢ တၢ်သံန့ၣ်လီၤ.
၁၃ တကးဒံးဘၣ် လၢညါန့ၣ် သုမ့ၢ်ပှၤလၢအသံလၢ သုတၢ်ကမၣ်အပူၤ ဒီးသုတဒိး တၢ်ကူးတရံးဘၣ် သနာ်က့ ကစၢ်ယွၤ မၤမူထီၣ်သု ဒ်သိးသုကအိၣ်လၢ ခရံာ်အပူၤလီၤ. ဒီးလၢတၢ်သူၣ်ဂ့ၤသးဝါအပူၤန့ၣ် အဝဲပျၢ်ကွံာ် ပတၢ်ကမၣ် ခဲလၢာ်လီၤ. ၁၄ ဒီးထူးသံကွံာ်ဝဲ တၢ်သိၣ်တၢ်သီ လၢအဘၣ် တၢ်ကွဲးအီၤလၢစု လၢအထီဒါပှၤန့ၣ်လီၤ. ဒီးကစၢ်ယွၤ ထုးထီၣ်ကွံာ် တၢ်သိၣ်တၢ်သီခီဖျိ ပျၤထီကွံာ်ဝဲလၢ တၢ်မၤအၢမၤနး အသ့ၣ်တၢၣ်* အလိၤန့ၣ်လီၤ. ၁၅ ခီဖျိလၢ တၢ်မၤအၢမၤနး အသ့ၣ်တၢၣ်အဃိ ဒ်သုးဖိတဖၣ်လၢ အဒုးတၢ်နၢၤ ဒီးဟဲက့ၤဖီၣ်န့ၢ် ပှၤအဂၤတဖၣ်အသိး အဝဲမၤနၢၤမၤဃၣ် တၢ်ပၢတၢ်ပြး ဒီးတၢ်စိတၢ်ကမီၤတဖၣ် ဒီးအဝဲဆှၢအဝဲသ့ၣ်လၢ ပှၤခဲလၢာ်အမဲာ်ညါ ဒ်တၢ်ကွၢ်ကီအသိးလီၤ.
၁၆ အဃိ ဘၣ်ဃးဒီး တၢ်လၢသုအီၣ်အီၤ ဒီးသုအီအီၤမ့ၢ်ဂ့ၤ, တၢ်မၤမူးပွဲမ့ၢ်ဂ့ၤ, လါထီၣ်သီမ့ၢ်ဂ့ၤ, မုၢ်အိၣ်ဘှံးနံၤမ့ၢ်ဂ့ၤ, တဘၣ်ပျဲ ပှၤပာ်ဒ့ၣ်ပာ်ကမၣ်သု နီတဂၤတဂ့ၤ. ၁၇ တၢ်သ့ၣ်တဖၣ်အံၤန့ၣ် မ့ၢ်ဝဲတၢ်လၢ အကဟဲတဖၣ် အကဒုလီၤ. ဘၣ်ဆၣ် တၢ်အမိၢ်ပှၢ်နီၢ်ကီၢ်န့ၣ် မ့ၢ်ဝဲခရံာ်လီၤ. ၁၈ ပှၤလၢ အပာ်မၤအသး ဒ်အဆီၣ်လီၤအသးအသိး ဒီးဘါထီၣ် မူခိၣ်ကလူးတဖၣ်န့ၣ်* တဘၣ်ပျဲအဝဲသ့ၣ် တြီသုလၢ သုကန့ၢ်ဘၣ် ခိၣ်ဖးအဂီၢ်တဂ့ၤ. အဝဲသ့ၣ် “အိၣ်ဆၢထၢၣ်လၢ” တၢ်လၢအဝဲသ့ၣ် ထံၣ်ဝဲတဖၣ်အဂီၢ်လီၤ. ဒီးခီဖျိလၢ အဝဲသ့ၣ် ဆိကမိၣ်တၢ်ဒ် တၢ်ဖံးတၢ်ညၣ် အတၢ်သူၣ်လီသးကွံအသိးအဃိ အဝဲသ့ၣ် ပာ်ထီၣ်ထီအသး ကလီကလီလီၤ. ၁၉ ဒီးအဝဲသ့ၣ် တမၤထွဲဝဲဒ် ခိၣ်န့ၣ်အသိးဘၣ်. တၢ်လၢခိၣ်န့ၣ် ဟ့ၣ်ဝဲနီၢ်ခိ ဒီတဂၤညါလၢ တၢ်လၢအလိၣ်ဘၣ်ဝဲတဖၣ် ဒီးအသူဝဲတၢ်အဆၢ ဒီးတၢ်အထူၣ်အပျၢ်တဖၣ် ဒ်သိးနီၢ်ခိ ကဘုးတာ်လိာ်အသး ဃူဃူအဂီၢ်လီၤ. တကးဒံးဘၣ် ဒုးဒိၣ်ထီၣ်ဝဲ နီၢ်ခိခီဖျိလၢ ကစၢ်ယွၤ အတၢ်စိတၢ်ကမီၤလီၤ.
၂၀ သုမ့ၢ်သံတ့ၢ်ဃုာ်ဒီးခရံာ် ဒီးထူၣ်ဖျဲးထီၣ်ကွံာ်လၢ တၢ်အခီၣ်ထံးခီၣ်ဘိတဖၣ် လၢအဘၣ်ဃးဒီး ဟီၣ်ခိၣ်အံၤန့ၣ် ဘၣ်မနုၤအဃိ သုအိၣ်မူဒံး ဒ်ပှၤလၢအဘၣ်ဃးဒီး ဟီၣ်ခိၣ်အသိးလဲၣ်. ဒီးဘၣ်မနုၤအဃိ သုဒိကနၣ်ဒံး တၢ်မၤလိာ်တဖၣ် ဒ်သိးဒီး ၂၁ “တဘၣ်ဟံးန့ၢ်တဂ့ၤ, တဘၣ်လ့ၣ်ကွၢ်တဂ့ၤ, တဘၣ်ဖီၣ်တဂ့ၤ” န့ၣ်လဲၣ်. ၂၂ တၢ်မၤလိာ်တဖၣ်အံၤ တဲဝဲဘၣ်ဃးဒီး တၢ်လၢအဘၣ် တၢ်အီၣ်အီၤအီအီၤ ဝံၤဒီး ဟးဂီၤကွံာ်ဝဲအဂ့ၢ်လီၤ. ဒီးတၢ်မၤလိာ်တဖၣ်အံၤ မ့ၢ်ဝဲပှၤဟီၣ်ခိၣ်ဖိတဖၣ် အတၢ်သိၣ်လိလီၤ. ၂၃ တၢ်မၤလိာ်တဖၣ်အံၤ ဖျါလၢအအိၣ်ဒီးတၢ်ကူၣ်သ့ ဘၣ်ဆၣ်မ့ၢ်ဝဲ တၢ်ဘူၣ်ထီၣ်ဘါထီၣ်တၢ် ဒ်အနီၢ်ကစၢ် အတၢ်ဘၣ်အသး ဒီးတၢ်ဆီၣ်လီၤသးလၢ တၢ်ပာ်မၤအသးအပူၤ ဒီးတၢ်မၤအၢမၤနးလီၤက့ၤ အနီၢ်ခိလီၤ. ဒီးတကဲဘျုးလၢ ပှၤကတြီဆၢ တၢ်ဖံးတၢ်ညၣ် အတၢ်သူၣ်လီသးကွံအဂီၢ် နီတစဲးဘၣ်.