ကလီးစဲ

၄ ကုၢ်အကစၢ်သ့ၣ်ဧၢ, ရ့ဒီးသုကုၢ်တဖၣ် ဂ့ၤဂ့ၤဘၣ်ဘၣ် ဒီးတီတီလိၤလိၤတက့ၢ်. သုသ့ၣ်ညါလၢ သုအိၣ်စ့ၢ်ကီး ဒီးသုကစၢ်တဂၤ လၢမူခိၣ်လီၤ.

၂ ဆဲးဃ့ဘါထုကဖၣ်တၢ် ထီဘိတက့ၢ်. ဘၣ်ဃးဒီး တၢ်ထုကဖၣ်န့ၣ် စီၣ်မဲာ်စီၣ်နါ ဒီးစံးဘျုးစံးဖှိၣ်တၢ်တက့ၢ်. ၃ တကတီၢ်ဃီန့ၣ် ဃ့ဘါထုကဖၣ်စ့ၢ်ကီးတၢ်လၢပဂီၢ် ဒ်သိးကစၢ်ယွၤ ကအိးဟိထီၣ်ကျဲလၢ ပကစံၣ်တဲၤတဲလီၤ အကလုၢ်ကထါ ဒီးတၢ်ခူသူၣ်စီဆှံ ဘၣ်ဃးဒီး ခရံာ်တက့ၢ်. ခီဖျိလၢ တၢ်အဝဲအံၤအဃိ တၢ်စၢဃာ်ယၤလီၤ. ၄ ဒီးဃ့ဘါထုကဖၣ်တၢ် ဒ်သိး ယကစံၣ်တဲၤတဲလီၤအီၤပျီပျီ ဒ်ယကြၢးမၤအသိးတက့ၢ်.

၅ ဆဲးအိၣ်မူလၢ တၢ်ကူၣ်သ့အပူၤ လၢပှၤလၢ အတစူၢ်တနာ်တၢ်ဘၣ်တဖၣ်အကျါ ဒီးသူသုတၢ်ဆၢကတီၢ်လၢ အဂ့ၤကတၢၢ်တက့ၢ်. ၆ ဒ်သိးသုကသ့ၣ်ညါလၢ သုကြၢးစံးဆၢ ပှၤတဂၤစုာ်စုာ် ဒ်လဲၣ်ဒ်လဲၣ်န့ၣ် မ်သုတၢ်ကတိၤတဖၣ် ကမ့ၢ်တၢ်လၢအမုာ်, ဟီဒ်အံသၣ်အသိး ထီဘိတက့ၢ်.

၇ ယဒီပုၢ်ဝဲၢ်သးဘိ စီၤတူဃံၤကူး လၢအမ့ၢ် ခရံာ်အခ့အပှၤ လၢအသးတီ ဒီးလၢအမ့ၢ် ကစၢ်အကုၢ် ဒ်သိးဒီးယၤန့ၣ် ကတဲဘၣ်သု ယကစီၣ်ခဲလၢာ်လီၤ. ၈ ယကဆှၢလီၤအီၤလၢ သုအိၣ်ဒ်သိး သုကသ့ၣ်ညါ တၢ်မၤအသးဒီးပှၤ ဒ်လဲၣ်အဂ့ၢ် ဒီးဒ်သိး အကမၤမုာ်ထီၣ် သုသးအဂီၢ်လီၤ. ၉ အဝဲ ကလဲၤလၢသုအိၣ် ဃုာ်ဒီး စီၤအီးန့ၤစံမူး လၢအမ့ၢ် ယဒီပုၢ်ဝဲၢ်သးဘိလၢ အသးတီ လၢအအိၣ်တ့ၢ်ဒီးသု လၢညါတဂၤန့ၣ်လီၤ. အဝဲသ့ၣ် ကတဲဘၣ်သု တၢ်လၢအကဲထီၣ်အသး ဖဲအံၤခဲလၢာ်န့ၣ်လီၤ.

၁၀ စီၤအရံစတၢ်ဃူး လၢအဘၣ် တၢ်စၢဃာ်အီၤဃုာ်ဒီးယၤ ဒီးစီၤဘၢ်နါဘၤအတခွါ စီၤမၢ်ကူးန့ၣ် (ဘၣ်ဃးဒီးအီၤန့ၣ် သုဒိးန့ၢ်ဘၣ် တၢ်ဟံးစုနဲၣ်ကျဲလၢ အဝဲမ့ၢ်လဲၤလၢသုအိၣ်န့ၣ် သုကဘၣ် တူၢ်လိာ်အီၤဂ့ၤဂ့ၤ) ဆၢဂ့ၤဆၢဝါသုလီၤ. ၁၁ တကးဒံးဘၣ် စီၤယ့ၣ်ၡူးလၢ တၢ်ကိးအီၤလၢ စီၤယူစတူးန့ၣ် ဆၢဂ့ၤဆၢဝါသု စ့ၢ်ကီးလီၤ. အဝဲသ့ၣ်န့ၣ် ပၣ်ဃုာ်လၢ ပှၤလၢအဒိး တၢ်ကူးတရံးတဖၣ်အကျါလီၤ. ဒီးထဲဒၣ်အဝဲသ့ၣ်န့ၣ် မ့ၢ်ယပှၤမၤသကိးတၢ်လၢ ယွၤအဘီအမုၢ်အဂီၢ် ဒီးအဝဲသ့ၣ်ကဲထီၣ် တၢ်ဟ့ၣ်ဂံၢ်ဟ့ၣ်ဘါလၢ ယဂီၢ်ဒိၣ်မးလီၤ. ၁၂ စီၤအ့းပၤဖြါ လၢအမ့ၢ် ယ့ၣ်ၡူးခရံာ်အကုၢ် လၢအအိၣ်တ့ၢ်ဒီးသုန့ၣ် ဆၢဂ့ၤဆၢဝါသုလီၤ. ဒီးဒ်သိး လၢခံကတၢၢ်န့ၣ် သုကအိၣ်ဆၢထၢၣ် လၢလၢပှဲၤပှဲၤ ဒီးသုကအိၣ်ဒီး တၢ်နာ်လၢအဂၢၢ်ကျၢၤ လၢအဘၣ်ဃးဒီး တၢ်လၢကစၢ်ယွၤ ဘၣ်အသးကိးမံၤဒဲးအဂီၢ် အဝဲဃ့ဘါထုကဖၣ်န့ၢ်တၢ်လၢ သုဂီၢ်ဆူၣ်ဆူၣ် ထီဘိလီၤ. ၁၃ ယအုၣ်ယသးလၢ အဝဲဂုာ်ကျဲးစၢးဆူၣ်ဆူၣ် လၢသုဂီၢ် ဒီးလၢပှၤအိၣ်လၢ ဝ့ၢ်လီၤဒံၤကံ ဒီးဝ့ၢ်ဟံၣ်ရိးပလံအဂီၢ်လီၤ.

၁၄ ကသံၣ်သရၣ် စီၤလူၤကၣ် လၢအဘၣ်တၢ်အဲၣ်အီၤ ဒီးစီၤဒ့မၤန့ၣ် ဆၢဂ့ၤဆၢဝါသုလီၤ. ၁၅ ဆၢဂ့ၤဆၢဝါန့ၢ်ယၤ ဒီပုၢ်ဝဲၢ်တဖၣ်လၢ အအိၣ်လၢ ဝ့ၢ်လီၤဒံၤကံ ဒီးနီၢ်နူၣ်ဖၤ ဒီးတၢ်အိၣ်ဖှိၣ်လၢ အအိၣ်ဖှိၣ်ဝဲလၢ အဟံၣ်ပူၤန့ၣ်တက့ၢ်. ၁၆ ဒီးဖဲတၢ်ဖးထီၣ် လံာ်ပရၢအံၤ လၢသုကျါ ဝံၤအလီၢ်ခံ ရဲၣ်ကျဲၤဒ်သိး တၢ်ကဖးအီၤလၢ ပှၤလီၤဒံၤကံဖိ အတၢ်အိၣ်ဖှိၣ်ပူၤစ့ၢ်ကီးတက့ၢ်. ဒီးသုကဘၣ်ဖးလံာ်ပရၢ လၢအဟဲလၢ ဝ့ၢ်လီၤဒံၤကံ စ့ၢ်ကီးလီၤ. ၁၇ ဒီးတဲဘၣ် စီၤအၢ်ဃံးပူးလၢ “ဒ်သိး နကမၤလၢပှဲၤမူဒါ လၢနတူၢ်လိာ်အီၤလၢ ကစၢ်အပူၤအဂီၢ် ဂုာ်ကျဲးစၢးလၢ အဂ့ၤကတၢၢ်တက့ၢ်.”

၁၈ ယၤ, စီၤပီလူးယကွဲးန့ၢ်သု ယတၢ်ဆၢဂ့ၤဆၢဝါအံၤလၢ ယနီၢ်ကစၢ်အစုလီၤ. သ့ၣ်နီၣ်ထီၣ်လၢ တၢ်စၢဃာ်ယၤန့ၣ်တက့ၢ်. မ်သုဒိးန့ၢ်ဘၣ် တၢ်သးကညီၤ ဒိၣ်ဒိၣ်မုၢ်မုၢ်တက့ၢ်.