၁ သ့းစၤလနံ

၂ ဒီပုၢ်ဝဲၢ်သ့ၣ်ဧၢ, သုသ့ၣ်ညါလီၤတံၢ်လီၤဆဲးလၢ ပတၢ်လဲၤအိၣ်သကိးသုန့ၣ် ကဲဘျုးဝဲလီၤ. ၂ ဒ်သုသ့ၣ်ညါအသိး ပတူၢ်ဘၣ်တၢ်နးတၢ်ဖှီၣ် ဒီးပှၤမၤမဲာ်ဆှးပှၤနးမး လၢဝ့ၢ်ဖံလံးပံၤအပူၤ သနာ်က့ ပမၤအါထီၣ် တၢ်သူၣ်ဒူသးဒူ ခီဖျိလၢ ပကစၢ်ယွၤ ဒ်သိးပကတဲဘၣ်သုလၢ ယွၤအတၢ်သးခုကစီၣ် လၢတၢ်ထီဒါ အါမးအပူၤလီၤ. ၃ ပဟ့ၣ်သဆၣ်ထီၣ်သုန့ၣ် တဟဲခီဖျိလၢ တၢ်ဆိကမိၣ်ကမၣ်, တၢ်ပာ်သူၣ်ပာ်သးလၢ အတကဆှီဘၣ် ဒီးအတပၣ်ဃုာ်ဒီး တၢ်လီတၢ်ဝ့ၤဘၣ်. ၄ ဘၣ်ဆၣ် ဒ်ကစၢ်ယွၤ ပာ်ပနီၣ်ပှၤလၢ ပမ့ၢ်ပှၤလၢ အကြၢးအဘၣ်လၢ တၢ်ကအးလီၤပှၤလၢ တၢ်သးခုကစီၣ်အသိးန့ၣ် ပတဲတၢ်ဒ်သိး ပကမၤကစၢ်ယွၤလၢ အသမံသမိး ပသူၣ်ပသးတဂၤန့ၣ် အတၢ်ဘၣ်သး ဒီးတမ့ၢ်ဒ်သိး ပကမၤတၢ်ဘၣ် ပှၤဟီၣ်ခိၣ်ဖိအသးဘၣ်.

၅ နီၢ်ကီၢ်န့ၣ် သုသ့ၣ်ညါလၢ ပတဟးစံးပတြၢၤသု ဒ်သိးကကွဲန့ၢ်လွဲန့ၢ်သု အဂီၢ်ဘၣ် ဒီးပတပာ်မၤပသး ဒ်သိးပကန့ၢ်ဘၣ် တၢ်တမံၤမံၤလၢ တၢ်သးကွံအပူၤအဂီၢ်ဘၣ်. ကစၢ်ယွၤ မ့ၢ်ပှၤအုၣ်အသးလီၤ. ၆ ဒ်ပမ့ၢ် ခရံာ်အတၢ်မၢဖိတဖၣ်အသိး ပပာ်ထီၣ် တၢ်ဝံတၢ်ယိးဃၢလၢ သုလိၤလၢ ကျိၣ်စ့တကပၤန့ၣ် သ့ဝဲလီၤ. ဘၣ်ဆၣ် ပတလီကီ တၢ်လၤကပီၤလၢ သုအိၣ် မ့တမ့ၢ် လၢပှၤအဂၤတဖၣ် အအိၣ်ဘၣ်. ၇ လၢတၢ်န့ၣ်အလီၢ် ဖဲပအိၣ်လၢ သုကျါအခါ ပကဲထီၣ်ပှၤလၢ အသူၣ်ကပုာ်လုး သးကဖီလီ လၢသုဖီခိၣ် ဒ်မိၢ်တဂၤလၢ အအံးထွဲကွၢ်ထွဲ အဖိအီနုၢ်တဖၣ်လၢ တၢ်အဲၣ်တၢ်ကွံအပူၤ အသိးလီၤ. ၈ အဃိ မ့ၢ်လၢ ပသူၣ်အိၣ်သးအိၣ်သု ဒီးပအဲၣ်သုဒိၣ်မးအဃိ ပပာ်လီၤပသး ဂၢၢ်ဂၢၢ်ကျၢၤကျၢၤ လၢပကဟ့ၣ်လီၤသုလၢ ယွၤအတၢ်သးခုကစီၣ် တကးဒံးဘၣ် လၢပသးသမူစ့ၢ်ကီးလီၤ.

၉ ဒီပုၢ်ဝဲၢ်သ့ၣ်ဧၢ, သုကနီၣ်ဘၣ်လၢ ပမၤတၢ်ဆူၣ်ဆူၣ် ဒီးပတၢ်ထဲးဂံၢ်ထဲးဘါလီၤ. ဖဲပစံၣ်တဲၤတဲလီၤ ယွၤအတၢ်သးခုကစီၣ် လၢသုအိၣ်အခါ ဒ်သိးပသုတပာ်ထီၣ် တၢ်ဝံတၢ်ယိးဃၢလၢ သုလိၤလၢ ကျိၣ်စ့တကပၤ နီတဂၤတဂ့ၤအဂီၢ် ပမၤတၢ်လၢ မုၢ်ဆါဒီးလၢမုၢ်နၤလီၤ. ၁၀ ဖဲပအိၣ်ဒီးသုလၢအမ့ၢ် ပှၤစူၢ်က့ၤနာ်က့ၤတၢ် တဖၣ်အခါ ပသးတီ, ပမၤတၢ်တီတီလိၤလိၤ ဒီးတၢ်ပာ်တၢ်ကမၣ် လၢပလိၤအလီၢ် တအိၣ်ဘၣ်န့ၣ် သုဒီးကစၢ်ယွၤစ့ၢ်ကီး မ့ၢ်ပှၤအုၣ်အသးလီၤ. ၁၁ သုသ့ၣ်ညါဂ့ၤဂ့ၤလၢ ပဟ့ၣ်သဆၣ်ထီၣ်သု, ပမၤမုာ်ထီၣ် သုသး ဒီးပဟ့ၣ်ကူၣ်ဟ့ၣ်ဖးသု တဂၤစုာ်စုာ် ဒ်ပၢ်တဂၤမၤစၢၤ အဖိတဖၣ်အသိးန့ၣ်လီၤ. ၁၂ ပမၤတၢ်ဒ်န့ၣ်န့ၣ် မ့ၢ်ဒ်သိး သုကဆဲးလဲၤတၢ် ဒ်အကြၢးဒီး ကစၢ်ယွၤလၢ အကိးသုဆူအဘီအမုၢ် ဒီးအလၤကပီၤန့ၣ်လီၤ.

၁၃ လၢတၢ်ဂ့ၢ်အံၤအဃိ ပစံးဘျုး ကစၢ်ယွၤထီဘိ, မ့ၢ်လၢ ဖဲသုဒိးန့ၢ်ဘၣ် ယွၤအကလုၢ်ကထါလၢ သုနၢ်ဟူဘၣ်အီၤလၢ ပအိၣ်အခါ သုတူၢ်လိာ်အီၤ ဒ်တၢ်လၢအမ့ၢ် တၢ်အနီၢ်ကီၢ်အသိး လၢအမ့ၢ် ယွၤအကလုၢ်ကထါ ဒီးတမ့ၢ်ဒ် ပှၤဟီၣ်ခိၣ်ဖိ အတၢ်ကတိၤဘၣ်. ယွၤအကလုၢ်ကထါအံၤ မၤတၢ်လၢသုဝဲလၢ အမ့ၢ်ပှၤစူၢ်က့ၤနာ်က့ၤတၢ်တဖၣ် အပူၤစ့ၢ်ကီးလီၤ. ၁၄ ဒီပုၢ်ဝဲၢ်သ့ၣ်ဧၢ, သုကဲထီၣ်ပှၤလၢ အကွၢ်လိ ကစၢ်ယွၤ အတၢ်အိၣ်ဖှိၣ်တဖၣ် လၢယ့ၣ်ၡူးခရံာ်အပူၤ လၢအအိၣ်လၢ ကီၢ်ယူဒၤန့ၣ်လီၤ. သုတူၢ်ဘၣ် တၢ်နးတၢ်ဖှီၣ် တမံၤဃီလၢ သုပှၤကလုာ်အစုပူၤ ဒ်အဝဲသ့ၣ်စ့ၢ်ကီး ဘၣ်တၢ်မၤနးမၤဖှီၣ်အီၤလၢ ပှၤယူဒၤဖိအစုပူၤ အသိးလီၤ. ၁၅ ဒီးပှၤယူဒၤဖိတဖၣ်န့ၣ် မ့ၢ်ပှၤလၢ အမၤသံကစၢ်ယ့ၣ်ၡူး ဒီးဝံတဖၣ် ဒီးမၤအၢမၤနးပှၤလီၤ. တကးဒံးဘၣ် အဝဲသ့ၣ်တမၤ တၢ်ဘၣ်ကစၢ်ယွၤအသးဘၣ် ဒီးအဝဲသ့ၣ်ထီဒါ တၢ်လၢအကဲဘျုးလၢ ပှၤခဲလၢာ်အဂီၢ် ၁၆ ခီဖျိလၢ အဝဲသ့ၣ်ကျဲးစၢးတြီပှၤ ဒ်သိးပသု တစံၣ်တဲၤတဲလီၤ ပှၤကလုာ်တဖၣ် တၢ်ကစီၣ်လၢ ကဆှၢအဝဲသ့ၣ်လၢ တၢ်အုၣ်က့ၤခီၣ်က့ၤတဂ့ၤအဂီၢ်န့ၣ်လီၤ. လၢတၢ်န့ၣ်အဃိ အဝဲသ့ၣ်မၤအါထီၣ် အတၢ်ဒဲးဘးထီဘိလီၤ. ဘၣ်ဆၣ် ကစၢ်ယွၤအတၢ်သးဒိၣ်န့ၣ် ကလီၤဘၣ်လၢအဝဲသ့ၣ်အလိၤ သပှၢ်ကတၢၢ်လီၤ.

၁၇ ဒီပုၢ်ဝဲၢ်သ့ၣ်ဧၢ, လၢအပူၤကွံာ်န့ၣ် ပဘၣ်လီၤဖးဒီးသုတစိၢ်တလီၢ် လၢနီၢ်ခိတခီ သနာ်က့ လၢပသူၣ်ပသးန့ၣ် ပတလီၤဖးဘၣ်. ဘၣ်ဆၣ် မ့ၢ်လၢ ပအဲၣ်ဒိးထံၣ်သုဒိၣ်မးအဃိ ပဂုာ်ကျဲးစၢး သပှၢ်ကတၢၢ်ဒ်သိး ပကထံၣ်ဘၣ်သုလီၤ. ၁၈ လၢတၢ်ဂ့ၢ်အံၤအဃိ ပအဲၣ်ဒိးလဲၤကဒီး လၢသုအိၣ်လီၤ. မ့ၢ်လီၤ, ယၤစီၤပီလူး ယဂုာ်ကျဲးစၢး လဲၤကဒီးတဘျီ တကးဒံးဘၣ် ခံဘျီညါ ဘၣ်ဆၣ် မုၣ်ကီၤလံၢ်* တြီပကျဲလီၤ. ၁၉ ဖဲပကစၢ်ယ့ၣ်ၡူး အတၢ်ဟဲက့ၤအိၣ်ဒီးပှၤအဆၢကတီၢ် ပတၢ်မုၢ်လၢ်, ပတၢ်သးခု ဒီးပတၢ်သူၣ်ဖှံသးညီ အခိၣ်သလုး လၢအမဲာ်ညါန့ၣ် ကကဲမတၤလဲၣ်. နီၢ်ကီၢ်န့ၣ် အကဲသု, တမ့ၢ်ဘၣ်ဧါ. ၂၀ သုဝဲဒၣ်အံၤ သုမ့ၢ်ပလၤကပီၤ ဒီးပတၢ်သးခု သပှၢ်ကတၢၢ်လီၤ.