တံတူး
၁ ယၤ, စီၤပီလူး ယမ့ၢ်ကစၢ်ယွၤအကုၢ် ဒီးယ့ၣ်ၡူးခရံာ် အတၢ်မၢဖိတဂၤ ဒ်ယွၤအပှၤဃုထၢဖိတဖၣ် အတၢ်စူၢ်တၢ်နာ်အိၣ်ဝဲအသိး ဒီးဒ်တၢ်သ့ၣ်ညါ တၢ်မ့ၢ်တၢ်တီ လီၤတံၢ်လီၤဆဲးလၢ အဘၣ်ထွဲလိာ်အသးဒီး တၢ်သးတီဒီးယွၤအသိးလီၤ. ၂ တၢ်သ့ၣ်တဖၣ်အံၤ ဒိးသန့ၤထီၣ်အသးလၢ တၢ်မုၢ်လၢ်လၢ အဘၣ်ဃးဒီး တၢ်မူလီၤထူလီၤယိာ်လၢ ကစၢ်ယွၤလၢ အလံၣ်တၢ်လီတၢ် တသ့ဘၣ်တဂၤန့ၣ် အၢၣ်လီၤဝဲ လၢပျၢၤလံၤလံၤန့ၣ်လီၤ. ၃ ဘၣ်ဆၣ် ဖဲတၢ်ဆၢကတီၢ်လၢ အဝဲပာ်ပနီၣ်ဝဲဘၣ်အခါ အဝဲပာ်ဖျါထီၣ် အကလုၢ်ကထါ ခီဖျိလၢ တၢ်စံၣ်တဲၤတဲလီၤတၢ်မၤ လၢအဘၣ် တၢ်အးလီၤအီၤလၢယၤ ဒ်ကစၢ်ယွၤလၢအမ့ၢ် ပှၤတဂၤလၢ အအုၣ်က့ၤခီၣ်က့ၤပှၤန့ၣ် အတၢ်မၤလိာ် အိၣ်ဝဲအသိးလီၤ. ၄ ယကွဲးလံာ်အံၤဆူ စီၤတံတူးလၢအမ့ၢ် ဖိခွါနီၢ်ကီၢ်လၢ အအိၣ်ဒီးတၢ်စူၢ်တၢ်နာ် တမံၤဃီဒီးပှၤန့ၣ် အအိၣ်လီၤ.
မ်နဒိးန့ၢ်ဘၣ် တၢ်သးကညီၤ ဒိၣ်ဒိၣ်မုၢ်မုၢ် ဒီးတၢ်ဃူတၢ်ဖိးလၢ အဟဲလၢပၢ်ကစၢ်ယွၤ ဒီးပတၢ်အုၣ်က့ၤခီၣ်က့ၤကစၢ် ယ့ၣ်ၡူးခရံာ် အအိၣ်န့ၣ်တက့ၢ်.
၅ ယပာ်တ့ၢ်နၤလၢ ကီးကြ့တ့ၤန့ၣ် ဒ်သိးနကဘှီဘၣ်ထီၣ် တၢ်လၢအလိၣ်တဖၣ် ဒီးပာ်ထီၣ် တၢ်အိၣ်ဖှိၣ်သးပှၢ်လၢ ဝ့ၢ်တဖျၢၣ်ဘၣ် တဖျၢၣ်အပူၤ ဒ်ယဟံးစုနဲၣ်ကျဲနၤ အသိးန့ၣ်လီၤ. ၆ တၢ်အိၣ်ဖှိၣ်သးပှၢ်န့ၣ် ကဘၣ်မ့ၢ်ပိာ်ခွါလၢ တၢ်ပာ်ဒ့ၣ်ပာ်ကမၣ်အီၤအလီၢ် တအိၣ်ဘၣ်, ဝၤလၢ အမါအိၣ်ထဲတဂၤ ဒီးအဖိတဖၣ် ကဘၣ်မ့ၢ်ပှၤလၢ အစူၢ်က့ၤနာ်က့ၤတၢ်လၢ ပှၤတပာ်ဒ့ၣ်ပာ်ကမၣ် အဝဲသ့ၣ်လၢ အအိၣ်မူ လီၤရၢၢ်လီၤစၢၢ် မ့တမ့ၢ် အနၢ်က့ၣ်န့ၣ်ဘၣ်. ၇ ဒ်ကစၢ်ယွၤ အခ့အပှၤအသိး ပှၤကွၢ်ထွဲတၢ်တဂၤန့ၣ် ကဘၣ်မ့ၢ်ပှၤလၢ တၢ်ပာ်ဒ့ၣ်ပာ်ကမၣ်အီၤ အလီၢ်တအိၣ်ဘၣ်, တဘၣ်မ့ၢ်ပှၤလၢ အမၤဖဲအသးဘၣ်, တဘၣ်မ့ၢ်ပှၤလၢ အသးထီၣ်တၢ်ချ့ဘၣ်, တဘၣ်မ့ၢ်ပှၤလၢ အအီမူၤသံးဘၣ်, တဘၣ်မ့ၢ် ပှၤလၢ အမၤဆူၣ်မၤစိးတၢ်ဘၣ် ဒီးတဘၣ်မ့ၢ် ပှၤလၢအသးကွံတၢ်လၢ ကမၤန့ၢ်တၢ်လၢ အနီၢ်ကစၢ်အဂီၢ်ဘၣ်. ၈ ဘၣ်ဆၣ် ကဘၣ်မ့ၢ်ပှၤလၢ အသးအိၣ်တူၢ်လိာ်ပှၤတမှံၤ, ပှၤလၢအအဲၣ်တၢ်ဂ့ၤ, ပှၤလၢအဆိကမိၣ်ထံတၢ် သ့ဂ့ၤဂ့ၤ, ပှၤလၢအတီအလိၤ, ပှၤလၢအသးတီ, ပှၤလၢအအိၣ်ဒီးတၢ်ပၢၤသူၣ်ပၢၤသး ၉ ဒီးဖဲအဝဲသူဝဲ အတၢ်သိၣ်လိ အကျိၤအကျဲတဖၣ်အခါ အကဘၣ်ဟံးဃာ် ယွၤအကလုၢ်ကထါလၢ အမ့ၢ်အတီ ဒ်သိး အကဟ့ၣ်ဂံၢ်ဟ့ၣ်ဘါပှၤဂၤ ခီဖျိလၢ တၢ်သိၣ်လိလၢအဂ့ၤအဘၣ် ဒီးကသိၣ်ဃီၣ်ပှၤလၢ အထီဒါတၢ်တဖၣ်အဂီၢ်လီၤ.
၁၀ နီၢ်ကီၢ်န့ၣ် ပှၤလၢအနၢ်က့ၣ် ဒီးလၢအတဲတၢ်လၢ အဘျုးတအိၣ်ဘၣ် ဒီးလၢအလီန့ၢ် ပှၤဂၤတဖၣ်န့ၣ် အိၣ်ဝဲအါဂၤ လီၤဆီဒၣ်တၢ် ပှၤလၢအမၤထွဲ တၢ်ကူးတရံး အလုၢ်အလၢ်တဖၣ်န့ၣ်လီၤ. ၁၁ နကဘၣ်ကးတံာ်ဃာ် အဝဲသ့ၣ်အကိာ်ပူၤ မ့ၢ်လၢ ပှၤသ့ၣ်တဖၣ်အံၤ မၤဟးဂီၤ ဟံၣ်ဖိဃီဖိတဖၣ် အတၢ်စူၢ်တၢ်နာ် ခီဖျိသိၣ်လိဝဲတၢ်လၢ အတကြၢးသိၣ်လိတဖၣ် ဒ်သိးအဝဲသ့ၣ် ကမၤန့ၢ်တၢ်လၢ အနီၢ်ကစၢ်အဂီၢ်လီၤ. ၁၂ ပှၤလၢ အဝဲသ့ၣ်အကျါတဂၤ လၢအမ့ၢ် အဝဲသ့ၣ် အနီၢ်ကစၢ်အဝံတဂၤန့ၣ် တဲဝဲလၢ “ထီဘိန့ၣ် ပှၤကြ့တ့ၤဖိတဖၣ် မ့ၢ်ပှၤလၢ အလံၣ်တၢ်လီတၢ်, မ့ၢ်ဆၣ်ဖိကီၢ်ဖိလၢ အအၢ ဒီးမ့ၢ်ပှၤကၢၣ်လၢ အအီၣ်တၢ်အီတၢ် အါတလၢလီၤ.”
၁၃ တၢ်အုၣ်အသးတခါအံၤန့ၣ် မ့ၢ်ဝဲတီဝဲလီၤ. အဃိ ဆဲးသိၣ်ဃီၣ် အဝဲသ့ၣ်ဆူၣ်ဆူၣ် ဒ်သိးအဝဲသ့ၣ် အတၢ်နာ်ကဂၢၢ်ကျၢၤဝဲ ၁၄ ခီဖျိ အသုတကနၣ်ဃုာ် ပှၤယူဒၤဖိအပူ ဒီးပှၤဟီၣ်ခိၣ်ဖိ အတၢ်မၤလိာ်တဖၣ်လၢ အဟဲလၢ ပှၤလၢအဃၣ်ကွံာ်အသးလၢ တၢ်မ့ၢ်တၢ်တီအအိၣ် တဂ့ၤအဂီၢ်န့ၣ်တက့ၢ်. ၁၅ တၢ်ခဲလၢာ်န့ၣ် မ့ၢ်တၢ်လၢအကဆှီလၢ ပှၤလၢအကဆှီတဖၣ် အမဲာ်ညါလီၤ. မ့မ့ၢ်ပှၤလၢ အဘၣ်အၢဘၣ်သီ ဒီးပှၤလၢအတၢ်နာ် တအိၣ်ဘၣ်တဖၣ်န့ၣ် မ့ၢ်လၢအဝဲသ့ၣ် အတၢ်ဆိကမိၣ် ဒီးအသးလၢ အသ့ၣ်ညါဒၣ်တၢ် ဘၣ်အၢဘၣ်သီအဃိ လၢအဝဲသ့ၣ် အမဲာ်ညါန့ၣ် တၢ်လၢအကဆှီ တအိၣ်နီတမံၤဘၣ်. ၁၆ လၢပှၤဂၤအမဲာ်ညါန့ၣ် ပှၤတဖၣ်အံၤ တဲဝဲလၢ အသ့ၣ်ညါကစၢ်ယွၤလီၤ. ဘၣ်ဆၣ် အဝဲသ့ၣ် သမၢအီၤလၢအတၢ်ဖံးတၢ်မၤ မ့ၢ်လၢအဝဲသ့ၣ်တဖၣ်န့ၣ် လီၤသးဘၣ်အၢ, တၢ်ဒိကနၣ်တအိၣ်ဘၣ် ဒီးတကြၢးဒီး တၢ်မၤလၢအဂ့ၤ နီတမံၤဘၣ်အဃိလီၤ.