၂ ၡမူၤအ့လး
၃ လၢပှၤလၢအဆီၣ်ထွဲ စီၤစီလူး အဒူၣ်ဖိထၢဖိ ဒီးပှၤလၢအဆီၣ်ထွဲ စီၤဒၤဝံး အဒူၣ်ဖိထၢဖိ အဘၢၣ်စၢၤန့ၣ် တၢ်ဒုးတၢ်ယၤ အိၣ်ဝဲဖးယံာ်လီၤ. ဒီးစီၤဒၤဝံး အတၢ်စိတၢ်ကမီၤ ဒံးယံာ်ဒံးဆူၣ်ထီၣ်ဝဲ,+ မ့မ့ၢ် ပှၤလၢအဆီၣ်ထွဲ စီၤစီလူး အဒူၣ်ဖိထၢဖိ အတၢ်စိတၢ်ကမီၤန့ၣ် ဒံးယံာ်ဒံးစှၤလီၤဝဲလီၤ.+
၂ ဒီးစီၤဒၤဝံး အဖိခွါတဖၣ် အိၣ်ဖျဲၣ်ထီၣ်ဝဲလၢ ဝ့ၢ်ဃ့ဘြိၣ်အပူၤလီၤ.+ ဒီးနီၢ်အဃံနိၣ်လၢ+ အဟဲလၢ ဝ့ၢ်ယံးစရ့လးန့ၣ် အိၣ်ဖျဲၣ်ထီၣ်န့ၢ်အီၤ အဖိခွါဝဲၢ်ကိ စီၤအၤမနိၣ်လီၤ.+ ၃ ဒီးပှၤကၢ်မ့ၤလးဖိ နီၢ်အဘံၤကါယံးလး+ လၢအမ့ၢ်တ့ၢ် စီၤနၤဘလးအမါန့ၣ် အိၣ်ဖျဲၣ်ထီၣ်န့ၢ်အီၤ အဖိခွါခံဂၤတဂၤ လၢအမ့ၢ် စီၤကံးလအာ်လီၤ.* ဒီးအဖိခွါသၢဂၤတဂၤန့ၣ် မ့ၢ်ဝဲ နီၢ်မၤကၤ အဖိခွါ စီၤအးဘၡါလိၣ်လီၤ.+ နီၢ်မၤကၤ အပၢ်မ့ၢ်ဝဲ ကၡူၢ်အစီၤပၤ စီၤတးလမဲလီၤ.+ ၄ ဒီးအဖိခွါ လွံၢ်ဂၤတဂၤန့ၣ် မ့ၢ်ဝဲ နီၢ်ဃးကံၤ အဖိခွါ စီၤအဒိနံယၤ,+ အဖိခွါ ယဲၢ်ဂၤတဂၤန့ၣ် မ့ၢ်ဝဲ နီၢ်အဘံတလး အဖိခွါ စီၤၡဖးတယၤ, ၅ အဖိခွါ ဃုဂၤတဂၤန့ၣ် မ့ၢ်ဝဲ စီၤယံးသြၣ် လၢစီၤဒၤဝံးအမါ နီၢ်ဧ့ကလၤ အိၣ်ဖျဲၣ်ထီၣ်ဝဲန့ၣ်လီၤ. အဝဲအံၤ မ့ၢ်ဝဲ စီၤဒၤဝံးအဖိခွါတဖၣ်လၢ အအိၣ်ဖျဲၣ်ထီၣ်လၢ ဝ့ၢ်ဃ့ဘြိၣ်အပူၤန့ၣ်လီၤ.
၆ ဖဲတၢ်ဒုးတၢ်ယၤ အိၣ်ဒံးဝဲလၢ ပှၤလၢအဆီၣ်ထွဲ စီၤစီလူး အဒူၣ်ဖိထၢဖိ ဒီးပှၤလၢအဆီၣ်ထွဲ စီၤဒၤဝံး အဒူၣ်ဖိထၢဖိ အဘၢၣ်စၢၤအခါ စီၤအဘံန့ၢ်+ အစိအကမီၤဆူၣ်ထီၣ်ဝဲလၢ စီၤစီလူး အဒူၣ်ဖိထၢဖိ အဖီခိၣ်လီၤ. ၇ ဒီးစီၤစီလူး အိၣ်ဒီးအသံၣ်မါ* တဂၤလၢ အမံၤမ့ၢ်ဝဲ နီၢ်ရံးစဖၤလီၤ.+ နီၢ်ရံးစဖၤ အပၢ်မ့ၢ်ဝဲ စီၤအၤယၤလီၤ. လၢခံ စီၤအံၤၡဘိၡ့း+ တဲစီၤအဘံန့ၢ်လၢ “ဘၣ်မနုၤအဃိ နမံဃုာ်ဒီး ယပၢ်အသံၣ်မါလဲၣ်.”+ ၈ ဒီးစီၤအဘံန့ၢ် အသးဒိၣ်ထီၣ်တၢ်ဒိၣ်မးလၢ စီၤအံၤၡဘိၡ့း အတၢ်ကတိၤတဖၣ်အဃိ ဒီးအတဲဝဲလၢ “နပာ်ယၤ ဒ်ထွံၣ်အခိၣ်သၣ်ဃံလၢ အဟဲလၢယူဒၤလီၤဧါ. ယပာ်ဖျါထီၣ် တၢ်အဲၣ်လၢအတီလၢ နပၢ် စီၤစီလူး အဒူၣ်ဖိထၢဖိ, အဒီပုၢ်ဝဲၢ်တဖၣ် ဒီးအတံၤသကိးတဖၣ် အဖီခိၣ် တုၤလီၤလၢ တနံၤညါအံၤ. ဒီးယတဟ့ၣ်လီၤကွံာ်နၤလၢ စီၤဒၤဝံး အစုပူၤဘၣ် သနာ်က့ ခဲအံၤ နကဟံးန့ၢ်ယၤအရ့ ခီဖျိလၢ ယမၤကမၣ်တၢ်ဒီး ပှၤပိာ်မုၣ်တဂၤအဃိဧါ. ၉ ယမ့ၢ်တမၤန့ၢ်တၢ်လၢ စီၤဒၤဝံးအဂီၢ်ဒ် ယဟိဝၤယွၤ အၢၣ်လီၤအီၤအသိးဘၣ်န့ၣ် မ်ကစၢ်ယွၤ သိၣ်ဃီၣ်ယၤ* ဆူၣ်ဆူၣ်တက့ၢ်.+ ၁၀ ယွၤအၢၣ်လီၤအီၤလၢ အကထုးထီၣ်ကွံာ် ဘီမုၢ်လၢ စီၤစီလူး အစၢၤအသွဲၣ်တဖၣ်အအိၣ် ဒီးကဒုးအိၣ်ထီၣ် စီၤဒၤဝံး အလီၢ်ပစိာ်လၢ အံၣ်စရ့လး အဖီခိၣ် ဒီးလၢယူဒၤ အဖီခိၣ် စးထီၣ်လၢ ဒၣ်အဟီၣ်ကဝီၤ ပၢၢ်တုၤလၢ ဘ့ၢ်ၡဘၤ အဟီၣ်ကဝီၤလီၤ.”+ ၁၁ ဒီးခီဖျိလၢ စီၤအံၤၡဘိၡ့း ပျံၤဝဲ စီၤအဘံန့ၢ်အဃိ အဝဲက့ၤတဲဆၢက့ၤအီၤ တဘူၣ်နီတထံၣ်လၢၤဘၣ်.+
၁၂ တဘျီဃီန့ၣ် စီၤအဘံန့ၢ် ဆှၢလီၤဝဲ ပှၤစိာ်တၢ်ကစီၣ်ဖိတဖၣ် ဒ်သိးကတဲဘၣ် စီၤဒၤဝံးလၢ “ကီၢ်န့ၣ်မ့ၢ် မတဂၤအတၢ်လဲၣ်.” ဒီးအဝဲ ဆဲးတဲကဒီးဝဲလၢ “မၤတၢ်အၢၣ်လီၤအီလီၤဒီးယၤမီၤ. ဒ်သိး ပှၤအံၣ်စရ့လးဖိခဲလၢာ် ကဃၣ်ဃီၤအသးလၢ နအိၣ်အဂီၢ် တၢ်လၢယမၤသ့န့ၣ် ယကမၤခဲလၢာ်လီၤ.”+ ၁၃ စီၤဒၤဝံး က့ၤတဲဆၢက့ၤဝဲလၢ “ဂ့ၤလံ, ယကမၤ တၢ်အၢၣ်လီၤအီလီၤဒီးနၤလီၤ. ဘၣ်ဆၣ် ယကဃ့နၤ တၢ်ထဲတမံၤလၢ နမ့ၢ်တဟဲဆှၢဆိန့ၢ်ယၤ စီၤစီလူးအဖိမုၣ် နီၢ်မံကၤလးဘၣ်န့ၣ်+ တလိၣ်နဟဲကွၢ်ယမဲာ်ဘၣ်.” ၁၄ ဒီးစီၤဒၤဝံး ဆှၢလီၤ ပှၤစိာ်တၢ်ကစီၣ်ဖိတဖၣ် ဒ်သိး ကတဲဘၣ် စီၤစီလူးအဖိခွါ စီၤအံၤၡဘိၡ့းလၢ+ “ဟ့ၣ်က့ၤယၤ ယမါ နီၢ်မံကၤလးတက့ၢ်. ဒ်သိးယကဖျီဘၣ် ယသးဒီးအီၤအဂီၢ် ယဟ့ၣ်တ့ၢ် ပှၤဖလ့ၡသးဖိ အဂၤ ၁၀၀ အတၢ်အခိၣ်ဖံးလီၤ.”+ ၁၅ အဃိ စီၤအံၤၡဘိၡ့း ဆှၢလီၤပှၤ ဒ်သိးကဟံးန့ၢ် နီၢ်မံကၤလး လၢအဝၤ စီၤဖးလၤတံလး အအိၣ်လီၤ. ဒီးစီၤဖးလၤတံလးန့ၣ်+ အပၢ်မ့ၢ်ဝဲ စီၤလ့ၡ့ၣ်လီၤ. ၁၆ ဘၣ်ဆၣ် နီၢ်မံကၤလး အဝၤလဲၤပိာ်အခံ ဒီးဟီၣ်ဒီးယၢၤတုၤလၢ ဘၤဃူရံၣ်လီၤ.+ ဒီးစီၤအဘံန့ၢ် တဲနီၢ်မံကၤလး အဝၤလၢ “က့ၤက့ၤသၢၤ.” အဃိ အဝဲက့ၤကဒါက့ၤလီၤ.
၁၇ ဒီးစီၤအဘံန့ၢ် ဆှၢလီၤဝဲပှၤစိာ် တၢ်ကစီၣ်ဖိတဖၣ် ဒ်သိးကတဲဘၣ် အံၣ်စရ့လး အပှၤသူၣ်က့သးပှၢ်တဖၣ်လၢ “သုအဲၣ်ဒိးလၢ စီၤဒၤဝံး ကကဲသုစီၤပၤန့ၣ် ဖးယံာ်လံ. ၁၈ ခဲအံၤန့ၣ် မၤဟီ. ယဟိဝၤယွၤ တဲပာ်စၢၤ စီၤဒၤဝံးလၢ ‘ယကသူ ယခ့ယပှၤ စီၤဒၤဝံး+ ဒ်သိးယကမၤပူၤဖျဲး ယပှၤဂီၢ်မုၢ် အံၣ်စရ့လးလၢ ပှၤဖလ့ၡသးဖိ အစုပူၤ ဒီးလၢအဝဲသ့ၣ် အဒုၣ်အဒါ အဂၤခဲလၢာ် အစုပူၤလီၤ.’” ၁၉ ဒီးစီၤအဘံန့ၢ် တဲတၢ်ဒီး ပှၤဘံၣ်ယၤမံၣ်ဖိလီၤ.+ ဒီးစီၤအဘံန့ၢ် လဲၤတဲခူသူၣ်စ့ၢ်ကီးတၢ်ဒီး စီၤဒၤဝံးလၢ ဝ့ၢ်ဃ့ဘြိၣ်အပူၤ ဒ်သိးကတဲဘၣ်အီၤ တၢ်ဂ့ၢ်လၢ ပှၤအံၣ်စရ့လးဖိ ဒီးပှၤဘံၣ်ယၤမံၣ်ဖိခဲလၢာ် အၢၣ်လီၤတူၢ်လိာ်ဝဲလီၤ.
၂၀ ဖဲစီၤအဘံန့ၢ် ဒီးအပှၤအဂၤ ၂၀ ဟဲတုၤလၢ စီၤဒၤဝံးအအိၣ်အခါ စီၤဒၤဝံး ကတဲာ်ကတီၤန့ၢ်ဝဲ တၢ်အီၣ်တၢ်အီလၢ စီၤအဘံန့ၢ် ဒီးပှၤလၢဟဲဒီးအီၤတဖၣ် အဂီၢ်လီၤ. ၂၁ ဒီးစီၤအဘံန့ၢ် တဲဘၣ်စီၤဒၤဝံးလၢ “ပျဲယၤလၢ ယကလဲၤကိးဖှိၣ် အံၣ်စရ့လးခဲလၢာ် လၢယကစၢ်စီၤပၤအဂီၢ် ဒ်သိးအဝဲသ့ၣ် ကမၤတၢ်အၢၣ်လီၤအီလီၤဒီးနၤ အဂီၢ်တက့ၢ်. နကကဲထီၣ် စီၤပၤ လၢတၢ်လၢ နလီကီခဲလၢာ်အဖီခိၣ်လီၤ.” အဃိ စီၤဒၤဝံး ပျဲလဲၤဝဲ စီၤအဘံန့ၢ် ဒီးစီၤအဘံန့ၢ် က့ၤဝဲ မုာ်မုာ်လီၤ.
၂၂ တစိၢ်ဖိဝံၤအလီၢ်ခံ စီၤဒၤဝံး အခ့အပှၤတဖၣ် ဒီးစီၤယိၤအာ် ဟဲက့ၤဝဲလၢတၢ်ဒုး ဒီးဟဲက့ၤစိာ်ဝဲ တၢ်လၢအမၤန့ၢ်ဝဲတဖၣ် အါအါဂီၢ်ဂီၢ်လီၤ. ဖဲန့ၣ်အခါ စီၤအဘံန့ၢ် တအိၣ်ဒီး စီၤဒၤဝံးလၢ ဝ့ၢ်ဃ့ဘြိၣ်အပူၤလၢၤဘၣ်, မ့ၢ်လၢ စီၤဒၤဝံး ပျဲက့ၤအီၤ မုာ်မုာ်လံအဃိလီၤ. ၂၃ ဒီးဖဲစီၤယိၤအာ်+ ဒီးသုးဖိခဲလၢာ် လၢအအိၣ်ဒီးအီၤန့ၣ် ဟဲက့ၤတုၤဝဲအခါ ပှၤတဲဘၣ် စီၤယိၤအာ်လၢ “စီၤန့ၢ်+ အဖိခွါ စီၤအဘံန့ၢ်+ ဟဲလၢ စီၤပၤအအိၣ် ဘၣ်ဆၣ် စီၤပၤ ပျဲက့ၤအီၤ ဒီးအဝဲက့ၤက့ၤဝဲ မုာ်မုာ်လံ.” ၂၄ အဃိ စီၤယိၤအာ် လဲၤလၢ စီၤပၤအအိၣ် ဒီးတဲအီၤလၢ “ဘၣ်မနုၤအဃိ နမၤဒ်န့ၣ်လဲၣ်. စီၤအဘံန့ၢ် ဟဲလၢနအိၣ်ဖဲအံၤဒၢး, ဘၣ်မနုၤအဃိ နပျဲက့ၤအီၤ ပူၤပူၤဖျဲးဖျဲးလဲၣ်. ၂၅ စီၤန့ၢ် အဖိခွါ စီၤအဘံန့ၢ်အဂ့ၢ်န့ၣ် နသ့ၣ်ညါတမ့ၢ်ဧီၤ. အဝဲဟဲဖဲအံၤ ဒ်သိး ကလံၣ်န့ၢ်နၤ ဒီးကဃုသ့ၣ်ညါ နတၢ်ဟူးတၢ်ဂဲၤ ဒီးတၢ်ခဲလၢာ် လၢနမၤလီၤ.”
၂၆ အဃိ စီၤယိၤအာ် ဟးထီၣ်ကွံာ်လၢ စီၤဒၤဝံးအအိၣ် ဒီးဆှၢလီၤဝဲ ပှၤစိာ်တၢ်ကစီၣ်ဖိတဖၣ် ဒ်သိး ကလဲၤလူၤ စီၤအဘံန့ၢ်လီၤ. ဒီးအဝဲသ့ၣ် လဲၤထံၣ် စီၤအဘံန့ၢ် လၢစံရၤ အထံကမါ ဒီးဟဲက့ၤကိးအီၤလီၤ. ဘၣ်ဆၣ် ဘၣ်ဃးဒီး တၢ်ဂ့ၢ်အံၤန့ၣ် စီၤဒၤဝံး တသ့ၣ်ညါဝဲ နီတစဲးဘၣ်. ၂၇ ဖဲစီၤအဘံန့ၢ် ဟဲက့ၤတုၤကဒါလၢ ဝ့ၢ်ဃ့ဘြိၣ်အခါ+ စီၤယိၤအာ် လဲၤကိးနုာ်အီၤလၢ ဝ့ၢ်အတြဲၤပူၤ ဒ်သိး ကတဲခူသူၣ်တၢ်ဒီးအီၤ အဂီၢ်လီၤ. ဘၣ်ဆၣ် မ့ၢ်လၢ စီၤအဘံန့ၢ် မၤသံတ့ၢ်ဝဲ+ စီၤယိၤအာ် အဒီပုၢ်ဝဲၢ်ခွါ စီၤဧစၤအ့လးအဃိ+ စီၤယိၤအာ် ဆဲးအဟၢဖၢဒီး အဝဲသံဝဲလီၤ. ၂၈ လၢခံ ဖဲစီၤဒၤဝံးနၢ်ဟူဝဲ တၢ်ဂ့ၢ်အံၤအခါ အဝဲတဲဝဲလၢ “ဘၣ်ဃးဒီး စီၤန့ၢ်အဖိခွါ စီၤအဘံန့ၢ် အသွံၣ်န့ၣ် ယၤဒီးယဘီယမုၢ် ပူၤဖျဲးဒီးတၢ်ကမၣ်လၢ ယဟိဝၤယွၤ အမဲာ်ညါ လီၤစိၤလီၤထီလီၤ.+ ၂၉ မ်အသွံၣ်လီၤတီလၢ စီၤယိၤအာ်+ အခိၣ်လိၤ ဒီးလၢအပၢ် အဒူၣ်ဖိထၢဖိခဲလၢာ် အလိၤတက့ၢ်. မ်စီၤယိၤအာ် အဒူၣ်ဖိထၢဖိ ကအိၣ်ဒီး ပှၤပိာ်ခွါလၢ အတၢ်ထံ ယွၤလီၤမ့ၢ်ဂ့ၤ,+ ပှၤလၢ အဘၣ်တၢ်ဆါအၢမ့ၢ်ဂ့ၤ,+ ပှၤပိာ်ခွါလၢ အမၤတၢ်လၢ ပှၤခူၣ်လုၣ်အလီၢ်မ့ၢ်ဂ့ၤ, ပှၤလၢ အလီၤဃံၢ်လၢနးမ့ၢ်ဂ့ၤ မ့တမ့ၢ် ပှၤလၢ အတၢ်အီၣ် တအိၣ်ဘၣ်တဖၣ် ထီဘိတက့ၢ်.”+ ၃၀ စီၤယိၤအာ် ဒီးအဒီပုၢ်ဝဲၢ်ခွါ စီၤအဘံၡဲၤ+ မၤသံဝဲ စီၤအဘံန့ၢ်,+ မ့ၢ်လၢ စီၤအဘံန့ၢ် မၤသံဝဲ အဝဲသ့ၣ် အဒီပုၢ်ဝဲၢ်ခွါ စီၤဧစၤအ့လး လၢတၢ်ဒုးပူၤ+ လၢဝ့ၢ်ကံးဘိၣ် အဃိလီၤ.
၃၁ ဒီးစီၤဒၤဝံး တဲဘၣ်စီၤယိၤအာ် ဒီးပှၤလၢ အအိၣ်ဒီးအီၤခဲလၢာ်လၢ “ဖှီညာ်သုဆ့တဖၣ် ဒီးစၢထီၣ် ထၢၣ်တၢ်ကံးညာ်* ဒီးဟီၣ်လၢ စီၤအဘံန့ၢ် အဃိတက့ၢ်.” စီၤပၤဒၤဝံး ဟးဝဲလၢ ပှၤလၢအယိးပှၤစိၣ် အလီၢ်ခံလီၤ. ၃၂ အဝဲသ့ၣ် ခူၣ်လီၤကွံာ် စီၤအဘံန့ၢ် လၢဝ့ၢ်ဃ့ဘြိၣ်အပူၤလီၤ. ဒီးစီၤပၤ ဟီၣ်ဝဲဖးဒိၣ်လၢ စီၤအဘံန့ၢ် အသွၣ်ခိၣ် ဒီးပှၤခဲလၢာ် ဟီၣ်ဝဲလီၤ. ၃၃ ဘၣ်ဃးဒီး စီၤအဘံန့ၢ်အဂ့ၢ်န့ၣ် စီၤပၤအုၣ်ထါလၢ
“စီၤအဘံန့ၢ်သံဝဲ ဒ်ပှၤဟးဂီၤဖိတဂၤ သံဝဲအသိးန့ၣ် မ့ၢ်အကြၢးဧါ,
၃၄ ပှၤတစၢဃာ်နစုဘၣ်
ဒီးနခီၣ်တကျီၤဃာ်အသးလၢ တိၢ်ဘီကွီၤအပူၤဘၣ်.
နလီၤဃံၢ်သံ ဒ်ပှၤလီၤဃံၢ်သံလၢ ပှၤတတီတလိၤတဖၣ် အမဲာ်ညါ အသိးလီၤ.”+
ဒီးပှၤခဲလၢာ် ဟီၣ်ကဒီးဝဲလၢ စီၤအဘံန့ၢ်အဃိလီၤ.
၃၅ လၢခံ ဖဲမုၢ်ဆါခီဒံး အဆၢကတီၢ်န့ၣ် စီၤဒၤဝံး အပှၤခဲလၢာ် ဟဲဟ့ၣ်အီၤ ကိၣ်လၢ တၢ်မၤမုာ်ထီၣ်က့ၤအဂီၢ်လီၤ.* ဘၣ်ဆၣ် စီၤဒၤဝံး အၢၣ်လီၤဝဲလၢ “တချုးလၢ မုၢ်လီၤနုာ်ဒံးဘၣ်န့ၣ် ယမ့ၢ်အီၣ်ကိၣ် မ့တမ့ၢ် တၢ်တမံၤမံၤန့ၣ် မ်ကစၢ်ယွၤ သိၣ်ဃီၣ်ယၤ ဆူၣ်ဆူၣ်တက့ၢ်.”+ ၃၆ ဒီးပှၤခဲလၢာ် ပာ်သူၣ်ပာ်သးဝဲ တၢ်မၤအသးအံၤ ဒီးအဝဲသ့ၣ် ဘၣ်သူၣ်ဘၣ်သးဝဲ ဒ်အဝဲသ့ၣ် ဘၣ်သူၣ်ဘၣ်သးဝဲ တၢ်အဂၤလၢ စီၤပၤမၤဝဲ ကိးမံၤဒဲးအသိးန့ၣ်လီၤ. ၃၇ ဒီးဖဲနံၤအဝဲန့ၣ် စီၤဒၤဝံး အပှၤခဲလၢာ် ဒီးအံၣ်စရ့လးခဲလၢာ် သ့ၣ်ညါဝဲလၢ စီၤန့ၢ် အဖိခွါ စီၤအဘံန့ၢ် ဘၣ်တၢ်မၤသံအီၤန့ၣ် တမ့ၢ်လၢ စီၤပၤရဲၣ်ကျဲၤဝဲဘၣ်.+ ၃၈ ဒီးစီၤပၤတဲဘၣ် အခ့အပှၤတဖၣ်လၢ “တနံၤအံၤ လၢအံၣ်စရ့လးအပူၤန့ၣ် ပှၤခိၣ်ပှၤနၢ် လၢအမ့ၢ် ပှၤဖးဒိၣ်တဂၤ သံဝဲန့ၣ် သုသ့ၣ်ညါမ့ၢ်ဧါ.+ ၃၉ ယဘၣ်တၢ်ဒိးဖှူယၤ ဒ်စီၤပၤအသိးလံ+ သနာ်က့ မုၢ်မဆါတနံၤအံၤ ယတၢ်စိတၢ်ကမီၤစှၤ ဒီးနီၢ်စရူယၤ အဖိခွါတဖၣ်အံၤ+ မ့ၢ်ပှၤလၢအဆူၣ်အကိၤ ဒိၣ်တလၢလီၤ.+ မ်ယဟိဝၤယွၤ ဟ့ၣ်ကၣ်ပှၤလၢ အမၤတၢ်အၢ ဒ်အတၢ်အၢတၢ်သီ အိၣ်ဝဲအသိးတက့ၢ်.”+