၂ ၡမူၤအ့လး
၅ လၢခံ အံၣ်စရ့လး အဒူၣ်ခဲလၢာ် ဟဲလၢ စီၤဒၤဝံးအအိၣ် လၢဝ့ၢ်ဃ့ဘြိၣ်+ ဒီးတဲဝဲလၢ “ပမ့ၢ် နသွံၣ်နထံလီၤ.*+ ၂ လၢညါ ဖဲစီၤစီလူး ကဲပစီၤပၤအခါ နမ့ၢ်ပှၤလၢ အတီခိၣ်ရိၤမဲ အံၣ်စရ့လးလၢ ကလဲၤဒုးတၢ် အဂီၢ်လီၤ.+ ဒီးယဟိဝၤယွၤ တဲနၤလၢ ‘ဒ်ပှၤကွၢ်သိတဂၤအသိး နကအံးထွဲကွၢ်ထွဲ ယပှၤဂီၢ်မုၢ် အံၣ်စရ့လး ဒီးနကကဲထီၣ် အံၣ်စရ့လး အခိၣ်လီၤ.’”+ ၃ အဃိ အံၣ်စရ့လး အပှၤသူၣ်က့သးပှၢ်ခဲလၢာ် ဟဲလၢစီၤပၤအအိၣ်လၢ ဝ့ၢ်ဃ့ဘြိၣ်လီၤ. ဒီးစီၤပၤဒၤဝံး မၤတၢ်အၢၣ်လီၤအီလီၤဒီး အဝဲသ့ၣ်လၢ+ ယဟိဝၤယွၤ အမဲာ်ညါ ဖဲဝ့ၢ်ဃ့ဘြိၣ်လီၤ. ဒီးအဝဲသ့ၣ် ဒိးဖှူ စီၤဒၤဝံး ဒ်စီၤပၤတဂၤအသိးလၢ အံၣ်စရ့လးအဂီၢ်လီၤ.+
၄ ဖဲစီၤဒၤဝံး ကဲထီၣ် စီၤပၤအခါ အသးအိၣ် အနံၣ် ၃၀ ဒီးအဝဲပၢဘၣ်တၢ် အနံၣ် ၄၀ လီၤ.+ ၅ လၢဝ့ၢ်ဃ့ဘြိၣ် အပူၤန့ၣ် အဝဲပၢဘၣ် ယူဒၤအဒူၣ် ၇ နံၣ် ဒီး ၆ လါ ဒီးလၢဝ့ၢ်ယရူၤၡလ့ၣ်+ အပူၤန့ၣ် အဝဲပၢဘၣ် အံၣ်စရ့လးခဲလၢာ်ဒီး ယူဒၤအဒူၣ် ၃၃ နံၣ်လီၤ. ၆ စီၤပၤဒၤဝံး ဒီးအပှၤတဖၣ် လဲၤဝဲလၢ ဝ့ၢ်ယရူၤၡလ့ၣ် ဒ်သိး ကဒုးဝဲ ပှၤယဘူၣ်ဖိလၢ+ အအိၣ်လၢ ဝ့ၢ်ယရူၤၡလ့ၣ် ဒီးအခိၣ်အဃၢၤတဖၣ်လီၤ. အဝဲသ့ၣ် တဲဆဲးအဲး စီၤဒၤဝံးလၢ “နဟဲနုာ်လီၤဖဲအံၤ တသ့နီတဘျီဘၣ်. ပှၤလၢ အမဲာ်တထံၣ်တၢ်ဘၣ် ဒီးပှၤလၢ အခီၣ်ဟးဂီၤဒၣ်လဲာ် ကနီဟးထီၣ်ကွံာ်နၤလီၤ.” အဝဲသ့ၣ် ဆိကမိၣ်ဝဲလၢ ‘စီၤဒၤဝံး ဟဲနုာ်လီၤဖဲအံၤ တန့ၢ်နီတဘျီဘၣ်.’+ ၇ ဘၣ်ဆၣ် စီၤဒၤဝံး မၤန့ၢ်ဝဲ တၢ်အိၣ်သဒၢအလီၢ် လၢအမ့ၢ် စံယိၣ် လၢခဲအံၤ ကဲထီၣ်က့ၤဝဲ စီၤဒၤဝံး အဝ့ၢ်န့ၣ်လီၤ.+ ၈ အဃိ ဖဲတၢ်တနံၤန့ၣ် စီၤဒၤဝံးတဲဝဲလၢ “ပှၤလၢ အကထီၣ်ဒုး ပှၤယဘူၣ်ဖိတဖၣ်န့ၣ် ကြၢးလဲၤတၢ်လၢ ထံဘီကျိၤ ဒ်သိးကမၤသံ ‘ပှၤလၢ အခီၣ်ဟးဂီၤ ဒီးပှၤလၢ အမဲာ်တထံၣ်တၢ်ဘၣ်’ လၢစီၤဒၤဝံး သးဟ့အီၤတဖၣ် အဂီၢ်လီၤ.” လၢတၢ်န့ၣ်အဃိ တၢ်ကတိၤဒိ အိၣ်ထီၣ်တခါ လၢအမ့ၢ်ဝဲ “ပှၤလၢ အမဲာ်တထံၣ်တၢ်ဘၣ် ဒီးပှၤလၢ အခီၣ်ဟးဂီၤ တနုာ်လီၤလၢ ဟံၣ်ပူၤနီတဘျီဘၣ်.” ၉ ဒီးစီၤဒၤဝံး လဲၤအိၣ်ဝဲလၢ တၢ်အိၣ်သဒၢအလီၢ် ဒီးတၢ်လီၢ်အံၤ ဘၣ်တၢ်ကိးန့ၢ်အမံၤလၢ စီၤဒၤဝံးအဝ့ၢ် ဒီးစီၤဒၤဝံး တ့ထီၣ်တၢ်လၢ တၢ်လူၢ်အလိၤ+ ဒီးလၢတၢ်လီၢ် အဂၤတဖၣ်လၢ ဝ့ၢ်အပူၤလီၤ.+ ၁၀ ဒီးစီၤဒၤဝံး အတၢ်စိတၢ်ကမီၤ ဒံးယံာ်ဒံးဆူၣ်ထီၣ်+ ဒီးတၢ်သုးမုၢ်ဂီၢ်မုၢ် အကစၢ် ယဟိဝၤယွၤ အိၣ်ဒီးအီၤလီၤ.+
၁၁ ဝ့ၢ်စိၢ် အစီၤပၤ စီၤဃံရၣ်+ ဆှၢလီၤ ပှၤစိာ်တၢ်ကစီၣ်ဖိတဖၣ်လၢ စီၤဒၤဝံး အအိၣ်လီၤ. ဒီးဆှၢလီၤစ့ၢ်ကီး သ့ၣ်ဆှိအ့ရ့းတဖၣ်,+ ပှၤလၢ တ့တၢ်ဘှီတၢ်လၢသ့ၣ် ဒီးပှၤမၤလၢၢ်ဖိ လၢကတ့ထီၣ် တၢ်အဒူၣ်တဖၣ်အဂီၢ် ဒီးအဝဲသ့ၣ် တ့ထီၣ်န့ၢ် စီၤဒၤဝံး အဟံၣ်တဖျၢၣ်လီၤ.+ ၁၂ ဒီးစီၤဒၤဝံး သ့ၣ်ညါဝဲလၢ ယဟိဝၤယွၤ ပာ်ဂၢၢ်ပာ်ကျၢၤအီၤ ဒ်စီၤပၤတဂၤအသိး လၢအံၣ်စရ့လးအဂီၢ်+ ဒီးမၤဆူၣ်ထီၣ်အဘီမုၢ်+ လၢအပှၤဂီၢ်မုၢ် အံၣ်စရ့လးအဂီၢ်လီၤ.+
၁၃ ဖဲစီၤဒၤဝံး ဟးထီၣ်လၢ ဝ့ၢ်ဃ့ဘြိၣ် ဒီးလဲၤအိၣ်လၢ ဝ့ၢ်ယရူၤၡလ့ၣ်အခါ အဝဲဟံးန့ၢ်အါထီၣ် အမါ ဒီးအသံၣ်မါတဖၣ်*+ ဒီးအဖိမုၣ် ဒီးအဖိခွါတဖၣ် အိၣ်ဖျဲၣ်အါထီၣ်ဝဲလီၤ.+ ၁၄ အဖိတဖၣ်လၢ အအိၣ်ဖျဲၣ်ထီၣ်လၢ ဝ့ၢ်ယရူၤၡလ့ၣ်န့ၣ် အမံၤမ့ၢ်ဝဲ စီၤၡးမူၤ, စီၤၡိၤဘာ်, စီၤနၤသၣ်,+ စီၤၡလိၤမိၤ,+ ၁၅ စီၤယံးဘဃၢ်, စီၤအလံၡူၤ, စီၤန့ဖ့း, စီၤယၤဖံ, ၁၆ စီၤအလံၡမၤ, စီၤအလံဒၤ ဒီးစီၤအလံၤဖလ့းလီၤ.
၁၇ ပှၤဖလ့ၡသးဖိတဖၣ် နၢ်ဟူဝဲလၢ စီၤဒၤဝံး ဘၣ်တၢ်ဒိးဖှူအီၤ ဒ်စီၤပၤတဂၤအသိး လၢအံၣ်စရ့လးအဖီခိၣ်လီၤ.+ ဖဲအဝဲသ့ၣ် နၢ်ဟူဝဲဒ်န့ၣ်အခါ အဝဲသ့ၣ်ခဲလၢာ် ဟဲဒုး စီၤဒၤဝံးလီၤ.+ ဒီးဖဲစီၤဒၤဝံးနၢ်ဟူဝဲ တၢ်ဂ့ၢ်အံၤအခါ အဝဲလဲၤလီၤလၢ တၢ်အိၣ်သဒၢအလီၢ်လီၤ.+ ၁၈ ဒီးပှၤဖလ့ၡသးဖိဟဲ ဒီးဆီလီၤအသးလၢ ရၤဖၤအတၢ်တြီၤပူၤဝးဝးလီၤ.+ ၁၉ စီၤဒၤဝံး သံကွၢ် ယဟိဝၤယွၤလၢ+ “မ့ၢ်ယဘၣ် လဲၤထီၣ်ဒုး ပှၤဖလ့ၡသးဖိဧါ. နကဟ့ၣ်လီၤကွံာ် အဝဲသ့ၣ်လၢ ယစုပူၤဧါ.” ဒီးယဟိဝၤယွၤ တဲဆၢက့ၤ စီၤဒၤဝံးလၢ “လဲၤထီၣ်, ယကဟ့ၣ်လီၤကွံာ် ပှၤဖလ့ၡသးဖိတဖၣ် လၢနစုပူၤ သပှၢ်တၢၢ်လီၤ.”+ ၂၀ အဃိ စီၤဒၤဝံး လဲၤဝဲလၢ ဘဧၤလးပရၤစံၣ် ဒီးစီၤဒၤဝံး မၤသံကွံာ် အဝဲသ့ၣ်ဖဲန့ၣ် ဒီးတဲဝဲလၢ “ယဟိဝၤယွၤ ဆီၣ်ဖျိးကွံာ် ယဒုၣ်ယဒါတဖၣ်လၢ+ ယမဲာ်ညါ ဒ်ထံဆီၣ်ဖျိးတၢ်အသိးလီၤ.” အဃိ အဝဲကိးန့ၢ် တၢ်လီၢ်တတီၤန့ၣ် အမံၤလၢ ဘဧၤလးပရၤစံၣ်လီၤ.+ ၂၁ ဒီးပှၤဖလ့ၡသးဖိတဖၣ် ပာ်တ့ၢ်ကွံာ် အဝဲသ့ၣ် အတၢ်ဂီၤတၢ်ဖှီၣ်တဖၣ်ဖဲန့ၣ် ဒီးစီၤဒၤဝံး ဒီးအပှၤတဖၣ် က့ၤစိာ်ဝဲလီၤ.*
၂၂ လၢခံ ပှၤဖလ့ၡသးဖိတဖၣ် ဟဲထီၣ်ကဒီး ဒီးဆီလီၤအသးလၢ ရၤဖၤအတၢ်တြီၤပူၤဝးဝးလီၤ.+ ၂၃ စီၤဒၤဝံး သံကွၢ် ယဟိဝၤယွၤ ဒီးကစၢ်ယွၤ တဲအီၤလၢ “တဘၣ်လဲၤထီၣ် လိၤလိၤတဂ့ၤ. လဲၤတရံးလၢ အဝဲသ့ၣ် အလီၢ်ခံတကပၤ ဒီးလဲၤဒုး အဝဲသ့ၣ်လၢ တပှီာ် ဘကၤတဖၣ် အမဲာ်ညါ တကပၤတက့ၢ်. ၂၄ ဖဲသုနၢ်ဟူတၢ်အသီၣ်လၢ အလီၤဂာ်ဒီး သုးဖိအဟးသီၣ် လၢတပှီာ်ဘကၤတဖၣ် အဖီခိၣ်န့ၣ် သုကဘၣ်သ့ၣ်ညါလၢ ယဟိဝၤယွၤ လဲၤတၢ်လၢ သုမဲာ်ညါ ဒ်သိးကမၤသံ ပှၤဖလ့ၡသးဖိ အသုးမုၢ် အဃိ လဲၤထီၣ်ဒုးအဝဲသ့ၣ် ချ့ချ့တက့ၢ်.” ၂၅ ဒီးစီၤဒၤဝံး မၤဝဲဒ် ယဟိဝၤယွၤ မၤလိာ်အီၤအသိး ဒီးအဝဲမၤသံဝဲ ပှၤဖလ့ၡသးဖိတဖၣ်+ စးထီၣ်လၢ ဝ့ၢ်က့ဘၤ+ တုၤလီၤလၢ ဝ့ၢ်က့စ့ၢ်လီၤ.+