၁ စီၤပၤ

၁၂ စီၤရဃၤဘၣ်​ လဲၤဝဲလၢ ဝ့ၢ်ၡက့ၣ်​ မ့ၢ်လၢ ပှၤအံၣ်စရ့လးဖိခဲလၢာ် လဲၤဝဲတုၤလၢ ဝ့ၢ်ၡက့ၣ်+ ဒ်သိးကပာ်ထီၣ်အီၤလၢ စီၤပၤအဃိလီၤ.+ ၂ ဖဲစီၤနဘး အဖိခွါ စီၤယၤရၤဘၣ်​ နၢ်ဟူတၢ်ကစီၣ်အံၤအခါ (ဖဲန့ၣ်အခါ စီၤယၤရၤဘၣ်​ အိၣ်ဒံးလၢ ကီၢ်အဲၤကူပတူး ခီဖျိလၢ အဃ့ၢ်ပူၤဖျဲးတ့ၢ်အသးလၢ စီၤပၤၡလိၤမိၤ ဒီးလဲၤအိၣ်ဝဲလၢ ကီၢ်အဲၤကူပတူးအပူၤ)+ ၃ ပှၤအံၣ်စရ့လးဖိ မၢပှၤလဲၤကိးန့ၢ် စီၤယၤရၤဘၣ်လီၤ. ဒီးစီၤယၤရၤဘၣ်​ ဒီးအံၣ်စရ့လး အတၢ်အိၣ်ဖှိၣ်ဒီတဖု လဲၤဝဲလၢ စီၤရဃၤဘၣ်​ အအိၣ်ဒီး တဲအီၤလၢ ၄ “နပၢ်ဒုးဝံပှၤ တၢ်ဝံတၢ်ယိး လၢအဃၢလီၤ.+ ဘၣ်ဆၣ်​ နမ့ၢ်မၤညီထီၣ်​ ဒီးမၤဖှံလီၤ တၢ်ဝံတၢ်ယိးလၢ နပၢ်ဒုးဝံပှၤန့ၣ်​ ပကမၤနတၢ်လီၤ.”

၅ ဒီးစီၤရဃၤဘၣ်​ တဲအဝဲသ့ၣ်လၢ “က့ၤဆိဟီ, အိၣ်ခိးသၢသီဒီး ဟဲကဒါက့ၤလၢယအိၣ်.” အဃိ ပှၤဂီၢ်မုၢ် က့ၤဝဲလီၤ.+ ၆ ဒီးစီၤပၤရဃၤဘၣ်​ သံကွၢ်ဝဲ ပှၤသူၣ်က့သးပှၢ်တဖၣ်လၢ အမၤအပၢ် စီၤၡလိၤမိၤအတၢ် ဖဲစီၤၡလိၤမိၤ အိၣ်မူဒံးအဆၢကတီၢ် လၢ “ဒ်သိး ယကစံးဆၢက့ၤ ပှၤဂီၢ်မုၢ်တဖၣ်န့ၣ်အဂီၢ် သုကဟ့ၣ်ကူၣ်ယၤ ဒ်လဲၣ်.” ၇ ဒီးအဝဲသ့ၣ်​ တဲဆၢက့ၤအီၤလၢ “စးထီၣ်တနံၤအံၤ နမ့ၢ်မၤန့ၢ်တၢ်လၢ ပှၤဂီၢ်မုၢ်တဖၣ်န့ၣ်​ အဂီၢ်, တူၢ်လိာ်အဝဲသ့ၣ်​ အတၢ်ဃ့ထီၣ်​ ဒီးစံးဆၢက့ၤ အဝဲသ့ၣ်​ မုာ်မုာ်န့ၣ်​ အဝဲသ့ၣ်​ ကကဲနခ့နပှၤ ထီဘိလီၤ.”

၈ ဘၣ်ဆၣ်​ အဝဲ တတူၢ်လိာ် ပှၤသူၣ်က့သးပှၢ်တဖၣ်​ အတၢ်ဟ့ၣ်ကူၣ်ဘၣ်. ဒီးအဝဲသံကွၢ် ပိာ်ခွါသးစၢ်တဖၣ်လၢ အဒိၣ်ထီၣ်ဒီးအီၤ ဒ်သိးသိး ဒီးခဲအံၤ အဝဲသ့ၣ်​ ကဲဝဲ အပှၤမၤစၢၤတၢ်တဖၣ်လီၤ.+ ၉ စီၤရဃၤဘၣ်​ တဲအဝဲသ့ၣ်လၢ “ပှၤဂီၢ်မုၢ်တဖၣ်​ တဲယၤလၢ ‘မၤဖှံလီၤ တၢ်ဝံတၢ်ယိးလၢ နပၢ်ဒုးဝံဒုးယိးပှၤမီၤ.’ အဃိ ပကဘၣ်​ တဲဆၢက့ၤ အဝဲသ့ၣ်​ ဒ်လဲၣ်န့ၣ်​ ဟ့ၣ်ကူၣ်ယၤတက့ၢ်.” ၁၀ ပိာ်ခွါသးစၢ်တဖၣ်လၢ အဒိၣ်ထီၣ်ဒီးအီၤ ဒ်သိးသိးန့ၣ်​ တဲအီၤလၢ “ပှၤတဲနၤလၢ ‘နပၢ်မၤဃၢ ပတၢ်ဝံတၢ်ယိး ဘၣ်ဆၣ်​ မ့မ့ၢ်နၤန့ၣ်​ နကဘၣ်​ မၤဖှံလီၤအီၤ လၢပဂီၢ်လီၤ.’ နကဘၣ်တဲက့ၤ အဝဲသ့ၣ်ဒ်အံၤ, ‘ယကမၢဆူၣ်သု နးန့ၢ်ဒံး ယပၢ်လီၤ.* ၁၁ ယပၢ် ဒုးဝံဒုးယိးသု တၢ်ဝံတၢ်ယိး လၢအဃၢ ဘၣ်ဆၣ်​ မ့မ့ၢ်ယၤန့ၣ်​ ယကမၤဃၢထီၣ်​ သုတၢ်ဝံတၢ်ယိးလီၤ. ယပၢ် သိၣ်ဃီၣ်သုလၢ နီၣ်ဖျ့ ဘၣ်ဆၣ်​ မ့မ့ၢ်ယၤန့ၣ်​ ယကသိၣ်ဃီၣ်သုလၢ နီၣ်ဖျ့လၢ အနးန့ၢ်ဒံး ယပၢ် အနီၣ်ဖျ့လီၤ.’”

၁၂ ဒ်စီၤပၤရဃၤဘၣ်​ တဲပာ်စၢၤဝဲလၢ “အိၣ်ခိးသၢသီဒီး ဟဲကဒါက့ၤလၢယအိၣ်” အသိး လၢသၢသီတသီန့ၣ်​ စီၤယၤရၤဘၣ်​ ဒီးပှၤဂီၢ်မုၢ် ခဲလၢာ် ဟဲက့ၤလၢအအိၣ်လီၤ.+ ၁၃ ဘၣ်ဆၣ်​ စီၤပၤ တဲဆၢက့ၤ ပှၤဂီၢ်မုၢ် ဆူၣ်ဆူၣ်ကိၤကိၤ ဒီးတတူၢ်လိာ် တၢ်ဟ့ၣ်ကူၣ်လၢ ပှၤသူၣ်က့သးပှၢ်တဖၣ်​ ဟ့ၣ်ကူၣ်ပာ်စၢၤအီၤန့ၣ်ဘၣ်. ၁၄ ဒ်ပှၤပိာ်ခွါ သးစၢ်တဖၣ်ဟ့ၣ်ကူၣ်အီၤအသိး အတဲအဝဲသ့ၣ်လၢ “ယပၢ် ဒုးဝံဒုးယိးသု တၢ်ဝံတၢ်ယိး လၢအဃၢ ဘၣ်ဆၣ်​ မ့မ့ၢ်ယၤန့ၣ်​ ယကမၤဃၢထီၣ်​ သုတၢ်ဝံတၢ်ယိးလီၤ. ယပၢ် သိၣ်ဃီၣ်သုလၢ နီၣ်ဖျ့ ဘၣ်ဆၣ်​ မ့မ့ၢ်ယၤန့ၣ်​ ယကသိၣ်ဃီၣ်သုလၢ နီၣ်ဖျ့လၢ အနးန့ၢ်ဒံး ယပၢ် အနီၣ်ဖျ့လီၤ.” ၁၅ အဃိ စီၤပၤ တဒိကနၣ်​ ပှၤဂီၢ်မုၢ်ဘၣ်. နီၢ်ကီၢ်န့ၣ်​ ယဟိဝၤယွၤ ဒုးကဲထီၣ်​ တၢ်မၤအသးတဖၣ်အံၤ+ ဒ်သိးကမၤလၢထီၣ်ပှဲၤထီၣ်​ ယဟိဝၤယွၤ အတၢ်ကတိၤလၢ အတဲဝဲ စီၤနဘးအဖိခွါ စီၤယၤရၤဘၣ်​ ခီဖျိလၢ ပှၤၡံလိၤဖိ စီၤအဃံယၤလီၤ.+

၁၆ ဒီးပှၤအံၣ်စရ့လးဖိခဲလၢာ်* ထံၣ်ဝဲလၢ စီၤပၤ တကနၣ်ဃုာ် အဝဲသ့ၣ်ဘၣ်. အဃိ ပှၤဂီၢ်မုၢ်တဲဆၢ စီၤပၤလၢ “မ့ၢ်ပဘၣ်ဃးဒီး စီၤဒၤဝံး ဒ်လဲၣ်. တမ့ၢ်လၢ ပကန့ၢ်သါဘၣ်တၢ် ဃုာ်ဒီးစီၤယံးၡဲ အဖိခွါတဂၤအံၤ နီတမံၤဘၣ်. ပှၤအံၣ်စရ့လးဖိသ့ၣ်ဧၢ, လဲၤသုဝဲလၢ သုယွၤတဖၣ်အအိၣ်တက့ၢ်. စီၤဒၤဝံး အစၢၤအသွဲၣ်တဖၣ်ဧၢ, ကွၢ်ထွဲလီၤက့ၤ သုနီၢ်ကစၢ်တက့ၢ်.” ဒီးပှၤအံၣ်စရ့လးဖိ က့ၤဝဲလၢ အနီၢ်ကစၢ်အဟံၣ်လီၤ.+ ၁၇ ဘၣ်ဆၣ်​ စီၤရဃၤဘၣ်​ ဆဲးပၢဝဲ ပှၤအံၣ်စရ့လးဖိလၢ အအိၣ်လၢ ယူဒၤ အဝ့ၢ်တဖၣ်လီၤ.+

၁၈ လၢခံ စီၤပၤရဃၤဘၣ်​ ဆှၢလီၤစီၤအဒိၤရၣ်+ လၢအမ့ၢ်ပှၤလၢ အတီခိၣ်ရိၤမဲ ပှၤလၢအဘၣ်​ တၢ်မၢဆူၣ်အီၤလၢ ကမၤတၢ်မၤတဖၣ်​ ဘၣ်ဆၣ်​ ပှၤအံၣ်စရ့လးဖိခဲလၢာ် ကွံာ်သံအီၤလၢ လၢၢ်လီၤ. စီၤပၤရဃၤဘၣ်​ ဒိးထီၣ်​ အလ့ၣ်ကဟၣ်​ ဒီးဃ့ၢ်ထီၣ်ကွံာ် လၢဝ့ၢ်ယရူၤၡလ့ၣ်လီၤ.+ ၁၉ စးထီၣ်ဖဲန့ၣ်​ ပှၤအံၣ်စရ့လးဖိတဖၣ်​ ပူထီၣ်ထီဒါ+ စီၤဒၤဝံး အစၢၤအသွဲၣ်​ တုၤလၢ မုၢ်မဆါတနံၤအံၤလီၤ.

၂၀ ဖဲပှၤအံၣ်စရ့လးဖိခဲလၢာ် နၢ်ဟူဝဲလၢ စီၤယၤရၤဘၣ်​ ဟဲက့ၤတုၤဝဲအခါ အဝဲသ့ၣ်​ ပာ်ဖှိၣ်ထီၣ်အသးဒီး ကိးန့ၢ်အီၤ ဒီးဒုးကဲထီၣ်​ အီၤလၢစီၤပၤလၢ ပှၤအံၣ်စရ့လးဖိခဲလၢာ် အဖီခိၣ်လီၤ.+ ပှၤလၢအအိၣ်လၢ စီၤဒၤဝံး အစၢၤအသွဲၣ်တဖၣ်​ အအိၣ်တခီန့ၣ်​ အိၣ်ဒၣ်ထဲ ယူဒၤအဒူၣ်တဒူၣ်လီၤ.+

၂၁ ဖဲစီၤရဃၤဘၣ်​ က့ၤတုၤဝဲလၢ ဝ့ၢ်ယရူၤၡလ့ၣ်​ တဘျီဃီန့ၣ်​ အဝဲဒုးအိၣ်ဖှိၣ်​ ပှၤပိာ်ခွါ ကိးဂၤဒဲးလၢ ယူဒၤအဒူၣ်​ ဒီးဘံၣ်ယၤမံၣ်​ အဒူၣ်ကျါ လၢအမ့ၢ် ပှၤသုးဖိလၢ အဘၣ်တၢ်ဃုထၢထီၣ်အီၤ အဂၤ ၁၈၀,၀၀၀ ဒ်သိးကဒုးတၢ်ဒီး အံၣ်စရ့လး ဒီးသူၣ်ထီၣ်က့ၤ ဘီမုၢ်လၢ စီၤၡလိၤမိၤ အဖိခွါ စီၤရဃၤဘၣ်​ အစုပူၤလီၤ.+ ၂၂ ဘၣ်ဆၣ်​ ယွၤလၢ အမ့ၢ်အတီတဂၤ တဲဘၣ်​ အခ့အပှၤ စီၤၡမါယၤလၢ+ ၂၃ “တဲဘၣ်​ စီၤၡလိၤမိၤ အဖိခွါ စီၤရဃၤဘၣ်​ လၢအမ့ၢ် ယူဒၤအစီၤပၤ, ယူဒၤအဒူၣ်, ဘံၣ်ယၤမံၣ်အဒူၣ်​ ဒီးပှၤဂီၢ်မုၢ်ခဲလၢာ်လၢ ၂၄ ‘ယဟိဝၤယွၤ တဲဝဲလၢ “သုတဘၣ်​ လဲၤထီၣ်ဒုး သုဒီပုၢ်ဝဲၢ် ပှၤအံၣ်စရ့လးဖိတဖၣ်တဂ့ၤ. ယဒုးကဲထီၣ်​ တၢ်မၤအသးအံၤအဃိ သုဝဲတဂၤစုာ်စုာ် ကဘၣ်က့ၤလၢ သုဟံၣ်လီၤ.”’”+ အဃိ အဝဲသ့ၣ်ဒိကနၣ်​ ယဟိဝၤယွၤ အကလုၢ် ဒီးက့ၤဝဲလၢ အဟံၣ်​ ဒ်ယဟိဝၤယွၤ တဲအဝဲသ့ၣ်​ အသိးလီၤ.

၂၅ ဒီးစီၤယၤရၤဘၣ်​ တ့ကျၢၤထီၣ်​ ဝ့ၢ်ၡက့ၣ်လၢ+ အအိၣ်ဝဲလၢ အ့ဖရဲၣ်​ ကစၢၢ်ကလိကျါ ဒီးအဝဲအိၣ်ဝဲ ဖဲန့ၣ်လီၤ. လၢခံ အဝဲဟးထီၣ်ဖဲန့ၣ်​ ဒီးလဲၤတ့ကျၢၤထီၣ်​ ဝ့ၢ်ပနူၤအ့လးလီၤ.+ ၂၆ စီၤယၤရၤဘၣ်​ တဲလီၤအသးလၢ “တဘျီအံၤဒု ဘီမုၢ် ကကဲထီၣ်ကဒါက့ၤ စီၤဒၤဝံး အစၢၤအသွဲၣ်​ အတၢ်လီၤ.+ ၂၇ ပှၤသ့ၣ်တဖၣ်အံၤ မ့ၢ်ဆဲးလဲၤလုၢ်ထီၣ်​ တၢ်လုၢ်တၢ်ပာ်လၢ ယဟိဝၤယွၤ အဟံၣ်​ လၢဝ့ၢ်ယရူၤၡလ့ၣ်+ အပူၤထီဘိန့ၣ်​ အဝဲသ့ၣ်​ ကအဲၣ်ဒိး က့ၤကဒါက့ၤလၢ အကစၢ် စီၤရဃၤဘၣ်​ လၢအမ့ၢ် ယူဒၤအစီၤပၤ အအိၣ်လီၤ. အဝဲသ့ၣ်​ ကမၤသံယၤ သပှၢ်တၢၢ် ဒီးက့ၤကဒါက့ၤလၢ ယူဒၤအစီၤပၤ စီၤရဃၤဘၣ်​ အအိၣ်လီၤ.” ၂၈ စီၤပၤတဲသကိးတၢ်ဒီး အပှၤဟ့ၣ်ကူၣ်တၢ်တဖၣ်​ ဝံၤဒီး အဝဲတ့ထီၣ်​ ကျီၢ်ထူဖိခံဒု+ ဒီးတဲပှၤဂီၢ်မုၢ်တဖၣ်လၢ “အိ အံၣ်စရ့လးသ့ၣ်ဧၢ, သုဘၣ်လဲၤတၢ်လၢ ဝ့ၢ်ယရူၤၡလ့ၣ်န့ၣ်​ ကီတလၢ လၢသုဂီၢ်မီၤ. သုကစၢ်ယွၤလၢ အဒုးဟးထီၣ်သုလၢ ကီၢ်အဲၤကူပတူး အပူၤန့ၣ်​ အိၣ်လၢအံၤ.”+ ၂၉ ဒီးအဝဲပာ်လီၤ ကျီၢ်ထူဖိတဒုလၢ ဝ့ၢ်ဘ့ၤသ့လးအပူၤ+ ဒီးအဝဲတဒုန့ၣ်​ အဝဲပာ်လီၤဝဲလၢ ဝ့ၢ်ဒၣ်အပူၤလီၤ.+ ၃၀ အဃိ ပှၤဂီၢ်မုၢ်တဖၣ်​ မၤတၢ်ဒဲးဘး+ ဒီးလဲၤပၢၢ်တုၤလၢ ဝ့ၢ်ဒၣ်​ ဒ်သိးကဘူၣ်ထီၣ်ဘါထီၣ်​ ကျီၢ်ထူဖိလၢ အအိၣ်ဖဲန့ၣ်တဒုလီၤ.

၃၁ အဝဲတ့ထီၣ်​ ဟံၣ်တဖၣ်လၢ ပှၤကဘူၣ်ထီၣ်ဘါထီၣ်တၢ်အဂီၢ် လၢတၢ်လီၢ်ထီၣ်ထီတဖၣ်အလိၤ ဒီးအဝဲဃုထၢထီၣ်​ ပှၤမုၢ်ဆ့ၣ်မုၢ်ဂီၤဖိလၢ ပှၤဂီၢ်မုၢ်အကျါ ဒ်သိးအဝဲသ့ၣ်​ ကကဲထီၣ်​ ပှၤလုၢ်တၢ်ဒိၣ်တဖၣ်လီၤ. ဒီးအဝဲသ့ၣ်တမ့ၢ် ပှၤလ့ၤဝံဖိဘၣ်.+ ၃၂ တကးဒံးဘၣ်​ စီၤယၤရၤဘၣ်​ ဒုးအိၣ်ထီၣ်​ စ့ၢ်ကီးဘူၣ်​ ဖဲလါဃိးလါတလါ, လါထီၣ်​ ၁၅ သီတသီ ဒ်ဘူၣ်လၢ ယူဒၤအဟီၣ်ကဝီၤအပူၤ အသိးလီၤ.+ လၢတၢ်လုၢ်လီၢ်လၢ အတ့ထီၣ်ဝဲလၢ ဝ့ၢ်ဘ့ၤသ့လးအပူၤန့ၣ်+ အဝဲလုၢ်ထီၣ်​ တၢ်လၢ ကျီၢ်ဖိလၢ အတ့ထီၣ်ဝဲတဖၣ်​ အအိၣ်လီၤ. ဒီးလၢ ဝ့ၢ်ဘ့ၤသ့လးန့ၣ်​ အဝဲပာ်ထီၣ်​ ပှၤလုၢ်တၢ်ဒိၣ်တဖၣ်လၢ ကမၤတၢ်လၢ တၢ်လီၢ်ထီၣ်ထီ လၢအတ့ထီၣ်ဝဲတဖၣ်​ အဂီၢ်လီၤ. ၃၃ ဒီးဖဲလါတလါလၢ အဝဲဃုထၢလၢ အနီၢ်ကစၢ် လၢအမ့ၢ် လါဃိးလါတလါ, လါထီၣ်​ ၁၅ သီတသီန့ၣ်​ အဝဲစးထီၣ်လုၢ်ထီၣ်တၢ် လၢတၢ်လုၢ်လီၢ်လၢ အဝဲတ့ထီၣ်ဝဲဖဲ ဝ့ၢ်ဘ့ၤသ့လးလီၤ. ဒီးအဝဲဒုးအိၣ်ထီၣ်​ ဘူၣ်တခါလၢ အံၣ်စရ့လး အပှၤဂီၢ်မုၢ်အဂီၢ် ဒီးလဲၤထီၣ်လၢ တၢ်လုၢ်လီၢ် ဒီးလုၢ်ထီၣ်​ တၢ်လုၢ်တၢ်ပာ် ဒ်သိးအကခုၣ်ထီၣ်​ အဂီၢ်လီၤ.