၂ စီၤပၤ

၁ စီၤအၤဃာ် သံဝံၤအလီၢ်ခံ ပှၤမိၤအးဖိ+ ထီဒါက့ၤ ပှၤအံၣ်စရ့လးဖိလီၤ.

၂ ဘၣ်တနံၤ စီၤအဃၤစယၤ အိၣ်လၢအဒၢးလၢ ဟံၣ်ခိၣ်လၢ ဝ့ၢ်ၡၤမရံအပူၤ ဒီးအဝဲလီၤတဲာ်လၢ တၢ်ထူၣ်ဖျိလၢ ပှၤထ့အီၤလၢ နီၣ်က့တဖၣ်​ ဒီးအဘၣ်ဒိဝဲလီၤ. အဃိ အဝဲဆှၢလီၤ ပှၤစိာ်တၢ်ကစီၣ်ဖိတဖၣ်​ ဒီးတဲအဝဲသ့ၣ်လၢ “မ့ၢ်ယကဘျါက့ၤဧါ တဘျါက့ၤဘၣ်ဧါန့ၣ်​ လဲၤသံကွၢ်တၢ်လၢ ဝ့ၢ်ဧ့ကြိၣ်အယွၤ+ ဘဧၤလးစဘူာ် အအိၣ်တက့ၢ်.”+ ၃ ဘၣ်ဆၣ်​ ယဟိဝၤယွၤ အမူခိၣ်ကလူး တဲဘၣ်ပှၤတံးၡဘးဖိ စီၤအ့ၤလံယၤ*+ လၢ “ဂဲၤဆၢထၢၣ်​ လဲၤထံၣ်လိာ်သးဒီး ၡၤမရံအစီၤပၤ အပှၤစိာ်တၢ်ကစီၣ်ဖိတဖၣ်​ ဒီးတဲအဝဲသ့ၣ်လၢ ‘သုကလဲၤသံကွၢ်တၢ်လၢ ဝ့ၢ်ဧ့ကြိၣ်အယွၤ ဘဧၤလးစဘူာ် အအိၣ်န့ၣ်​ မ့ၢ်ကစၢ်ယွၤလၢ အံၣ်စရ့လးအပူၤ တအိၣ်ဘၣ်ဟီဧါ.+ ၄ အဃိ ယဟိဝၤယွၤ တဲဝဲဒ်အံၤ, “နတဟးထီၣ်ဘၣ်လၢ လီၢ်မံခိၣ်လၢ နမံနီၤလၢအလိၤန့ၣ်ဘၣ်. နကသံသပှၢ်ကတၢၢ်လီၤ.”’” ဝံၤဒီး စီၤအ့ၤလံယၤ ဟးထီၣ်ကွံာ်ဝဲလီၤ.

၅ ဖဲပှၤစိာ်တၢ်ကစီၣ်ဖိတဖၣ်​ ဟဲက့ၤတုၤလၢ စီၤအဃၤစယၤ အအိၣ်အခါ တဘျီဃီန့ၣ်​ စီၤအဃၤစယၤ တဲအဝဲသ့ၣ်လၢ “ဘၣ်မနုၤအဃိ သုဟဲက့ၤကဒါက့ၤလဲၣ်.” ၆ အဝဲသ့ၣ်​ တဲဆၢအီၤလၢ “ပှၤပိာ်ခွါတဂၤ ဟဲထံၣ်လိာ်သးဒီးပှၤ ဒီးတဲပှၤလၢ ‘က့ၤလၢစီၤပၤလၢ အဆှၢလီၤသုအအိၣ်​ ဒီးတဲအီၤလၢ “ယဟိဝၤယွၤ တဲဒ်အံၤ, ‘နဆှၢလီၤပှၤဂၤ ဒ်သိးကသံကွၢ်တၢ်လၢ ဝ့ၢ်ဧ့ကြိၣ်အယွၤ ဘဧၤလးစဘူာ် အအိၣ်န့ၣ်​ မ့ၢ်ကစၢ်ယွၤလၢ အံၣ်စရ့လးအပူၤ တအိၣ်ဘၣ်ဟီဧါ. လၢတၢ်န့ၣ်အဃိ နတဟးထီၣ်ဘၣ်လၢ လီၢ်မံခိၣ်လၢ နမံနီၤလၢအလိၤန့ၣ်ဘၣ်. နကသံသပှၢ်တၢၢ်လီၤ.’”’”+ ၇ ဒီးစီၤအဃၤစယၤ သံကွၢ်အဝဲသ့ၣ်လၢ “ပိာ်ခွါလၢ အဟဲထံၣ်လိာ်သးဒီးသု ဒီးတဲသု တၢ်ဂ့ၢ်တဖၣ်အံၤန့ၣ်​ အဖျါလီၤဂာ်ဒ်လဲၣ်.” ၈ ဒီးအဝဲသ့ၣ်တဲအီၤလၢ “အကၤဝဲ ဆ့ကၤလၢ အဘၣ်တၢ်တ့အီၤလၢ ဆၣ်ဖိကီၢ်ဖိအဆူၣ်+ ဒီးစၢထီၣ်​ အယီၢ်ဒ့ဒီး ယီၢ်တကိးလၢ အဘၣ်တၢ်တ့အီၤလၢ ဆၣ်ဖိကီၢ်ဖိအဘ့ၣ်လီၤ.”+ တဘျီဃီန့ၣ်​ စီၤအဃၤစယၤ တဲဝဲလၢ “အကဲဝဲ ပှၤတံးၡဘးဖိ စီၤအ့ၤလံယၤလီၤ.”

၉ ဒီးစီၤပၤဆှၢလီၤဝဲ ပှၤ ၅၀ အခိၣ်​ ဒီးအသုးဖိအဂၤ ၅၀ လၢစီၤအ့ၤလံယၤ အအိၣ်လီၤ. ဒီးပှၤ ၅၀ အခိၣ်တဂၤန့ၣ်​ လဲၤထီၣ်ဝဲလၢ ကစၢၢ်ဒီခိၣ်လၢ စီၤအ့ၤလံယၤ ဆ့ၣ်နီၤဝဲန့ၣ်လီၤ. ဒီးအဝဲတဲ စီၤအ့ၤလံယၤလၢ “ယွၤလၢ အမ့ၢ်အတီအပှၤဧၢ,+ စီၤပၤတဲဝဲလၢ ‘ဟဲက့ၤလီၤတက့ၢ်.’” ၁၀ ဘၣ်ဆၣ်​ စီၤအ့ၤလံယၤ တဲဆၢက့ၤ ပှၤ ၅၀ အခိၣ်လၢ “ယမ့မ့ၢ် ယွၤအပှၤတဂၤန့ၣ်​ မ်မ့ၣ်အူလၢမူခိၣ်န့ၣ်​ ဟဲလီၤအီၣ်ကွံာ် နၤဒီးနပှၤသုးဖိ အဂၤ ၅၀ န့ၣ်တက့ၢ်.” ဒီးမ့ၣ်အူလၢမူခိၣ်န့ၣ်​ ဟဲလီၤအီၣ်ကွံာ်ဝဲ+ ပှၤ ၅၀ အခိၣ်​ ဒီးအပှၤသုးဖိ အဂၤ ၅၀ န့ၣ်လီၤ.

၁၁ ဒီးစီၤပၤဆှၢလီၤကဒီး ပှၤ ၅၀ အခိၣ်လၢအဂၤတဂၤ ဒီးအသုးဖိ အဂၤ ၅၀ လၢစီၤအ့ၤလံယၤ အအိၣ်လီၤ. ဒီးအဝဲလဲၤတဲဘၣ်​ စီၤအ့ၤလံယၤလၢ “ယွၤလၢ အမ့ၢ်အတီအပှၤဧၢ, စီၤပၤတဲဝဲလၢ ‘ဟဲက့ၤလီၤမ့ၢ်ချ့ဟီ.’” ၁၂ ဘၣ်ဆၣ်​ စီၤအ့ၤလံယၤ တဲဆၢက့ၤ အဝဲသ့ၣ်လၢ “ယမ့မ့ၢ် ယွၤလၢ အမ့ၢ်အတီအပှၤန့ၣ်​ မ်မ့ၣ်အူလၢမူခိၣ်န့ၣ်​ ဟဲလီၤအီၣ်ကွံာ် နၤဒီးနပှၤသုးဖိ အဂၤ ၅၀ န့ၣ်တက့ၢ်.” ဒီးကစၢ်ယွၤအမ့ၣ်အူလၢမူခိၣ်န့ၣ်​ ဟဲလီၤအီၣ်ကွံာ်ဝဲ ပှၤ ၅၀ အခိၣ်​ ဒီးအပှၤသုးဖိ အဂၤ ၅၀ န့ၣ်လီၤ.

၁၃ ဝံၤဒီး စီၤပၤဆှၢလီၤ ပှၤ ၅၀ အခိၣ်သၢဂၤတဂၤ ဒီးအသုးဖိအဂၤ ၅၀ လီၤ. ဘၣ်ဆၣ်​ ပှၤ ၅၀ အခိၣ်​ သၢဂၤတဂၤန့ၣ်​ လဲၤထီၣ်ချံးလီၤအခီၣ်လၢ စီၤအ့ၤလံယၤ အမဲာ်ညါ ဒီးဃ့ကညးအီၤလၢ “ယွၤလၢ အမ့ၢ်အတီ အပှၤဧၢ, ဝံသးစူၤ မ်ယသးသမူ ဒီးယသုးဖိ အဂၤ ၅၀* အသးသမူ မ့ၢ်တၢ်လၢ အလုၢ်ဒိၣ်ပှ့ၤဒိၣ်လၢ နမဲာ်ညါတက့ၢ်. ၁၄ ပှၤ ၅၀ အခိၣ်ခံဂၤ ဒီးအသုးဖိ အဂၤ ၅၀ လၢညါခံဒူၣ်န့ၣ်​ မ့ၣ်အူလၢ မူခိၣ်​ ဟဲလီၤအီၣ်ကွံာ် အဝဲသ့ၣ်လံ. ဘၣ်ဆၣ်​ ခဲအံၤ ဝံသးစူၤ မ်ယသးသမူ မ့ၢ်တၢ်လၢ အလုၢ်ဒိၣ်ပှ့ၤဒိၣ်လၢ နမဲာ်ညါတက့ၢ်.”

၁၅ ဒီးယဟိဝၤယွၤ အမူခိၣ်ကလူး တဲဘၣ်​ စီၤအ့ၤလံယၤလၢ “လဲၤလီၤဒီးအီၤ, တဘၣ်ပျံၤအီၤတဂ့ၤ.” အဃိ စီၤအ့ၤလံယၤ ဂဲၤဆၢထၢၣ်ဒီး လဲၤလီၤဒီးအီၤလၢ စီၤပၤ အအိၣ်လီၤ. ၁၆ ဒီးစီၤအ့ၤလံယၤ တဲဘၣ်စီၤပၤလၢ “ယဟိဝၤယွၤ တဲဝဲဒ်အံၤ, ‘နဆှၢလီၤ ပှၤစိာ်တၢ်ကစီၣ်ဖိတဖၣ်​ ဒ်သိးကသံကွၢ်တၢ်လၢ ဧ့ကြိၣ်အယွၤ+ ဘဧၤလးစဘူာ် အအိၣ်န့ၣ်​ မ့ၢ်ကစၢ်ယွၤလၢ အံၣ်စရ့လးအပူၤ တအိၣ်ဘၣ်ဟီဧါ.+ ဘၣ်မနုၤအဃိ နတသံကွၢ်တၢ်လၢ ကစၢ်ယွၤ အအိၣ်ဘၣ်လဲၣ်. ခီဖျိလၢ နမၤဒ်န့ၣ်အဃိ နတဟးထီၣ်ဘၣ်လၢ လီၢ်မံခိၣ်လၢ နမံနီၤလၢအလိၤန့ၣ်ဘၣ်. နကသံသပှၢ်တၢၢ်လီၤ.’” ၁၇ အဃိ ဒ်ယဟိဝၤယွၤ တဲပာ်စၢၤဝဲ ခီဖျိ စီၤအ့ၤလံယၤအသိး စီၤအဃၤစယၤ သံဝဲလီၤ. ဒီးမ့ၢ်လၢ စီၤအဃၤစယၤ အဖိခွါ တအိၣ်နီတဂၤဘၣ်အဃိ စီၤယဟိရၣ်*+ ထီၣ်စီၤပၤလၢအလီၢ် ဖဲယူဒၤအစီၤပၤ စီၤယဟိၡၤဖး အဖိခွါ စီၤယဟိရၣ်​ ပၢတၢ်ခံနံၣ်တနံၣ်လီၤ.+

၁၈ ဒီးမ့မ့ၢ် စီၤအဃၤစယၤ+ အဂ့ၢ်လၢအဂၤတဖၣ်​ ဒီးတၢ်လၢအမၤဝဲတဖၣ်န့ၣ်​ ဘၣ်တၢ်ကွဲးလီၤအီၤလၢ အံၣ်စရ့လး အစီၤပၤ တၢ်စံၣ်စိၤတဲစိၤ အလံာ်ပူၤလီၤ.