၂ စီၤပၤ
၁၁ ဖဲစီၤအဃၤစယၤ အမိၢ် နီၢ်ဧသၤလယၤ+ သ့ၣ်ညါဝဲလၢ အဖိခွါ သံလံအခါ+ အဝဲမၤဟးဂီၤကွံာ် စီၤပၤအစၢၤအသွဲၣ် ခဲလၢာ်လီၤ.+ ၂ ဘၣ်ဆၣ် စီၤယဟိရၣ် အဖိမုၣ် နီၢ်ယဟိၡ့ဘၤ လၢအမ့ၢ် စီၤအဃၤစယၤ အဒီပုၢ်ဝဲၢ်မုၣ် တဂၤန့ၣ် မၤပူၤဖျဲး စီၤအဃၤစယၤ အဖိခွါ စီၤယိၤအၣ်+ လၢစီၤပၤ အဖိခွါတဖၣ်လၢ အဘၣ်တၢ်မၤသံ အဝဲသ့ၣ် အကျါန့ၣ်လီၤ. နီၢ်ယဟိၤၡ့ဘၤ ကရီဟံးန့ၢ်ကွံာ် စီၤယိၤအၣ် ဒီးပာ်အီၤဒီး ပိာ်မုၣ်လၢ အဒုးအီအီၤနုၢ်တဂၤလၢ ဒၢးတဖျၢၣ်လၢ ဟံၣ်လီၢ်ခံလီၤ. အဃိ အဝဲသ့ၣ်ပာ်ခူသူၣ်အီၤ ဒ်သိးကပူၤဖျဲး လၢနီၢ်ဧသၤလယၤ အအိၣ် ဒီးစီၤယိၤအၣ် တသံဘၣ်. ၃ ဖဲနီၢ်ဧသၤလယၤ ပၢဝဲကီၢ်အခါ စီၤယိၤအၣ် အိၣ်ဒီးပိာ်မုၣ်လၢ အဒုးအီအီၤနုၢ်တဂၤန့ၣ် ဃုနံၣ် ဒီးအဝဲသ့ၣ် အိၣ်ခူသူၣ်ဝဲလၢ ယဟိဝၤယွၤ အဟံၣ်လီၤ.
၄ ဘၣ်ဆၣ် ဖဲနွံနံၣ်တနံၣ်န့ၣ် စီၤယဟိၤယဒါ မၢပှၤလဲၤကိးန့ၢ်အီၤ ပှၤအကယၤ အခိၣ်တဖၣ်လၢ အအိၣ်ဝဲလၢ ပှၤခိးတၢ်ဖိလီၤဆီ* ဒီးပှၤပၢၤနီတဖၣ် အဖီခိၣ်လီၤ.+ အဃိ ပှၤတဖၣ်န့ၣ် လဲၤဝဲလၢ အအိၣ် ဖဲယဟိဝၤယွၤ အဟံၣ်လီၤ. ဒီးအဝဲမၤ တၢ်အၢၣ်လီၤ ဒီးအဝဲသ့ၣ် ဒီးအဝဲမၢ အဝဲသ့ၣ် အၢၣ်လီၤထွဲဝဲဖဲ ယဟိဝၤယွၤအဟံၣ် ဝံၤဒီး အဝဲဒုးနဲၣ် အဝဲသ့ၣ်လၢ စီၤပၤအဖိခွါလီၤ.+ ၅ စီၤယဟိၤယဒါ မၤလိာ် အဝဲသ့ၣ်လၢ “သုကဘၣ်မၤဒ်အံၤ, သုဝဲသၢပူတပူန့ၣ် ကအိၣ်ဒီးမူဒါ ဖဲမုၢ်အိၣ်ဘှံးနံၤ ဒီးကဘၣ်ခိးကွၢ် စီၤပၤအဟံၣ် လီၤတံၢ်လီၤဆဲးလီၤ.+ ၆ ဒီးသုဝဲလၢအဂၤ သၢပူတပူန့ၣ် ကဘၣ်အိၣ်လၢ တၢ်သူၣ်ထီၣ်အခီၣ်ထံး အတြဲၤတဘ့ၣ် ဒီးသုဝဲလၢအဂၤ သၢပူတပူန့ၣ် ကဘၣ်အိၣ်လၢ တြဲၤလၢအအိၣ်လၢ ပှၤပၢၤနီတဖၣ် အလီၢ်ခံန့ၣ်လီၤ. သုကဘၣ်ခိးကွၢ် တၢ်လုၢ်ဟံၣ် တဒူၣ်တကလဲးလီၤ. ၇ မ့မ့ၢ် သုဝဲခံကရူၢ် လၢအတညီနုၢ် အိၣ်ဒီးမူဒါ ဖဲမုၢ်အိၣ်ဘှံးနံၤဘၣ်န့ၣ် ကဘၣ်ခိးကွၢ် ယဟိဝၤယွၤအဟံၣ် လီၤတံၢ်လီၤဆဲး ဒ်သိးကဒီသဒၢ စီၤပၤအဂီၢ်န့ၣ်လီၤ. ၈ သုကဘၣ်အိၣ်ဝးတရံး စီၤပၤ ဒီးသုဝဲတဂၤစုာ်စုာ် ကဘၣ်စိာ်ဒီး တၢ်စုကဝဲၤတဖၣ်လီၤ. ပှၤတဂၤဂ့ၤ တဂၤဂ့ၤလၢ အဂုာ်ကျဲးစၢး ဟဲနုာ်လီၤတလၢ သုးဖိလၢအအိၣ်ရဲၣ်လီၤအသးတဖၣ်န့ၣ် ကဘၣ်တၢ်မၤသံအီၤလီၤ. စီၤပၤမ့ၢ်လဲၤ ဖဲလဲၣ်ဂ့ၤ ဖဲလဲၣ်ဂ့ၤန့ၣ် လဲၤဒီးအီၤတက့ၢ်.”
၉ ဒီးပှၤအကယၤ အခိၣ်တဖၣ်+ မၤဝဲဒ် ပှၤလုၢ်တၢ်ဒိၣ် စီၤယဟိၤယဒါ မၤလိာ်ဝဲအသိးလီၤ. အဃိ အဝဲသ့ၣ် တဂၤစုာ်စုာ် ကိးထီၣ်ဝဲ အပှၤလၢ အအိၣ်ဒီးမူဒါ ဖဲမုၢ်အိၣ်ဘှံးနံၤ ဃုာ်ဒီး အပှၤလၢအတအိၣ်ဒီးမူဒါ ဖဲမုၢ်အိၣ်ဘှံးနံၤဘၣ် ဒီးအဝဲသ့ၣ်လဲၤလၢ ပှၤလုၢ်တၢ်ဒိၣ် စီၤယဟိၤယဒါ အအိၣ်လီၤ.+ ၁၀ ပှၤလုၢ်တၢ်ဒိၣ် ဟ့ၣ်လီၤဝဲ ပှၤအကယၤ အခိၣ်တဖၣ်လၢ စီၤပၤဒၤဝံး အဘီတဖၣ် ဒီးအကတီၤတဖၣ် လၢအအိၣ်လၢ ယဟိဝၤယွၤ အဟံၣ်ပူၤန့ၣ်လီၤ. ၁၁ ဒီးပှၤပၢၤနီတဖၣ်+ ဆီလီၤအသး ဝးတရံးဝဲ စီၤပၤ စးထီၣ်လၢ ဟံၣ်အထွဲတကပၤ တုၤလၢ ဟံၣ်အစ့ၣ်တကပၤ လၢတၢ်လုၢ်လီၢ်+ ဒီးဟံၣ်အဃၢၤန့ၣ်လီၤ. ဒီးအဝဲသ့ၣ် တဂၤစုာ်စုာ်န့ၣ် စိာ်ဒီး တၢ်စုကဝဲၤလီၤ. ၁၂ ဒီးစီၤယဟိၤယဒါ ဟဲကိးထီၣ် စီၤပၤအဖိခွါ+ ဒီးပာ်ထီၣ် ခိၣ်သလုး ဒီးတၢ်အၢၣ်လီၤအီလီၤအလံာ်*+ လၢအခိၣ်လိၤ ဒီးအဝဲသ့ၣ် ပာ်ထီၣ်အီၤလၢ စီၤပၤ ဒီးဒိးဖှူအီၤလီၤ. အဝဲသ့ၣ်ဒဲစု ဒီးတဲဝဲလၢ “မ်စီၤပၤအိၣ်မူဘၣ် ယံာ်ယံာ်တက့ၢ်.”+
၁၃ ဖဲနီၢ်ဧသၤလယၤ နၢ်ဟူဝဲလၢ ပှၤဂီၢ်မုၢ်ဃ့ၢ်သီၣ်အခါ အဝဲလဲၤလၢ ပှၤဂီၢ်မုၢ်အအိၣ်လၢ ယဟိဝၤယွၤ အဟံၣ်တဘျီဃီလီၤ.+ ၁၄ ဒီးအဝဲထံၣ်စီၤပၤ ဆၢထၢၣ်ဖဲန့ၣ် ဘူးဒီးတၢ်အထူၣ် ဒ်လုၢ်လၢ်အိၣ်ဝဲအသိးလီၤ.+ ပှၤခိၣ်ပှၤနၢ်တဖၣ် ဒီးပှၤအူကွဲၤတဖၣ်+ အိၣ်ဒီးစီၤပၤ ဒီးပှၤထံဖိကီၢ်ဖိတဖၣ် သူၣ်ဖှံသးညီဒီး အူထီၣ်ဝဲကွဲၤလီၤ. အဃိ နီၢ်ဧသၤလယၤ ဖှီညာ်အဆ့ကၤ ဒီးကိးပသူထီၣ်ဝဲလၢ “ပှၤကူၣ်ခူသူၣ်တၢ်လံ, ပှၤကူၣ်ခူသူၣ်တၢ်လံ.” ၁၅ ဘၣ်ဆၣ် ပှၤလုၢ်တၢ်ဒိၣ် စီၤယဟိၤယဒါ တဲပာ်စၢၤဝဲလၢ “တဘၣ်မၤသံအီၤလၢ ယဟိဝၤယွၤ အဟံၣ်ပူၤတဂ့ၤ.” အဃိ အဝဲမၤလိာ်ဝဲ ပှၤအကယၤ အခိၣ်တဖၣ်လၢ+ အအိၣ်ဝဲလၢ သုးမုၢ်အဖီခိၣ်လၢ “ဒုးဟးထီၣ်အီၤလၢ သုးဖိလၢအအိၣ်ရဲၣ်လီၤအသးတဖၣ် အအိၣ် ဒီးပှၤတဂၤဂ့ၤ တဂၤဂ့ၤ မ့ၢ်ပိာ်ထီၣ်အခံန့ၣ် မၤသံအီၤလၢနးတက့ၢ်.” ၁၆ ဒီးအဝဲသ့ၣ် ဖီၣ်န့ၢ်အီၤ ဒီးလဲၤကိးအီၤတုၤလၢ တၢ်လီၢ်လၢ ကသ့ၣ်တဖၣ်နုာ်လီၤလၢ စီၤပၤအနီပူၤ+ ဒီးမၤသံကွံာ်အီၤဖဲန့ၣ်လီၤ.
၁၇ ဒီးစီၤယဟိၤယဒါ ဒုးအိၣ်ထီၣ် တၢ်အၢၣ်လီၤအီလီၤ လၢယဟိဝၤယွၤ ဒီးစီၤပၤ ဒီးပှၤဂီၢ်မုၢ်အဘၢၣ်စၢၤ+ လၢအဝဲသ့ၣ် ကဆဲးကဲဝဲ ယဟိဝၤယွၤ အပှၤဂီၢ်မုၢ်န့ၣ်လီၤ. ဒီးအဝဲဒုးအိၣ်ထီၣ်စ့ၢ်ကီး တၢ်အၢၣ်လီၤအီလီၤလၢ စီၤပၤဒီးပှၤဂီၢ်မုၢ် အဘၢၣ်စၢၤလီၤ.+ ၁၈ ဝံၤဒီး ပှၤထံဖိကီၢ်ဖိခဲလၢာ် လဲၤလၢ ဘဧၤလးအဟံၣ်,* မၤလီၤပှီၢ်ကွံာ် ဘဧၤလး အတၢ်လုၢ်လီၢ်တဖၣ်,+ မၤသဘှံးဝဲ ဘဧၤလး အတၢ်ဂီၤတၢ်ဖှီၣ်တဖၣ်+ ဒီးမၤသံကွံာ်ဝဲ စီၤမးတၣ် လၢအမ့ၢ် ဘဧၤလး အပှၤလုၢ်တၢ်ဒိၣ်+ လၢတၢ်လုၢ်လီၢ်တဖၣ် အမဲာ်ညါလီၤ.
ဒီးပှၤလုၢ်တၢ်ဒိၣ် ပာ်ထီၣ်ဝဲ ပှၤကွၢ်ထွဲတၢ်တဖၣ်လၢ အကတီခိၣ်ရိၤမဲတၢ်လၢ ယဟိဝၤယွၤအဟံၣ်န့ၣ်လီၤ.+ ၁၉ တကးဒံးဘၣ် အဝဲလဲၤကိးဃုာ်ဒီး ပှၤအကယၤ အခိၣ်တဖၣ်,+ ပှၤခိးတၢ်ဖိလီၤဆီ, ပှၤပၢၤနီတဖၣ်+ ဒီးပှၤထံဖိကီၢ်ဖိခဲလၢာ် ဒီးအဝဲသ့ၣ် လဲၤဆှၢ စီၤပၤလၢ အအိၣ်လၢ ယဟိဝၤယွၤအဟံၣ် ဆူစီၤပၤအနီပူၤလီၤ. ဒီးစီၤယိၤအၣ် လဲၤနုာ်လီၤဝဲ ခီဖျိလၢ ပှၤပၢၤနီအတြဲၤလီၤ. ဝံၤဒီးအဝဲ ဆ့ၣ်နီၤလၢ စီၤပၤတဖၣ် အလီၢ်ပစိာ် အဖီခိၣ်လီၤ.+ ၂၀ ဒီးလၢစီၤပၤအနီန့ၣ် ပှၤဂီၢ်မုၢ် မၤသံကွံာ် နီၢ်ဧသၤလယၤ လၢနးလံ အဃိ ပှၤထံဖိကီၢ်ဖိခဲလၢာ် သူၣ်ခုသးခု ဒီးဝ့ၢ်ပူၤန့ၣ် အိၣ်ဝဲဒီး တၢ်မုာ်တၢ်ခုၣ်လီၤ.