၂ စီၤပၤ

၁၄ ဖဲစီၤယဟိအါဃး အဖိခွါ လၢအမ့ၢ် အံၣ်စရ့လး အစီၤပၤ စီၤယိၤအၣ်+ ပၢတၢ် ခံနံၣ်တနံၣ်န့ၣ်​ ယူဒၤအစီၤပၤယိၤအၣ်​ အဖိခွါ စီၤအမၤစယါ ကဲထီၣ်စီၤပၤလီၤ. ၂ ဖဲစီၤအမၤစယါ ကဲထီၣ်​ စီၤပၤအခါ အသးနံၣ်အိၣ်ဝဲ ၂၅ နံၣ်​ ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၂၉ နံၣ်လီၤ. ဒီးအမိၢ်မ့ၢ်ဝဲ နီၢ်ယဟိဧဒံၣ်​ လၢအအိၣ်လၢ ဝ့ၢ်ယရူၤၡလ့ၣ်လီၤ.+ ၃ စီၤအမၤစယါ ဆဲးမၤတၢ်လၢ ယဟိဝၤယွၤ ထံၣ်ဝဲလၢအဂ့ၤ ဘၣ်ဆၣ်​ တမၤဝဲ ဒ်သိးဒီး အဖုဖးဒိၣ်​ စီၤဒၤဝံးဘၣ်.+ အဝဲမၤတၢ်ဒ် အပၢ်စီၤယိၤအၣ်​ မၤတ့ၢ်ဝဲအသိး ကိးမံၤဒဲးလီၤ.+ ၄ ဘၣ်ဆၣ်​ တၢ်လီၢ်ထီၣ်ထီတဖၣ်​ အိၣ်ဒံးဝဲလီၤ.+ ဒီးပှၤဂီၢ်မုၢ်တဖၣ်​ ဆဲးလုၢ်ထီၣ်ဒံးတၢ် ဒီးဒွဲၣ်ခုၣ်ထီၣ်တၢ်လုၢ် လၢတၢ်လီၢ်ထီၣ်ထီတဖၣ်​ အဖီခိၣ်လီၤ.+ ၅ ဖဲဘီမုၢ် အိၣ်ဂၢၢ်ကျၢၤဝဲလၢ အစုပူၤအခါ အဝဲမၤသံကွံာ်ဝဲ အခ့အပှၤတဖၣ်​ လၢအမၤသံတ့ၢ်ဝဲ အပၢ်လၢအမ့ၢ် စီၤပၤန့ၣ်လီၤ.+ ၆ ဘၣ်ဆၣ်​ အဝဲတမၤသံ ပှၤမၤသံတၢ်တဖၣ်န့ၣ်​ အဖိခွါတဖၣ်ဘၣ်. လၢတၢ်န့ၣ်အလီၢ် အဝဲမၤထွဲ ယဟိဝၤယွၤ အတၢ်မၤလိာ်လၢ အကွဲးအသးလၢ စီၤမိၤၡ့ အတၢ်သိၣ်တၢ်သီ အပူၤန့ၣ်လီၤ. တၢ်မၤလိာ်အံၤ တဲဝဲလၢ “ပၢ်တဖၣ်​ တကြၢးဘၣ်တၢ်မၤသံ အဝဲသ့ၣ်လၢ အဖိခွါတဖၣ်အဃိဘၣ်​ ဒီးဖိခွါတဖၣ်​ တကြၢးဘၣ်တၢ်မၤသံ အဝဲသ့ၣ်လၢ အပၢ်တဖၣ်အဃိဘၣ်. ပှၤတဂၤစုာ်စုာ် ကြၢးသံလၢ အနီၢ်ကစၢ် အတၢ်ဒဲးဘးအဃိလီၤ.”+ ၇ စီၤအမၤစယါ မၤသံဝဲ ပှၤအဒိၣ်ဖိ+ အဂၤ ၁၀,၀၀၀ လၢအံသၣ်အတၢ်တြီၤပူၤ+ ဒီးအဝဲမၤန့ၢ်ဝဲ ဝ့ၢ်စ့လၤလၢ တၢ်ဒုးပူၤလီၤ.+ ဒီးဝ့ၢ်န့ၣ်​ ဘၣ်တၢ်ကိးက့ၤအီၤလၢ ယိးကသ့လး တုၤလၢမုၢ်မဆါတနံၤအံၤလီၤ.

၈ ဒီးစီၤအမၤစယါ ဆှၢလီၤ ပှၤစိာ်တၢ်ကစီၣ်ဖိတဖၣ်လၢ အံၣ်စရ့လး အစီၤပၤယဟိအါဃး အဖိခွါ စီၤယိၤအၣ်​ အအိၣ်​ ဒီးတဲဝဲလၢ “ဟဲထီၣ်​ ဒီးပကဒုးလိာ်သးသၢၤ.”+ စီၤယဟိအါဃးန့ၣ်​ အပၢ်မ့ၢ်ဝဲ စီၤယ့ၤဟူလီၤ. ၉ ဒီးအံၣ်စရ့လး အစီၤပၤယိၤအၣ်​ ဆှၢလီၤအတၢ်စံးဆၢလၢ စီၤပၤအမၤစယါ အအိၣ်ဒ်လာ်အံၤအသိးလီၤ. “တၤဆှုၣ်တၤမဲလၢ လဘၤနိၣ်​ အကစၢၢ်ကလိကျါ ဆှၢလီၤတၢ်ကစီၣ်လၢ သ့ၣ်ဆှိအ့ရ့းတထူၣ်​ လၢလဘၤနိၣ်​ အကစၢၢ်ကလိကျါ ဒီးတဲအီၤလၢ ‘ဟ့ၣ်လီၤနဖိမုၣ်​ ဒ်သိးအကဖျီအသးဒီး ယဖိခွါအဂီၢ်တက့ၢ်.’ ဘၣ်ဆၣ်​ ဆၣ်ဖိကီၢ်ဖိ အမံၤတဒုလၢ လဘၤနိၣ်​ အကစၢၢ်ကလိကျါန့ၣ်​ ဟဲယီၢ်တံၢ်လီၤ တၤဆှုၣ်တၤမဲလီၤ. ၁၀ စီၤအမၤစယါဧၢ, နမၤနၢၤ ပှၤအဒိၣ်ဖိတဖၣ်+ အဃိ နပာ်ကဖၢလၢနသးလံ. သးခုလၢ နဒိးန့ၢ်ဘၣ်​ တၢ်လၤကပီၤအဃိ ဒီးဆဲးအိၣ်လၢ နနီၢ်ကစၢ်အဟံၣ်သၢၤ. ဘၣ်မနုၤအဃိ နအဲၣ်ဒိးဒုးအိၣ်ထီၣ်​ တၢ်နးတၢ်ဖှီၣ်​ ဒီးလီၤဃံၢ် ဒီးတွံၢ်လီၤ ယူဒၤအဘီအမုၢ် ဃုာ်ဒီးနၤလဲၣ်.” ၁၁ ဘၣ်ဆၣ်​ စီၤအမၤစယါ တဒိကနၣ်ဝဲဘၣ်.+

အဃိ အံၣ်စရ့လး အစီၤပၤယိၤအၣ်​ လဲၤထီၣ်သဂၢၢ်ဝဲ ယူဒၤအစီၤပၤအမၤစယါ လၢတၢ်ဒုးအပူၤ ဖဲဝ့ၢ်ဘ့ၤသၡ့မ့ၣ်+ လၢအအိၣ်လၢ ယူဒၤအဘီမုၢ် အတၢ်ပၢဖီလာ်န့ၣ်လီၤ.+ ၁၂ အံၣ်စရ့လး မၤနၢၤဝဲ ယူဒၤအဃိ ယူဒၤအသုးဖိ တဂၤစုာ်စုာ် က့ၤဃ့ၢ်ဝဲလၢ အဟံၣ်လီၤ.* ၁၃ အံၣ်စရ့လး အစီၤပၤယိၤအၣ်​ ဖီၣ်န့ၢ် ယူဒၤအစီၤပၤ အမၤစယါ ဖဲဝ့ၢ်ဘ့ၤသၡ့မ့ၣ်န့ၣ်လီၤ. စီၤပၤအမၤစယါ အပၢ်မ့ၢ်ဝဲ စီၤယိၤအၣ်​ ဒီးစီၤယိၤအၣ်​ အပၢ်မ့ၢ်ဝဲ စီၤအဃၤစယၤလီၤ. ဝံၤဒီးစီၤပၤယိၤအၣ်​ လဲၤကိးအီၤလၢ ဝ့ၢ်ယရူၤၡလ့ၣ်​ ဒီးစီၤယိၤအၣ်​ မၤလီၤပှီၢ် ယရူၤၡလ့ၣ်​ အဝ့ၢ်ဒူၣ်​ စးထီၣ်လၢ အ့ဖရဲၣ်အတြဲၤ+ တုၤလၢ တၢ်အသနၢၣ်အတြဲၤ+ လၢအဒ့ၣ်စၢၤယံၤဝဲ အပျၢ် ၄၀၀ လီၤ.* ၁၄ ဒီးစီၤယိၤအၣ်​ ဟံးန့ၢ်ဝဲ ထူ, စ့ညၣ်​ ဒီးတၢ်ဖိတၢ်လံၤ ခဲလၢာ်လၢ အအိၣ်လၢ ယဟိဝၤယွၤ အဟံၣ်ပူၤ ဒီးလၢတၢ်လုၢ်ဒိၣ်ပှ့ၤဒိၣ်​ အလီၢ်လၢ စီၤပၤ အဟံၣ်ပူၤ ဒီးဖီၣ်န့ၢ်ပှၤတနီၤ ဒီးက့ၤကဒါက့ၤလၢ ဝ့ၢ်ၡၤမရံလီၤ.

၁၅ မ့မ့ၢ် စီၤယိၤအၣ်​ အဂ့ၢ်လၢအဂၤတဖၣ်, တၢ်လၢအမၤတ့ၢ်ဝဲ, အတၢ်မၤလၢ အဒိၣ်အမုၢ် ဒီးအဝဲဒုး ယူဒၤအစီၤပၤအမၤစယါ ဒ်လဲၣ်အဂ့ၢ်န့ၣ်​ ဘၣ်တၢ်ကွဲးလီၤအီၤလၢ အံၣ်စရ့လးအစီၤပၤ တၢ်စံၣ်စိၤတဲစိၤ အလံာ်ပူၤလီၤ. ၁၆ ဒီးစီၤယိၤအၣ်​ သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး ဒီးပှၤခူၣ်လီၤကွံာ်အီၤလၢ ဝ့ၢ်ၡၤမရံအပူၤ+ တပူၤဃီဒီး အံၣ်စရ့လး အစီၤပၤတဖၣ်လီၤ. ဒီးအဖိခွါ စီၤယၤရၤဘၣ်*+ ကဲထီၣ်စီၤပၤလၢ အလီၢ်လီၤ.

၁၇ အံၣ်စရ့လး အစီၤပၤယဟိအါဃး+ အဖိခွါ စီၤယိၤအၣ်+ သံဝံၤအလီၢ်ခံ ယူဒၤအစီၤပၤယိၤအၣ်​ အဖိခွါ စီၤအမၤစယါ+ ဆဲးအိၣ်မူဒံးဝဲ ၁၅ နံၣ်လီၤ. ၁၈ မ့မ့ၢ် စီၤအမၤစယါ အဂ့ၢ်လၢအဂၤတဖၣ်န့ၣ်​ ဘၣ်တၢ်ကွဲးလီၤအီၤလၢ ယူဒၤအစီၤပၤ တၢ်စံၣ်စိၤတဲစိၤ အလံာ်ပူၤလီၤ. ၁၉ လၢခံ ပှၤကူၣ်အၢ+ စီၤအမၤစယါ လၢဝ့ၢ်ယရူၤၡလ့ၣ်​ ဒီးအဝဲလဲၤဃ့ၢ်လၢ ဝ့ၢ်လၤကံၣ်လီၤ. ဘၣ်ဆၣ်​ ပှၤကူၣ်အၢတၢ်တဖၣ်​ ဆှၢလီၤ ပှၤပိာ်ခွါတဖၣ်လၢ ဝ့ၢ်လၤကံၣ်​ ဒီးအဝဲသ့ၣ်​ လဲၤလူၤအီၤဒီး မၤသံကွံာ်အီၤဖဲန့ၣ်လီၤ. ၂၀ ဒီးအဝဲသ့ၣ်​ ဟဲက့ၤတီၣ်​ စီၤအမၤစယါအစိၣ်လၢ ကသ့ၣ်တဖၣ်အလိၤ ဒီးပှၤခူၣ်လီၤကွံာ်အီၤလၢ ဝ့ၢ်ယရူၤၡလ့ၣ်အပူၤ တပူၤဃီဒီး အမိၢ်ပၢ်ဖံဖု လၢပျၢၤတဖၣ်​ လၢစီၤဒၤဝံး အဝ့ၢ်ပူၤလီၤ.+ ၂၁ လၢခံ ပှၤဂီၢ်မုၢ်ခဲလၢာ်လၢ ယူဒၤဘီမုၢ်အပူၤန့ၣ်​ ပာ်ထီၣ်ဝဲ စီၤဧစၤရယၤ*+ လၢစီၤပၤ လၢအပၢ် စီၤအမၤစယါ+ အလီၢ်န့ၣ်လီၤ. ဖဲန့ၣ်အခါ စီၤဧစၤရယၤ အသးနံၣ်အိၣ်ဝဲ ၁၆ နံၣ်လီၤ.+ ၂၂ ဖဲစီၤပၤ အမၤစယါ သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး+ ဝံၤအလီၢ်ခံ စီၤဧစၤရယၤ မၤန့ၢ်က့ၤ ဝ့ၢ်အ့လး+ လၢယူဒၤဘီမုၢ်အဂီၢ် ဒီးတ့ထီၣ်ကဒါက့ၤဝဲလီၤ.

၂၃ ဖဲယူဒၤ အစီၤပၤ စီၤယိၤအၣ်​ အဖိခွါ စီၤအမၤစယါ ပၢတၢ် ၁၅ နံၣ်တနံၣ်န့ၣ်​ အံၣ်စရ့လး အစီၤပၤယိၤအၣ်​ အဖိခွါ စီၤယၤရၤဘၣ်+ ကဲထီၣ်စီၤပၤလၢ ဝ့ၢ်ၡၤမရံအပူၤ ဒီးအဝဲပၢဘၣ်တၢ် ၄၁ နံၣ်လီၤ. ၂၄ ဒီးစီၤယၤရၤဘၣ်* ဆဲးမၤ တၢ်လၢယဟိဝၤယွၤ ထံၣ်ဝဲလၢ အအၢလီၤ. ကယဲၢ်တၢ်ဒဲးဘးလၢ စီၤနဘးအဖိခွါ စီၤယၤရၤဘၣ်​ ဆီၣ်ထွဲဝဲ ပှၤအံၣ်စရ့လးဖိလၢ ကမၤဝဲန့ၣ်​ စီၤယၤရၤဘၣ်​ တပာ်တ့ၢ်ကွံာ်အီၤ နီတမံၤဘၣ်.+ ၂၅ အဝဲမၤန့ၢ်က့ၤ အံၣ်စရ့လး အကီၢ်ဆၢ ဒ်အအိၣ်လၢ အခီၣ်ထံးအသိး, စးထီၣ်လၢ လံၤဘိၤဃမါသး+ ပၢၢ်တုၤလၢ ဧၤရဘၤ+ အပီၣ်လဲၣ်​ ဒ်အံၣ်စရ့လး အကစၢ်ယဟိဝၤယွၤ တဲဝဲခီဖျိလၢ အခ့အပှၤ ဝံယိၤနါန့ၣ်လီၤ. ဝံယိၤနါန့ၣ်+ အဟဲလၢ ဝ့ၢ်ကၤသးဃ့ဖ့ၢ်+ ဒီးအမ့ၢ်ဝဲ စီၤအမံးတဲၤ အဖိခွါလီၤ. ၂၆ ယဟိဝၤယွၤ ထံၣ်ဘၣ်ဝဲလၢ ပှၤအံၣ်စရ့လးဖိ ဘၣ်နးဘၣ်ဖှီၣ်ဒိၣ်မးလီၤ.+ ဒီးပှၤလၢအကမၤစၢၤ ပှၤအံၣ်စရ့လးဖိန့ၣ်​ တအိၣ်နီတဂၤဘၣ်, ပှၤလၢအပတီၢ်ဖုၣ်ကတၢၢ် ဒီးလၢအဂံၢ်စၢ်တဖၣ်ဒၣ်လဲာ် တအိၣ်ဘၣ်. ၂၇ ဘၣ်ဆၣ်​ ယဟိဝၤယွၤ အၢၣ်လီၤပာ်စၢၤဝဲလၢ အတမၤလီၤမၢ်ကွံာ် အံၣ်စရ့လး အမံၤ လၢဟီၣ်ခိၣ်ချၢဘၣ်.+ အဃိ အဝဲမၤပူၤဖျဲး ပှၤအံၣ်စရ့လးဖိ ခီဖျိလၢ စီၤယိၤအၣ်​ အဖိခွါ စီၤယၤရၤဘၣ်လီၤ.+

၂၈ မ့မ့ၢ် စီၤယၤရၤဘၣ်​ အဂ့ၢ်လၢအဂၤတဖၣ်, တၢ်လၢအမၤတ့ၢ်ဝဲခဲလၢာ်, အတၢ်မၤလၢ အဒိၣ်အမုၢ်, အဝဲဒုးတၢ်ဒ်လဲၣ်​ ဒီးအဝဲမၤန့ၢ်က့ၤ ဝ့ၢ်ဒၤမ့ၤစ့း+ ဒီးဝ့ၢ်ဃမါသး+ လၢယူဒၤဒီးအံၣ်စရ့လးအဂီၢ် ဒ်လဲၣ်အဂ့ၢ်န့ၣ်​ ဘၣ်တၢ်ကွဲးလီၤအီၤလၢ အံၣ်စရ့လး အစီၤပၤ တၢ်စံၣ်စိၤတဲစိၤ အလံာ်ပူၤလီၤ. ၂၉ ဒီး စီၤယၤရၤဘၣ်​ သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး ဒီးပှၤခူၣ်လီၤကွံာ်အီၤ တပူၤဃီဒီး အံၣ်စရ့လး အစီၤပၤတဖၣ်လီၤ. ဒီးအဖိခွါ စီၤစကၤရယၤ+ ကဲထီၣ်စီၤပၤလၢ အလီၢ်လီၤ.