၂ စီၤပၤ

၁၈ ဖဲစီၤအ့လၤ အဖိခွါလၢအမ့ၢ် အံၣ်စရ့လး အစီၤပၤဟိၤၡ့+ ပၢတၢ် သၢနံၣ်တနံၣ်န့ၣ်​ ယူဒၤဘီမုၢ် အစီၤပၤအၤဃး+ အဖိခွါ စီၤဃံးစကံယၤ+ ကဲထီၣ်​ စီၤပၤလီၤ. ၂ ဖဲစီၤဃံးစကံယၤ ကဲထီၣ်စီၤပၤအခါ အသးနံၣ်အိၣ်ဝဲ ၂၅ နံၣ်​ ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၂၉ နံၣ်လီၤ. စီၤဃံးစကံယၤ အမိၢ်မ့ၢ်ဝဲ နီၢ်အဘံယၤ လၢအမ့ၢ် စီၤစကၤရယၤ အဖိမုၣ်န့ၣ်လီၤ.+ ၃ စီၤဃံးစကံယၤ ဆဲးမၤတၢ်လၢ ယဟိဝၤယွၤ ထံၣ်ဝဲလၢအဂ့ၤ+ ဒ်အဖုဖးဒိၣ်​ စီၤဒၤဝံး မၤတ့ၢ်ဝဲ အသိးလီၤ.+ ၄ စီၤဃံးစကံယၤ မ့ၢ်ပှၤလၢ အမၤလီၤမၢ်ကွံာ် တၢ်လီၢ်ထီၣ်ထီတဖၣ်,+ မၤကၢ်လီၤကွံာ် လၢၢ်ထူၣ်စီဆှံတဖၣ်​ ဒီးမၤလီၤကူၢ်ကွံာ်ဝဲ တၢ်စီဆှံအထူၣ်လီၤ.*+ ဒီးဂုၢ်တိၢ်ဘီလၢ စီၤမိၤၡ့တ့ထီၣ်ဝဲန့ၣ်+ ခီဖျိလၢ ပှၤအံၣ်စရ့လးဖိ ဒွဲၣ်ခုၣ်ထီၣ်​ တၢ်လုၢ်လၢအအိၣ်​ တုၤလီၤလၢ ဆၢကတီၢ်ဖဲန့ၣ်​ ဒီးပှၤကိးဝဲလၢ တၢ်ဂီၤတၢ်ဖှီၣ်ဂုၢ်တိၢ်ဘီ* အဃိ စီၤဃံးစကံယၤ မၤကၢ်လီၤကလဲကွံာ် စ့ၢ်ကီးအီၤလီၤ. ၅ စီၤဃံးစကံယၤ နာ်န့ၢ် အံၣ်စရ့လး အကစၢ် ယဟိဝၤယွၤလီၤ.+ လၢယူဒၤဘီမုၢ် အစီၤပၤခဲလၢာ် အကျါန့ၣ်​ စီၤပၤလၢ အပၢတၢ်လၢ အမဲာ်ညါမ့ၢ်ဂ့ၤ အလီၢ်ခံမ့ၢ်ဂ့ၤ တဒ်သိးဒီးအီၤ နီတဂၤဘၣ်. ၆ အဝဲတီဒီး ယဟိဝၤယွၤဒီး+ ဒိကနၣ်အကလုၢ် ထီဘိလီၤ. အဝဲဆဲးမၤထွဲ ယဟိဝၤယွၤ အတၢ်မၤလိာ်တဖၣ်လၢ အဟ့ၣ်တ့ၢ် စီၤမိၤၡ့န့ၣ်လီၤ. ၇ ဒီးယဟိဝၤယွၤ အိၣ်ဒီးအီၤလီၤ. ဖဲအဝဲလဲၤ တပူၤဂ့ၤတပူၤဂ့ၤန့ၣ်​ အဝဲမၤတၢ်လၢ တၢ်ကူၣ်သ့အပူၤလီၤ. အဝဲထီဒါက့ၤ ကီၢ်အၤၡူၢ်အစီၤပၤ ဒီးတမၤအတၢ်ဘၣ်.+ ၈ အဝဲမၤနၢၤစ့ၢ်ကီး ပှၤဖလ့ၡသးဖိတဖၣ်လၢ+ တၢ်လီၢ်ကိးတီၤဒဲး စးထီၣ်လၢ တၢးထီခိးတၢ်အလီၢ် တုၤလီၤလၢ ဝ့ၢ်တဖၣ်လၢအအိၣ်ဒီး အဒူၣ်လၢအကျၢၤ* ပၣ်ဃုာ်ဒီး ဝ့ၢ်ဂါစၤ ဒီးအလီၢ်ကဝီၤတဖၣ်လီၤ.

၉ ဖဲစီၤပၤဃံးစကံယၤ ပၢတၢ်လွံၢ်နံၣ်တနံၣ်န့ၣ်​ ဘၣ်ဖဲစီၤအ့လၤ အဖိခွါ လၢအမ့ၢ် အံၣ်စရ့လး အစီၤပၤဟိၤၡ့+ ပၢတၢ် နွံနံၣ်တနံၣ်လီၤ. ဖဲန့ၣ်အခါ ကီၢ်အၤၡူၢ် အစီၤပၤၡၤလမၤန့စ့ၢ် ဟဲထီၣ်ကဝီၤဃာ် ဝ့ၢ်ၡၤမရံလီၤ.+ ၁၀ ဒီးဖဲအဝဲသ့ၣ်​ ကဝီၤဃာ်ဝ့ၢ်+ ဘူးကပှဲၤထီၣ်​ သၢနံၣ်န့ၣ်​ အဝဲသ့ၣ်မၤန့ၢ်ဝ့ၢ်လီၤ. ဝ့ၢ်ၡၤမရံ ဘၣ်တၢ်မၤန့ၢ်အီၤ ဖဲစီၤဃံးစကံယၤ ပၢတၢ်ဃုနံၣ်တနံၣ်​ ဒီးစီၤဟိၤၡ့ ပၢတၢ်ခွံနံၣ်တနံၣ်​ အခါလီၤ. ၁၁ ဒီးကီၢ်အၤၡူၢ်အစီၤပၤ က့ၤဖီၣ်ဝဲ ပှၤအံၣ်စရ့လးဖိ+ ဆူကီၢ်အၤၡူၢ် ဒီးဒုးအိၣ်အဝဲသ့ၣ်​ လၢဃၤလၤအပူၤ, လၢဝ့ၢ်ဃၤဘိၢ်အပူၤ ဘူးဒီးထံကျိကိစၣ်​ ဒီးလၢပှၤမၤဒဲဖိ အဝ့ၢ်တဖၣ်အပူၤလီၤ.+ ၁၂ တၢ်ကဲထီၣ်အသးဒ်အံၤန့ၣ်​ မ့ၢ်လၢ ပှၤအံၣ်စရ့လးဖိတဖၣ်​ တဒိကနၣ်​ အဝဲသ့ၣ်​ အကစၢ် ယဟိဝၤယွၤ အကလုၢ်ဘၣ်​ ဒီးအဝဲသ့ၣ်​ မၤဟးဂီၤဝဲ အတၢ်အၢၣ်လီၤအီလီၤ လၢအမ့ၢ် တၢ်ခဲလၢာ်လၢ ယဟိဝၤယွၤ အခ့အပှၤ စီၤမိၤၡ့ မၤလိာ်တ့ၢ်ဝဲန့ၣ်လီၤ.+ အဝဲသ့ၣ်​ တဒိကနၣ်ဝဲ ဒီးတမၤထွဲဝဲဘၣ်.

၁၃ ဖဲစီၤပၤဃံးစကံယၤ ပၢတၢ် ၁၄ နံၣ်တနံၣ်န့ၣ်​ ကီၢ်အၤၡူၢ်+ အစီၤပၤစၤနဃ့ရံာ် ဟဲထီၣ်ဒုးဝဲ ယူဒၤဘီမုၢ် အဝ့ၢ်လၢအအိၣ်ဒီး အဒူၣ်လၢအကျၢၤ ကိးဖျၢၣ်ဒဲး ဒီးမၤန့ၢ်ဝဲ ဝ့ၢ်တဖၣ်န့ၣ်လီၤ.+ ၁၄ အဃိ ယူဒၤအစီၤပၤဃံးစကံယၤ ဆှၢလီၤတၢ်ကစီၣ်​ ဆူဝ့ၢ်လၤကံၣ်​ လၢကီၢ်အၤၡူၢ် အစီၤပၤအအိၣ်​ ဒီးတဲဝဲလၢ “မ့ၢ်ဒၣ်ယတၢ်ကမၣ်လီၤ. နမ့ၢ်တဟဲဒုးယၤလၢၤဘၣ်န့ၣ်​ ယကဟ့ၣ်နၤ တၢ်တမံၤဂ့ၤတမံၤဂ့ၤ လၢနဃ့ယၤလီၤ.” ဒီးကီၢ်အၤၡူၢ်အစီၤပၤ ဃ့အီၣ်လိးဝဲ ယူဒၤ အစီၤပၤဃံးစကံယၤလၢ စ့ညၣ်အတၤလၣ်* ၃၀၀ ဒီးထူ အတၤလၣ်​ ၃၀ လီၤ. ၁၅ အဃိ စီၤဃံးစကံယၤ ဟ့ၣ်လီၤဝဲ ကယဲၢ်စ့ညၣ်လၢ အထံၣ်န့ၢ်ဝဲလၢ ယဟိဝၤယွၤ အတၢ်လုၢ်ဟံၣ်​ ဒီးလၢတၢ်လုၢ်ဒိၣ်ပှ့ၤဒိၣ်​ အလီၢ်လၢ စီၤပၤအဟံၣ်ပူၤန့ၣ်လီၤ.+ ၁၆ ဖဲန့ၣ်အခါ ယူဒၤ အစီၤပၤဃံးစကံယၤ ထုးလီၤကွံာ်ဝဲ ယဟိဝၤယွၤ အတၢ်လုၢ်ဟံၣ်​ အတြဲၤတဖၣ်+ ဒီးပဲတြီအထူၣ်တဖၣ်လၢ အဝဲကျးဝဲလၢထူ+ ဒီးအဟ့ၣ်လီၤဝဲလၢ ကီၢ်အၤၡူၢ် အစီၤပၤန့ၣ်လီၤ.

၁၇ ဒီးသုးခိၣ်ကျၢၢ်,* ပဒိၣ်လၢ အဒိၣ်ကတၢၢ်တဂၤ,* ပှၤစိာ်စပံးထံ အခိၣ်တဂၤ* လၢအအိၣ်လၢ ဝ့ၢ်လၤကံၣ်+ ဃုာ်ဒီး သုးမုၢ်ဖးဒိၣ်တဖုန့ၣ်​ ကီၢ်အၤၡူၢ် အစီၤပၤ မၢလီၤအဝဲသ့ၣ်​ ဆူစီၤပၤဃံးစကံယၤ အအိၣ်လၢ ဝ့ၢ်ယရူၤၡလ့ၣ်လီၤ.+ အဃိ အဝဲသ့ၣ်လဲၤထီၣ်လၢ ဝ့ၢ်ယရူၤၡလ့ၣ်​ ဒီးဆီလီၤအသးလၢ ထံကမါလၢ ထးခီအထံကျိၤ ကပၤလီၤ. တၢ်လီၢ်အဝဲန့ၣ်​ အိၣ်ဘူးဒီး ကျဲမုၢ်လၢအလဲၤဆူ ပှၤဆှုၣ်တၢ်ကံးညာ် အပျီလီၤ.+ ၁၈ ဖဲအဝဲသ့ၣ်​ ဃ့ထံၣ်လိာ်သးဒီး စီၤပၤအခါ စီၤဃံးလကံယၤ အဖိခွါ စီၤအ့ၤလယါကံၣ်လၢ+ အတီခိၣ်ရိၤမဲတၢ်လၢ နီပူၤ, နဲၣ်ရွဲၣ်​ စီၤၡ့ၤဘနၤ+ ဒီးစီၤအၤစာ် အဖိခွါ စီၤယိၤအၤ လၢအကဲ ပှၤကွဲးနီၣ်တၢ်ဖိန့ၣ်​ လဲၤထံၣ်လိာ်သးဒီး အဝဲသ့ၣ်လီၤ.

၁၉ ဒီးပှၤစိာ်စပံးထံ အခိၣ်တဂၤ တဲဘၣ်အဝဲသ့ၣ်လၢ “ဝံသးစူၤ တဲဘၣ်​ စီၤဃံးစကံယၤ ဒ်အံၤ, ‘စီၤပၤဖးဒိၣ်​ လၢအမ့ၢ် ကီၢ်အၤၡူၢ် အစီၤပၤ အဲၣ်ဒိးတဲနၤလၢ “ဘၣ်မနုၤအဃိ နနာ်န့ၢ်လီၤနသးလဲၣ်.+ ၂၀ နတဲလၢ နအိၣ်ဒီးတၢ်ကူၣ်​ ဒီးတၢ်စိတၢ်ကမီၤလၢ နကဒုးတၢ်အဂီၢ် ဘၣ်ဆၣ်​ နတၢ်ကတိၤတဖၣ်အံၤ မ့ၢ်တၢ်ကလီကလီလီၤ. နထီဒါက့ၤယၤဘူၣ်န့ၣ်​ မ့ၢ်နနာ်န့ၢ် မတဂၤလဲၣ်.+ ၂၁ နဟးသန့ၤနသးလၢ ကီၢ်အဲၤကူပတူး လၢအလီၤဂာ်ဒ်သိးဒီး တပိၢ်လၢအကၢ်တဘိ+ လၢအဆဲးနုာ်ဖျိ ပှၤလၢအသန့ၤအသးလၢအီၤ အစုပူၤလီၤ. ပှၤလၢ အသန့ၤအသးလၢ ကီၢ်အဲၤကူပတူး အစီၤပၤဖၤရိၤ အအိၣ်န့ၣ်​ ကဲထီၣ်အသးဒ်န့ၣ်​ ကိးဂၤဒဲးလီၤ. ၂၂ ဒီးသုမ့ၢ်ကတဲယၤလၢ သုသန့ၤသုသးလၢ သုကစၢ် ယဟိဝၤယွၤ+ သနာ်က့ စီၤဃံးစကံယၤ မၤလီၤမၢ်ကွံာ် အတၢ်လီၢ်ထီၣ်ထီတဖၣ်, အတၢ်လုၢ်လီၢ်တဖၣ်+ ဒီးတဲတ့ၢ်ပှၤလၢ ယူဒၤဘီမုၢ် ဒီးဝ့ၢ်ယရူၤၡလ့ၣ်​ အပူၤလၢ ‘သုကဘၣ်​ ထိၣ်လီၤပှီၤသုသးလၢ တၢ်လုၢ်လီၢ်တဖျၢၣ်အံၤလၢ ဝ့ၢ်ယရူၤၡလ့ၣ်အပူၤ, တမ့ၢ်ဧီၤ.’”’+ ၂၃ ဝံသးစူၤနီၤ, ခဲအံၤန့ၣ်​ ယကစၢ် အၤၡူၢ်အစီၤပၤ အဲၣ်ဒိးဃ့ဘူၣ်နၤ* တၢ်တမံၤ. နဃုထံၣ်န့ၢ် ပှၤဒိးကသ့ၣ်​ အဂၤ ၂,၀၀၀ မ့ၢ်ဘၣ်န့ၣ်​ ယကဟ့ၣ်နၤ ကသ့ၣ်အဒုပှဲၤန့ၣ်လီၤ.+ ၂၄ အဃိ နမ့ၢ်သန့ၤနသးလၢ ကီၢ်အဲၤကူပတူး လၢကဟ့ၣ်နၤ လ့ၣ်ကဟၣ်တဖၣ်​ ဒီးပှၤဒိးကသ့ၣ်တဖၣ်​ အဂီၢ်ဒၣ်လဲာ် နနီဟးထီၣ်​ ပဒိၣ်လၢ အပၣ်ဃုာ်လၢ ယကစၢ် အခ့အပှၤလၢ အဆံးကတၢၢ်တဖၣ်​ အကျါတဂၤ ကသ့ဒ်လဲၣ်. ၂၅ ယဟဲထီၣ်​ ဒ်သိး ယကဒုး ဒီးမၤဟးဂီၤ တၢ်လီၢ်တတီၤအံၤန့ၣ်​ မ့ၢ်သုဆိကမိၣ်လၢ ယဟိဝၤယွၤ တဟ့ၣ်ယၤအခွဲးဘၣ်န့ၣ်ဧါ. ယဟိဝၤယွၤ အနီၢ်ကစၢ်တဲယၤလၢ ‘လဲၤထီၣ်​ ဒုးတၢ်လီၢ်န့ၣ်​ ဒီးမၤဟးဂီၤကွံာ် အီၤတက့ၢ်.’”

၂၆ ဖဲန့ၣ်အခါ စီၤဃံးလကံယၤ အဖိခွါ စီၤအ့ၤလယါကံၣ်, စီၤၡ့ၤဘနၤ+ ဒီးစီၤယိၤအၤ တဲဘၣ်​ ပှၤစိာ်စပံးထံ အခိၣ်တဂၤလၢ+ “ပကနၣ်​ အရၣ်မ့းအကျိာ် သ့အဃိ ဝံသးစူၤ တဲတၢ်ဒီးပှၤလၢ အရၣ်မ့း* အကျိာ်မီၤ.+ ပှၤလၢ အအိၣ်လၢ ဝ့ၢ်ခိၣ်ဒူအလိၤ ကနၢ်ဟူဝဲအဃိ တဘၣ်တဲတၢ်ဒီးပှၤ* လၢပှၤယူဒၤဖိ အကျိာ်တဂ့ၤ.”+ ၂၇ ဘၣ်ဆၣ်​ ပှၤစိာ်စပံးထံ အခိၣ်တဂၤန့ၣ်​ တဲဆၢက့ၤ အဝဲသ့ၣ်လၢ “မ့ၢ်ယကစၢ် ဆှၢလီၤယၤ လၢယကတဲ တၢ်ကတိၤသ့ၣ်တဖၣ်အံၤ ထဲလၢသုဒီး သုကစၢ် အဂီၢ်လီၤဧါ. တမ့ၢ်စ့ၢ်ကီးလၢ ပှၤလၢအအိၣ်လၢ ဝ့ၢ်ခိၣ်ဒူအလိၤ လၢအကအီၣ်လီၤက့ၤ အနီၢ်ကစၢ် အအ့ၣ်​ ဒီးအီလီၤက့ၤ အနီၢ်ကစၢ် အဆံၣ်ထံတဖၣ်​ တပူၤဃီဒီးသု အဂီၢ်ဧီၤ.”

၂၈ ဒီးပှၤစိာ်စပံးထံ အခိၣ်တဂၤန့ၣ်​ တဲဝဲလၢ အကလုၢ်ဒိၣ်ဒိၣ်လၢ ပှၤယူဒၤဖိ အကျိာ်လၢ “စီၤပၤဖးဒိၣ်​ လၢအမ့ၢ် ကီၢ်အၤၡူၢ် အစီၤပၤ အဲၣ်ဒိးတဲသု ဒ်အံၤလီၤ.+ ၂၉ စီၤပၤတဲဝဲလၢ ‘တဘၣ်ပျဲလၢ စီၤဃံးစကံယၤ လံၣ်န့ၢ်လီန့ၢ်သုတဂ့ၤ. အဝဲမၤပူၤဖျဲးသု တန့ၢ်ဘၣ်.+ ၃၀ စီၤဃံးစကံယၤ ကတဲသုလၢ “ယဟိဝၤယွၤ ကမၤပူၤဖျဲးပှၤ သပှၢ်တၢၢ်လီၤ. အတဟ့ၣ်လီၤ ဝ့ၢ်တဖျၢၣ်အံၤလၢ ကီၢ်အၤၡူၢ် အစီၤပၤအစုပူၤဘၣ်.”+ ဘၣ်ဆၣ်​ တဘၣ်ပျဲ အကဆီၣ်ထွဲသုလၢ သုကနာ်န့ၢ် ယဟိဝၤယွၤအဂီၢ်တဂ့ၤ. ၃၁ တဘၣ်ကနၣ်​ စီၤဃံးစကံယၤ အကလုၢ်တဂ့ၤ. ကီၢ်အၤၡူၢ် အစီၤပၤ တဲဝဲလၢ “မၤတၢ်ဃူတၢ်ဖိးဒီးယၤ ဒီးပာ်လီၤသုစုကဝဲၤ ဒီးသုဝဲကိးဂၤဒဲး ကအီၣ်ဘၣ်တၢ်လၢ သုနီၢ်ကစၢ်အစပံးမုၢ်, သုနီၢ်ကစၢ် ချၢၣ်ဒၢထူၣ်​ ဒီးအီဘၣ်ထံလၢ သုနီၢ်ကစၢ် ထံကမါပူၤ ၃၂ တုၤလၢ ယဟဲကိးသုလၢ ကီၢ်တဘ့ၣ်လၢ အလီၤဂာ်ဒီး သုထံကီၢ်လီၤ.+ ကီၢ်တဘ့ၣ်န့ၣ်​ ပှဲၤဝဲဒီးဘု, စပံးထံ, ကိၣ်, စပံးကျီးတဖၣ်, သ့ၣ်စၤယံးတဖၣ်​ ဒီးကနဲစီလီၤ. အဃိ သုကဆဲးမူ ဒီးသုတသံလၢၤဘၣ်. ဒီးစီၤဃံးစကံယၤ ဆှၢကမၣ်သု ဒီးတဲသုလၢ ယဟိဝၤယွၤ ကမၤပူၤဖျဲးသုန့ၣ်​ တဘၣ်ကနၣ်​ ဃုာ်အီၤတဂ့ၤ. ၃၃ ပှၤကလုာ် အယွၤတဖၣ်လၢ အမၤပူၤဖျဲး အဝဲသ့ၣ်အကီၢ် လၢအၤၡူၢ် အစီၤပၤအစုပူၤန့ၣ်​ အိၣ်တဂၤဂၤဧါ. ၃၄ ဝ့ၢ်ဃမါသး+ ဒီးဝ့ၢ်အၢ်ပး အယွၤတဖၣ်​ အိၣ်ဖဲလဲၣ်. ဝ့ၢ်စဖၤရဝံၣ်,+ ဝ့ၢ်ဟ့နၤ ဒီးဝ့ၢ်ဧၤဝါ အယွၤတဖၣ်​ အိၣ်ဖဲလဲၣ်. မ့ၢ်အဝဲသ့ၣ်​ မၤပူၤဖျဲး ဝ့ၢ်ၡၤမရံလၢ ကီၢ်အၤၡူၢ် အစီၤပၤ အစုပူၤဧါ.+ ၃၅ ကီၢ်ကစၢ်တဖၣ်လၢ အမၤပူၤဖျဲး အထံကီၢ်လၢ ယစုပူၤန့ၣ်​ အိၣ်ဝဲတဂၤဂၤဧါ. မ့မ့ၢ်ဒ်န့ၣ်န့ၣ်​ ယဟိဝၤယွၤ မၤပူၤဖျဲး ဝ့ၢ်ယရူၤၡလ့ၣ်​ လၢယစုပူၤ ကသ့ဒ်လဲၣ်.”’”+

၃၆ ဘၣ်ဆၣ် မ့ၢ်လၢ စီၤပၤဃံးစကံယၤ မၤလိာ်ပာ်စၢၤဝဲလၢ “သုတဘၣ် စံးဆၢက့ၤအီၤတဂ့ၤ” အဃိ အဝဲသ့ၣ် အိၣ်ဘှီၣ်ဝဲ ဒီးတတဲဆၢ တၢ်နီတမံၤဘၣ်.+ ၃၇ စီၤဃံးလကံယၤ အဖိခွါ စီၤအ့ၤလယါကံၣ်လၢ အတီခိၣ်ရိၤမဲတၢ်လၢနီပူၤ, နဲၣ်ရွဲၣ် စီၤၡ့ၤဘနၤ ဒီးစီၤအၤစာ် အဖိခွါ စီၤယိၤအၤ လၢအကဲ ပှၤကွဲးနီၣ်တၢ်ဖိန့ၣ် ဖှီညာ်လီၤ အဝဲသ့ၣ်အဆ့ကၤ ဒီးက့ၤလၢ စီၤဃံးစကံယၤ အအိၣ် ဒီးတဲဘၣ်အီၤလၢ ပှၤစိာ်စပံးထံ အခိၣ်တဂၤန့ၣ် အတၢ်ကတိၤတဖၣ်လီၤ.