၂ စီၤပၤ

၂၀ ဖဲန့ၣ်အဆၢကတီၢ် စီၤဃံးစကံယၤ ဆိးက့ဝဲ ဘူးထီၣ်လၢအကသံလီၤ.+ စီၤအၤမိးအဖိခွါ ဝံယၡါယၤ လဲၤတဲအီၤလၢ “ယဟိဝၤယွၤ တဲဝဲဒ်အံၤ, ‘နတဘျါက့ၤလၢၤဘၣ်​ ဒီးနကသံလီၤ. အဃိ ရဲၣ်လီၤကျဲၤလီၤတၢ်ဒီး နဟံၣ်ဖိဃီဖိတက့ၢ်.’”*+ ၂ ဒီးစီၤဃံးစကံယၤ ဃၣ်အသးလၢ တၢ်ဒူၣ်ကပၤ ဒီးဃ့ဘါထုကဖၣ်တၢ်လၢ ယဟိဝၤယွၤ အအိၣ်လၢ ၃ “အိ ယဟိဝၤယွၤဧၢ, ယဃ့ကညးနၤလၢ ဝံသးစူၤ သ့ၣ်နီၣ်ထီၣ်က့ၤလၢ ယလဲၤတၢ်လၢ နမဲာ်ညါ လၢတၢ်သးတီအပူၤ ဒီးလၢယသးဒီဖျၢၣ်​ ဒီးယမၤတၢ်လၢ နထံၣ်လၢ အဂ့ၤန့ၣ်တက့ၢ်.”+ ဒီးစီၤဃံးစကံယၤ ဟီၣ်ဝဲနးမးလီၤ.

၄ ဒီးတချုးလၢ ဝံယၡါယၤ ဟးထီၣ်တုၤလၢ ကရၢၢ်လၢအိၣ်လၢတၢ်ခၢၣ်သး ဒံးဘၣ်အခါ ယဟိဝၤယွၤ တဲဘၣ်အီၤလၢ+ ၅ “က့ၤတဲဘၣ်​ ယပှၤဂီၢ်မုၢ်အခိၣ်​ စီၤဃံးစကံယၤလၢ ‘နဖုဖးဒိၣ်​ စီၤဒၤဝံး အကစၢ် ယဟိဝၤယွၤ တဲဝဲဒ်အံၤ, “ယနၢ်ဟူနတၢ်ထုကဖၣ်လံ, ယထံၣ်ဘၣ်​ နမဲာ်ထံလံ.+ ယကမၤဘျါက့ၤနၤလီၤ.+ ဒီးလၢသၢသီတသီန့ၣ်​ နကလဲၤလၢ ယၤ, ယဟိဝၤယွၤ အဟံၣ်လီၤ.+ ၆ ယကမၤထီထီၣ်​ နသးသမူ ၁၅ နံၣ်ဒီးယကမၤပူၤဖျဲးနၤ ဒီးဝ့ၢ်တဖျၢၣ်အံၤလၢ ကီၢ်အၤၡူၢ်အစီၤပၤ အစုပူၤလီၤ.+ ယကဒီသဒၢဝ့ၢ်အံၤ လၢယနီၢ်ကစၢ်အဃိ ဒီးလၢယခ့ယပှၤ စီၤဒၤဝံးအဃိလီၤ.”’”+

၇ ဒီးဝံယၡါယၤ တဲဝဲလၢ “ဟဲစိာ်ကိၣ်တလိၣ်လၢ အဘၣ်တၢ်တ့အီၤလၢ ချၢၣ်ဒၢသၣ်အဃ့တက့ၢ်.” အဃိ အဝဲသ့ၣ်ဟဲစိာ်ဝဲ ဒီးပာ်လီၤဝဲလၢ စီၤဃံးစကံယၤ အတၢ်ဝ့အလိၤ ဒီးကယီကယီန့ၣ်​ အဝဲဘျါက့ၤဝဲလီၤ.+

၈ စီၤဃံးစကံယၤ သံကွၢ် ဝံယၡါယၤလၢ “ယဟိဝၤယွၤ ကမၤဘျါယၤ ဒီးလၢသၢသီတသီ ယကလဲၤလၢ ယဟိဝၤယွၤ အဟံၣ်န့ၣ်​ အတၢ်ပနီၣ်ကမ့ၢ် မနုၤလဲၣ်.”+ ၉ ဝံယၡါယၤ တဲဆၢက့ၤဝဲလၢ “ယဟိဝၤယွၤ ကဟ့ၣ်လီၤ တၢ်ပနီၣ်တမံၤ လၢအကပာ်ဖျါထီၣ်န့ၢ်နၤလၢ ယဟိဝၤယွၤ ကမၤလၢပှဲၤအတၢ်ကတိၤ ဒ်အတဲပာ်စၢၤဝဲ အသိးလီၤ. အဃိ မ့ၢ်နကအဲၣ်ဒိးလၢ တၢ်အကဒုလၢ ဃီသွါအလိၤန့ၣ်​ ကလဲၤဆူညါ အခါတဆံဧါ မ့တမ့ၢ် ကက့ၤကဒါက့ၤလၢ အလီၢ်ခံ အခါတဆံဧါ.”+ ၁၀ စီၤဃံးစကံယၤ တဲဝဲလၢ “တၢ်အကဒု ကလဲၤဆူညါ အခါတဆံန့ၣ်​ ညီညီဖိလီၤ. ဘၣ်ဆၣ်​ တၢ်အကဒု ကက့ၤကဒါက့ၤလၢ အလီၢ်ခံ အခါတဆံန့ၣ်​ တညီဘၣ်.” ၁၁ အဃိ ဝံယၡါယၤ ကိးထီၣ်လၢ ယဟိဝၤယွၤအအိၣ်​ ဒီးတၢ်အကဒုလၢ အလဲၤလီၤတ့ၢ်လံလၢ စီၤအၤဃး အဃီသွါအလိၤန့ၣ်​ ယွၤဒုးက့ၤကဒါက့ၤအီၤ လၢအလီၢ်ခံ အခါတဆံလီၤ.+

၁၂ ဖဲန့ၣ်အခါ စီၤဘၤလဒၣ်​ အဖိခွါ စီၤဘရိဒးဘၤလဒၣ်​ လၢအမ့ၢ် ကီၢ်ဘၤဘူၤလိၣ်​ အစီၤပၤန့ၣ်​ နၢ်ဟူဘၣ်ဝဲလၢ စီၤဃံးစကံယၤ ဆိးက့အဃိ အဝဲဆှၢလီၤ လံာ်ပရၢတဖၣ်​ ဒီးတၢ်ဟ့ၣ်ဆူ စီၤဃံးစကံယၤ အအိၣ်လီၤ.+ ၁၃ စီၤဃံးစကံယၤ တူၢ်လိာ်မုာ် ပှၤစိာ်တၢ်ကစီၣ်ဖိတဖၣ်​ ဒီးဒုးနဲၣ်အဝဲသ့ၣ်လၢ အတၢ်လုၢ်ဒိၣ်ပှ့ၤဒိၣ်​ အဒၢးဒီတဖျၢၣ်+ လၢအအိၣ်ဒီး ထူ, စ့ညၣ်, သ့ၣ်စရံအထုး ဒီးသိလၢ အလုၢ်ဒိၣ်ပှ့ၤဒိၣ်တဖၣ်, အစုကဝဲၤတဖၣ်​ ဒီးကယဲၢ်တၢ်လၢ အအိၣ်လၢ အတၢ်လုၢ်ဒိၣ်ပှ့ၤဒိၣ်​ အလီၢ်တဖၣ်​ အပူၤလီၤ. တၢ်လၢ စီၤဃံးစကံယၤ တဒုးနဲၣ်အဝဲသ့ၣ်လၢ အနီၢ်ကစၢ်အဟံၣ်ပူၤ* မ့ၢ်ဂ့ၤ အဘီမုၢ်ပူၤမ့ၢ်ဂ့ၤန့ၣ်​ တအိၣ်နီတမံၤဘၣ်.

၁၄ လၢခံ ဝံယၡါယၤ ဟဲသံကွၢ် စီၤပၤဃံးစကံယၤလၢ “ပှၤသ့ၣ်တဖၣ်န့ၣ်​ ဟဲတဲတၢ်မနုၤလဲၣ်​ ဒီးအဝဲသ့ၣ်ဟဲဖဲလဲၣ်.” စီၤဃံးစကံယၤ တဲဆၢက့ၤအီၤလၢ “အဝဲသ့ၣ်ဟဲလၢ တၢ်လီၢ်ဖးယံၤ လၢကီၢ်ဘၤဘူၤလိၣ်န့ၣ်လီၤ.”+ ၁၅ ဝံၤဒီးဝံယၡါယၤ သံကွၢ်ဝဲလၢ “လၢနဟံၣ်ပူၤန့ၣ်​ အဝဲသ့ၣ်​ ထံၣ်တၢ်မနုၤလဲၣ်.” စီၤဃံးစကံယၤ တဲဆၢဝဲလၢ “အဝဲသ့ၣ်ထံၣ်​ တၢ်အိၣ်လၢယဟံၣ်ပူၤ ကိးမံၤဒဲးလီၤ. တၢ်လၢအအိၣ်လၢ ယတၢ်လုၢ်ဒိၣ်ပှ့ၤဒိၣ်​ အလီၢ်တဖၣ်အပူၤ လၢယတဒုးနဲၣ်​ အဝဲသ့ၣ်ဘၣ်န့ၣ်​ တအိၣ်နီတမံၤဘၣ်.”

၁၆ အဃိ ဝံယၡါယၤ တဲဘၣ်​ စီၤဃံးစကံယၤလၢ “ကနၣ်​ ယဟိဝၤယွၤ အတၢ်ကတိၤတက့ၢ်.+ ၁၇ ယဟိဝၤယွၤ တဲဝဲလၢ ‘ဆၢကတီၢ်ကဟဲလၢ တၢ်ကိးမံၤဒဲးလၢ နဟံၣ်ပူၤ ဒီးတၢ်ကိးမံၤဒဲးလၢ နမိၢ်ပၢ်ဖံဖု လၢပျၢၤတဖၣ်​ ပာ်ဖှိၣ်ထီၣ်​ တုၤလၢ မုၢ်မဆါတနံၤအံၤန့ၣ်​ ကဘၣ်တၢ်က့ၤစိာ်အီၤလၢ ကီၢ်ဘၤဘူၤလိၣ်လီၤ.+ ဒီးတၢ်တအိၣ်တ့ၢ် နီတမံၤဘၣ်.’ ၁၈ ‘ဒီးနစၢၤနသွဲၣ်တနီၤလၢ ကဟဲအိၣ်ဖျဲၣ်ထီၣ်န့ၣ်​ ကဘၣ်တၢ်က့ၤဖီၣ်အီၤ+ ဒီးအဝဲသ့ၣ်ကကဲထီၣ်​ ပဒိၣ်တဖၣ်လၢ ကီၢ်ဘၤဘူၤလိၣ်​ အစီၤပၤအနီပူၤလီၤ.’”+

၁၉ ဒီးစီၤဃံးစကံယၤ တဲဆၢက့ၤ ဝံယၡါယၤလၢ “ယဟိဝၤယွၤ အတၢ်ကတိၤလၢ နတဲတဖၣ်န့ၣ်​ ဂ့ၤလီၤမၢၤ.”+ ဒီးအဝဲဆဲးတဲဝဲလၢ “တၢ်မုာ်တၢ်ခုၣ်​ ဒီးတၢ်ဂၢၢ်တၢ်ကျၢၤ မ့ၢ်အိၣ်ဖဲ ယအိၣ်မူအဆၢကတီၢ်ဒုဂ့ၤဝဲလီၤ.”+

၂၀ မ့မ့ၢ် စီၤဃံးစကံယၤ အဂ့ၢ်လၢအဂၤတဖၣ်, အတၢ်မၤလၢ အဒိၣ်အမုၢ်ခဲလၢာ်, အဝဲတ့ထီၣ်​ ထံကမါ,+ ထံကျိၤ ဒီးဒုးဟဲလီၤဝဲထံလၢ ဝ့ၢ်ပူၤဒ်လဲၣ်​ အဂ့ၢ်န့ၣ်+ ဘၣ်တၢ်ကွဲးလီၤအီၤလၢ ယူဒၤအစီၤပၤ တၢ်စံၣ်စိၤတဲစိၤ အလံာ်ပူၤလီၤ. ၂၁ လၢခံ စီၤဃံးစကံယၤ သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး+ ဒီးအဖိခွါ စီၤမနၤၡ့ၤ+ ကဲထီၣ်စီၤပၤ လၢအလီၢ်လီၤ.+