၂ စီၤပၤ

၅ ဒီးစူၤရံအစီၤပၤ အသုးခိၣ်ကျၢၢ် စီၤနဧၤမၣ်​ မ့ၢ်ပှၤလၢအမံၤဒိၣ်​ ဒီးစီၤပၤပာ်ဒိၣ်အီၤ မ့ၢ်လၢ ယဟိဝၤယွၤ ဟ့ၣ်လီၤ တၢ်မၤနၢၤလၢ ပှၤစူၤရံဖိ ခီဖျိလၢ အီၤအဃိလီၤ. ဒီးအဝဲမ့ၢ် ပှၤဘၣ်တၢ်ဆါအၢ သနာ်က့ အဝဲမ့ၢ် ပှၤဒူပှၤဃိၤတဂၤလီၤ. ၂ ဘၣ်တဘျီ ဖဲအဝဲသ့ၣ်​ လဲၤနုာ်လီၤဒုး ကီၢ်အံၣ်စရ့လး သတူၢ်ကလာ်အခါ အဝဲသ့ၣ်​ ဖီၣ်န့ၢ်ဝဲ အံၣ်စရ့လးမုၣ်ဖိတဂၤ ဒီးအဝဲဘၣ်ကဲကုၢ်လၢ စီၤနဧၤမၣ်​ အမါအဂီၢ်လီၤ. ၃ အဝဲတဲဘၣ်​ အကစၢ်မုၣ်လၢ “ယကစၢ်မ့ၢ်လဲၤလၢ ဝံတဂၤလၢ+ အအိၣ်လၢ ၡၤမရံအပူၤန့ၣ်​ ဝံကမၤဘျါက့ၤ အတၢ်ဆါအၢလီၤ.”+ ၄ အဃိ အဝဲ* လဲၤတဲဘၣ်​ အကစၢ် တၢ်လၢအံၣ်စရ့လး မုၣ်ဖိတဲအီၤန့ၣ်လီၤ.

၅ ဒီးစူၤရံ အစီၤပၤ တဲဝဲလၢ “လဲၤခဲအံၤသၢၤ, ယကဆှၢလီၤ လံာ်ပရၢလၢ အံၣ်စရ့လး အစီၤပၤအအိၣ်လီၤ.” အဃိ စီၤနဧၤမၣ်လဲၤဝဲ ဒီးလဲၤစိာ်ဃုာ်ဒီး စ့ညၣ်​ အတၤလၣ်* ၁၀, ထူအဘ့ၣ်​ ၆,၀၀၀ ဒီးတၢ်ကူတၢ်သိး အစူၣ်​ ၁၀ လီၤ. ၆ ဒီးအဝဲလဲၤစိာ် လံာ်ပရၢတဘ့ၣ်လၢ အံၣ်စရ့လး အစီၤပၤအအိၣ်လီၤ. ဒီးလံာ်ပရၢ တဲဝဲဒ်အံၤ, “ယဆှၢလီၤန့ၢ်နၤ လံာ်ပရၢတဘ့ၣ်အံၤ တကးဒံးဘၣ်​ ယဆှၢလီၤစ့ၢ်ကီး ယခ့ယပှၤ စီၤနဧၤမၣ်​ ဒ်သိးနကမၤဘျါက့ၤ အတၢ်ဆါအၢအဂီၢ်လီၤ.” ၇ ဖဲအံၣ်စရ့လးအစီၤပၤ ဖးဝဲလံာ်ပရၢအခါ အဝဲဖှီညာ်လီၤ အဆ့ကၤ ဒီးတဲဝဲလၢ “အဝဲဆှၢလီၤပှၤတဂၤအံၤ လၢယအိၣ်ဒီး မၢယမၤဘျါက့ၤ အတၢ်ဆါအၢလီၤ. ယမၤသံတၢ်ဒီးပာ်မူတၢ် ဒ်ကစၢ်ယွၤအသိး ကသ့ဧါ.+ အဝဲအဲၣ်ဒိးဃု တၢ်အ့ၣ်လိာ်ဒီးယၤန့ၣ်​ သုထံၣ်လၢ သုနီၢ်ကစၢ်လီၤ.”

၈ ဘၣ်ဆၣ်​ ဖဲယွၤလၢအမ့ၢ်အတီအပှၤ စီၤအလံၤၡါ နၢ်ဟူဝဲလၢ အံၣ်စရ့လးအစီၤပၤဖှီညာ်လီၤ အဆ့ကၤအခါ အဝဲဆှၢလီၤ တၢ်ကစီၣ်လၢ စီၤပၤအအိၣ်​ ဒီးတဲဝဲလၢ “ဘၣ်မနုၤအဃိ နဖှီညာ်လီၤ နဆ့ကၤလဲၣ်. ဒ်သိးအဝဲ ကသ့ၣ်ညါလၢ ဝံအိၣ်ဝဲတဂၤလၢ အံၣ်စရ့လးအပူၤအဂီၢ် ဝံသးစူၤ ပျဲလီၤအီၤလၢ ယအိၣ်တက့ၢ်.”+ ၉ အဃိ စီၤနဧၤမၣ်​ လဲၤဝဲဒီး အကသ့ၣ်​ ဒီးအလ့ၣ်ကဟၣ်သုးတဖၣ်​ ဒီးဆၢထၢၣ်ဝဲလၢ စီၤအလံၤၡါ အဟံၣ်အကျဲနုာ်လီၤန့ၣ်လီၤ. ၁၀ ဘၣ်ဆၣ်​ စီၤအလံၤၡါ ဆှၢလီၤ ပှၤစိာ်တၢ်ကစီၣ်ဖိတဂၤ ဒ်သိးကတဲအီၤလၢ “လဲၤသ့စီကွံာ်နသးလၢ ထံကျိယၢ်ဒ့ၣ်အပူၤ+ နွံဘျီတက့ၢ်.+ ဒီးနဖံးနညၣ်​ ကဂ့ၤထီၣ်က့ၤ ဒီးနကကဆှီထီၣ်က့ၤလီၤ.” ၁၁ ဖဲန့ၣ်​ စီၤနဧၤမၣ်​ သးပှံၢ်ထီၣ်တၢ်ဒိၣ်မး ဒီးဖဲအဝဲဟးထီၣ်အခါ အဝဲတဲဝဲလၢ “ယတဲလီၤယသးလၢ ‘ပှၤတဂၤအံၤ ကဟဲထီၣ်လၢယအိၣ်, ကဆၢထၢၣ်ဖဲအံၤ ဒီးကကိးထီၣ်​ အကစၢ် ယဟိဝၤယွၤအမံၤ ဒီးကဝံၢ်ဝၢ်အစု ဖဲတၢ်ဆါအၢ အိၣ်ဝဲအဖီခိၣ်​ ဒ်သိးကမၤဘျါယၤ အဂီၢ်လီၤ.’ ၁၂ ဝ့ၢ်ဒၤမ့ၤစ့း+ အထံကျိလၢအမ့ၢ် အဘၤနါ ဒီးဖၢ်ပၢ်န့ၣ်​ ဂ့ၤဒိၣ်န့ၢ်ဒံး ထံကျိခဲလၢာ်လၢ အံၣ်စရ့လးအပူၤ တမ့ၢ်ဧီၤ. ယလဲၤသ့စီကွံာ် ယသးလၢ ထံကျိတဖၣ်န့ၣ်​ ဒီးကဆှီထီၣ်က့ၤ တသ့ဧီၤ.” ဒီးစီၤနဧၤမၣ်​ သးဒိၣ်ထီၣ်တၢ် ဒီးဟးထီၣ်ဝဲလီၤ.

၁၃ ဒီးအခ့အပှၤတဖၣ်​ ဟဲဃီၤလၢအအိၣ်​ ဒီးတဲအီၤလၢ “ပၢ်ဧၢ, ဝံမ့ၢ်မၢ နမၤတၢ်လၢ အကီတမံၤမံၤန့ၣ်​ နကမၤလီၤတမ့ၢ်ဧီၤ. ဘၣ်ဆၣ်​ အဝဲမၢနၤထဲလၢ ‘လဲၤသ့စီနသး ဒီးကဆှီထီၣ်က့ၤ’ အဃိ တညီဘၣ်နၤဧီၤ.” ၁၄ အဃိ စီၤနဧၤမၣ်​ လဲၤစုၣ်လီၤအသးလၢ ထံကျိယၢ်ဒ့ၣ်​ နွံဘျီ ဒ်ယွၤလၢ အမ့ၢ်အတီ အပှၤတဂၤ တဲအီၤအသိးလီၤ.+ ဝံၤဒီး အဖံးအညၣ်​ ဂ့ၤထီၣ်က့ၤဒ် ဖိသၣ်ပိာ်ခွါဖိ အဖံးအညၣ်အသိး+ ဒီးအဝဲကဆှီထီၣ်က့ၤဝဲလီၤ.+

၁၅ အဃိ စီၤနဧၤမၣ်​ ဒီးအပှၤခဲလၢာ် က့ၤကဒါက့ၤလၢ ယွၤလၢအမ့ၢ်အတီ+ အပှၤတဂၤန့ၣ်အအိၣ်​ ဒီးစီၤနဧၤမၣ်​ ဆၢထၢၣ်လၢ အမဲာ်ညါ ဒီးတဲအီၤလၢ “ခဲအံၤ ယသ့ၣ်ညါလၢ ကစၢ်ယွၤအိၣ်ဒၣ်​ ထဲလၢကီၢ်အံၣ်စရ့လး အပူၤ ဒီးကစၢ်ယွၤ တအိၣ်လၢ တၢ်လီၢ်အဂုၤအဂၤလၢ ဟီၣ်ခိၣ်ချၢ နီတတီၤဘၣ်.+ ခဲအံၤ ဝံသးစူၤ တူၢ်လိာ်နခ့နပှၤယၤအံၤ အတၢ်ဟ့ၣ်တက့ၢ်.” ၁၆ ဘၣ်ဆၣ်​ စီၤအလံၤၡါတဲဝဲလၢ “ယအၢၣ်လီၤနၤလၢ ယဟိဝၤယွၤလၢ ယဘူၣ်ထီၣ်ဘါထီၣ်အီၤတဂၤ အမဲာ်ညါလၢ ယတတူၢ်လိာ် နတၢ်ဟ့ၣ်ဘၣ်.”+ ဒီးစီၤနဧၤမၣ်​ ဟ့ၣ်န့ၢ်ဆူၣ်အီၤ တၢ်ဟ့ၣ်​ ဘၣ်ဆၣ်​ စီၤအလံၤၡါ တတူၢ်လိာ်ဝဲဘၣ်. ၁၇ လၢခံကတၢၢ် စီၤနဧၤမၣ်​ တဲဝဲလၢ “နမ့ၢ်တတူၢ်လိာ် ယတၢ်ဟ့ၣ်ဘၣ်န့ၣ်​ ဝံသးစူၤ ဟ့ၣ်လီၤယၤ ဟီၣ်ခိၣ်ညၣ်ထ့ၣ်လၢ ကီၢ်တဘ့ၣ်အံၤအပူၤ ဖဲကသ့ၣ်ယီၤ* ခံဒုတီၣ်ဝဲန့ၢ်မီၤ. ဒီးယကက့ၤစိာ်အီၤ မ့ၢ်လၢ စးထီၣ်လၢ ခဲအံၤန့ၣ်​ ယတလုၢ်ထီၣ်​ တၢ်လုၢ်ဒွဲၣ်အူ ဒီးတၢ်လုၢ်အဂၤလၢ ယွၤအဂၤတဖၣ်​ အအိၣ်လၢၤဘၣ်. ယကလုၢ်ထီၣ်​ တၢ်ထဲလၢ ယဟိဝၤယွၤအအိၣ်လီၤ. ၁၈ ဘၣ်ဆၣ်​ ယမုၢ်လၢ်လၢ ယဟိဝၤယွၤ ကပျၢ်ယတၢ်ကမၣ်တမံၤ. ဖဲယကစၢ် လဲၤနုာ်လၢ ကစၢ်ရံးမိၣ်​ အဟံၣ်ပူၤ ဒီးချံးလီၤအခီၣ်အခါ အဝဲသန့ၤအသးလၢ ယစုအဃိ ယဘၣ်ချံးလီၤယခီၣ်လၢ ကစၢ်ရံးမိၣ်အဟံၣ်ပူၤလီၤ. ဖဲယချံးလီၤယခီၣ်လၢ ကစၢ်ရံးမိၣ်​ အဟံၣ်ပူၤအခါ ဝံသးစူၤ မ်ယဟိဝၤယွၤ ပျၢ်ယတၢ်ကမၣ်​ တမံၤအံၤတက့ၢ်.” ၁၉ ဒီးစီၤအလံၤၡါ တဲအီၤလၢ “က့ၤမုာ်မုာ်ဟီ.” ဒီးစီၤနဧၤမၣ်​ ဟးထီၣ်လၢ စီၤအလံၤၡါအအိၣ်​ ဒီးဖဲအက့ၤတုၤဝဲလၢ ကျဲတကူာ်အခါ ၂၀ ယွၤလၢအမ့ၢ်အတီ+ အပှၤစီၤအလံၤၡါ အပှၤမၤစၢၤတၢ် လၢအမ့ၢ် စီၤက့ၤဃစံန့ၣ်+ တဲလီၤအသးလၢ ‘ယကစၢ် တတူၢ်လိာ် တၢ်လၢ ပှၤစူၤရံဖိ စီၤနဧၤမၣ်+ ဟဲစိာ်ဝဲဘၣ်​ ဒီးပျဲက့ၤခီလီအီၤလီၤ. အဃိ ယအၢၣ်လီၤလၢ ယဟိဝၤယွၤ လၢအမူဝဲတဂၤ အမဲာ်ညါလၢ ယကလဲၤလူၤအီၤ ဒီးဟံးန့ၢ်တၢ်တမံၤမံၤလၢ အအိၣ်လီၤ.’ ၂၁ အဃိ စီၤက့ၤဃစံ လဲၤလူၤဝဲ စီၤနဧၤမၣ်လီၤ. ဖဲစီၤနဧၤမၣ်​ ထံၣ်ဝဲလၢ ပှၤတဂၤ ဟဲဃ့ၢ်လၢအလီၢ်ခံအခါ အဝဲစံၣ်လီၤလၢ အလ့ၣ်ကဟၣ်အပူၤလီၤ. အဝဲထံၣ်လိာ်သးဒီးအီၤ ဒီးတဲဝဲလၢ “တၢ်ကီတၢ်ခဲ အိၣ်တမံၤမံၤဧါ.” ၂၂ စီၤက့ၤဃစံ တဲဆၢဝဲလၢ “တအိၣ်နီတမံၤဘၣ်. ဘၣ်ဆၣ်​ ယကစၢ်ဆှၢလီၤယၤ ဒီးတဲဝဲဒ်အံၤ, ‘ပှၤသးစၢ်ခံဂၤလၢ အ့ဖရဲၣ်​ ကစၢၢ်ကလိကျါ ဟဲတုၤလၢ ယအိၣ်ခဲအံၤ ဒီးအဝဲသ့ၣ်​ ပၣ်ဃုာ်လၢ ဝံအဖိခွါတဖၣ်​ အကျါလီၤ. အဃိဝံသးစူၤ ဟ့ၣ်လီၤအဝဲသ့ၣ်​ စ့ညၣ်တတၤလၣ်* ဒီးတၢ်ကူတၢ်သိး ခံစူၣ်တက့ၢ်.’”+ ၂၃ ဒီးစီၤနဧၤမၣ်​ တဲဝဲလၢ “အံၤ, က့ၤစိာ် စ့ညၣ်ခံတၤလၣ်အံၤသၢၤ.” ဒီးစီၤနဧၤမၣ်​ ဆဲးမၢဆူၣ်အီၤဒ်န့ၣ်+ ဒီးပၢနုာ်ဝဲ စ့ညၣ်ခံတၤလၣ်​ ဒီးတၢ်ကူတၢ်သိးခံစူၣ်လၢ ထၢၣ်ခံဖျၢၣ်အပူၤ ဒီးဟ့ၣ်လီၤဝဲ အပှၤမၤစၢၤတၢ်ခံဂၤ ဒီးအဝဲသ့ၣ်လဲၤဝဲလၢ စီၤက့ၤဃစံ အမဲာ်ညါ ဒီးစိာ်န့ၢ်အီၤလီၤ.

၂၄ ဖဲစီၤက့ၤဃစံ က့ၤတုၤလၢ ဧိၤဖ့လး* အခါ အဝဲဟံးန့ၢ်ဝဲ တၢ်ဟ့ၣ်တဖၣ်န့ၣ်လၢ ပှၤမၤစၢၤတၢ်ခံဂၤန့ၣ်အအိၣ်​ ဒီးပာ်ဝဲလၢ ဟံၣ်ပူၤဒီး ပျဲက့ၤအဝဲသ့ၣ်လီၤ. ဒီးအဝဲသ့ၣ်ဟးထီၣ်ဝံၤအလီၢ်ခံ ၂၅ စီၤက့ၤဃစံ လဲၤလၢ အကစၢ် စီၤအလံၤၡါ အအိၣ်လီၤ. ဒီးစီၤအလံၤၡါ တဲအီၤလၢ “စီၤက့ၤဃစံဧၢ, နဟဲက့ၤဖဲလဲၣ်.” ဒီးစီၤက့ၤဃစံ တဲအီၤလၢ “ကစၢ်ဧၢ, ယတလဲၤနီတပူၤဘၣ်.”+ ၂၆ စီၤအလံၤၡါ တဲအီၤလၢ “ဖဲပိာ်ခွါတဂၤန့ၣ်​ စံၣ်လီၤလၢ အလ့ၣ်ကဟၣ်အပူၤ ဒ်သိးကထံၣ်လိာ်သးဒီးနၤအခါန့ၣ်​ နဆိကမိၣ်​ ယတသ့ၣ်ညါဧီၤ. အခဲအံၤန့ၣ်​ မ့ၢ်ဝဲတၢ်ဆၢကတီၢ်လၢ ပကြၢးဟံးန့ၢ် စ့ညၣ်မ့ၢ်ဂ့ၤ, တၢ်ကူတၢ်သိးမ့ၢ်ဂ့ၤ, သ့ၣ်စၤယံး အကျီးမ့ၢ်ဂ့ၤ, စပံးကျီးမ့ၢ်ဂ့ၤ, သိမ့ၢ်ဂ့ၤ, ကျီၢ်မ့ၢ်ဂ့ၤ, ကုၢ်မုၣ်မ့ၢ်ဂ့ၤ, ကုၢ်ခွါမ့ၢ်ဂ့ၤဧါ.+ ၂၇ စးထီၣ်ခဲအံၤ စီၤနဧၤမၣ်​ အတၢ်ဆါအၢ+ ကအိၣ်လၢ* နၤဒီးနစၢၤနသွဲၣ်တဖၣ်အလိၤ လီၤစိၤလီၤထီလီၤ.” တဘျီဃီန့ၣ်​ စီၤက့ၤဃစံ ဟးထီၣ်ကွံာ်ဝဲလၢ စီၤအလံၤၡါ အအိၣ်​ ဒ်ပှၤဘၣ်တၢ်ဆါအၢတဂၤ လၢအဝါဝဲဒ် မူခိၣ်ဖီအသိးလီၤ.+