၁ ကွဲးနီၣ်တၢ်
၂၁ ဒီးမုၣ်ကီၤလံၢ်* ဆၢထၢၣ် ဒ်သိး ကထီဒါ ပှၤအံၣ်စရ့လးဖိ ဒီးထိၣ်ဟူးထိၣ်ဂဲၤထီၣ် စီၤဒၤဝံးလၢ အကဂံၢ် ပှၤအံၣ်စရ့လးဖိတဖၣ် အဂီၢ်လီၤ.+ ၂ အဃိ စီၤဒၤဝံး တဲဘၣ် စီၤယိၤအာ်+ ဒီးပှၤဂီၢ်မုၢ် အခိၣ်အနၢ်တဖၣ်လၢ “လဲၤဂံၢ် ပှၤအံၣ်စရ့လးဖိ အနီၣ်ဂံၢ် စးထီၣ်လၢ ဝ့ၢ်ဘ့ၢ်ၡဘၤ ပၢၢ်တုၤလၢ ဝ့ၢ်ဒၣ်တက့ၢ်.+ ဝံၤဒီး ဟဲက့ၤတဲကျၢယၤ ဒ်သိး ယကသ့ၣ်ညါလၢ ပှၤဂီၢ်မုၢ်အနီၣ်ဂံၢ် အိၣ်ထဲလဲၣ်န့ၣ်တက့ၢ်.” ၃ ဘၣ်ဆၣ် စီၤယိၤအာ် တဲဝဲလၢ “မ်ယဟိဝၤယွၤ မၤအါထီၣ် အပှၤဂီၢ်မုၢ် အနီၣ်ဂံၢ် အစး ၁၀၀ တက့ၢ်. ကစၢ်စီၤပၤဧၢ, အဝဲသ့ၣ်ခဲလၢာ် ကဲနခ့နပှၤလံ တမ့ၢ်ဧီၤ. ဘၣ်မနုၤအဃိ ကစၢ်စီၤပၤ အဲၣ်ဒိးမၤ ဒ်အံၤလဲၣ်. မ့ၢ်နကြၢးကဲထီၣ် တၢ်လီၤကမၣ်အလီၢ်လၢ ပှၤအံၣ်စရ့လးဖိ အဂီၢ်ဧါ.”
၄ ဘၣ်ဆၣ် စီၤပၤမၢဆူၣ် စီၤယိၤအာ် အဃိ စီၤယိၤအာ် ဟးထီၣ်ဒီး လဲၤဝဲလၢ အံၣ်စရ့လးအကီၢ်ပူၤ ဒီတဘ့ၣ်ညါလီၤ. ဝံၤဒီး စီၤယိၤအာ် ဟဲက့ၤတုၤလၢ ဝ့ၢ်ယရူၤၡလ့ၣ်လီၤ.+ ၅ ဒီးစီၤယိၤအာ် ဟ့ၣ်လီၤ စီၤဒၤဝံးလၢ ပှၤဂီၢ်မုၢ် အနီၣ်ဂံၢ်လီၤ. အံၣ်စရ့လးသုးဖိ လၢအအိၣ်ဒီးနးန့ၣ် ခဲလၢာ်ခဲဆ့ အိၣ်ဝဲအဂၤ ၁,၁၀၀,၀၀၀ ဒီးပှၤပိာ်ခွါလၢ ယူဒၤအဒူၣ်ကျါ လၢအအိၣ်ဒီးနးန့ၣ် အိၣ်ဝဲအဂၤ ၄၇၀,၀၀၀ လီၤ.+ ၆ ဘၣ်ဆၣ် စီၤယိၤအာ် တဂံၢ်ဝဲ ပှၤလ့ၤဝံဖိ ဒီးပှၤဘံၣ်ယၤမံၣ်ဖိတဖၣ် အနီၣ်ဂံၢ်ဘၣ်,+ မ့ၢ်လၢ အသးဘၣ်အၢ စီၤပၤ အတၢ်ကတိၤ အဃိလီၤ.+
၇ တၢ်မၤအသးတဖၣ်န့ၣ် တဘၣ် ယွၤလၢအမ့ၢ်အတီတဂၤ အသးဘၣ် အဃိ အဝဲစံၣ်ညီၣ် ပှၤအံၣ်စရ့လးဖိလီၤ. ၈ အဃိ စီၤဒၤဝံး တဲဘၣ် ယွၤလၢအမ့ၢ်အတီတဂၤလၢ “ယဟးမၤနါစိၤတၢ်+ ဒ်န့ၣ်အဃိ ယမၤကမၣ်ဘၣ်နၤ+ ဖးဒိၣ်လံ. ခဲအံၤ ဝံသးစူၤ ပျၢ်ယတၢ်ကမၣ်တက့ၢ်.”+ ၉ ဝံၤဒီး ယဟိဝၤယွၤ တဲဘၣ် ဝံကး+ လၢအမ့ၢ် စီၤဒၤဝံး အပှၤထံၣ်တၢ်ထံၣ် လၢညါခီ တဂၤလၢ ၁၀ “လဲၤတဲဘၣ် စီၤဒၤဝံးလၢ ‘ယဟိဝၤယွၤ တဲဝဲလၢ “ယကဟ့ၣ်နၤ တၢ်ဃုထၢ သၢခါလီၤ. လၢတၢ်သၢခါအံၤ အကျါန့ၣ် ဃုထၢအီၤတခါ ဒီးယကမၤနၤဒ် နဃုထၢ အသိးလီၤ.”’” ၁၁ အဃိ ဝံကး ဟဲတဲဘၣ် စီၤဒၤဝံးလၢ “ယဟိဝၤယွၤ တဲဝဲလၢ ‘ဃုထၢတက့ၢ်. ၁၂ မ့ၢ်တၢ်သၣ်ဝံၤလီၤဒိ ကဘၣ်အိၣ်ထီၣ် သၢနံၣ်ဧါ,+ နဒုၣ်နဒါတဖၣ်အနး ကချုးန့ၢ်နၤ ဒီးပှၤလၢအထီဒါနၤ ကမၤနၢၤနၤ သၢလါဧါ+ မ့တမ့ၢ် ယဟိဝၤယွၤအနး လၢအမ့ၢ် ယဟိဝၤယွၤ အမူခိၣ်ကလူး ကမၤဟးဂီၤတၢ်လၢ+ ကီၢ်အံၣ်စရ့လး ဒီတဘ့ၣ်အပူၤ ခီဖျိ တၢ်ဆါသံသတြိာ် သၢသီဧါ.’+ ယကဘၣ် စံးဆၢက့ၤ ပှၤလၢ အမၢလီၤယၤတဂၤ ဒ်လဲၣ်န့ၣ် ခဲအံၤ ဆိကမိၣ်ထံ တက့ၢ်.” ၁၃ ဒီးစီၤဒၤဝံးတဲဘၣ် ဝံကးလၢ “ယဘၣ်ကိၢ်ဘၣ်ဂီၤ ဒိၣ်မးလၢ တၢ်ဂ့ၢ်တခါအံၤအဃိ ဘၣ်ဆၣ် တဘၣ်ဟ့ၣ်လီၤယၤလၢ ပှၤကညီ အစုပူၤတဂ့ၤ.+ ယဟိဝၤယွၤ အတၢ်သးကညီၤ အိၣ်အါမး+ အဃိ ဝံသးစူၤ မ်ယလီၤဘၣ်လၢ အစုပူၤတက့ၢ်.”
၁၄ အဃိ ယဟိဝၤယွၤ ဒုးလီၤဘၣ် တၢ်ဆါသံသတြိာ်လၢ+ အံၣ်စရ့လးအဖီခိၣ် ဒီးပှၤဂီၢ်မုၢ် သံဝဲအဂၤ ၇၀,၀၀၀ လီၤ.+ ၁၅ တကးဒံးဘၣ် ယွၤလၢအမ့ၢ်အတီတဂၤ ဆှၢလီၤဝဲ မူခိၣ်ကလူးတဂၤ လၢဝ့ၢ်ယရူၤၡလ့ၣ် ဒ်သိးကမၤဟးဂီၤ ဝ့ၢ်န့ၣ်လီၤ. ဖဲမူခိၣ်ကလူးတဂၤအံၤ ဘူးထီၣ်ကမၤဟးဂီၤဝဲအခါ ယဟိဝၤယွၤ ထံၣ်ဝဲဒီး အသးအုးဝဲ+ လၢတၢ်ဆါသံသတြိာ် လၢအဒုးလီၤဘၣ်ဝဲ အဃိလီၤ. ဒီးကစၢ်ယွၤတဲဘၣ် မူခိၣ်ကလူးလၢ အမၤဟးဂီၤတၢ်တဂၤန့ၣ်လၢ “ပာ်လီၤကွံာ် နစု, ပှဲၤန့ၣ်ဘၣ်လံ.”+ ဒီးယဟိဝၤယွၤ အမူခိၣ်ကလူးတဂၤန့ၣ် ဆၢထၢၣ်ဝဲလၢ ပှၤယဘူၣ်ဖိ+ စီၤအၤရနၤ+ အကြဲၢ်ဃၢၤလီၤ.
၁၆ ဖဲစီၤဒၤဝံး ကွၢ်ထီၣ်တၢ်အခါ အထံၣ်ဘၣ်ဝဲ ယဟိဝၤယွၤ အမူခိၣ်ကလူးလၢ တၢ်ဖးဖီ* လၢအစိာ်နးတဘ့ၣ်လၢ+ အစုပူၤ လၢအယူာ်ဃီၤအသး လိၤလိၤလၢ ဝ့ၢ်ယရူၤၡလ့ၣ်လီၤ. ဖဲန့ၣ်န့ၣ် စီၤဒၤဝံး ဒီးပှၤသူၣ်က့သးပှၢ် လၢအသိးဝဲ ထၢၣ်တၢ်ကံးညာ်တဖၣ်န့ၣ်*+ ထိၣ်လီၤပှီၤအသး တဘျီဃီဒီး ကျးလီၤအမဲာ်လၢ ဟီၣ်ခိၣ်လိၤလီၤ.+ ၁၇ စီၤဒၤဝံးတဲဘၣ် ယွၤလၢအမ့ၢ်အတီတဂၤလၢ “ပှၤတဖၣ်အံၤ* မၤကမၣ်ဘၣ် တၢ်မနုၤလဲၣ်. ပှၤလၢအမၢ ပှၤဂံၢ်ပှၤဂီၢ်မုၢ် အနီၣ်ဂံၢ်န့ၣ် တမ့ၢ်ယၤဧီၤ. ပှၤလၢအမၤတၢ်ဒဲးဘး ဒီးမၤကမၣ်တၢ်န့ၣ် အကဲယၤလီၤ.+ အိ ယကစၢ် ယဟိဝၤယွၤဧၢ, ဝံသးစူၤ မ်နသိၣ်ဃီၣ် ထဲယၤဒီး ယပၢ်အဒူၣ်ဖိထၢဖိ တဖၣ်တက့ၢ်. တဘၣ်ဒုးလီၤ တၢ်သိၣ်ဃီၣ်အံၤ လၢနပှၤဂီၢ်မုၢ် အလိၤတဂ့ၤ.”+
၁၈ ယဟိဝၤယွၤ အမူခိၣ်ကလူး တဲဘၣ် ဝံကး+ လၢအကလဲၤ တဲဘၣ် စီၤဒၤဝံးလၢ စီၤဒၤဝံး ကဘၣ်လဲၤ သူၣ်ထီၣ် တၢ်လုၢ်လီၢ်တခါ လၢယဟိဝၤယွၤအဂီၢ် လၢပှၤယဘူၣ်ဖိ စီၤအၤရနၤ အကြဲၢ်ပူၤလီၤ.+ ၁၉ အဃိ စီၤဒၤဝံးလဲၤထီၣ်ဝဲ ဒ်ဝံကးတဲအီၤ ဒီးဒ်ယဟိဝၤယွၤ မၤလိာ်ဝဲ ခီဖျိ ဝံကးအသိးလီၤ. ၂၀ ဒီးဖဲစီၤအၤရနၤ ယီၢ်ဘုကၠူၣ် အခါ အဝဲဃၣ်ဃီၤအသး ဒီးထံၣ်ဘၣ်မူခိၣ်ကလူးလီၤ. ဒီးစီၤအၤရနၤ အဖိခွါလွံၢ်ဂၤ လၢအအိၣ်ဒီးအီၤန့ၣ် အိၣ်ခူသူၣ်အသးလီၤ. ၂၁ ဖဲစီၤဒၤဝံး လဲၤထီၣ်လၢ စီၤအၤရနၤ အအိၣ်အခါ စီၤအၤရနၤ ကွၢ်လီၤတၢ်ဒီး အထံၣ်ဝဲ စီၤဒၤဝံးလီၤ. ဒီးအဝဲလဲၤလီၤဝဲ တဘျီဃီ ဒီးထိၣ်လီၤပှီၤအသး လၢဟီၣ်ခိၣ်လိၤ လၢစီၤဒၤဝံး အမဲာ်ညါလီၤ. ၂၂ စီၤဒၤဝံး တဲဘၣ် စီၤအၤရနၤလၢ “ဒ်သိး တၢ်သိၣ်ဃီၣ် သုတဘၣ်ပှၤဂီၢ်မုၢ် လၢၤတဂ့ၤအဂီၢ် ယကတ့ထီၣ် တၢ်လုၢ်လီၢ်လၢ ယဟိဝၤယွၤအဂီၢ် လၢနကြဲၢ်အလီၢ်အဃိ ဆါန့ၢ်ယၤ နကြဲၢ်အလီၢ် ဒ်အကြၢးဒီး အပှ့ၤအသိးတက့ၢ်.”+ ၂၃ ဘၣ်ဆၣ် စီၤအၤရနၤတဲဘၣ် စီၤဒၤဝံးလၢ “ကစၢ်စီၤပၤဧၢ, ဟံးန့ၢ်ခီလီအီၤ ဒီးကွၢ်ဖဲ နအဲၣ်ဒိးမၤန့ၣ် မၤဟီ. အအံၤ ယဟ့ၣ်လီၤနၤ ကျီၢ်တဖၣ်လၢ တၢ်လုၢ်ဒွဲၣ်အူအဂီၢ်, နီၣ်ယီၢ်ဘု+ လၢနကသူအီၤ ဒ်သ့ၣ်မုၣ်အသိး ဒီးဘုကၠူၣ်လၢ တၢ်လုၢ်ဘု အဂီၢ်ခဲလၢာ်လီၤ.”
၂၄ ဘၣ်ဆၣ် စီၤပၤဒၤဝံး တဲဘၣ် စီၤအၤရနၤလၢ “မၤဒ်န့ၣ်တဂ့ၤ. ယကဘၣ်ပှ့ၤအီၤ ဒ်အကြၢးဒီး အပှ့ၤအသိးသၢၤ. ယတဟံးန့ၢ်ခီလီနတၢ် ဒီးဟ့ၣ်လီၤလၢ ယဟိဝၤယွၤအအိၣ်ဘၣ်. ဒီးတၢ်လၢ ယန့ၢ်ဘၣ်ခီလီလီန့ၣ် ယတဟ့ၣ်လုၢ်ထီၣ်အီၤ ဒ်တၢ်လုၢ်ဒွဲၣ်အူတဖၣ် အသိးဘၣ်.”+ ၂၅ အဃိ စီၤဒၤဝံး ဟ့ၣ်ဝဲ စီၤအၤရနၤလၢ တၢ်အပှ့ၤ လၢအလီၤတယၢၢ်ဝဲ ထူၡက့လး* ၆၀၀ လၢဟီၣ်ခိၣ်လီၢ် အဂီၢ်န့ၣ်လီၤ. ၂၆ ဒီးဖဲန့ၣ်န့ၣ် စီၤဒၤဝံး တ့ထီၣ်ဝဲ တၢ်လုၢ်လီၢ်တခါ+ လၢယဟိဝၤယွၤ အဂီၢ် ဒီးဟ့ၣ်လုၢ်ထီၣ် တၢ်လုၢ်ဒွဲၣ်အူ ဒီးတၢ်လုၢ်အိၣ်ဃူအိၣ်ဖိးတဖၣ်လီၤ. ဒီးအဝဲကိးထီၣ် ယဟိဝၤယွၤ ဒီးယွၤစံးဆၢက့ၤအီၤ ခီဖျိ ဆှၢလီၤဝဲ မ့ၣ်အူလၢမူခိၣ် လၢအအီၣ်ကွံာ်ဝဲ တၢ်လုၢ်တၢ်ပာ်တဖၣ် လၢတၢ်လုၢ်လီၢ် အဖီခိၣ်လီၤ.+ ၂၇ ဝံၤဒီး ယဟိဝၤယွၤ မၤလိာ်ဝဲ မူခိၣ်ကလူးတဂၤန့ၣ်လၢ+ ကဂိာ်နုာ်က့ၤ အနးလၢ အတြိးပူၤလီၤ. ၂၈ မ့ၢ်လၢစီၤဒၤဝံး ထံၣ်ဘၣ်ဝဲလၢ ယဟိဝၤယွၤ စံးဆၢအီၤလၢ ပှၤယဘူၣ်ဖိ စီၤအၤရနၤ အကြဲၢ်ပူၤအဃိ အဝဲ လုၢ်ထီၣ်တၢ်ဖဲန့ၣ် ထီဘိလီၤ. ၂၉ ဖဲန့ၣ်အခါ ယဟိဝၤယွၤ အဒဲစီဆှံ လၢစီၤမိၤၡ့ တ့ထီၣ်ဝဲလၢ ပှၢ်မုၢ်ကနၢအပူၤ ဒီးတၢ်လုၢ်လီၢ် လၢတၢ်လုၢ်ဒွဲၣ်အူအဂီၢ်န့ၣ် အိၣ်ဝဲလၢ တၢ်လီၢ်ထီၣ်ထီ ဖဲဝ့ၢ်ကံးဘိၣ်န့ၣ်လီၤ.+ ၃၀ ဘၣ်ဆၣ် စီၤဒၤဝံး ပျံၤတၢ်ဒိၣ်မးခီဖျိလၢ ယဟိဝၤယွၤ အမူခိၣ်ကလူး အနးတဘ့ၣ်အဃိ အဝဲတလဲၤဝဲဖဲန့ၣ် ဒ်သိး အကသံကွၢ်တၢ်လၢ ကစၢ်ယွၤ အအိၣ်ဘၣ်.