၂ ကွဲးနီၣ်တၢ်
၁၆ ဖဲစီၤအၤစါ ပၢတၢ် ၃၆ နံၣ်တနံၣ်န့ၣ် အံၣ်စရ့လး အစီၤပၤဘါၡၤ+ လဲၤဒုးဝဲ ယူဒၤဘီမုၢ် ဒီးတ့ဂၢၢ်တ့ကျၢၤထီၣ်က့ၤဝဲ ဝ့ၢ်ရၤမါ+ ဒ်သိး ပှၤသုတလဲၤနုာ် ဒီးဟးထီၣ်လၢ ယူဒၤ အစီၤပၤအၤစါ အအိၣ်တဂ့ၤအဂီၢ်လီၤ.+ ၂ အဃိ စီၤအၤစါ ဟံးန့ၢ်ဝဲ စ့ညၣ် ဒီးထူလၢ အအိၣ်လၢ တၢ်လုၢ်ဒိၣ်ပှ့ၤဒိၣ်အလီၢ်လၢ ယဟိဝၤယွၤ အဟံၣ်ဒီး+ စီၤပၤအဟံၣ် ဒီးအဝဲဆှၢန့ၢ်ဝဲ ကီၢ်စူၤရံ အစီၤပၤဘ့ၣ်ဟဒး+ လၢအအိၣ်လၢ ဝ့ၢ်ဒၤမ့ၤစ့းန့ၣ်လီၤ. ဒီးစီၤအၤစါ တဲဝဲလၢ ၃ “လၢနပၢ် ဒီးယပၢ်အဘၢၣ်စၢၤ ဒီးလၢနၤဒီးယၤ အဘၢၣ်စၢၤန့ၣ် တၢ်အၢၣ်လီၤအီလီၤ အိၣ်ဝဲတခါ. ယဆှၢလီၤန့ၢ်နၤ စ့ညၣ် ဒီးထူလီၤ. ဒ်သိး အံၣ်စရ့လး အစီၤပၤဘါၡၤ ကဂုၤက့ၤအလီၢ်ခံအဂီၢ် ဟဲမၤဟးဂီၤကွံာ် နတၢ်အၢၣ်လီၤအီလီၤ ဒီးအီၤတက့ၢ်.”
၄ စီၤဘ့ၣ်ဟဒး မၤဝဲဒ် စီၤပၤအၤစါ တဲအီၤအသိး ဒီးဆှၢလီၤဝဲ အသုးခိၣ်တဖၣ် ဒ်သိး ကလဲၤဒုးဝဲ အံၣ်စရ့လး အဝ့ၢ်တဖၣ် အဂီၢ်လီၤ. ဒီးအဝဲသ့ၣ် မၤန့ၢ်ဝဲ ဝ့ၢ်ဧံၤယိၣ်,+ ဝ့ၢ်ဒၣ်,+ ဝ့ၢ်အၤဘ့ၤလးမဲၣ် ဒီးတၢ်ပာ်ဖှိၣ် တၢ်ဖိတၢ်လံၤအလီၢ် ခဲလၢာ်လၢ နးသၤလံ အဝ့ၢ်တဖၣ် အပူၤလီၤ.+ ၅ ဖဲစီၤဘါၡၤ နၢ်ဟူဝဲ တၢ်ဂ့ၢ်န့ၣ်အခါ အဝဲပတုာ်ကွံာ်ဝဲ တၢ်တ့ဂၢၢ်တ့ကျၢၤထီၣ်က့ၤ ဝ့ၢ်ရၤမါ တဘျီဃီ ဒီးတဆဲးတ့ထီၣ်ဝဲလၢၤဘၣ်. ၆ အဃိ စီၤပၤအၤစါ ကိးန့ၢ်ဝဲ ပှၤလၢအအိၣ်လၢ ယူဒၤဘီမုၢ်ပူၤ ကိးဂၤဒဲး ဒီးအဝဲသ့ၣ် က့ၤစိာ်ဝဲ လၢၢ်တဖၣ် ဒီးသ့ၣ်ဘၣ်တဖၣ် လၢအအိၣ်ဝဲလၢ ဝ့ၢ်ရၤမါအပူၤ+ လၢစီၤဘါၡၤ သူပာ်စၢၤဝဲ ဒီးစီၤပၤအၤစါ သူက့ၤအီၤ ဒ်သိးကတ့ဂၢၢ်တ့ကျၢၤထီၣ်က့ၤ+ ဝ့ၢ်က့ဘၤ+ ဒီးဝ့ၢ်မံးစပၤ အဂီၢ်လီၤ.+
၇ ဖဲန့ၣ်အခါ စီၤဃနၤနံ+ လၢအမ့ၢ် ပှၤထံၣ်တၢ်တဂၤ* လဲၤလၢ ယူဒၤအစီၤပၤ အၤစါအအိၣ် ဒီးတဲအီၤလၢ “နသန့ၤနသးလၢ စူၤရံအစီၤပၤ ဒီးနတသန့ၤနသးလၢ နကစၢ် ယဟိဝၤယွၤဘၣ်အဃိ စူၤရံအစီၤပၤ အသုးမုၢ် ထူၣ်ဖျဲးထီၣ်ကွံာ်လၢ နစုပူၤလံ.+ ၈ ပှၤအဲၤသံအီးပးဖိ ဒီးပှၤလံၤဘူဖိန့ၣ် အိၣ်ဒီး အသုးမုၢ်ဖးဒိၣ်, လ့ၣ်ကဟၣ်တဖၣ် ဒီးအသုးဒိးကသ့ၣ် ဒီဒူၣ်တမ့ၢ်ဧီၤ. ဘၣ်ဆၣ် ခီဖျိလၢ နသန့ၤနသးလၢ ယဟိဝၤယွၤအဃိ ကစၢ်ယွၤ ဟ့ၣ်လီၤကွံာ် ပှၤသ့ၣ်တဖၣ်န့ၣ်လၢ နစုပူၤလီၤ.+ ၉ ယဟိဝၤယွၤ အမဲာ်ဃုကွၢ်တၢ်လၢ ဟီၣ်ခိၣ်ဒီဘ့ၣ်ညါ+ ဒ်သိး ကသူအတၢ်စိတၢ်ကမီၤလၢ ကမၤစၢၤ ပှၤလၢအတီဒီးအီၤလၢ အသးဒီဖျၢၣ်လီၤ.+ ဘၣ်ဆၣ် နမၤနါစိၤဘၣ်တၢ်လံ အဃိ စးထီၣ်လၢ ခဲအံၤန့ၣ် ပှၤကဟဲဒုးနၤလီၤ.”+
၁၀ ဒီးစီၤအၤစါ သးဆါ ပှၤထံၣ်တၢ်တဂၤန့ၣ် ဒီးသးပှံၢ်ထီၣ်အီၤအဃိ ထၢနုာ်အီၤလၢ ဃိာ်ပူၤလီၤ. တကတီၢ်ဃီန့ၣ် အဝဲစးထီၣ် ဆီၣ်တံၢ်မၤနၢၤ ပှၤဂၤတဖၣ်လၢ ပှၤဂီၢ်မုၢ်အကျါ စ့ၢ်ကီးလီၤ. ၁၁ စီၤအၤစါ အဂ့ၢ် စးထီၣ်လၢအခီၣ်ထံး တုၤလၢအကတၢၢ်န့ၣ် ဘၣ်တၢ်ကွဲးလီၤအီၤလၢ ယူဒၤဒီးအံၣ်စရ့လး အစီၤပၤတဖၣ် အလံာ်ပူၤလီၤ.+
၁၂ ဖဲစီၤအၤစါ ပၢတၢ် ၃၉ နံၣ်တနံၣ်န့ၣ် တၢ်ဆါတခါ အိၣ်ထီၣ်လၢ အခီၣ်လိၤအဃိ လၢခံ အဝဲဆိးက့နးမးလီၤ. ဘၣ်ဆၣ် ဖဲအဆိးက့အခါဒၣ်လဲာ် အဝဲတဃ့ တၢ်မၤစၢၤလၢ ယဟိဝၤယွၤ အအိၣ်ဘၣ်, အဝဲဃ့ တၢ်မၤစၢၤလၢ ကသံၣ်သရၣ်တဖၣ်* အအိၣ်လီၤ. ၁၃ လၢခံ စီၤအၤစါ သံဝဲဒ် အမိၢ်ပၢ်ဖံဖု လၢပျၢၤတဖၣ်အသိးလီၤ.+ အဝဲသံဝဲဖဲ အပၢတၢ် ၄၁ နံၣ်အနံၣ်လီၤ. ၁၄ အဃိ ပှၤပာ်လီၤအီၤလၢ လီၢ်မံတခါအလိၤလၢ အပှဲၤဝဲဒီး သ့ၣ်စရံအထုး ဒီးတၢ်နၢမူနၢဆှီ အကလုာ်ကလုာ် ဃါဃုာ်အသး ဒ်သိနၢမူလီၤလီၤဆီဆီ တခါအသိးလီၤ.+ ဒီးပှၤခူၣ်လီၤအီၤလၢ အသွၣ်ခိၣ်လၢ အလီၤဘီလီၤမုၢ် လၢအခူၣ်လီၤပာ်ဝဲ လၢအနီၢ်ကစၢ်အဂီၢ် ဖဲစီၤဒၤဝံး အဝ့ၢ်ပူၤလီၤ.+ ဒီးအဝဲသ့ၣ် မၤကဲၤထီၣ် မ့ၣ်အူဖးဒိၣ်တပူၣ် ဒ်သိး ကမၤလၤကပီၤအီၤ အဂီၢ်လီၤ.