၂ ကွဲးနီၣ်တၢ်
၁၈ စီၤယဟိၤၡၤဖး အိၣ်ဒီး တၢ်ထူးတၢ်တီၤ ဒီးတၢ်လၤကပီၤ အါအါဂီၢ်ဂီၢ်+ ဘၣ်ဆၣ် အဝဲရဲၣ်ကျဲၤဝဲလၢ ပှၤလၢအဟံၣ်ဖိဃီဖိ အကျါတဂၤဂၤ ကဆီဟံၣ်ဆီဃီဒီး ပှၤလၢ စီၤအၤဃာ် အဟံၣ်ဖိဃီဖိ အကျါတဂၤဂၤလီၤ.+ ၂ တဘျုးနံၣ် ဝံၤအလီၢ်ခံ စီၤယဟိၤၡၤဖး လဲၤလၢ စီၤအၤဃာ် အအိၣ် လၢဝ့ၢ်ၡၤမရံန့ၣ်လီၤ.+ ဒီးစီၤအၤဃာ် လုၢ်ထီၣ်ဝဲ သိဒီးကျီၢ် အါအါဂီၢ်ဂီၢ် လၢစီၤယဟိၤၡၤဖး ဒီးပှၤလၢအဟဲ ဃုာ်ဒီးအီၤတဖၣ် အဂီၢ်လီၤ. ဒီးစီၤအၤဃာ် ဟ့ၣ်သဆၣ်ထီၣ်အီၤလၢ အကလဲၤဒုးဝဲ ဝ့ၢ်ရၤမိးကံးလဧးလီၤ.+ ၃ ဝံၤဒီး အံၣ်စရ့လး အစီၤပၤအၤဃာ် တဲဘၣ် ယူဒၤ အစီၤပၤယဟိၤၡၤဖးလၢ “နကလဲၤပိာ်ယခံလၢ ဝ့ၢ်ရၤမိးကံလဧးဧါ.” စီၤယဟိၤၡၤဖး တဲဆၢအီၤလၢ “ယၤဒီးနၤန့ၣ် မ့ၢ်ဒ်သိးသိး, ယပှၤဂီၢ်မုၢ်န့ၣ် မ့ၢ်နပှၤဂီၢ်မုၢ် ဒီးယကမၤစၢၤနၤလၢ တၢ်ဒုးပူၤလီၤ.”
၄ ဘၣ်ဆၣ် စီၤယဟိၤၡၤဖးတဲဘၣ် အံၣ်စရ့လး အစီၤပၤလၢ “ဝံသးစူၤ သံကွၢ်ဆိ ယဟိဝၤယွၤတက့ၢ်.”+ ၅ အဃိ အံၣ်စရ့လး အစီၤပၤ ကိးဖှိၣ် ဝံတဖၣ် ဒီးအဝဲသ့ၣ် အိၣ်ဝဲအဂၤ ၄၀၀ ဒီးအသံကွၢ်အဝဲသ့ၣ်လၢ “မ့ၢ်ယကဘၣ် လဲၤထီၣ်ဒုး ဝ့ၢ်ရၤမိးကံးလဧးဧါ, တဘၣ်လဲၤဘၣ်ဧါ.” အဝဲသ့ၣ် တဲဝဲလၢ “လဲၤထီၣ်ဟီ, ယွၤလၢအမ့ၢ်အတီတဂၤ ကဟ့ၣ်လီၤဝ့ၢ်လၢ နစုပူၤလီၤ.”
၆ ဒီးစီၤယဟိၤၡၤဖး တဲဝဲလၢ “ဖဲအံၤ ယဟိဝၤယွၤ အဝံတအိၣ်နီတဂၤဧီၤ.+ ပကသံကွၢ်တၢ်လၢအီၤ စ့ၢ်ကီးမီၤ.”+ ၇ ဒီးအံၣ်စရ့လး အစီၤပၤတဲ စီၤယဟိၤၡၤဖးလၢ “ပှၤပိာ်ခွါလၢ ကသံကွၢ်န့ၢ်ပှၤတၢ်လၢ ယဟိဝၤယွၤအအိၣ်န့ၣ် အိၣ်တဂၤဒံး.+ ဘၣ်ဆၣ် အဝဲမ့ၢ်တဲတၢ် ဒ်ဝံအသိး လၢအဘၣ်ဃးဒီးယၤန့ၣ် တဂ့ၤနီတဘျီဘၣ်. အဝဲတဲဝဲထဲ အအၢထီဘိလီၤ.+ အဃိ ယသးဟ့အီၤ. အဝဲမ့ၢ် စီၤယံးမလၤ အဖိခွါ စီၤမံၤကါယၤလီၤ.” ဒီးစီၤယဟိၤၡၤဖး တဲဝဲလၢ “စီၤပၤန့ၣ် တကြၢးတဲတၢ် ဒ်န့ၣ်ဘၣ်.”
၈ ဒီးအံၣ်စရ့လး အစီၤပၤကိးန့ၢ်ဝဲ ပဒိၣ်ဖးဒိၣ်တဂၤ ဒီးတဲအီၤလၢ “ဟဲက့ၤကိးန့ၢ်ယၤ စီၤယံးမလၤ အဖိခွါ စီၤမံၤကါယၤ မ့ၢ်ချ့.”+ ၉ ဒီးအံၣ်စရ့လး အစီၤပၤ ဒီးယူဒၤအစီၤပၤယဟိၤၡၤဖး ကူကၤဝဲ စီၤပၤ အတၢ်ကူတၢ်ကၤတဖၣ် ဒီးအဝဲသ့ၣ် ဆ့ၣ်နီၤလၢ အနီၢ်ကစၢ် အလီၢ်ပစိာ်အဖီခိၣ် ဖဲကြဲၢ်လၢ အအိၣ်ဝဲလၢ ဝ့ၢ်ၡၤမရံ အတြဲၤအကျဲနုာ်လီၤ န့ၣ်လီၤ. ဒီးဝံတဖၣ်န့ၣ် တဲတၢ်ဒ်ဝံအသိး ကိးဂၤဒဲး လၢအဝဲသ့ၣ် အမဲာ်ညါလီၤ. ၁၀ ဝံၤဒီး စီၤကနၤနါ အဖိခွါ စီၤစံးဒကံယၤ တ့ထီၣ်ဝဲ တၢ်အနၢၤတဖၣ်လၢထး ဒီးတဲဝဲလၢ “ယဟိဝၤယွၤ တဲဝဲဒ်အံၤ, ‘နကဆီၣ်ဖျိးကွံာ် ပှၤစူၤရံဖိလၢ တၢ်အနၢၤတဖၣ်အံၤတုၤလၢ အဝဲသ့ၣ် လီၤမၢ်ကွံာ် ခဲလၢာ်လီၤ.’” ၁၁ ဒီးဝံအဂၤတဖၣ်န့ၣ် တဲတၢ်ဒ်ဝံအသိး တမံၤဃီကိးဂၤဒဲး ဒီးတဲဝဲလၢ “ယဟိဝၤယွၤ ကဟ့ၣ်လီၤ ဝ့ၢ်ရၤမိးကံးလဧး လၢစီၤပၤအစုပူၤလီၤ. အဃိ လဲၤထီၣ်ဒုးန့ၢ် ဝ့ၢ်ရၤမိးကံးလဧးဟီ, နကမၤနၢၤတၢ်လီၤ.”+
၁၂ ဒီးပှၤစိာ်တၢ်ကစီၣ်ဖိတဂၤ လၢအလဲၤကိးန့ၢ် စီၤမံၤကါယၤန့ၣ် တဲစီၤမံၤကါယၤလၢ “ဝံတဖၣ် တဲစီၤပၤ တၢ်လၢအဂ့ၤတခီ ကိးဂၤဒဲးလီၤ. ဝံသးစူၤ တၢ်လၢနကတဲသ့ၣ်တဖၣ်န့ၣ် မ်အကလီၤဂာ် ဒ်တၢ်လၢအဝဲသ့ၣ် တဲပာ်စၢၤဝဲ+ ဒီးမ်နကတဲ တၢ်လၢအဂ့ၤတခီတက့ၢ်.”+ ၁၃ ဘၣ်ဆၣ် စီၤမံၤကါယၤ တဲဝဲလၢ “ယအၢၣ်လီၤတၢ်လၢ ယဟိဝၤယွၤ အမဲာ်ညါလၢ တၢ်တမံၤဂ့ၤတမံၤဂ့ၤလၢ ယကစၢ်ယွၤ တဲယၤန့ၣ် ယကတဲလီၤ.”+ ၁၄ ဒီးစီၤမံၤကါယၤ ဟဲနုာ်လၢ စီၤပၤအအိၣ် ဒီးစီၤပၤသံကွၢ်အီၤလၢ “စီၤမံၤကါယၤဧၢ, မ့ၢ်ပကဘၣ် လဲၤထီၣ်ဒုး ဝ့ၢ်ရၤမိးကံးလဧးဧါ, တဘၣ်လဲၤဘၣ်ဧါ.” တဘျီဃီန့ၣ် စီၤမံၤကါယၤ တဲဆၢက့ၤဝဲလၢ “အဝဲသ့ၣ် ကဘၣ်တၢ်ဟ့ၣ်လီၤအီၤ လၢနစုပူၤလီၤ. အဃိ လဲၤထီၣ်ဟီ, နကမၤနၢၤတၢ်လီၤ.” ၁၅ ဒီးစီၤပၤ တဲအီၤလၢ “ဒ်သိး နကတဲယၤ ထဲတၢ်မ့ၢ်တၢ်တီလၢ ယဟိဝၤယွၤ အမံၤပူၤအဂီၢ် ယကဘၣ်မၢ နအၢၣ်လီၤဆိတၢ် ပှဲၤဘျီလဲၣ်.” ၁၆ အဃိ စီၤမံၤကါယၤ တဲဝဲလၢ “ယထံၣ်လၢ ပှၤအံၣ်စရ့လးဖိခဲလၢာ် လီၤမုၢ်ပြံပြါ လၢကစၢၢ်ကလိကျါ ဒ်သိလၢ ပှၤကွၢ်ထွဲအီၤ တအိၣ်ဘၣ်အသိးလီၤ.+ ဒီးယဟိဝၤယွၤ တဲဝဲလၢ ‘ပှၤသ့ၣ်တဖၣ်အံၤ အကစၢ်တအိၣ်ဘၣ်. မ်အဝဲသ့ၣ် တဂၤစုာ်စုာ် က့ၤကဒါက့ၤလၢ အဟံၣ်မုာ်မုာ်တက့ၢ်.’”
၁၇ ဒီးအံၣ်စရ့လး အစီၤပၤတဲဘၣ် စီၤယဟိၤၡၤဖးလၢ “ယတဲနၤလံတမ့ၢ်ဧီၤ ‘အဝဲမ့ၢ်တဲတၢ်ဒ် ဝံအသိး လၢအဘၣ်ဃးဒီးယၤန့ၣ် အတတဲဝဲ လၢအဂ့ၤဘၣ်. အဝဲတဲဝဲထဲ အအၢလီၤ.’”+
၁၈ ဝံၤဒီးစီၤမံၤကါယၤ တဲဝဲလၢ “ခဲအံၤန့ၣ် ဒိကနၣ်တၢ်လၢ ယဟိဝၤယွၤ တဲဝဲန့ၣ်တက့ၢ်. ယထံၣ်တ့ၢ် ယဟိဝၤယွၤ ဆ့ၣ်နီၤလၢ အလီၢ်ပစိာ်အဖီခိၣ်+ ဒီးမူခိၣ်အသုးမုၢ်ခဲလၢာ်+ ဆၢထၢၣ်ဘူးဒီးအီၤ လၢအစ့ၣ် ဒီးလၢအထွဲလီၤ.+ ၁၉ ဒီးယဟိဝၤယွၤ တဲဝဲလၢ ‘မတဂၤကလဲၤ ကွဲန့ၢ်လွဲန့ၢ် အံၣ်စရ့လး အစီၤပၤအၤဃာ် ဒ်သိး အဝဲကလဲၤထီၣ်ဒုးတၢ်လၢ ဝ့ၢ်ရၤမိးကံးလဧး ဒီးသံဖဲန့ၣ်လဲၣ်.’ ဒီးမူခိၣ်ကလူးတဂၤ တဲဝဲတမံၤ ဒီးလၢအဝဲတဂၤ တဲဝဲလၢ အဂၤတမံၤလီၤ. ၂၀ ဒီးမူခိၣ်ကလူး*+ တဂၤ ဟဲဆၢထၢၣ်လၢ ယဟိဝၤယွၤ အမဲာ်ညါ ဒီးတဲဝဲလၢ ‘ယကလဲၤ ကွဲန့ၢ်လွဲန့ၢ်အီၤ.’ ဒီးယဟိဝၤယွၤ သံကွၢ်အီၤလၢ ‘နကကွဲန့ၢ်လွဲန့ၢ် အီၤဒ်လဲၣ်.’ ၂၁ မူခိၣ်ကလူးတဂၤန့ၣ် တဲဆၢဝဲလၢ ‘ယကလဲၤမၤဒ်သိး စီၤအၤဃာ် အဝံ ကိးဂၤဒဲး ကတဲလံၣ်တဲလီတၢ် အဂီၢ်လီၤ.’ အဃိ ကစၢ်ယွၤ တဲဝဲလၢ ‘နကကွဲန့ၢ်လွဲန့ၢ်အီၤ ဒီးတကးဒံးဘၣ်န့ၣ် နကမၤနၢၤတၢ်လီၤ. အဃိ လဲၤမၤဒ်န့ၣ် အသိးတက့ၢ်.’ ၂၂ လၢတၢ်န့ၣ်အဃိ ခဲအံၤန့ၣ် ယဟိဝၤယွၤ မၤဒ်သိးနဝံတဖၣ်အံၤ ကတဲလံၣ်တဲလီတၢ် ကိးဂၤဒဲးလံ.+ ဒီးအနီၢ်ကီၢ်န့ၣ် ယဟိဝၤယွၤ တဲဝဲလၢ နကထံၣ်ဘၣ် တၢ်နးတၢ်ဖှီၣ်လီၤ.”
၂၃ ဒီးစီၤကနၤနါ အဖိခွါ စီၤစံးဒကံယၤ+ လဲၤဃီၤလၢ စီၤမံၤကါယၤ+ အအိၣ် ဒီးဒဲအမဲာ်သၣ်+ ဒီးတဲဝဲလၢ “မ့မ့ၢ်ဒ်န့ၣ်န့ၣ် ယဟိဝၤယွၤ အသးစီဆှံ ဟးထီၣ်လၢ ယအိၣ် ဒီးလဲၤလၢနအိၣ် ဒ်သိးအကတဲတၢ်ဒီးနၤ အဂီၢ်လီၤဧါ. အလဲၤကျဲ ဖဲလဲၣ်တဘိလဲၣ်.”+ ၂၄ စီၤမံၤကါယၤ တဲဆၢဝဲလၢ “အလဲၤကျဲ ဖဲလဲၣ်တဘိလဲၣ်န့ၣ် နကသ့ၣ်ညါဘၣ် ဖဲမုၢ်နံၤလၢ နလဲၤနုာ်အိၣ်ခူသူၣ်လၢ ဒၢးလၢတၢ်လီၢ်ခံတဖျၢၣ် အပူၤအခါန့ၣ်လီၤ.” ၂၅ ဝံၤဒီး အံၣ်စရ့လး အစီၤပၤတဲဝဲလၢ “လဲၤကိးစီၤမံၤကါယၤ ဒီးလဲၤဟ့ၣ်လီၤအီၤလၢ ဝ့ၢ်အပဒိၣ်ဖးဒိၣ် စီၤအၤမိၣ် ဒီးစီၤပၤအဖိခွါ စီၤယိးအၣ် အအိၣ်တက့ၢ်. ၂၆ တဲဘၣ်အဝဲသ့ၣ်လၢ ‘စီၤပၤတဲဝဲဒ်အံၤ, “ပၢနုာ်ပှၤတဂၤအံၤလၢ ဃိာ်ပူၤ+ ဒီးဒုးအီၣ်ဒုးအီအီၤလၢ ကိၣ်ဒီးထံ ထဲတစဲးဖိတုၤလၢ ယဟဲက့ၤကဒါ မုာ်မုာ်တက့ၢ်.”’” ၂၇ ဘၣ်ဆၣ် စီၤမံၤကါယၤ တဲဝဲလၢ “နမ့ၢ်ဟဲက့ၤမုာ်မုာ်န့ၣ် အခီပညီမ့ၢ်ဝဲဒၣ် ယဟိဝၤယွၤ တတဲတၢ် ခီဖျိယၤဘၣ်.”+ ဒီးအဝဲဆဲးတဲဝဲလၢ “သုဝဲကိးဂၤဒဲး, ပာ်သူၣ်ပာ်သးနီၤ.”
၂၈ အဃိ အံၣ်စရ့လး အစီၤပၤ ဒီးယူဒၤ အစီၤပၤယဟိၤၡၤဖး လဲၤထီၣ်လၢ ဝ့ၢ်ရၤမိးကံးလဧးလီၤ.+ ၂၉ အံၣ်စရ့လး အစီၤပၤ တဲဘၣ် စီၤယဟိၤၡၤဖးလၢ “ယကမၤလီၤဆီထီၣ်ယသး ဒီးလဲၤလၢ တၢ်ဒုးပျီအပူၤလီၤ. မ့မ့ၢ်နၤန့ၣ် နကဘၣ်ကၤထီၣ် စီၤပၤ အတၢ်ကူတၢ်ကၤလီၤ.” အဃိ အံၣ်စရ့လး အစီၤပၤ မၤလီၤဆီထီၣ်အသး ဒီးအဝဲသ့ၣ် လဲၤလၢ တၢ်ဒုးပျီပူၤလီၤ. ၃၀ ဒီးစူၤရံအစီၤပၤ မၤလိာ်ပာ်စၢၤ လ့ၣ်ကဟၣ် အသုးခိၣ်တဖၣ်လၢ “ပှၤအဒိၣ်မ့ၢ်ဂ့ၤ အဆံးမ့ၢ်ဂ့ၤ တဘၣ်ဒုးနီတဂၤတဂ့ၤ. ဒုးထဲအံၣ်စရ့လး အစီၤပၤတဂၤ တက့ၢ်.” ၃၁ ဒီးဖဲလ့ၣ်ကဟၣ် အသုးခိၣ်တဖၣ် ထံၣ်ဝဲ စီၤယဟိၤၡၤဖးအခါ အဝဲသ့ၣ် တဲလီၤအသးလၢ “ပှၤတဂၤအံၤ ကဲအံၣ်စရ့လး အစီၤပၤလီၤ.” အဃိ အဝဲသ့ၣ် လဲၤဒုးအီၤ ဒီးစီၤယဟိၤၡၤဖး ကိးပသူထီၣ်လၢ တၢ်မၤစၢၤအဂီၢ်လီၤ.+ ယဟိဝၤယွၤ မၤစၢၤအီၤ ဒီးထိၣ်ဟူးထိၣ်ဂဲၤထီၣ် ပှၤသ့ၣ်တဖၣ်န့ၣ်လၢ ကဃၣ်ကွံာ်အသး လၢအီၤတဘျီဃီလီၤ. ၃၂ ဒီးဖဲလ့ၣ်ကဟၣ် အသုးခိၣ်တဖၣ် ထံၣ်ဘၣ်ဝဲလၢ အတမ့ၢ် အံၣ်စရ့လး အစီၤပၤဘၣ်အခါ အဝဲသ့ၣ် တလူၤစီၤပၤ ယဟိၤၡၤဖးလၢၤဘၣ်.
၃၃ ဘၣ်ဆၣ် ပှၤတဂၤခးပျၢ်တဘိ ဒီးပျၢ်တဘိန့ၣ် လဲၤဘၣ် အံၣ်စရ့လး အစီၤပၤ ဖဲအဆ့ကၤထး အသဘျံးတဖၣ် အကဆူးလီၤ. အဃိ စီၤပၤတဲဘၣ် ပှၤလၢအနီအလ့ၣ်ကဟၣ်တဂၤလၢ “ယဘၣ်ဒိဖးနးလံ. ဃၣ်ကွံာ်လ့ၣ်ကဟၣ် ဒီးဒုးဟးထီၣ်ယၤလၢ တၢ်ဒုးပျီပူၤတက့ၢ်.”+ ၃၄ ဖဲတၢ်တနံၤန့ၣ် တၢ်ဒုးဆူၣ်ဒိၣ်မး ဒီးပှၤပိာ်ဆၢထၢၣ် အံၣ်စရ့လး အစီၤပၤလၢ လ့ၣ်ကဟၣ်အပူၤ ဒီးအမဲာ်ဃၣ်ဃီၤအသးလၢ ပှၤစူၤရံဖိ အအိၣ်တခီ တုၤလီၤလၢ မုၢ်ဟါလီၤ ဒီးဖဲမုၢ်လီၤနုာ်န့ၣ် အဝဲသံဝဲလီၤ.+