၂ ကွဲးနီၣ်တၢ်
၂ စီၤၡလိၤမိၤ ဟ့ၣ်လီၤတၢ်ကလုၢ်လၢ ပှၤကတ့ထီၣ် ဟံၣ်တဖျၢၣ်လၢ ယဟိဝၤယွၤ အမံၤအဂီၢ်+ ဒီးဟံၣ်တဖျၢၣ်လၢ အဘီမုၢ် အဂီၢ်လီၤ.+ ၂ စီၤၡလိၤမိၤ ဃုထၢထီၣ်ဝဲ ပှၤအဂၤ ၇၀,၀၀၀ လၢအဝံတၢ်ယိးတၢ်ဃၢတဖၣ် ဒီးပှၤဘူးတဲာ်လၢၢ် အဂၤ ၈၀,၀၀၀ လၢကစၢၢ်ကျါ+ ဒီးပှၤအဂၤ ၃,၆၀၀ လၢကတီခိၣ်ရိၤမဲဝဲ အဝဲသ့ၣ်န့ၣ်လီၤ.+ ၃ တကးဒံးဘၣ် စီၤၡလိၤမိၤ ဆှၢလီၤတၢ်ကစီၣ်လၢ ဝ့ၢ်စိၢ်အစီၤပၤဃံရၣ်+ အအိၣ်လၢ “ဒ်နဆှၢလီၤန့ၢ် ယပၢ်စီၤဒၤဝံးလၢ သ့ၣ်ဆှိအ့ရ့း လၢအကတ့ထီၣ် ဟံၣ်တဖျၢၣ်လၢ အကအိၣ်ဝဲလၢအပူၤအဂီၢ် အသိး ဆှၢလီၤန့ၢ်ယၤ စ့ၢ်ကီးတက့ၢ်.+ ၄ ခဲအံၤ ယကသူၣ်ထီၣ် ဟံၣ်တဖျၢၣ်လၢ ယကစၢ် ယဟိဝၤယွၤ အမံၤအဂီၢ် ဒီးယကပာ်စီဆှံ ဟံၣ်တဖျၢၣ်အံၤလၢ ယွၤအဂီၢ်လီၤ. ဒီးဖဲန့ၣ် ပှၤလုၢ်တၢ်ဒိၣ်တဖၣ် ကဒွဲၣ်ထီၣ် တၢ်နၢမူလၢ+ ယွၤအမဲာ်ညါ, ကပာ်လီၤကိၣ်လၢ အဘၣ်တၢ်ပာ်လီၤအီၤ* ထီဘိ+ ဒီးကလုၢ်ထီၣ် တၢ်လုၢ်ဒွဲၣ်အူတဖၣ်လၢ ဂီၤခီမ့ၢ်ဂ့ၤ, ဟါခီမ့ၢ်ဂ့ၤ,+ ဖဲမုၢ်အိၣ်ဘှံးနံၤမ့ၢ်ဂ့ၤ,+ လါထီၣ်သီမ့ၢ်ဂ့ၤ+ ဒီးဖဲပကစၢ် ယဟိဝၤယွၤ အဘူၣ်တဖၣ် ဘၣ်ဝဲအဆၢကတီၢ်လီၤ.+ အဝဲန့ၣ် မ့ၢ်မူဒါလၢ ပှၤအံၣ်စရ့လးဖိ အဂီၢ်ထီဘိလီၤ. ၅ ပကစၢ်ယွၤန့ၣ် ဒိၣ်န့ၢ်ဒံး ယွၤအဂၤခဲလၢာ်အဃိ ဟံၣ်လၢယကသူၣ်ထီၣ် တဖျၢၣ်န့ၣ် ကမ့ၢ်ဝဲဟံၣ်ဖးဒိၣ်တဖျၢၣ်လီၤ. ၆ အဃိ မတဂၤသူၣ်ထီၣ်န့ၢ်အီၤ ဟံၣ်တဖျၢၣ် ကသ့တဂၤလဲၣ်. မူခိၣ်လၢအလဲၢ်အထီအံၤဒၣ်လဲာ် အအိၣ်ဝဲတတြီၢ်ဘၣ်+ အဃိ ယသူၣ်ထီၣ်ဟံၣ်တဖျၢၣ်လၢ အကအိၣ်ဝဲအဂီၢ်ကသ့ဒ်လဲၣ်. အိၣ်ဒၣ်ယကတ့ထီၣ်ဟံၣ်လၢ ပှၤကဒွဲၣ်ခုၣ်ထီၣ်တၢ်လုၢ်တဖၣ် လၢအအိၣ်လီၤ. ၇ ခဲအံၤန့ၣ် ဆှၢလီၤန့ၢ်ယၤ ပှၤစုသ့တဂၤလၢ အမၤတၢ်ဘၣ်ဃးဒီး ထူ, စ့ညၣ်, တိၢ်ဘီ,+ ထး, သိဆူၣ်လၢ အလွဲၢ်လုး, လုၣ်လၢ အလွဲၢ်ဂီၤ ဒီးလုၣ်လၢ အလွဲၢ်လါအဲးတက့ၢ်. ဒီးအဝဲကဘၣ်မ့ၢ် ပှၤလၢအစိးပျၤတၢ်သ့ တဂၤလီၤ. အဝဲကမၤတၢ်လၢ ယူဒၤအဘီမုၢ် ဒီးဝ့ၢ်ယရူၤၡလ့ၣ်အပူၤ ဒီးအဝဲကမၤသကိးတၢ်ဒီး ယပှၤစုသ့တဖၣ်လၢ ယပၢ်စီၤဒၤဝံး ဃုထၢတ့ၢ်ဝဲန့ၣ်လီၤ.+ ၈ ဒီးဆှၢန့ၢ်ယၤ သ့ၣ်ဆှိအ့ရ့း, သ့ၣ်ကၠူနံးဖၢၤ+ ဒီးသ့ၣ်အလၤမူး အသ့ၣ်ဘၣ်+ လၢအအိၣ်လၢ လဘၤနိၣ် ကစၢၢ်ကလိကျါတက့ၢ်. ယသ့ၣ်ညါလၢ နခ့နပှၤတဖၣ် ကူာ်လီၤ လဘၤနိၣ် အသ့ၣ်တဖၣ် သ့ဂ့ၤဂ့ၤလီၤ.+ ယခ့ယပှၤတဖၣ် ကမၤသကိးတၢ်ဒီး နခ့နပှၤတဖၣ်လီၤ.+ ၉ ဒီးအဝဲသ့ၣ် ကကတဲာ်ကတီၤန့ၢ်ယၤ သ့ၣ်ဘၣ်အါအါဂီၢ်ဂီၢ် မ့ၢ်လၢ ဟံၣ်တဖျၢၣ်လၢ ယကသူၣ်ထီၣ်န့ၣ် မ့ၢ်ဝဲဟံၣ်ဖးဒိၣ်ဖးထီ တဖျၢၣ်အဃိလီၤ. ၁၀ ဒီးယကဟ့ၣ်လီၤ နခ့နပှၤ ပှၤကူာ်သ့ၣ်ဖိတဖၣ် တၢ်အီၣ်တၢ်အီ+ လၢအမ့ၢ် ဘုကၠူၣ်အကိၢ်* ၂၀,၀၀၀, ဘုမုယီၤအကိၢ်* ၂၀,၀၀၀, စပံးထံအဘၤသၤ* ၂၀,၀၀၀ ဒီးသိအဘၤသၤ ၂၀,၀၀၀ လီၤ.”
၁၁ ဒီးစိၢ်အစီၤပၤဃံရၣ် ဆှၢလီၤဝဲ လံာ်ပရၢလၢ စီၤၡလိၤမိၤ အအိၣ်လၢ “ယဟိဝၤယွၤ အဲၣ်အပှၤဂီၢ်မုၢ် အဃိ အဝဲဒုးကဲထီၣ်နၤလၢ အဝဲသ့ၣ်အစီၤပၤလီၤ.” ၁၂ ဒီးစီၤဃံရၣ် တဲဝဲလၢ “မ်အံၣ်စရ့လး အကစၢ် ယဟိဝၤယွၤ လၢအတ့လီၤ မူခိၣ်ဒီးဟီၣ်ခိၣ်န့ၣ် ဘၣ်တၢ်စံးထီၣ်ပတြၢၤ အီၤတက့ၢ်, မ့ၢ်လၢ အဟ့ၣ် စီၤပၤဒၤဝံးလၢ ဖိခွါလၢ အကူၣ်တၢ်သ့တဂၤ+ လၢအအိၣ်ဒီး တၢ်ကူၣ်တၢ်ဆး ဒီးတၢ်နၢ်ပၢၢ်+ ဒီးအဝဲကတ့ထီၣ် ဟံၣ်တဖျၢၣ်လၢ ယဟိဝၤယွၤအဂီၢ် ဒီးဟံၣ်တဖျၢၣ်လၢ အဘီမုၢ်အဂီၢ် အဃိလီၤ. ၁၃ ခဲအံၤ ယကဆှၢလီၤ စီၤဃူရၣ်အဘံ+ လၢအမ့ၢ် ပှၤစုသ့ဖိလၢအဖၠဲး လၢအမၤတၢ်သ့ဂ့ၤဂ့ၤတဂၤလီၤ. ၁၄ အမိၢ်မ့ၢ်ဝဲ ပှၤဒၣ်ဖိ ဒီးအပၢ်မ့ၢ်ဝဲ ပှၤစိၢ်ဖိလီၤ. စီၤဃူရၣ်အဘံ အိၣ်ဒီး တၢ်သ့တၢ်ဘၣ်အါမးလၢ အဘၣ်ဃးဒီး ထူ, စ့ညၣ်, တိၢ်ဘီ, ထး, လၢၢ်, သ့ၣ်ဘၣ်, သိဆူၣ်လၢ အလွဲၢ်လုး, လုၣ်လၢ အလွဲၢ်လါအဲး, တၢ်ကံးညာ်လၢအဂ့ၤ ဒီးလုၣ်လၢ အလွဲၢ်ဂီၤလီၤ.+ အဝဲစိးပျၤတၢ်သ့ကိးကလုာ်ဒဲး ဒီးအကူၣ်ထီၣ်ဖးလီၤတၢ်လၢ အကတ့ထီၣ်တၢ် ဃံဃံလၤလၤအဂီၢ် သ့ဝဲကိးမံၤဒဲးလီၤ.+ အဝဲကမၤသကိးတၢ်ဒီး နပှၤစုသ့ဖိ ဒီးနပၢ်စီၤဒၤဝံး အပှၤစုသ့ဖိလၢ အအိၣ်ဒီး တၢ်သ့တၢ်ဘၣ်တဖၣ်လီၤ. ၁၅ ကစၢ်ဧၢ, ဆှၢလီၤ ဘုကၠူၣ်, ဘုမုယီၤ, သိ ဒီးစပံးထံ ဒ်နအၢၣ်လီၤပှၤ အသိးတက့ၢ်.+ ၁၆ ဒီးပကကူာ်လီၤ သ့ၣ်လၢ လဘၤနိၣ်+ ပှဲၤသိးဒီး နလိၣ်ဘၣ်အသိး ဒီးပကထိၣ်ထွံလီၤအီၤ လၢနအိၣ် ဒ်ထိအသိး လၢပီၣ်လဲၣ်ပူၤ ဆူယၤဖိၤန့ၣ်လီၤ.+ ဒီးနကဘၣ်က့ၤစိာ်အီၤဆူ ဝ့ၢ်ယရူၤၡလ့ၣ်လီၤ.”+
၁၇ စီၤၡလိၤမိၤ ဂံၢ်ဝဲ ပှၤပိာ်ခွါကိးဂၤဒဲး လၢအမ့ၢ် ပှၤထံဂၤကီၢ်ဂၤဖိလၢ ကီၢ်အံၣ်စရ့လးအပူၤ+ ဒ်အပၢ်စီၤဒၤဝံး မၤတ့ၢ်ဝဲအသိး+ ဒီးအဝဲသ့ၣ် အိၣ်ဝဲအဂၤ ၁၅၃,၆၀၀ လီၤ. ၁၈ လၢအဝဲသ့ၣ်အကျါန့ၣ် စီၤၡလိၤမိၤ ဟ့ၣ်လီၤမူဒါလၢ ပှၤအဂၤ ၇၀,၀၀၀ လၢကဝံတၢ်ယိးတၢ်ဃၢ ဒီးပှၤအဂၤ ၈၀,၀၀၀ လၢကဘူးတဲာ်လၢၢ်+ လၢကစၢၢ်ကျါအဂီၢ်လီၤ. ဒီးအဝဲဟ့ၣ်လီၤ မူဒါလၢ ပှၤအဂၤ ၃,၆၀၀ လၢကတီခိၣ်ရိၤမဲဝဲ ပှၤမၤတၢ်ဖိတဖၣ်လီၤ.+