၂ ကွဲးနီၣ်တၢ်
၂၂ ဒီးမ့ၢ်လၢ သုးဖိတဒူၣ်လၢ အဟဲပိာ် ပှၤဧ့ရ့းဖိတဖၣ်အခံ တုၤလၢ ယူဒၤဘီမုၢ်န့ၣ် မၤသံ စီၤယဟိရၣ် အဖိခွါလၢအဒိၣ် ကိးဂၤဒဲးအဃိ+ ပှၤလၢအအိၣ်ဝဲလၢ ဝ့ၢ်ယရူၤၡလ့ၣ် အပူၤတဖၣ် ဒုးကဲထီၣ် စီၤယဟိရၣ် အဖိခွါသဒါ စီၤအဃၤစယၤလၢ စီၤပၤလၢ စီၤယဟိရၣ် အလီၢ်လီၤ. အဃိ စီၤယဟိရၣ် အဖိခွါ စီၤအဃၤစယၤ စးထီၣ်ပၢတၢ် ဒ်ယူဒၤဘီမုၢ် အစီၤပၤအသိးလီၤ.+ ၂ ဖဲစီၤအဃၤစယၤ ကဲထီၣ်စီၤပၤအခါ အသးနံၣ်အိၣ်ဝဲ ၂၂ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ တနံၣ်လီၤ. အမိၢ်အမံၤ မ့ၢ်ဝဲ နီၢ်ဧသၤလယၤ+ လၢအမ့ၢ် စီၤဧိၣ်ရံၤ အလံၤမုၣ်*+ န့ၣ်လီၤ.
၃ စီၤအဃၤစယၤ စ့ၢ်ကီး အိၣ်မူပိာ်ထွဲဒ် စီၤအၤဃာ် အဒူၣ်ဖိထၢဖိ မၤဝဲအသိး,+ မ့ၢ်လၢ အမိၢ်ကဲထီၣ် ပှၤဟ့ၣ်ကူၣ်ဟ့ၣ်ဖးအီၤ လၢအကမၤ တၢ်အၢအဃိလီၤ. ၄ ဖဲစီၤအဃၤစယၤ အပၢ် သံဝံၤအလီၢ်ခံ စီၤအၤဃာ် အဒူၣ်ဖိထၢဖိ ကဲထီၣ် ပှၤလၢ အဟ့ၣ်ကူၣ်ဟ့ၣ်ဖး စီၤအဃၤစယၤ ဒီးအဝဲသ့ၣ် ဆှၢအီၤလၢ တၢ်ဟးဂီၤ အဃိ အဝဲမၤတၢ်လၢ ယဟိဝၤယွၤ ထံၣ်ဝဲလၢအအၢ ဒ်စီၤအၤဃာ် အဒူၣ်ဖိထၢဖိ မၤဝဲအသိးလီၤ. ၅ အဃိ စီၤအဃၤစယၤ မၤပိာ်ထွဲဝဲဒ် အဝဲသ့ၣ် ဟ့ၣ်ကူၣ်ဟ့ၣ်ဖးအီၤ ဒီးလဲၤဃုာ်ဒီး အံၣ်စရ့လး အစီၤပၤအၤဃာ် အဖိခွါ စီၤယဟိရၣ် ဒီးလဲၤဒုးတၢ်ဒီး ကီၢ်စူၤရံ အစီၤပၤဃစ့လး+ လၢဝ့ၢ်ရၤမိးကံးလဧးလီၤ.+ ဖဲန့ၣ် ပှၤခးပျၢ်ဖိတဖၣ် မၤဘၣ်ဒိ စီၤယဟိရၣ်လီၤ. ၆ မ့ၢ်လီၤ, ဖဲစီၤပၤယဟိရၣ် လဲၤဒုး ကီၢ်စူၤရံ+ အစီၤပၤဃစ့လးအခါ အဝဲသ့ၣ် မၤဘၣ်ဒိအီၤဖဲ ဝ့ၢ်ရၤမါ* အဃိ အဝဲက့ၤလၢ ဝ့ၢ်ယံးစရ့လး+ ဒ်သိး အတၢ်ပူၤလီၢ်တဖၣ် ကဘျါက့ၤ အဂီၢ်လီၤ.
ဒီးယူဒၤဘီမုၢ် အစီၤပၤယဟိရၣ်+ အဖိခွါ စီၤအဃၤစယၤန့ၣ် လဲၤလီၤထံၣ်လိာ်သးဒီး စီၤအၤဃာ်အဖိခွါ စီၤယဟိရၣ်လၢ+ ဝ့ၢ်ယံးစရ့လးအပူၤ, မ့ၢ်လၢ အဝဲဘၣ်ဒိ* အဃိလီၤ.+ ၇ ဘၣ်ဆၣ် ဖဲစီၤအဃၤစယၤ လဲၤလၢ စီၤယဟိရၣ် အအိၣ်အခါ ကစၢ်ယွၤ ရဲၣ်ကျဲၤဝဲ ဒ်သိး စီၤအဃၤစယၤ ကတုၤလၢ တၢ်ဟးဂီၤအဂီၢ်လီၤ. အဃိ ဖဲစီၤအဃၤစယၤ လဲၤတုၤဝဲဖဲန့ၣ်အခါ အဝဲလဲၤပိာ်ထီၣ် စီၤယဟိရၣ်အခံ ဒ်သိး ကလဲၤထံၣ်လိာ်သးဒီး စီၤနံၣ်ၡံ အလံၤခွါ* စီၤယ့ၤဟူလီၤ.+ ဒီးစီၤယ့ၤဟူန့ၣ် မ့ၢ်ပှၤတဂၤလၢ ယဟိဝၤယွၤ ဒိးဖှူအီၤဒ်သိး အကမၤဟးဂီၤကွံာ် စီၤအၤဃာ် အဒူၣ်ဖိထၢဖိ အဂီၢ်လီၤ.+ ၈ ဖဲစီၤယ့ၤဟူ ဟးလူၤမၤသံကွံာ် စီၤအၤဃာ် အဒူၣ်ဖိထၢဖိတဖၣ် ဒ်ကစၢ်ယွၤ အတၢ်စံၣ်ညီၣ် အိၣ်ဝဲအသိးအခါ အဝဲထံၣ်ဝဲ ယူဒၤအပဒိၣ်ဖးဒိၣ်တဖၣ် ဒီးစီၤအဃၤစယၤ အခ့အပှၤတဖၣ် လၢအမ့ၢ် စီၤအဃၤစယၤ အဖိဒိၣ်ခွါတဖၣ်လီၤ. ဒီးစီၤယ့ၤဟူ မၤသံကွံာ် အဝဲသ့ၣ်လီၤ.+ ၉ လၢခံအဝဲမၢ ပှၤလဲၤဃု စီၤအဃၤစယၤ ဒီးပှၤလဲၤဖီၣ်န့ၢ်အီၤလၢ အအိၣ်ခူသူၣ်ဝဲအလီၢ် ဖဲဝ့ၢ်ၡၤမရံလီၤ. ဒီးပှၤဟဲကိးအီၤလၢ စီၤယ့ၤဟူ အအိၣ် ဒီးမၤသံအီၤလီၤ. ဒီးအဝဲသ့ၣ် တဲဝဲလၢ “အဝဲမ့ၢ် စီၤယဟိၤၡၤဖး လၢအဃု ယဟိဝၤယွၤလၢ အသးဒီဖျၢၣ်န့ၣ် အလံၤခွါလီၤ.”+ အဃိ အဝဲသ့ၣ် ခူၣ်လီၤကွံာ်အီၤလီၤ.+ ဒီးလၢစီၤအဃၤစယၤ အဒူၣ်ဖိထၢဖိ အကျါန့ၣ် ပှၤလၢအအိၣ်ဒီး တၢ်စိတၢ်ကမီၤလၢ အကပၢဘီမုၢ်န့ၣ် တအိၣ်နီတဂၤဘၣ်.
၁၀ ဖဲစီၤအဃၤစယၤ အမိၢ် နီၢ်ဧသၤလယၤ+ သ့ၣ်ညါဝဲလၢ အဖိခွါ သံလံအခါ အဝဲမၤဟးဂီၤကွံာ် ယူဒၤ အဒူၣ်ဖိထၢဖိ အစီၤပၤအစၢၤအသွဲၣ် ခဲလၢာ်လီၤ.+ ၁၁ ဘၣ်ဆၣ် စီၤပၤအဖိမုၣ် နီၢ်ယဟိၤၡ့ဘၤန့ၣ် မၤပူၤဖျဲး စီၤအဃၤစယၤ အဖိခွါ စီၤယိၤအၣ်+ လၢစီၤပၤအဖိခွါတဖၣ်လၢ အဘၣ်တၢ်မၤသံ အဝဲသ့ၣ် အကျါလီၤ. ဒီးနီၢ်ယဟိၤၡ့ဘၤ ပာ်အီၤဒီး ပိာ်မုၣ်လၢ အဒုးအီအီၤနုၢ်တဂၤ လၢဒၢးတဖျၢၣ်လၢ ဟံၣ်လီၢ်ခံလီၤ. နီၢ်ယဟိၤၡ့ဘၤ လၢအမ့ၢ် စီၤပၤယဟိရၣ်+ အဖိမုၣ်န့ၣ် (အဝဲမ့ၢ်ဝဲ စီၤအဃၤစယၤ အဒီပုၢ်ဝဲၢ်မုၣ် ဒီးအဝၤမ့ၢ်ဝဲ ပှၤလုၢ်တၢ်ဒိၣ် စီၤယဟိၤယဒါ)+ ပာ်ခူၣ်သူၣ် စီၤယိၤအၣ် ဒ်သိး နီၢ်ဧသၤလယၤ သုတမၤသံအီၤ တဂ့ၤလီၤ.+ ၁၂ ဖဲနီၢ်ဧသၤလယၤ ပၢဝဲကီၢ်အခါ စီၤယိၤအၣ် အိၣ်ဒီးပှၤသ့ၣ်တဖၣ်န့ၣ် ဃုနံၣ် ဒီးအိၣ်ခူသူၣ်ဝဲလၢ ယွၤလၢအမ့ၢ်အတီတဂၤ အဟံၣ်လီၤ.